Yãmb moonda koe-noogã neer bɩ?
1 B yeela tõnd Tʋʋma sebrã pʋgẽ t’a Zezi yeela a karen-biisã tɩ b moon koe-noogã, ‘n kɩs neba kaset neere.’ (Tʋʋ. 2:40, NW; 8:25; 28:23) Sɩd-sɩda ra yaa tʋm-tʋmd a Poll bõn-datl la woto. (Tʋʋ. 20:24, NW ) Yãmb sẽn yaa koe-noogã moondã, ka yãmb me bõn-datl sɩda? Wãn-wãn la y tõe n pids-a?
2 Segl-y y sẽn na n wilg koɛɛgã to-to: Seglgã tara yõod wʋsg sẽn na yɩl n tõog n kõ kaset sõngo. Sẽn yɩɩda, d segd n segla sõma d sã n wa kãabd neb a taaba zʋrno rãmbã, bala gom-zugã toeemda wakat fãa. Ne Rĩungã Tʋʋmd kãngã, sõs-paalg la b ning tɩ be goabgã, sẽn na yɩl n sõng n segl-d sõma n paase. Zĩ-kang tara goam toɛy-toɛy d sẽn tõe n yeel n wilg yaoolem Gũusg Gasgã la Réveillez-vous! zʋrno rãmba. Zʋrnall fãa na n talla gom-zug sẽn zems ne wakatã, sẽn na n zĩnd yamleoog ne neb wʋsgo. Wãn to la y tõe n tũnug ne wilg-kãensã sẽn yaa koeesã?
3 Yãk-y wilgr ning y sẽn tagsd tɩ yaa sõma n yɩɩd ne yãmb moonegã zĩiga. Maag-y y meng n karem sõasgã, n gʋls tagsa takɩ y sẽn tagsd tɩ tõe n kɩtame tɩ neda tʋll n karm-a. Gẽes-y verse zʋrnallã pʋgẽ sẽn zems ne gom-zugã sẽn na yɩl n tõog n karm-a n wilg nedã. Sẽn na n baase, koɛɛg-koɛɛg bala togs-y gomd sẽn na n daool nedã t’a karem zʋrnallã, la y wilg t’a soabã tõe n kõo kũun n teel a Zeova Kaset rãmbã dũni gill tʋʋmde, tɩ gom-kãngã paasg sã n zemsame. Rẽ poore, bɩ y lebs n maan y wilgrã n minim.
4 Segl-y y tũnug ne Biiblã: Y sã n segl y meng sõma y na n tõog n paasa verse y koɛɛgã wilgr pʋgẽ. Wala makre, zĩis wʋsgo koe-moondb paamda bi-sõma, b sã n kẽng nedã nengẽ ne Biiblã b nugẽ, n pʋʋs-a la b yeele:
◼ “Tõnd sʋkda nebã n getẽ b sã n tẽeda . . . ” Karm-y Sɩngre 1:1, la y sʋk woto: “Yãmb saka gom-kãngã bɩ?” Nedã sã n sak tɩ yaa sɩd bɩ y yeele: “Mam me sakame tɩ yaa sɩda. La yãmb tagsdame tɩ sẽn yaa Wẽnnaam n naan bũmb fãa wã, yaa yẽ n kɩt tɩ wẽnemã beẽ me bɩ?” Sak-y-yã a soabã leokr la y karem Koɛɛg Soaba 7:29. Lak-y Bãngr sebrã seb-neng 71, la y karem sull a 2. Sagl-y nedã t’a karem sebrã. Nedã sã n ka sak Sɩngre 1:1 wã sẽn yeel bũmb ningã, bɩ y sagl-a t’a karem Création sebrã.
5 Lebgd-y n tʋgd n get neb nins sẽn wilg tɩ b nonga sɩdã: Y sã n ka lebgd n tʋgd n get neb nins sẽn wilg tɩ b nonga sɩdã yɩta toog tɩ y tõog n moon koe-noogã neere. Yãmb sõasg ne ned sã n yɩ noogo, y bas sebr tɩ y ka bas sebr me, bɩ y gʋls a soabã yʋʋr la adɛrse. Modg-y sõma n gʋʋl a soabã raab ne sɩdã, n lebg n kẽng a nengẽ tao-tao. Sẽn ya a soab fãa, kãab-y-yã-a Biibl zãmsgo.
6 Pipi yʋʋm kob-gĩndẽ kiris-nebã ra miimi t’a Zezi ra kõ-b-la noor tɩ b ‘kɩs kasetã’ neere. (Tʋʋ. 10:42) Rũndã me tõnd segd n tũu no-kãngã, bala yaa woto bal la d na n tõog n maan karen-biisi. (Mat. 28:19, 20) Bɩ d maan d sẽn tõe fãa n moon koe-noogã neere.—2 Tɩm. 4:5.