D wilg tɩ nebã yell pak-d lame, n segend d mens sõma
1 D sã n segl d koe-moonegã sõma, sõngd-d lame tɩ d tõog n wilg nebã tɩ b yell pak-d lame. Wãn to la rẽ tõe n sõng-do? D sã n segla d meng sõma, d sã n wa sõsd ne neda, d kelgda a soabã neer n pa tagsd d sẽn na n sõs ne-a to-to wã zug tɩ loog ye. Sẽn paase, sõngd-d lame tɩ d tõogd d rabeemã la kɩtdẽ tɩ d tõe n gom ne d sũur fãa. La wãn-wãn la d tõe n segl sõsg sẽn yaa sõma.
2 Sõss sẽn zems ne kɛlgdbã: D tõe n yãka sõsg Rĩungã Tʋʋmd seb-paasdmã (seb-neng a 5-8) pʋgẽ sẽn zems ne d moonegã zĩig nebã n mak d sẽn tõe n lebs n dɩk-a ne d meng goam to-to n sõs ne nebã tɩ zemse. Wala makre, d sã n nong n segda tũudum a ye neb wall buud a ye neba, d tõe n bao n bãnga bũmb ning sẽn tõe n yɩ-b noogo. D sã n toeemd d sõssã tɩ zemsd ne d kɛlgdbã, wilgdame tɩ b yell sɩd pak-d lame.—1 Kor. 9:22.
3 D sã n yãk sõsg n tũudẽ bɩ d toeemd-a n paasdẽ. Sẽn mik tɩ d sɩngr-goamã tara yõodã, d segd n gũusd n geta nebã manesem sẽn yaa to-to d sõsgã sɩngrẽ. Wala makre, bũmb ning yell d sẽn gomdã noom-b lame bɩ? B leokda d sogsgã bɩ? Sã n pa woto bɩ d toeemdẽ hal tɩ wa zemse.
4 D sẽn tõe n maan n da yĩmi: Koe-moondb wʋsg yãame tɩ b sã n ta zak noore, yaa toog ne-b tɩ b tẽeg b sẽn da segl b mens n na n sõs to-to wã. A buud zoe n paama yãmb bɩ? Sã n yaa woto, nand tɩ y yi koe-moonegã bɩ y bao ned n mak y sẽn na n sõs to-to wã ne a soabã n gese. Rẽ tõe n sõng-y lame tɩ y ra yĩm y goamã la y tõog n togs-b nana-nana tɩ zemse. Leb n tõe n sõng-y lame tɩ y bãng y sẽn na n maan to-to y kɛlgdbã manesem toɛy-toɛyã taoore.
5 Bũmb a to sẽn tõe n sõng-d tɩ d ra yĩm d sẽn segl to-to wã yaa d sẽn na n kʋms d goamã seb-bil zug tɩ d sã n wa kolg zak bɩ d yiis n gese. Koe-moondb kẽer yãame tɩ woto sõngd-b lame tɩ b tõe n sõs ne nebã ne bas-m-yam. D sã n segend d mens sõma woto, tõe n sõng-d lame tɩ d wilg tɩ nebã yell pak-d lame, la leb n na n paasa d koe-noogã mooneg sõmblem.