Yãmb sogsgã leoore
◼ Sagl-bʋs la d segd n tũ, d sã n wa kõt neb sẽn be bi-bees rotẽ kaseto?
Dũniyã gill zugu, neb sõor sẽn yɩɩd milyõ a nii n be bi-bees rotẽ, la bãmb kẽer wilgame tɩ b rat n bãng n paasa koe-noogã wɛɛngẽ. (1 Tɩm. 2:4) Kiuug fãa, yaa lɛta sõor sẽn zems 1 400 la neb sẽn be bi-bees rotẽ bɩ b zags neb toond Sosiete wã tʋʋmd will a yembr n kot sɛba, bɩ tɩ ned wa ges-ba. Yaa sɩd tɩ neb wʋsg sẽn be bi-bees rotẽ maanda woto ne pʋ-peelem, la kɩbay d sẽn paam wilgdame tɩ bãmb kẽer maanda wa b rata sɩdã sẽn na yɩl n tũnug ne Wẽnnaam nin-buiidã n pids b rat-m-yembr bõn-datɩ. Rẽ n so tɩ tõnd fãa segd n tũ sagls nins sẽn pʋgdã, kaset kũun bi-bees rotẽ wã wɛɛngẽ.
Naoor wʋsgo yaa ne lɛta maasem la d kõt neb wʋsg sẽn be bi-bees rotẽ kasetã. D sagenda saam-bi-pogsã tɩ b ra gʋls rap sẽn be bi-bees rotẽ lɛta ye, baa sã n yaa sẽn na yɩl n sõng-b tẽebã wɛɛngẽ. Yaa saam-biis nins sẽn tar zʋg-sõma nins sẽn segdã bal n segd n maan dẽ. B tõe n yãka saam-bi-pogs sẽn tar zʋg-sõma nins sẽn segdã tɩ b gʋls pagb sẽn be bi-bees rotẽ, sẽn wilg ne pʋ-peelem tɩ b rat n bãnga Biiblã sɩda. B ka segd n tool neb sẽn be bi-bees rotẽ kũun bɩ ligd ye, baa rẽ sã n yaa bũmb b sẽn tõe n kose.
Ned b sẽn kẽes roog sã n wilg a raab ne sɩdã, bɩ y kɩs a yʋʋrã la a adɛrsã bãens-roogã sẽn be babg ningã tiging neba. Naoor wʋsgo, yaa saam-biis sẽn tar zʋg-sõma nins sẽn segd n be tiging-kãngã pʋgẽ wã n tõe n bãng n welg yɛl toɛy-toɛy sẽn tõe n wa puki. B sã n ka mi sẽn yaa tiging ninga, b tõe n toola Sosiete wã tʋʋmd will kɩbay sẽn tɩ loe ne a soabã.
Pa wẽng tɩ saam-biis nins b sẽn yãkã maan tigiss bi-bees roogẽ tɩ neb wʋsg naag taab n zãms Biiblã ye. Baasg zãnga, bãens-roogẽ wã b ka segd n maan tigiss zall tɩ koe-moondb la neb sẽn be bi-bees rot pʋsẽ lagemd taab yaar ye. Sẽn paase, ka zems tɩ koe-moondb kẽng bãens-roogẽ b sẽn dat wakat ning bal n tɩ maand lagem-n-taar wʋsg ne neb sẽn be be ye.
D sã n wa taasd neb sẽn be bãens-rotẽ koe-noogã, bɩ d ‘yɩ yam dãmb wa wiisi, la d yɩ neb sẽn ka tar yelle, n yaa wa wala.’—Mat. 10:16, Kãab-paalgã Koe-noogo.