Zĩis nins d sẽn tigimd n waoogd Wẽnnaamã

A ZEOVA sagla sẽn tũud-b yẽ wã tɩ b tigimd taab sẽn na yɩl n paam zãmsgo, la b kengd taab raoodo. (Ebre. 10:23-25) “Sɛk roogã” n yɩ pipi zĩig Israyɛll nebã sẽn da yaa buud Wẽnnaam sẽn yãkã sẽn da tigimd taab n waoogd Wẽnnaam. (Yik. 39:32, 40) Kaoosg zugẽ, a Davɩɩd biig a Salomo mee wẽnd-doog Wẽnnaam ziirã yĩnga. (1 Rĩm. 9:3) B sãama wẽnd-do-kãng yʋʋmd 607 S.D.Z.R. Rẽ poore, Zʋɩf-rãmbã ra tigimda taab karen-dotẽ n waoogd Wẽnnaam. B wa n lebs n mee wẽnd-doogã, tɩ le yaa be la b tigimd taab n waoogd Wẽnnaam. A Zeezi zãmsa nebã karen-dotẽ la wẽnd-doogẽ wã. (Luk 4:16; Zã 18:20) A Zeezi tigma neb tãng zug meng n zãms-ba.—Mat. 5:1–7:29.

² A Zeezi kũumã poore, kiris-nebã ra tigimda taab zĩis neb wʋsg sẽn tõe n wa, la neb zagsẽ, sẽn na yɩl n zãms Gʋls-sõamyã, la b paam n zĩnd ne b tẽed-n-taasã. (Tʋʋ. 19:8, 9; Rom. 16:3, 5; Kolo. 4:15; File. 2) Wakat kẽere, yɩɩ tɩlɛ tɩ pipi kiris-nebã tigim zĩis neb sẽn kaẽ, sẽn na yɩl tɩ bɛɛbã ra bãng b sẽn beẽ ye. Hakɩɩka, pĩnd wẽndẽ wẽn-sakdbã ra tʋlla ne b sũy fãa n tigimd taab sẽn na yɩl n paam zãmsg a Zeova nengẽ.—Eza. 54:13.

³ Rũndã-rũndã me, kiris-nebã tigimda taab zĩis neb wʋsg sẽn tõe n wa, la neb zagsẽ n waoogd Wẽnnaam. B wae n tigimda taab neb zagsẽ n maand koe-moonegã tigsga. Neb nins sẽn paam tɩ b maand tigiss a woto b zagsẽ wã getame tɩ yaa zu-zẽkre. Neb wʋsg yetame tɩ b sẽn sak tɩ b wat n maand tigiss a woto b zagsẽ wã nafd-b lame.

RĨUNGÃ ROOGO

⁴ Zĩig ning a Zeova Kaset rãmbã sẽn wae n tigimd taab yaa Rĩungã roogẽ. Naoor wʋsgo, b raada zĩig n me Rĩung ro-paalle, wall b maneg roog tɩ lebg Rĩung roogo. Sẽn na yɩl n kẽgs ligd la b tʋm ne Rĩungã rot nins d sẽn tarã sõma, tigims wʋsg mi n tigimda taab Rĩung ro-yɛng pʋgẽ, sã n mik tɩ tõeeme. Zĩis kẽere, yaa tɩlɛ tɩ b luwaas roogo. B sã n me Rĩung ro-paall wall b lebs n maneg bũmb wʋsg Rĩung roogẽ, yɩta sõma tɩ b maan tigsg n dɩk roogã n kõ Wẽnnaam. La b sẽn lebs n manegã sã n pa waooge, pa tɩlɛ tɩ b maan tigsg a woto buud ye.

⁵ B pa segd n nags Rĩungã roog tɩ loog noore, b sẽn dat tɩ nebã get n pẽgd yĩng ye. Baa b sẽn met Rĩungã rot to-to wã sẽn pa yembr tẽnsã fãa pʋsẽ wã, b sẽn dat bal yaa b tõog n maand tigissã tɩ bũmb pa tiisd-b ye. (Tʋʋ. 17:24) B segd n gesa tẽngã yɛl sẽn yaa to-to wã n maneg-a tɩ zems ne rẽ, tɩ b tõe n maand tigissã be tɩ be yamleoogo.

⁶ A Zeova Kaset rãmb nins fãa sẽn tigimd taab Rĩung roog a ye pʋgẽ wã kõta ligd sẽn na yɩl n ges roogã yelle. La b pa pɩʋʋgd ne lepr n kot ligdi, wall b moon tɩ b kõ ligd ye. Koglg n be Rĩungã roogẽ tɩ sẽn wat-b tigissã tõe n ning ligd be, Rĩungã roog depãens-rãmb yĩnga. B maanda rẽ ne yamleoogo, la ne b sũy fãa.—2 Kor. 9:7.

⁷ Tigingã neb fãa getame tɩ b sẽn paam n tõe n kõ ligd tɩ b ges Rĩungã roog depãens-rãmb yellã, n paas b sẽn tõe n sõng ne Rĩungã roog yɩlgr la a manegrã yaa zu-zẽkre. B wae n yãkda kãsem-soab wall kãsem-sõngd t’a get tʋʋm-kãng siglg yelle. Naoor wʋsgo, b kɩtdame tɩ koe-moonegã sulã tʋmd tʋʋm-kãng n deesd taaba, tɩ sull fãa taoor lʋɩt bɩ a sõangdã get rẽ yelle. Rĩungã roog pʋgẽ la a yɩngã fãa segd n yɩɩ yɩlemde, tɩ waoogd a Zeova la a siglgã.

⁸ Sã n mik tɩ tigims wʋsg n tigimd taab Rĩungã roogẽ, tigims nins sẽn tigimd be wã kãsem-dãmb segd n lugla Sull sẽn get Rĩungã roog yelle, tɩ b get roogã la a zakã yelle. Kãsem-dãmbã sul toor-toorã segd n naaga taab n yãk sull ning sẽn na n ges Rĩungã roog yellã taoor lʋɩta. Kãsem-dãmbã sul wilgda Sull ning sẽn get Rĩungã roog yellã sore, tɩ b get Rĩungã roog yɩlgr la a manegr yelle, la b sõngdẽ tɩ teed sẽn na n sek zĩnd tɩ b tõe n tall n tʋme. Rẽ baoodame tɩ tigims nins fãa sẽn tigimd be wã naagd taab n tʋmdẽ.

⁹ Sã n mik tɩ tigims wʋsg n tigimd taab Rĩungã roog a ye pʋgẽ, b tõe n toeemda tigissã wakat n deesd taaba. Kãsem-dãmbã segd n wʋma taaba, n yãk wakat ning b sẽn na n maand tigissã. B segd n maana rẽ ne nonglem. (Fili. 2:2-4; 1 Pɩy. 3:8) Tiging a yembr kãsem-dãmb pa segd n yãk wakat tigims a taabã yĩng ye. Tigims sull yel-gɛtã sã n wa na n kaag tiging a ye sẽnbe Rĩung ro-kãng pʋgẽ, tigims a taabã segd n toeema b tigissã wakat semen-kãnga, sã n mikame tɩ yaa tɩlɛ.

¹⁰ B tõe n kosa kãsem-dãmbã sull ning sẽn get koe-moonegã yellã sor n wɛgs sõss Rĩungã roogẽ, yi-kãadem la kũum mumb yĩnga. Kãsem-dãmb-kãens na n maaga b yĩng n ges demandã, la b tik sagls nins filiyallã sẽn kõ wã zug n ges b sã n tõe n kõo sore.

¹¹ Neb nins b sẽn kõ sor tɩ b wɛgs b sõss yi-kãadem wall kũum mumb yĩngã segd n zãa b mens sõma tɩ zems ne kiris-neb sẽn zãad b mens to-to wã. B pa segd n maan bũmb Rĩungã roogẽ sẽn na n sãam saam-biisã sũya, bɩ n sãam a Zeova ne tigingã yʋʋr ye. (Fili. 2:14, 15) Filiyallã tõe n kõo sor tɩ b maand tigiss a taab Rĩungã roogẽ. Wala makre, Rĩungã tʋʋmd lekolle, la So-pakrã tʋʋmd lekolle.

¹² Tigingã neb segd n talla waoogr ne b tigissã zĩig wakat fãa. B fu-yerdɩ wã, b sẽn manegd b mens to-to wã la b manesmã segd n waoogda a Zeova. (Koɛ. 5:1; 1 Tɩm. 2:9, 10) D sã n tũud saglg ning b sẽn kõ rẽ wɛɛngẽ wã, d wilgdame tɩ d nanda d tigissã.

¹³ Zũnd-zãnd pa segd n zĩnd tigissã sasa ye. Yɩta sõma tɩ kambã zĩnd ne b roagdbã. B segd n sagla roagdb nins sẽn tar kom-bõonegã tɩ b zĩnd zĩis b sẽn pa na n tiis neb a taabã wʋsgo, sã n wa yaa tɩlɛ tɩ b yi n kibl b biiga, wall b ges a yelle.

¹⁴ B segd n yãka saam-biis sẽn tar minim tɩ b reegd nebã Rĩungã roogẽ tigissã sasa. B segd n yɩɩ gũusdba, n nong neba, la b tar yam-vẽenem. B tʋʋmd yaa b reegd sãambã noog-noog tɩ b yam gãand bãane, n sõngd sẽn pa wa-b pĩndã tɩ b paam zĩisi, n sõt nebã sõore, la b get roogã sã n tʋʋla wʋsg wall maasa wʋsgo, tɩ b segd n ning vãntilatɛɛr-dãmbã bɩ n kiis-ba. Sã n wa yaa tɩlɛ, saam-bi-kãens tõe n tẽega roagdbã tɩ b ges b kambã yell neere, tɩ b ra zoet yaar nand tɩ tigissã sɩng wall tigissã poore, pa rẽ bɩ n deemd ɛstaraadã zug ye. Biig sã n wa pa sakd nana, saam-bi-kãens tõe n kosa a roagdbã ne bʋgsem, tɩ b tall biigã n yi t’a ra wa tiis kɛlgdbã wʋsg ye. Sẽn deegd-b nebã tʋʋm sõngdame tɩ kɛlgdbã tõe n dɩ tigissã yõod sõma. Yɩta sõma tɩ b yãk kãsem-dãmb wall kãsem-sõngdb tɩ b reegd nebã.

RĨUNGÃ ROOG MEEBO

¹⁵ Pipi kiris-nebã wakatẽ, kiris-neb kẽer nug ra zãadame n yɩɩd b taabã. Rẽ n so tɩ tʋm-tʋmd a Poll yeel yaa: “Sẽn na yɩl tɩ yãmb sẽn paam tɩ sek n kell masã wã lek bãmb sãoogã, sẽn na yɩl tɩ bãmb sẽn paam tɩ sek n kellã me wa lek yãmb sãoogã, tɩ zeng-taab zĩndi.” (2 Kor. 8:14) Rũndã-rũndã me, “zeng-taab” a woto n be. B naagda kũun nins dũniyã gill zug saam-biisã sẽn kõtã taaba, n tar n met Rĩungã rot la b manesd kẽere. Siglgã, n paas tigims nins sẽn paam tɩ b sõng-b ne kũunã nanda yamleoog kũunã dũniyã gill zug saam-biisã sẽn kõtã.

¹⁶ Filiyallã tikda tẽng fãa yɛl sẽn yaa to-to wã, n wilg tiging fãa sẽn segd n tigimd Rĩung roog ning pʋgẽ. Sẽn paase, filiyallã n yãkd wakat ning b sẽn segd n me Rĩung ro-paalle, wall b lebs n maneg Rĩung rot kẽere, la zĩis nins b sẽn segd n maan dẽ, tẽns nins filiyallã sẽn get koe-moonegã yellã pʋsẽ. Sabab-wẽns sã n wa maane, b siginda yɛlã sẽn na yɩl n maneg Rĩung rot nins sẽn sãamã. B mi n manega saam-biis rot me.

¹⁷ Tʋm-tʋmdb n sõngd ne yamleoog sẽn na yɩl tɩ b paam zĩig n da, tɩ kẽer maand Rĩungã rot pãlã-rãmba, tɩ sãnda sõngdẽ tɩ b paamd sor meebã yĩnga, tɩ kẽer met Rĩungã rot la b get b yelle. Filiyallã n wilgd nin-kãensã fãa b sẽn segd n tʋm to-to. Sẽn mik tɩ b segd n mee Rĩung rot tẽns wʋsg pʋsẽ wã, yaa tɩlɛ tɩ b paam yamleoog tʋm-tʋmdb wʋsgo. Koe-moond ning fãa sẽn deeg lisgu, n tar minim la a rat n sõng ne tʋʋmdã tõe n gʋlsa demand n kõ a tigingã kãsem-dãmbã sull ning sẽn get koe-moonegã yellã. Baa koe-moondb nins sẽn pa reeg lisgã tõe n sõnga ne b Rĩungã roog meebo, wall a manegre.

TIGIS-KÃSEMSÃ ROTO

¹⁸ Pipi kiris-nebã ra wae n tigimda taab sul-bõones pʋsẽ. La wakat ninga, ra yaa “neb wʋsg” n tigimd taaba. (Tʋʋ. 11:26) Rũndã-rũndã me, a Zeova Kaset rãmbã tigimda taab tɩ b sõorã yaa wʋsgo, n maand daar a ye tigis-kãsemse, la rasem a tãab tigis-kãsemse. B wae n luwaasda zĩis tigis-kãens yĩnga. La zĩig sẽn zems b sẽn tõe n luwaas sã n ka be, b baooda zĩig n me wall b ra roogo, tɩ b boond ro-kãng tɩ tigis-kãseng roogo.

¹⁹ Wakat kẽere, b baooda roog n da, n lebs n maneg-a t’a lebg tigis-kãseng roogo. La naoor wʋsgo, b raada zĩig n me ro-paalle. Tigis-kãsemsã rot yalem pa yembr ye. Bee ne zĩig fãa yɛl sẽn yaa to-to. Yaa filiyallã n yãkd b sã n na n daa roog wall b me. La b rengd n maaga b yĩng n ges ligd ning b sẽn na n kẽes roogã pʋgẽ, la a sẽn na n naf saam-biisã to-to wã.

²⁰ Filiyallã yãkda saam-biis tɩ b get tigis-kãsemsã rot yelle, la b manegrã yelle. B maana na-kẽndr tɩ tigims sulã yɩlgd tigis-kãsemsã rot wakat fãa la kiuug a yoob-yoobe. B segd n manegd-b lame me sẽn na yɩl tɩ b bũmb ra wa sãam ye. Saam-biisã sã n kẽesd b toog tʋʋm-kãngã pʋgẽ, b paamda nafa wʋsgo. Woto wã, b sagenda tigimsã neb tɩ b teel tʋʋm-kãensã ne b sũy fãa.—Yɩɩn. 110:3; Mal. 1:10.

²¹ Wakat kẽere, b tõe n maana bũmb a taab tigis-kãseng roogẽ. Wala makre, Biiblã zãmsg lekoll-dãmba, la tigims sull yel-gɛtbã tigissi. Tigis-kãsemsã rot me yaa zĩis b sẽn waoogd Wẽnnaam wa Rĩungã roto. D sã n wa be tigis-kãseng roogẽ, d manesmã, d fu-yerdɩ wã, la d sẽn maneg d mens to-to wã segd n waoogda Wẽnnaam, wa sẽn yaa to-to Rĩungã roogẽ wã.

²² Rũndã-rũndã sẽn yaa yaoolem wakatã, neb wʋsg rata ne b sũy fãa n naag Wẽnnaam nin-buiidã. Rẽ wilgdame t’a Zeova ningda a siglgã barka. (Eza. 60:8, 10, 11, 22) Woto wã, bɩ d teel bũmb nins fãa b sẽn maande, sẽn na yɩl tɩ d paam zĩis d sẽn tigimd n waoogd Wẽnnaam, tɩ yaa yɩlemde, la be yamleoogo. D sã n maand woto, d wilgdame tɩ d sũy nooma ne zĩ-kãens sẽn sõngd tõnd tɩ d tõe n keng taab raoodo, sẽn yɩɩd fãa d sẽn ne t’a Zeova daarã kolgdame wã.