D rɩ “Rĩungã koe-moondb sẽn tar yẽesmã” tigims gĩn sull tigis-kãseng nafa
1 Sõss sẽn paasd tõnd yẽesem: Ad sõssã d sẽn wʋm tigims gĩn sull tigis-kãsengã sẽn loog tɩ nan pa kaoosã zĩnda yamleoog wʋsgo! Tõnd fãa tigma taab sẽn na yɩl n paam seglg sõma sẽn na yɩl n moon Wẽnnaam Rĩungã ne yẽesem. Yãmb tẽra pipi sõasdã sẽn bilg gomd ning sẽn yaa “moonã” võor to-to bɩ? Yãmb tẽra b sẽn da sagl tõnd tɩ d maan vaeesg ning sõasg ning gom-zug sẽn yaa, “D ra yɛɛs ye, d sẽn mi t’a Zeova bee ne tõndã yĩng” pʋgẽ bɩ? Hal tɩ ta rũndã neb vɩɩm kɩba-bʋs sẽn yaa sɩd la yãmb vaees-yã?
2 Gom-n-dees taab ning gom-zug sẽn yaa “Tõnd tẽebã paamda makr buud toor-toorã” wilga tõnd bõn-kãsems a tãab sẽn kɩt t’a Zeova basd tɩ namsgã beẽ wã. Y tõe n wilga sẽn yaa bũmb nins bɩ? Tõnd pa-kẽesd-m-toogã tika Gʋlsg Sõamyã zĩ-bʋse? Bõe la b sagl tõnd tɩ d maan sẽn na yɩl n segl d mens n tõog n mao ne yɛl nins sẽn pukd tõnd pa-kẽesd-m-toogã yĩngã? Wãn-wãn la d sẽn yalsd kãn-kãe makr toɛy-toɛyã taoorã ne kɩs-sɩdã waoogd a Zeova?
3 Darmã gom-zug sẽn yaa “Yals-y kãn-kãe toog wakatã” zĩ-bʋs n keng yãmb tẽeb n tɩ yɩɩda? Wãn-wãn la d tõe n yɩ wala a Zeremi?
4 Zãma sõasgã gom-zug sẽn yaa, “Dũni kãngã yɛlã toeemdame” wã bilga toeen-kãsems bʋs sẽn na n maane, la sẽn na n tall tõnd n tãag Wẽnnaam daarã sẽn kõt rabeemã sasa? Y sẽn da wa n kelgd baasg sõasgã gom-zug sẽn yaa “Y sẽn yaa Rĩungã koe-moondb sẽn tar yẽesmã, bɩ y maan tʋʋm sõma wʋsgã,” wãn-wãn la yãmb da tagsd n na n tũ saglsã yãmb koe-moonegã wakate?
5 Tags-kãsems y sẽn tõe n tũ: Wa b sẽn wilg sõasg ning gom-zug sẽn yaa “Wilg-y tɩ y tara mi-beoogã” pʋgẽ wã, wãn-wãn la d tõe n wilg d mi-beoog ne a Zeova ne d sũur fãa? Gom-zu-raoog sõasgã sẽn da yaa “Rĩungã koe-moondb sẽn tar yẽesem wʋsgã” pʋgẽ, b sagla tõnd tɩ d rɩk togs-n-taar ne ãnda yẽesem? B sagla tõnd tɩ d vaeesd d mens wãn-wãn to?
6 Gom-n-dees taab ning gom-zug sẽn yaa “A Miise bãngr-gomdã kõta tõnd pãng tɩ d kẽn a Zeova yʋʋr yĩnga” wilga yɛl a tãab d sẽn tog n maan n paam a Zeova lohorem, bãmb la bʋse? D sɩd tõe n maan-b lame bɩ? (Mii. 6:8) Sõasg ning gom-zug sẽn yaa “Kogl-y y sũurã, n kell n tall vɩɩm manesem sẽn yaa yɩlemdã” wilgame tɩ bõe la d segd n maan n tall vɩɩm manesem sẽn yaa yɩlemde? Zĩ-bʋs wɛɛngẽ la sõasg ning gom-zug sẽn yaa “Gũus-y ne zãmbã” sagl tõnd tɩ d ra bas tɩ b zãmb-do, la d ra zãmb neb a taab me?
7 Gom-n-dees-taab ning gom-zug sẽn yaa “Rĩungã koe-moondb sẽn waoogd b tʋʋmdã” sagl-bʋs sẽn tar yõod la yãmb sɩng tũub y koe-moonegã pʋgẽ? Sõasg ning gom-zug sẽn yaa “Tẽebã yɛl zut sõsg kengda tẽebã” pʋgẽ, b vaeesa Filip rãmba 4:8. Wãn-wãn la verse kãngã sõngd tõnd tɩ d maan tɩ d sõssã yɩ sõss sẽn kengd tẽebo, la wakat bʋg la d segd n maan dẽ?
8 Sõasg ning gom-zug sẽn yaa “Tall-y bas-yard zãng ne a Zeova toog wakatã” wilga d sẽn tõe n maan to-to n tõog n mao ne yel-beedo, ligd zu-loeese, bãase, zak pʋgẽ zu-loeese, la pãn-komslem sẽn namsd-d wakat fãa. Wãn to la d tõe n wilg tɩ d teega a Zeova, d sã n wa maood ne yel-kãensã?
9 Tẽeb arzɛg-paalse: D sũur yɩɩ noog d sẽn paam seb-paalgã gom-zug sẽn yaa Adorez le seul vrai Dieu wã. Wãn-wãn la koɛɛg ning sẽn wilgd sebrã bõn-datlã tall pãn-tusdg yãmb zugu? Bõe yĩng t’a na n tall yõodo, a sẽn yaa zãmsg sebr a yiib soabã d sẽn na n tʋm ne d karen-biisã maaneg tʋʋmd pʋgẽ wã?
10 Rẽ poore, d paama seb-neer ning gom-zug sẽn yaa Approchez-vous de Jéhovah wã. Sebrã zĩ-kãsems kẽer la bʋse? Sebrã fot bʋs la yãmb nong n tɩ yɩɩda? Rẽ yĩnga yãmb sẽn karm-a wã pẽnega yãmb ne a Zeova n paas bɩ? Ãnd yɛs n tõe n dɩ seb-kãngã yõodo?
11 “Rĩungã koe-moondb sẽn tar yẽesmã” tigims gĩn sull tigis-kãsengã kõo tõnd sõngr ning d sẽn dat tẽebã wɛɛngẽ wã, sẽn na yɩl n mao ne wakat kãngã sẽn yaa toog wakatã. Sẽn na yɩl n dɩ segl-kãensã sẽn ka wõnd a taab tẽebã wɛɛngẽ nafa tɩ pidi, bɩ d maan d sẽn na maan n tẽeg bũmb ning b sẽn yeelã, n tall mi-beoog bũmb ning d sẽn paamã yĩnga, la d tũ bũmb nins d sẽn zãmsã. (2 Pɩɛ. 3:14) D sã n maan woto, na n sõng-d lame n paas tɩ d tall d burkĩndã la d yɩ Rĩungã koe-moondb sẽn tar yẽesem wala tõnd Soaal a Zezi Kirist, tɩ kõ a Zeova ziiri.—Fil. 1:9-11.