Rĩung Rot meebã ket n kẽngda taoore
1 Yʋʋmd 1983, “Rĩungã lagem-n-taar” tigims gĩn tigis-kãsengẽ Etazĩni, b ra mooname tɩ ligd la b na n tigis sẽn na yɩl n sõng ne Rĩungã Rot meeb la b manegr Etazĩni la Kanada. Tʋʋmdã sẽn sɩng yaal-yaalã d ra pa bãng t’a na n wa talla bark woto ye. D sɩngame n yãt Yɩɩl Sõamyã 92:5 wã pidsg n yɩɩd pĩndã. Be b yeela woto hal tɩ zems bal kɛpɩ: “Zusoaba, yãmb kõo maam sũ-noogo bũmb nins yãmb sẽn maana yĩnga. Mam kaasda ne sũ-noogo yãmb nus tʋʋma yĩnga.”
2 Masã tõnd maanda sũ-noog wʋsg ne bũmb ning sẽn paamd pidsg masã wã. Rũndã-rũndã Rĩung Rot meeb tʋʋmdã b sẽn maand tʋʋll-tʋʋll zĩig fãa wã kẽngda taoore. Ne manesem buud toor-toore, tõnd fãa tara zu-noog n tõe n kõ d sõngr tʋʋm kãngã pʋgẽ. D tõe n kõo ligd bilf bɩ wʋsg n sõng ne depãens rãmbã b sẽn maand n met baleng zĩisã dũniyã gill zugã n paasdẽ wã. Saam-biis wʋsg me sakda ne yamleoog n dɩkd b teedo, b sẽka, b tõodo, la b minim n kẽesd tʋʋm kãensã pʋsẽ. Segl-kãensã fãa sẽn kẽngd taoor sõmb-sõmbã ya a Zeova sẽn kõt sor-wilgri, teelgo, la a ningd tõnd modgrã d sẽn naagd taab n maandẽ wã barkã yĩnga.—Yɩɩl 127:1.
3 Sosiete wã Tʋʋmd wil wʋsg tũu makr ning b sẽn da lugl sɩngrẽ wã Etazĩni tigimsã yĩngã. Tẽns wʋsg pʋsẽ, Rĩungã Rotẽ koglg n be tɩ koe-moondbã tõe n ning b kũunã Rĩungã Rot meeb ligd yĩnga. Etazĩni, yʋʋmd 1997 tʋʋlg kiuugã Rĩungã Tʋʋmd togsa remsg Rĩungã Rot segl-kãens wɛɛngẽ. Be b yeela woto: “B sẽn lugl Sosiete wã Rĩungã Rot Ligd-tigisg kees yʋʋmd 1983 wã, saam-biisã maana kũun wʋsgo, tɩ rẽ kɩt tɩ b tõog n peng tigims ligd b Rĩungã Rot meeb yĩnga. Tẽn-kãngã tigims sõor sẽn zems 2 700 la segl-kãensã zoe n nafe. Segl-kãensã sã n da kaẽ, tigims wʋsg ra kõn tõogẽ n me Rĩung Ro-paals bɩ b maneg b rãmb nins sẽn baood manegrã ye. Masã lebga yãgb yell tɩ b tũnug ne ligd lobdem kãngã pedg n peng tigims nins sẽn be tẽns nins laog sẽn paood wʋsgã pʋsẽ. Sosiete wã la tigims nins yãmb kũuna sẽn nafdã nanda yãmb sẽn ket n teend segl-kãensã wã ne mi-beoog wʋsgã.”
4 B kell n tũnuga ne koe-kãngã b sẽn taasã n kos nebã tɩ b kẽes b mens Rĩungã Rot meeb b sẽn maand tʋʋll-tʋʋllã pʋgẽ. B na n tũnuga ne Rĩung Rot meeb ligd n pids tõnd saam-biis sẽn be tẽns a taab raabo, la d ket n pengd tõnd tẽngã tigims me ligd Rĩung Rotã meeb yĩnga. Sõasg a to sẽn pʋgl pʋgẽ, sẽn yi yʋʋmd 1997 sa-sik kiuug Rĩungã Tʋʋmd pʋgẽ, b yeelame: “Dũniyã gill zugu, d ket n datame n me Rĩung Roto. Rɩẽ tʋʋmd yʋʋmdã yen-yen bala, tigims paal 3 288 la b maan-yã. Bãmb wʋsg yɩɩ Afiriki, Azi, Amerik tẽn-sʋk la a goabga, la Erop yaangã.”
5 Wakat kãng tɛka bõe la b tõog n pidsi? Annuaire 2001 yeela woto: “Hal tɩ ta rũndã, tẽns 30 pʋsẽ, Rĩung Rot 453 la b tõog n me n baase, tɩ Rĩung Rot 727 a taab be meeb zugu. D sẽn modgd n na n maan bũmb ning n yɩɩd masã yaa maan Rĩung Rot pãlã rãmb tẽng fãa yĩnga, tɩ b tõe n tũnug ne meeb teed la modɛll dãmb b sẽn tõe n paam tẽng fãa pʋgẽ. Kenya b tũnugda ne kug-peesdem, Togo b nong n tũnugda ne tãn-koɛɛma, Kamerun b nong n tũnugda ne sima tãn-koɛɛma, tɩ rẽ poor bɩ b kirpsaase. D sã n maan woto, tẽngã saam-biis tõe n paama tʋʋm-minim sẽn yaa tɩlae wã n tõog n wa yɩ nin-gĩin tẽngã Rĩung Rot meeb tʋʋmd pʋgẽ.”
6 Afirik pʋgẽ b tõe n yãa vẽeneg t’a Zeova sɩd ningda meebã tʋʋmd barka. Y sã n wa get Rĩungã Rot kẽer b sẽn me wã fot rãmba, bɩ y tags pãn-tusdg ning ro-kãens sẽn tall a Zeova Kaset rãmbã tʋʋmd zugã! Sɩd yɩɩ woto zĩis a tãab wɛɛngẽ: Dũni gill saam-biisã lagem-n-taar pʋgẽ, pãn-tusdg ning rẽ sẽn tall bab-kãng nebã zut pʋgẽ, la tigingã tigissẽ watb sõor paasg pʋgẽ. Seb-paasdem kãngã wilgda Rĩung Rot b sẽn me Afiriki, la Rĩungã Tʋʋmd sɛb a taab sẽn wat pʋsẽ, d na n wilga Rĩungã meeb tʋʋmd sẽn kẽngd taoor to-to dũniyã babs a taab pʋsẽ.
[Foto rãmbã, seb-neng a 3]
REPIBLIK SÃNTRAFRIKƐN
Bimbo, Bãngui
Beguya, Bãngui
[Foto rãmbã, seb-neng a 4]
Ukõnga, Tãnzani
[Foto, seb-neng a 4]
Akra, Gãna
[Foto, seb-neng a 4]
Salala, Liberia
[Foto, seb-neng a 4]
Karoi, Zimbabwe
[Foto rãmbã, seb-neng a 4, 5]
Allada, Benẽ—pĩnd Rĩungã Roogo
Allada, Benẽ—Rĩung Ro-paalga
[Foto, seb-neng a 5]
Kpeme, Togo
[Foto, seb-neng a 5]
Sokode, Togo
[Foto rãmbã, seb-neng a 4, 5]
Fidzros, Benẽ
[Foto, seb-neng a 6]
Lyenga, Zãmbi—pĩnd Rĩungã Roogo
[Foto, seb-neng a 6]
Lyenga, Zãmbi—Rĩung Ro-paalgã
[Foto, seb-neng a 6]
Kinsasa, Kõngo
[Foto, seb-neng a 6]
Musambira, Ruwãnda