Y sẽn na n tall sɛbã kãabg goam nins b sẽn gʋlsã n tʋm to-to
1. Wãn to la d segd n ges sɛbã kãabg goam nins b sẽn gʋlsã?
1 Wakat fãa Rĩungã Tʋʋmd tara tõnd zʋrno rãmbã la sɛb a taab kãabg goam sẽn gʋls b pʋsẽ. D sã n wa moond koe-noogã, ka tɩlae tɩ d lebs n dɩk gom-kãensã n yeel wala sẽn gʋlsã takɩ ye. B sẽn gʋls bũmb ningã yaa wala tags-zu-raad d sẽn tõe n tik b zut n sõs ne neb a taabã. Naoor wʋsgo, d sã n togs tags-kãens ne d meng no-goamã, womda bi-sõma n yɩɩda. D sã n gomd wala d sẽn minim n gomd raasenkamã, kɩtdame tɩ d sõsd-n-taagã tall bas-m-yam, la leb n wilgdẽ me tɩ d gomda ne pʋ-peelem la tɩ d kɩsa sɩd ne d sẽn yetã.—2 Kor. 2:17; 1 Tes. 1:5.
2. Bõe yĩng tɩ d sã n wa segend d koɛɛgã taasg goam bɩ d segd n gũus n da kɩɩs babgã neb minungu?
2 Maneg-y goamã tɩ zems ne y sõsd-n-taagã raabo: Tẽngã neb minung sẽn yaa to-to wã tara pãn-tusdg tõnd sẽn taasd nebã koe-noogã to-to wã zugu. Rẽ yĩnga y pa tõe n pʋʋs nedã tɩ rẽ poor bɩ y kell n tũnug ne rẽ n taas-a koɛɛgã sɩda? Bɩ yãmb babgẽ wã neba ratame tɩ y togs y waoongã võor tɩ pa be kẽe ka yii ka? Yɛlã pa taab zĩig fãa la ne ned fãa ye. D sã n maand nebã sogsgo, d segd n deng n tagsa sõma me. Sogsg nins tõe n zemsa zĩis kẽere, tɩ zĩis a taabã bɩ nebã ka nong sogs-kãens buudã ye. Woto yĩnga d tog n tagsame tɩ bɩ sõma, la d maneg d koɛɛgã taasg goam tɩ zems ne bũmb ning sẽn sakd tõnd babgẽ wã.
3. Bõe yĩng tɩ d ka segd n yĩm d sẽn sõsd ne neb ninsã tẽeb la b tagsgo?
3 Sẽn paase, d sã n wa segend n na n yi moonegã bɩ d ra yĩm tõnd moonegã zĩigẽ neb sẽn tẽed bũmb ning la b tagsd to-to wã ye. Wala makre, yaa vẽeneg tɩ yãmb sẽn na n sõs ne ned sẽn yaa katolik Matɩe 6:9, 10 zug to-to wã na n yɩɩ toor ne ned sẽn ka mi ‘tõnd Ba sẽn be arzãnã’ pʋʋsgã ye. D sã n deng n tags bilf bala, naoor wʋsgo d tõogdame n maneg d goamã tɩ tall yamleoog n yɩɩd ne neb nins tõnd sẽn segd koe-moonegã wakatã.—1 Kor. 9:20-23.
4. Bõe yĩng tɩ seglg sẽn yaa sõma yaa tɩlae?
4 Baa d sã n geend n na n tũnuga ne kãabg goam b sẽn zoe n gʋlse, d segd n segla sõma. D segd n maaga d yĩng n karem sõasg bɩ sak ning d sẽn dat n wilg a soabã n bao tagsa sẽn tõe n kɩt t’a tʋlg n bãng n paase. Rẽ poor bɩ d naag tags-kãens d koɛɛgã taasg pʋsẽ. Yaa tõnd sẽn na n mi kɩba-sõma nins sẽn be tõnd sɛbã pʋsẽ wã sõma bal la d na n tõog n kãab-b nebã ne yẽesem.
5. Bõe yĩng tɩ d tõe n segl koɛɛg taasg manesem a taaba, la wãn-wãn la d tõe n maan woto?
5 Koɛɛg taasg goam a taaba: Rẽ yĩnga yaa tɩlae tɩ yɩ sɛbã kãabg goam nins b sẽn gʋlsã bal la d na n tʋmd ne bɩ? Ayo. Yãmb sã n tõe n sɩnga sõasg nana n yɩɩd ne manesem a to bɩ ne verse a to, bɩ y maan boto. Sẽn yɩɩd fãa, d sã n wa kãabd zʋrno rãmbã bɩ d yɩ tao-tao n bao soay n wilg sõss sẽn be b pʋsẽ tɩ b pa gom b yell sebrã pipi seb-nengã zugu, tɩ yaool n tõe n tall yamleoog ne tõnd moonegã zĩigẽ neba. B sã n segd n maan koɛɛgã taasg mak-n-wilg tʋʋmdã tigsgẽ, b segd n maana segls n maan mak-n-wilg buud ning sẽn womd biis n yɩɩd tigingã mooneg zĩigẽ wã. Woto na n sõnga koe-moondba fãa tɩ b taas nebã koe-noogã tɩ wom biis sõmb-sõmbo.