D sẽn tõe n segl sõsg sɩngr goam to-to tɩ yɩ sõma
1. Bõe yĩng tɩ tar yõod tɩ d sɩngr goamã yɩ sõma?
1 Rɩɩb yũug sã n noome, kɩtdame tɩ f rat-a n dɩ. Woto me, sɩngr goam sẽn yaa sõma kɩtdame tɩ d paam n sõs ne ned Biiblã zugu. Sɩngr goam toor-toor tõe n yɩɩ sõma. La wa rɩ-noog seglg sẽn baood tɩ d reng n tags neerã, sɩngr goam sẽn yaa sõma me baoodame tɩ d reng n tags la d segl sõma. (Yel. 15:28) Bõe n kɩtd tɩ sõsg sɩngr goam yɩ sõma?
2. Wãn to la d tõe n segl sɩngr goam sẽn yaa sõma?
2 D gom bũmb sẽn noom nebã yelle: Tõnd sɩngr goamã sã n pa kẽ d kɛlgdã, a tõe n kʋʋga sõsgã. Woto wã, d sã n wa segend n na n yi koe-moonegã, bɩ d tags d moonegã zĩig nebã yelle. Yaa goosneema sẽn yaa sõma la b rat bɩ? Yaa paam tɩ b zagsã pʋsẽ zĩid-n-taarã tall bark n pak-b bɩ? Bɩ yaa zabã la b rat tɩ sa? Naoor wʋsgo, ned sã n kelg gomde, a mi n datame tɩ b kõ-a sor t’a togs a sẽn tagsde. Rẽ yĩnga, yɩta sõma tɩ d pĩnd n segl sokr sẽn na n kɩt tɩ d kɛlgdã togs a tagsgo. Rĩungã Tʋʋmd pʋgẽ, b wilgda d sẽn tõe n sɩng sõsg to-to ne nebã. Mak-y sagl-kãens tũubu. Y zak pʋgẽ zaabr Biibl zãmsgã sasa me, bɩ y mi n mak y sẽn tõe n sɩng sõsg ne ned to-to.
3. Wãn to la d tõe n wilg d sɩngr goamã pʋgẽ tɩ d miime tɩ nebã minimd yaa toor-toore?
3 D tẽeg tɩ nebã minimd yaa toor-toore: Zĩis kẽere, nebã ratame tɩ f sã n wa n na n sõs ne-b bɩ f reng n wilg f waoongã võore. La zĩis sãnda, f sã n ta n pa reng n pʋʋs zakã rãmb n sok b keelem, n zoe n sɩng sõsga, b getame tɩ f pa nand-b ye. Zĩis kẽer me, nebã sẽn tẽed Kiristã kɩtame tɩ sõsg sɩngrẽ, d tõe n gom Biiblã yelle. (Tʋʋ. 2:14-17) La sã n yaa zĩig nebã sẽn pa tẽed Kiristã wall tũudum yell pʋd n pa pak-ba, yɩta sõma tɩ d ra sɩng Biiblã yell goam ye. Yaa b sã n sak n sõsa ne-do, tɩ d lebg n na n tɩ kaag-b la d tõe n gom Biiblã yelle.—Tʋʋ. 17:22-31.
4. Bõe la d tõe n maan tɩ d sɩngr goamã yɩ sõma?
4 D segl d sɩngr goamã sõma: Segl-y y sɩngr goamã neere. Naoor wʋsgo, sɩngr goam sẽn yaa koɛɛg la vẽeneg kɩtdame tɩ nebã kelg-do. D sẽn gomd to-to wã me tara yõodo. Segdame tɩ d gomd ne yẽesem. Y nengã sã n pa gãnem tɩ y goamã pʋgẽ bɩ y waoog kɛlgdã, tõe n kɩtame t’a tʋlg n kelge. D sã n tũ sõs-kãngã saglsã, d sɩngr goamã na n nooma d moonegã zĩig neb tɩ b kelgd koɛɛgã.—1 Kor. 10:21.