D segl d mens tʋʋm-sõma buud fãa yĩnga
1 A Zezi rɩka sẽk n segl a karen-biisã tɩ b yaool n kẽng n tɩ moon koɛɛgã. (Mat. 10:5-14) Baa d fãa sẽn tar tʋʋm wʋsgã, d sã n dɩk minit a wãn n segl d mens la d yaool n sɩng koe-moonegã zak-zakã, na n kɩtame tɩ d moonegã wom biisi.—2 Kor. 9:6.
2 D sẽn na n segl d mens to-to: D sã n dat n segl d mens sõma d segd n deng n bao n bãnga sɛb nins d sẽn dat n kãab nebã sõma. D segd n tagsa neb nins sẽn be d moonegã zĩigẽ wã me yell neere. Yel-bʋs n pak-ba? B yaa tũudum bʋs neba, la b nong n tẽeda bõe? D tõe n gesa b sẽn wilg d sẽn tõe n kãab nebã sɛbã to-to tɩ be Rĩungã Tʋʋmd pʋgẽ la Comment raisonner à partir des Écritures sebrã pʋgẽ wã.
3 D sã n maag d yĩng n kelg mak-n-wilg nins b sẽn maand Tʋʋmdã tigisg sasa wã, na n sõng-d lame. D sã n wa tõe n kãab nebã sɛbã sõma, d pa na n ye rɩkd sẽk wʋsg n segend d meng ye. La daar fãa, nand tɩ d kẽng koɛɛgã moonego, d sã n tagsd d sẽn na n yeel bũmb ninga, la d manegd d sẽn na n kãab nebã sɛbã to-to wã, na n sõng-d lame tɩ d paamd minim n paasdẽ. D segd n gesa d sã n tara sɛb nins d sẽn dat n tall n moonã d korgã pʋgẽ.
4 Bõe n tõe n sõng-d tɩ d ra yĩm bũmb ning d sẽn na n yeel n kãab nebã sɛbã? D sã n zẽkd d koɛɛg n lebgd n togsd rẽ n yɩlemdẽ, na n kɩtame tɩ d da yĩm ye. Neb kẽer nong n maanda mak-n-wilgi, b zakã Biibl zãmsg sasa. Sãnda kʋmsda b goamã seb-bil zug tɩ b sã n wa kolg zak bɩ b yiis n gese.
5 Seglgã yõodo: D sã n segend d mens sõma, d moonegã minim la d sũ-noogã paasdame. Leb n na n sõng-d lame tɩ d sã n wa rat n moon ned bɩ d ra yɛɛsdẽ ye. D na n tõog n kelgda nebã sõma n da maand yɩɩr wʋsg ne d sẽn na n yeel bũmb ning ye. Sẽn paase, d sã n zoe n mi bũmb ning sẽn be d sɛbã pʋsẽ wã sõma, na n kɩtame tɩ d tall yẽesem wʋsg d sã n wa kãabd-ba.
6 Biiblã sagenda tõnd tɩ d segl d mens sõma sẽn na yɩl n “maan tʋʋm-sõma fãa.” (Tɩt 3:1) Tʋʋm-sõng ka be n yɩɩd koɛɛgã mooneg ye. D sã n segl d mens sõma, d wilgdame tɩ d waoogda d kɛlgdbã, la d waoogd a Zeova, bala yaa yẽ koɛɛg la d moonda.—Ezai 43:10.