D paas d koe-moonegã minim: D segend d sɩngr-goamã sõma

Bõe yĩng tɩ tar yõodo: Tõnd sɩngr-goamã sã n pa kẽ d kɛlgdã sũuri, a tõe n kʋʋga sõsgã tɩ d pa paam n taas-a koɛɛgã ye. Rẽ n so tɩ koe-moondb wʋsg getẽ tɩ yɩl tɩ b tõog n sõs ne neda, b sɩngr-goamã tara yõod wʋsgo. Yaa sɩd tɩ Rĩungã Tʋʋmd yaoolem nengã la Comment raisonner wã pʋgẽ, b wilgda d sẽn tõe n sɩng sõsg ne ned to-to. La yaa koɛɛg-koɛɛg bala, sẽn na yɩl tɩ koe-moond fãa bãng a sẽn na n paas gomd ning tɩ yɩ sõma. La baa sɩngr-goamã sã n gãnega zãng tɩ yaa sõma me, pa tɩlae tɩ koe-moondbã rɩk rẽ ne zug n tar n togsdẽ ye. B tõe n toeem-a lame. Rẽnd sẽn na yɩl tɩ d sɩngr-goamã yɩ sõma, togame tɩ d segendẽ, tɩ d sã n ta zak noor bɩ d bãng d sẽn na n sɩng to-to n paam n taas koɛɛgã.—Yel. 15:28.

Ad y sẽn tõe n maan dẽ to-to:

• Ges-y sebr ning y sẽn na n kãab kiuugã pʋgẽ wã, n yãk gom-zug sẽn na n yɩ koe-moonegã zĩig nebã noogo.

• Segl-y y sẽn na n sɩng sõsgã to-to wã sõma, tɩ y sã n pʋʋs kɛlgdã n sa, bɩ y sɩnge. Wala makre, y tõe n sɩnga woto: “M waame n na n . . . . ” Wall y yeele: “Neb wʋsg maanda yɩɩr . . . . ” Pa rẽ bɩ: “Yãmb tagsg yaa wãn ne . . . ?” Naoor wʋsgo, sɩngr-goam sẽn yaa koɛɛg la vẽeneg yaa sõma n yɩɩda. Koe-moondb kẽer dɩkda b sɩngr-goamã ne zugu.

• D sok kɛlgdã sokr sẽn na n kɩt t’a wilg a tagsgo. (Mat. 17:25) Tẽeg-y tɩ nand tɩ y wa a nengẽ, a tõe n da tagsda bũmb a to yelle. Rẽ wã, gũus-y n da wa sok-a sokr tɩ leokrã yaa toogo, wall yaa yãnd ne-a ye.

Mak-y woto ki-kãngã:

• Bao-y sẽk zak pʋgẽ Biibl zãmsgã sasa n segl y sɩngr-goamã sõma, la y mak y sẽn na n gom to-to wã n yɩlme.

• Y sã n wa yi koɛɛgã moonego, bɩ y togs koe-moondb a taab y sẽn segl bũmb ningã. (Yel. 27:17) Y sã n sɩng sõsg ne ned tɩ pa yãk nenga, y sã n ta zak a to noor bɩ y toeem y sẽn na n sɩng to-to wã.