Rĩungã Rot meeb dũniyã gill zugu Erop tẽns kẽer pʋsẽ
1 Sẽn pa kaoos pʋgẽ, Rĩungã tʋʋmd (ges-y km 9/02 3-6) goma Rĩungã Rot meeb Afirikã yelle. Tõnd sʋkã, neb wʋsg na n tʋlgame n bãng bũmb ning sẽn maand nasaar tẽnsã pʋsẽ.
2 Sẽn na maan yʋʋm pi-gĩna, b ra gɩdga a Zeova Kaset rãmbã tʋʋmd nasaar tẽns wʋsg pʋsẽ, wala Erop yaangã. Naoor wʋsg menga, gɩdgrã ka yɩ gɩdg-bil ye. Yɩl n tõog n maan tigisg vẽeneg neb nifẽ yaa toogo, tɩ b pa gomd tigisg Rĩung Roog pʋgẽ maaneg ye. La yʋʋm sẽn pa kaoos pʋgẽ, ‘[a Zeova] maana bõn-kãsems n kõ-do. Tõnd maana sũ-noogo.’—Yɩɩl 126:3.
3 Yʋʋmd 1983 wã tɛka, weoogr ning b sẽn da weoogd a Zeova Kaset rãmbã sɩnga boogre. Yʋʋmd 1989 wã, Poloyn la Õngri pãn-soaadbã saka a Zeova Kaset rãmbã tũudum b tẽnsẽ wã. Yɩɩ woto me Risi yʋʋmd 1991 wã pʋgẽ. Rẽ tɛka, a Zeova Kaset rãmbã tʋʋmd paama pãng Risi la pĩnd Iniyõ Sovietik tẽns a taabã pʋsẽ. Yʋʋmd 1996, tʋʋlg kiuugã ne yʋʋmd 1998 zĩ-likr kiuugã sʋka, Siglgã taoor lʋɩtb sull sak n kɩsa ligd Sosiete wã tʋʋmd wil sẽn get nasaar tẽns 11 yellã sẽn peng n na n me Rĩung Rot 359 wã.
4 Y sã n wa get fot rãmbã sẽn be seb-paasdem kãngã pʋgẽ wã, bɩ y tags bõn-kãsems nins a Zeova sẽn maan n kõ a nin-buiidã yelle. (Yɩɩl 136:4) Y sũy na n yɩɩ noogo, tɩ y bãng tɩ b tʋmda ne ligd ning saam-biisã sẽn kõt dũniyã gill zugã sõma, tɩ rẽ wilgdẽ t’a Zezi sẽn da yeel Zã 13:35 pʋgẽ wã yaa sɩda. B gʋlsa be woto: “Yãmb sã n nong taaba, neba fãa na n bãngame tɩ yãmb yaa mam karen-biisi.”
5 Rumani bee nasaar tẽns sẽn ka tar laog wʋsg b sẽn sõngd ne ligd sẽn na yɩl tɩ b me Rĩung Rotã sʋka. Tẽn-kãng pʋgẽ, yʋʋmd 2000 sẽoog kiuugã tɛka, b mee Rĩung Rot 36. Ukrɛn tũnugda ne meeb modɛll yɛng n met b Rĩung Rotã fãa la bala. Be, b mee Rĩung Rot 61 yʋʋmd 2001 wã pʋgẽ, la b me Rĩung Rot 76 n paas yʋʋmd 2002 wã pʋgẽ. B rɩka ligd ning b sẽn kõ tɩ b me Rĩung Rotã n me Rĩung Rot kobs Bulgari, Korwasi, Masedoan, Moldava, Risi, ne Sɛrbi-Montenegro.
6 Tẽns kẽer pʋsẽ Rĩung Rotã meeb ka yɩ nana ye, tɩ rẽ kɩt tɩ b ra tog n mao wʋsg n maneg yɛl n yaool n tõog n sɩng meebã menga. Naoor wʋsgo meebã seglg meng rɩkda sẽk wʋsgo. Sẽn paase, Rĩung Rot meeb ligd Erop tẽnsã bab-kãng yaa toog wʋsg n yɩɩd Afirik bɩ Amerik nug-goabgã zĩis wʋsgo. Baasg zãngã, a Zeova balemdbã sõor sẽn paasd wʋsgã kɩtame tɩ b ket n dat Rĩung Rot kobs Erop tẽn-kãensã sẽn ka tar laog wʋsgã pʋsẽ.
7 Ad sɩd bee yamleoogo, d sẽn ne tɩ Rĩungã Rot meeb kẽngda taoor tʋʋll-tʋʋllã! Kɩbay wʋsg wilgdame tɩ zĩis nins b sẽn me Rĩung Rotã, yɩɩ kaset sõng n kõ bab-kãng neba. Zĩis kẽere, pãn-soaadbã sũy yɩɩ noog b sẽn yã tɩ b saka ne yamleoog n tũ meebã noyã.
8 Wa sẽn zemse, a Ezai reng n togsame tɩ fɩɩgr n na n zĩnd sɩd balengã pʋgẽ rũndã-rũndã. Wẽnnaam kɩtame t’a no-rɛɛsa reng n togse: “Mam yaa [a Zeova]. A wakata sã n ta, mam na n maan-a-la tao-tao.” (Ezai 60:22) Sãmbg sẽn ka be, yʋʋm pi-gĩnd ning sẽn loogã yɩɩ wakat ning a Zeova sẽn da rat tɩ balemdbã sõor fɩɩg Erop yaangã. D kota a Zeova t’a ket n ningd modgr ning d sẽn maand sẽn na yɩl tɩ Rĩung Rotã meeb kẽngd taoor tʋʋll-tʋʋll tẽns wʋsg pʋsẽ wã bark wʋsgo, d sẽn ket n kõt ligd Rĩungã Rot meeb yĩnga sasa! Rẽ na n kɩtame tɩ b tõog n me Rĩung Rot wʋsg n paas tẽns nins sẽn ka tar laog wʋsgã pʋsẽ. A na n kɩtame tɩ baleng sẽn yaa yɩlemdã ket n paamd pãng n paasd nasaar tẽnsã, la tɩ b tõe n kõ kaset sẽn yaa kãseng n yɩɩd “dũniyã tɛk fãa.”—Tʋʋ. 13:47.
[Foto rãmbã, seb-neng a 3]
Rĩung Rot Mosku, Risi
[Foto rãmbã, seb-neng a 4-6]
Rĩung Ro-paals Erop yaangã
Strumitsa, Masedoan
Daruvaar, Korwasi
Sokal, Lviv soolma, Ukrɛn
Bitola, Masedoan
Mladost, Bulgari
Plovdiv, Bulgari
Krasnooktyabrskiy, Maïkop babgã, Risi
Bački Petrovac, Sɛrbi-Montenegro
Tlumach, Ivano-Frankivsk soolmã, Ukrɛn
Rava-Ruska, Lviv soolmã, Ukrɛn
Stara Pazova, Sɛrbi-Montenegro
Zenica, Bozni-Hɛrzegovine
Sokal Lviv soolmã, Ukrɛn
Zhydachiv Lviv soolmã, Ukrɛn