D kãab nebã zʋrno rãmbã sẽn kɩt sɩdã kasetã
1. Gũusg Gasgã la Réveillez-vous ! wã yõod yaa bõe?
1 Gũusg Gasgã ne Réveillez-vous ! wã sẽn yaa a tũud-n-taagã ket n yaa sɛb sẽn sõngd tõnd wʋsg Rĩungã koɛɛg mooneg la karen-biisã maaneg pʋgẽ n yɩɩda. (Mat. 24:14; 28:19, 20) Yaa ne sũ-noog la tõnd wilgd nebã seb-kãensã b yiibã d koe-moonegã nens fãa pʋsẽ.
2. Toeen-bʋs la b maan Gũusg Gasgã la Réveillez-vous ! wã pʋgẽ, la yaa bõe yĩnga?
2 B sẽn sɩng seb-kãensã yiisgã tɛk n tãag masã, tõnd yãa b sẽn toeem bũmb nins sẽn be a pʋgẽ wã, la gom nins d sẽn na n togs n kãab-a nebã. Toeengã fãa yaa sẽn na yɩl tɩ sebrã tall yamleoog n paase, la kɩt tɩ Rĩungã koɛɛg ta ‘nebã buud fãa, tɩ b tõog n paam fãagre, la b bãng sɩdã.’—1 Tɩm. 2:4.
3. Wãn to la d na n tʋm ne zʋrno rãmbã koɛɛgã mooneg sasa?
3 Sẽn sɩng ne yʋʋmd 2006 yʋʋm-vẽkr kiuugã, tõnd tũnugda ne sɩngr goam toor-toor n wilgd nebã kiuugã pʋgẽ Réveillez-vous ! wã. Masã d na n maana woto me ne Gũusg Gasgã, bala a ye la d tar kiuug fãa masã (ne farendã) n wilgd nebã. B wilgda d sẽn tõe n kãab sebr fãa nebã to-to, Rĩungã Tʋʋmd poor zugu. Mak-kãensã tikda sebrã pʋgẽ sɩngrẽ sõssã zugu, la wakat ninga a tikda sõsg ning sẽn noom neb wʋsg n yɩɩdã zugu. D sã n wa bãng sebrã sẽn gomd bũmb ning yellã sõma, d na n tõogame n tik sagls nins b sẽn kõ wã zugu, n togs ne d meng goam tɩ zems ne d moonegã zĩigẽ nebã.
4. Bõe yĩng tɩ tõe n yɩ sõma tɩ d bas makr nins sẽn be Rĩungã Tʋʋmd zugã la d wilg sɛbã ne d mens goama?
4 Baa ne Rĩungã Tʋʋmd sẽn kõt sagls a yiib sebr fãa yĩngã, y tõeeme n bas rẽ fãa la y togs wa y sẽn date. B sẽn yet tɩ d maan woto wã, yaa tɩ sõsg ning tõe n zemsa ne yãmb moonegã zĩigẽ nebã n yɩɩd sõsg ning yell b sẽn gomd makrã pʋgẽ wã. Bʋʋm a to me yaa tɩ yãmb mengã tõe n gesame tɩ sõsg ning n noom yãmb n yɩɩda tɩ y tõe n tik rẽ n segl sɩngr goam sẽn yaa sõma.
5. Nand tɩ d segl d sẽn na n wilg zʋrnall to-to, bõe la d segd n deng n maane?
5 D sẽn na n segl d mens goam to-to: Pipi, d segd n deng n bãnga sõsg ning d sẽn dat n tik n sõsã sõma. Tõe tɩ pa wakat fãa la d na n tõog n deng n karem sebr fãa n bãng a sẽn yet bũmb ningã sõma la d yaool n kãab-a nebã ye. D segd n wilga nebã sõss nins d sẽn yãka ne sũ-noogo, ne pʋ-peelem, la ne yẽesem. La sẽn na yɩl n tõog n maan woto, rɩlla d bãng bũmb ning d sẽn dat n wilgã sõma.
6. Wãn to la d tõe n segl d meng sɩngr goama?
6 Sẽn paase, d segd n toeemda goam nins d sẽn segl n dat n togsã. D tõe n tika sebrã sõsg zugu n maan sokr n sɩng sõsg ne nebã. D tik Wẽnnaam Gomdã sẽn tar pãngã zug wakat fãa, tɩ rẽ n tõe n kɩt tɩ d goamã kẽ nebã sũyã. (Heb. 4:12) D karem verse sẽn zemsd ne bũmb ning yell d sẽn dat n gomã. La yɩta sõma tɩ d ges sõsg ning d sẽn dat n tik n sõsã pʋgẽ n yãk verse wã. D segd n deng n tagsa d sẽn na n wɛgs verse wã tɩ zems ne sebrã pʋgẽ sõsgã to-to.
7. Wãn to la d tõe n maneg d sẽn kãabd zʋrno rãmbã to-to wã tɩ yɩ sõma n paase?
7 Sẽn yaa zĩig ning la wakat ning fãa: Sẽn na yɩl n tõog n kãab nebã sɛbã tɩ yɩ sõma, d segd n tʋma ne goam nins d sẽn seglã. D naag d tigingã sibrã daar n pʋɩ zʋrno rãmbã. D tõe n kõo zʋrno rãmbã neb nins sẽn da sak n deeg sɛb a taab pĩndã. Wakat fãa, d segd n kõo d Biibl karen-biisã la neb nins d sẽn mikd neb nins d sẽn lebgd n tʋgd n getẽ wã nengẽ wã. D kãab nebã zʋrno rãmbã, d sã n rebd raaga, d sã n wa togd sore, bɩ d sã n wa zĩ n gũud logtore. Kiuugã fãa pʋgẽ, d modg n maneg d sẽn kãabd zʋrno rãmbã to-to wã tɩ yɩ sõma n paase.
8. Bõe n kɩt tɩ Gũusg Gasgã la Réveillez-vous ! wã pa wa sɛb a taabã?
8 Gũusg Gasgã ne Réveillez-vous ! wã yaa sɛb sẽn pa wõnd sɛb a taabã. B pẽgda a Zeova a sẽn yaa yĩngr la tẽng Naab sẽn ka to wã yĩnga. (Tʋʋ. 4:24) B tũnugda ne Wẽnnaam Rĩungã koe-noog n belsd nebã, la b sagend-b tɩ b tẽ a Zezi Kirist. (Mat. 24:14; Tʋʋ. 10:43) Sẽn paase, b gũusd n geta dũniyã yɛl sẽn pidsd Biiblã sẽn pĩnd n togsã, n wilgd b võore. (Mat. 25:13) D segl d mens sõma tɩ d sẽn paam sor fãa bɩ d kãab nebã zʋrno rãmbã, sẽn na yɩl n sõng-b tɩ b rɩ a nafa.
9. Bõe la d tõe n maan tɩ nebã sak tɩ d lebg n wa sõs ne-b n paase?
9 Y sã n paam tɩ ned sak n deeg zʋrnalle, walla y sã n paam n sõs ne ned bilf Biiblã zugu, bɩ y sok a soabã sokre, pa rẽ bɩ y gom gomd sẽn tõe n kɩt t’a sak tɩ y lebg n wa sõs n paase. Tõnd sã n moond koɛɛgã ne yẽesem, bɩ d kɩs sɩd t’a Zeova na n paka neb nins sẽn sɩd rat n bãng-a la b maan a raabã sũyã.—1 Kor. 3:6.