Tʋm-y ne zʋrno rãmbã y koe-moonegã pʋgẽ wʋsgo
1, 2. Wãn to la Gũusg Gasgã la Réveillez-vous ! wã toeem neb vɩɩm?
1 “Yaa sɛb sẽn be yamleoogo, sẽn kengd raoodo, la sẽn gomd yɛl sẽn sɩd be yelle.” “Mam da nan zɩ n karem zʋrno rãmb sẽn kengd raood wala bãmbã ye.” Gom-kãensã wilgda nebã sẽn tar tagsg ning Gũusg Gasgã la Réveillez-vous ! wã wɛɛngẽ dũniyã gill zugã sõma. Sɩd me, tõnd sɛbã yaa tʋʋm-teed sẽn tar yõod wʋsg koe-noogã taasg ‘nebã buud fãa’ wã wɛɛngẽ.—1 Tɩm. 2:4.
2 Omdafɛɛr a yembr da karma Réveillez-vous ! a ye gom-zug sẽn yɩ-a noogo. Rẽ zugẽ, a karma Gũusg Gasgã b sẽn da kõ-a n paasã. Seb-kãng talla sõsg sẽn tus-a t’a vaees Tãablmã a sẽn da sɩng n tẽedã. Rẽ kɩtame t’a tʋlg n na n bao n bãng n paase. Kiuug a yoob zugẽ, a reega lisgu. Rao a ye n da reegd zʋrno rãmbã wakat fãa la a ra zɩ n karem-b ye. A pagã yẽ ra ginda a Zeova Kaset rãmbã, la a ra karemda zʋrno rãmbã b sẽn kõt a sɩdã. A sũur yɩɩ noog a sẽn yã tɩ Biiblã kãabame tɩ tẽngã na n lebga arzãn n pid ne nin-tɩrsã. Yẽ ne a biribl la a yao-bipugl wa n lebga a Zeova sõgen dãmba.
3. Bõe yĩng tɩ tar yõod tɩ d lagemd d zʋrno rãmbã buud toor-toor n wilgdẽ?
3 Lagm-y b yiibã fãa n kãabe: Wala makr nins sẽn loogã sẽn wilgã, d pa tõe n bãng ned ninga sẽn na n karem tõnd zʋrno rãmbã bɩ bũmb ning sẽn na n kɩt tɩ b tʋlg n bãng n paasã ye. (Koɛ. 11:6) Rẽ n so tɩ yaa sõma tɩ d lagem Gũusg Gasgã ne Réveillez-vous ! wã fãa n kãabe, baa sã n yɩɩ zʋrnall a yembr bal zug la d gom-yã. Zĩis kẽere, tõe tɩ na n yɩɩ sõma tɩ d wilg d sɛbã buud toor-toore.
4. Wãn-wãn la d tõe n sigl zʋrno rãmbã pʋɩɩbo?
4 Tara yõod tɩ d yãk daar semenã pʋgẽ n naagd n pʋɩt zʋrno rãmbã. A Zeova Kaset rãmbã yʋʋmd 2005 kalãndirie wã zugu, b yãka sibr fãa tɩ yaa “zʋrno rãmbã pʋɩɩb raare.” La sẽn mik tɩ zĩigã la nebã yɛl pa taabã, kẽer tõe n yãka raar a to semenã pʋgẽ sẽn na yɩl n kãabd zʋrno rãmbã. Rẽ yĩnga y yãkã raar n pʋɩt zʋrno rãmbã bɩ?
5. Segb-bʋs sẽn na yɩl n kãab zʋrno rãmbã la d segd n bao, la bõe n tõe n sõng-d tɩ maan dẽ?
5 Yãk-y y toorẽ bõn-datla: Ned kam fãa sã n yãk zʋrno rãmb sõor a sẽn na n pʋɩt kiuug fãa, tõe n sõng-d lame tɩ d tõog n kẽes d meng zʋrno rãmbã pʋɩɩb pʋgẽ sõmb-sõmbo. Yãmb tara zʋrno rãmb pʋɩɩb sor bɩ? Y kãabda zʋrno rãmbã neb nins y sẽn segd koe-moonegã wakatã bɩ? Rẽ yĩnga y tõe n kãaba nebã zʋrno rãmbã y sã n moond sorã zugu, raasẽ wã la zĩig ning fãa zãma wã sẽn beẽ wã bɩ? Yãmb sã n wa be kẽnd zug bɩ y rigda raag wall tʋʋmã, y zɩta zʋrno rãmb bɩ? Tũnug-y ne segb fãa y sẽn paam n sõng nebã tɩ b rɩ Gũusg Gasgã la Réveillez-vous ! wã yõodo.
6. Wãn to la d tõe n tʋm ne zʋrno kʋdã tɩ yɩ sõmã?
6 D segd n kãabda zʋrno kʋdã me. Baa d sã n pa tõog n taas nebã zʋrno rãmbã b yiibã kiuug bɩ kiis a yiib poore, kibar ning sẽn be b pʋsẽ wã ket n tara yõodo. Kãab-y-b neb nins sẽn dat-bã. Ne neb wʋsgo, Gũusg Gasgã la Réveillez-vous ! wã yɩɩ wa ‘goam b sẽn togs a wakate.’ (Yel. 25:11) D tall-b n sõng neb milyõ rãmb n paas tɩ b bãng a Zeova la b sõgen-a.