D sẽn na n segl d mens to-to n kãab nebã zʋrno rãmbã
1. Bõe yĩng tɩ tar yõod tɩ d kãab nebã zʋrno rãmbã ne d toorẽ goam la d ra rɩk goam nins sẽn be Rĩungã Tʋʋmd sebrẽ wã bala?
1 Sẽn mik tɩ zʋrno rãmbã kãabg bugs n zoe n be Rĩungã Tʋʋmd sebrẽ wã, d tõe n yetame tɩ pa tar yõod tɩ d leb n segl d sẽn na n kãab-b to-to wã ye. Baa neb wʋsg sẽn mik tɩ kãabg bugs kãens yaa sõma wã, segdame tɩ d kell n segle. Zʋrno rãmbã kãabg bugs nins b sẽn wilg be wã tõe n zemsa ne zĩig ning neba, n yaool n pa zems ne zĩig a to rãmb ye. Woto yĩnga, pa tɩlae tɩ d rɩk gom-kãens takɩ ye. Baa d sã n dat n tũ-b wa b sẽn wilg to-to wã, segd n yɩɩ ne d toorẽ goamã.
2. Sẽn na yɩl n bãng n yãk sõsg ning d sẽn na n kãabã, bõe la d segd n maane?
2 Yãk-y sõsga: D segd n deng n karma sebrã n yãk sõsg sẽn zems ne d moonegã zĩig nebã, la sẽn yɩ tõnd mengã noogo. D sã n kɩs sɩd tɩ sõsgã noomame, d na n kãab-a-la ne yẽesem tɩ kɩt tɩ d kɛlgdã tʋlg n karem-a. D segd n kãaba nebã sõsg sẽn na n tall yamleoog wʋsg ne-ba, la d segd n bãnga sõss a taab me sẽn be sebrã pʋgẽ. Rẽ na n sõng-d lame tɩ d sã n wa sɛg ned sẽn dat sõsg a to bɩ d tõog n bãng d sẽn na n kãab-a to-to.
3. Wãn to la d tõe n sɩng zʋrno rãmbã kãabg tɩ yɩ sõma?
3 Maan-y sokre: Sẽn pʋgde, d segl d sɩngr goamã sõma, bala b tara yõod wʋsgo. D tõe n sɩnga ne sokr sẽn kɩtd tɩ d kɛlgdã tagse, sẽn na yɩl tɩ sõsg ning d sẽn yãkã tall yamleoog ne-a. Sogsg nins sẽn kɩtd tɩ kɛlgdã togs a tagsgã yaa sõma n yɩɩda. D gũus n da sok kɛlgdã sokr sẽn tõe n ning-a yãnde, wall kɩt t’a rat n wẽ no-koeemd ye.
4. D sã n paam n karem verse tɩ d kɛlgdã kelge, rẽ yõod yaa bõe?
4 Karm-y verse: Sẽn na n baase, d segd n yãka verse tɩ d kɛlgd sã n wa kõ-d sor bɩ d karm-a. Verse kãng tõe n yii sõsg ning d sẽn na n kãabã pʋgẽ. D sã n karem verse wã, a na n bãngame tɩ d koɛɛgã yita Wẽnnaam Gomdã pʋgẽ. (1 Tes. 2:13) Baa a sã n pa reeg zʋrnalle, verse ning d sẽn karmã na n kõ-a-la kasetã. Sẽn na yɩl tɩ ned sak n kelge, koe-moondb kẽer karemda verse la b yaool n sok sokr takɩ. D sã n dat n sɩng ne verse karengo, d tõe n yeela woto: “M da nong n bãngẽ-la yãmb tagsg Biiblã verse kãngã zugu.” Rẽ poore, d togsda kɛlgdã bũmb ning sẽn be sebrã pʋgẽ wã n gom a yell bilf t’a yamleoog kẽ-a sõma, n yaool n kãab-a sebrã.
5. D sã n wa segend n na n kãab nebã zʋrno rãmbã, sagl-bʋs la d segd n ning d yamẽ?
5 Noy takɩ b sẽn kõ tɩ d segd n tũ n kãab nebã zʋrno rãmbã kae ye. Naoor wʋsgo, d sã n gomd koɛɛg-koɛɛg tɩ d kɛlgdã wʋmd d goamã võore, yaa sõma. D tũnug ne goam sẽn yaa nana ne-do, la sẽn kɩtd tɩ nebã kelgd-d sõma. D segd n ninga d yamẽ tɩ sebrã tara yõod wʋsg n kãab-a ne yẽesem. D sã n segl d mens sõma, d na n tõog n kãaba ‘neb nins fãa sẽn dat vɩɩm sẽn-kõn-sa wã’Gũusg Gasgã ne Réveillez-vous! wã tɩ b sak n deeg-ba.—Tʋʋma 13:48, NW.