Yɩ-y ned sẽn mi koɛɛg taasgo!
1 Sẽn na yɩl n tõog n pids tʋʋmd ning b sẽn kõ-do, sẽn yaa tɩ d moon la d maan karen-biisã, rɩlla d taas nebã koeese. (Mat. 24:14; 28:19, 20) Baa yaa ned ne a zo-rãmb mengã, tõe n yaa toog t’a bãng n taas-b koɛɛga. Bõe n tõe n sõng tõnd tɩ d taas neb d sẽn ka mi koe-noogã?
2 Sõng-y nedã t’a ges-y wala a zoa, la ka wala sãan ye: Ning-y y mengã neb nins yãmb sẽn segd koe-moonegã wakatã zĩigẽ. Rũndã dũniyã sẽn yaa to-to wã kɩtame tɩ neb wʋsg be bʋʋm b sẽn yaa gũus-m-meng rãmb ne sãambã, bɩ b zoet-bã menga. Woto yaa bũmb sẽn tõe n gɩdg yẽsgo. Nand tɩ y reng n sɩng ne nedã goamã, wãn-wãn la y na n tõog rabeem ning sẽn tar-y nebã taoorã? Nand tɩ d yeel tɩ bũmbã menga, tõnd mengã manesmã sẽn zemsã taasda koɛɛga. Tõnd sã n maneg d futã sõma tɩ be burkĩndi, sõngdame n yiis rabeemã.—1 Tɩm. 2:9, 10.
3 Bũmb a to sẽn na n tõog n sõng koɛɛg taasgã pʋgẽ wã, yaa d sẽn na n tar zood manesem. Rẽ tõe n sõngame tɩ neb a taabã ra maan rabeem, la kɩt tɩ b tʋlg n kelge. Zĩ-kãngã wɛɛngẽ, seglg sẽn yaa sõma yaa tɩlae. D sã n mi d yamẽ vẽeneg d sẽn na n yeel a soabã bũmb ningã, d rabeemã boogda wʋsgo. Tõnd laafɩ manesem kãng leb n tõe n kɩtame tɩ tõnd koɛɛgã zĩnd yamleoog ne neb a taabã. Pag a yembr yeela woto Kaset soab a yembr sẽn wa a nengẽ wɛɛngẽ: “A noorã sẽn be laadã sẽn da tẽegd maam bũmb ning yaa t’a ra yaa ned yam sẽn gãe bãane. Rẽ ra yaa bũmb sẽn wa ne sʋgsg m yamẽ wã.” Woto paka sor tɩ pagã kelg koe-noogã.
4 Zʋg-sõma sẽn na n kɩt t’a soabã tʋlg n kelge: D segdame n wilg ne d sũur fãa tɩ neb a taabã yell pak-d lame. (Fil. 2:4) Manesem a yembr d sẽn tõe n tũnug ne n maan dẽ yaa d sẽn na n basdẽ tɩ kɛlgdba togsd b tagsgo. Sɩd-sɩda, yẽsg yaa kelg taaba. Tõnd sã n kos nebã tɩ b togs b sẽn tagsd la d kelg-b sõma, b na n bãngame tɩ d tagsda b yelle. Dẽ sẽn kelgd-b yãmbã sã n gomda, bɩ y ra yãgd n dat n bao sor n leb yãmb sẽn da segl goam ninsã zug ye. Y sã n tõe n pẽg-b ne pʋ-peelem fãa, bɩ y maan dẽ la y mak n zems yãmb sẽn seglã ne b rãmbã sẽn yeelã. Sã n mikame tɩ b goama vẽnega yell sẽn pak-b wʋsgo, bɩ y maneg y sõasgã sẽn na yɩl tɩ tik yel-kãng zugu.
5 Maan-tɩ-zems la sik-m-meng kɩtdame tɩ yẽsg yaa nana. (Yel. 11:2; Tʋʋ. 20:19) Neba ra nonga a Zezi zĩiga, bala a ra yaa ‘sũ-mar soaba la a yaa nin-nana.’ (Mat. 11:29) Sẽn yaa lebend ne rẽ, ned ka nong tɩta-ned zĩigẽ ye. Dẽ, baa d sẽn kɩs sɩd vẽeneg tɩ d tara sɩdã, ne yam, d na n gũusame n da wa gomd ne manesem sẽn pa vigsd ye.
6 La yaa wãn to ne a soabã sẽn na n togsd tagsa sẽn kɩɩsd Biiblã zãmsgo? Yaa tɩlae tɩ d rems a soabã bɩ? N-ye, d na n wa baas n demsa a tagsa wã, la ka tɩlae tɩ d maan dẽ d pipi kẽngrã ye. Naoor wʋsgo, nong n yaa sõma n yɩɩd tɩ d tik sõasgã bũmb ningã tõnd ne d kɛlgdã sẽn naag taab n sakã zugu. Rẽ poore d tõe n sõsa ne-a Biiblã zãmsg nins a sẽn ges tɩ b sakr yaa toog n yɩɩdã zugu. Rẽ baooda maag-m-meng la gom ne gũusgu. Zĩ-kãng wɛɛngẽ a Poll kõo mak-sõngo, a sẽn da wa n kõt Areopaazã bʋ-kaoodb kasetã.—Tʋʋ. 17:18, 22-31.
7 Sẽn yɩɩd fãa, nonglem hakɩk na n sõnga tõnd tɩ d yɩ neb sẽn tõe n taas neb a taab koɛɛg sõma. Wala a Zezi, d tog n zoee neb nins ‘sũy sẽn sãam tɩ b pãng fãa sɛ’ wã nimbãanega. (Mat. 9:36) Rẽ tusda tõnd tɩ d taas nin-kãensã koe-noogã la d sõng-b tɩ b sɩng kẽnd sor ning sẽn tar n debd vɩɩm zĩigẽ wã zugu. Tõnd koɛɛgã yaa nonglem koɛɛga, bɩ d ket n togsd-a ne nonglem. D sã n maand woto, d rɩkda togs-n-taar ne Wẽnnaam a Zeova la ne a Zezi Kirist, sẽn yaa b rãmb nins sẽn mi koɛɛg taasg n yɩɩd ãndũniyã fãa pʋgẽ wã.