D zã d balengã zĩis sõma
1. Rĩungã Roog bõn-datl yaa bõe?
1 A Zeova Kaset rãmbã tigims sõor sẽn yɩɩd 94 000 n be dũniyã gill zugu. Tigims kãensã neb tigimda taab Rĩungã Rot sẽn yaa bãmb babgã baleng zĩisã pʋsẽ, n zãmsd Biiblã la b maand tũud-n-taar ne taaba.
2. Bõe yĩng tɩ tar yõod wʋsg tɩ d zãad Rĩungã Roog t’a yaa yɩlemd la a sakd gesgo?
2 Na-kẽndr sẽn na yɩl n pek la b pɩɩs Ri̇̃ungã Roog wakat fãa: Tʋʋmd ning b sẽn maand sẽn na yɩl n ges Rĩungã Roog yellã tara yõod wʋsg tõnd baleng tʋʋmdã pʋgẽ. Notre ministère sebrã yeela a seb-neng 61-2 pʋsẽ woto: “Saam-biisã segd n gesame tɩ yaa waoogr ne-b tɩ b kõ ligd Rĩungã Roog zãab yĩnga, la b leb n sõng n zã-a t’a yɩ yɩlemde, t’a sakd gesg la a yaa sõma. Rĩungã Roogã pʋgẽ la a yɩng fãa segd n waooga a Zeova siglgã.” Neba sẽn wat Rĩungã Roog pʋgẽ naoor yak semen fãa wã yĩng kɩtame tɩ b segd n yiisd rẽgdã la b get a yell wakat fãa. Naoor wʋsgo, yaa tiging bɩ tigims nins sẽn tigimd Rĩungã Roogẽ wã yamleoog tʋm-tʋmdb n sõngd n maand bõn-kãensã. Wala Biiblã gʋlsg wẽnde, rũndã-rũndã me a Zeova sõgen dãmbã segdame n modg ne balengã zĩig ‘manegr tʋʋmde.’—2 Kɩb. 34:10.
3. Wãn-wãn la b segd n sigl Rĩungã Roog pɩɩsg la a pekre, la ãnda n tõe n naag n maan tʋʋm kãngã?
3 B segd n maana na-kẽndr Rĩungã Roog pɩɩsg la a pekr semen fãa yĩng n tabl sɛbã tablg zĩigẽ. Sebrã zãmsg sul fãa segd n pɩɩsda Rĩungã Roog n deesd taaba, n maand tʋʋm toɛy-toɛyã b sẽn wilg tɩ b segd n maana semen fãa wã. Neb nins sẽn tõeyã fãa segd n naagame n sõngd semen fãa tɩ Rĩungã Roog yaa yɩlemd la a sakd gesgo. Kambã me tõe n naag n tʋma ne b roagdbã, tɩ bala rẽ me zãmsd-b lame tɩ b tall naneb ne zu-noog tʋʋm kãngã. Tigims a yiib bɩ sẽn yɩɩd rẽ sã n tigimd taab Rĩung Roog a yembr pʋgẽ, b segd n lagma taab sõma n tʋm sẽn na yɩl tɩ tõnd Rĩungã Roog pɩɩsgã la pekrã sẽn tar yõod wʋsgã ra lebg neb a wãn zɩɩb bal ye.
4. Bõe la b segd n maan sẽn na yɩl tɩ tigingã neb bãng b sẽn na n pɩɩs la b pek Rĩungã Roog to-to?
4 Sã n tõe, b segdame n gʋls tʋʋm nins b sẽn segd n maanã sebr zugu, n tabl-a teedã bĩngr zĩigẽ. Sebrã segd n wilgda tʋʋm nins b sẽn tog n maan semen fãa wã, wala pɩɩsgã, fenetr dãmbã la taabl dãmbã yẽesgo, sagdã lobre, tẽngã la kabine wã pekr la yɛl a taaba. B tõeeme n maand tʋʋm a taab wakat-wakat bala, wala zombdsã, rido rãmbã, la teed nins sẽn tʋmd ne kʋʋrã wã yẽesg bɩ b pekr sõmb-sõmbo. B segd n bĩnga safãnã la tɩt nins fãa b sẽn tar n pekdẽ la b yẽesdẽ wã zĩig ning kambã sẽn ka tõe n taẽ. Sẽn paase, b segd n gʋlsame n wilg sẽn yaa tɩt nins vẽenega, n paas b sẽn segd n tʋm ne-b to-to wã koɛɛg-koɛɛga.
5. Gũus tɩ yell ra wa maanã yõod taa zĩ-bʋgo, la bõe la b segd n gũusd n get wakat-wakate? (Ges-y zĩ-gũbrã sẽn be seb-neng a 4 zugu.)
5 Sõng tɩ yell ra zĩnd Rĩungã Roogẽ wã yaa bũmb sẽn segd n pak-d n yɩɩda. (Tõo. 22:8) Zĩ-kãngã wɛɛngẽ, zĩ-gũbrã sẽn be seb-neng a 4 zug wilgda bõn-yood kẽer d sẽn segd n gũusd n get wakat-wakate, sẽn na yɩl tɩ yell da wa maan ye.
6. Wãn-wãn la b tõe n sigl Rĩungã Roog zãabo?
6 Ri̇̃ungã Roog zãabo: Rĩungã Roog zãab yell zaoo kãsem dãmbã sull zugu. Naoor wʋsgo, yaa kãsem soab bɩ kãsemb sõngd la b yãkd t’a ges tʋʋmdã yelle. A siginda Rĩung Roogã yell gesg tʋʋm daar fãa, n modgdẽ t’a yaa yɩlemde, la tɩ b zãad-a t’a yaa sõma, la a leb n modgdẽ tɩ roogã zãab tʋʋm-teed beẽ tɩ seke. Tara yõod wʋsg tɩ bũmb sẽn tõe n wa wa ne yell ra zĩnd Roogã pʋgẽ bɩ zĩigẽ wã ye. Tigims a yiib bɩ sẽn yɩɩd woto sã n tigimd taab Rĩung Ro-yɛng pʋgẽ, kãsem dãmbã sul yãkda Rĩungã Roog zãab yel-gesg sulli, t’a maan segls Rĩungã Roog la zĩigã zãab yĩnga. Sul-kãng tʋmda kãsem dãmb sulã sor-wilgr pʋgẽ.
7. a) Yʋʋmd fãa, bõe la b segd n maan sẽn na yɩl tɩ Rĩungã Roog paam zãab sõma? b) Yel-bʋs la d segd n gũusd n maand wakat-wakate? (Ges-y zĩ-gũbrã sẽn be seb-neng a 5 wã zugã.)
7 Yʋʋmd fãa, b segd n vaeesa Rĩungã Roog sõma n gese. Yaa kãsem dãmbã n segd n maan segls tɩ b ges bũmb nins b sẽn segd n maanã yell sõma. B tõe n kosa koe-moondbã tɩ b sõng ne manegrã tʋʋma. Neba fãa segd n gũusa yel-bõonesã fãa tɩ bũmb sã n baood manegr bɩ b kɩt tɩ b maneg tao-tao. Tigims gĩnd yel-gɛtã kaagr wakate, a tõeeme n wilg kãsem dãmbã bũmb sẽn tõe n beẽ n baood manegre, tɩ b segd n maneg-a tao-tao.
8. Wakat bʋg la kãsem dãmbã tõe n kos biru ning sẽn get Rĩungã Rot meeb yell Sosiete wã tʋʋmd willẽ wã sõngre?
8 Kãsem dãmbã sã n yã tɩ yaa tɩlae tɩ b paam sagls bɩ sõngr Rĩungã Roog manegr yĩnga, b tõe n yãa biru ning sẽn get Rĩung Rotã meeb yellã sẽn be Sosiete wã tʋʋmd willẽ wã. B segd n maana woto, sã n wa yaa maneg-kãsems wala yɛl sẽn tɩ loe ne wʋmbã teedo, pẽntiir bɩ vɛrni ningri, ne roogã sugri, la yɛl a taaba. La yaa tigingã n segd n ges maneg-bõonesã yelle. Baasg zãngã, wakat fãa kãsem dãmbã tõe n kosa biru ning yell b sẽn gom zugẽ wã sõngre.
9. B sã n dat n dɩk ãnterpiriiz bɩ ned t’a wa maan tʋʋmdã, no-bʋs la b segd n tũ?
9 D rɩk tigingã ligd n tʋm ne yam: Yaa yamleoog tʋm-tʋmdb n maand Rĩungã Roog la a zĩigã tʋʋm fãa la bala. Modgr ning b sẽn maandã wilgda b nonglmã sõma, la sõngd n boogd depãens rãmbã me. Sã n wa yaa tɩlae tɩ b rɩk ãnterpernɛɛr t’a maan tʋʋmd ninga, wala kabine wã vaagre, minizieemd bɩ meeb tʋʋmde, kãsem dãmbã tõe n baoo ãnterpiriiz rãmb toɛy-toɛy sẽn tõe n maan tʋʋmdã. B na n deng n gʋls n bilga tʋʋmd ning b sen segd n maanã neer la teed nins b sẽn dat fãa wã sebr zugu. B na n kɩsa seb-kãng ãnterpiriiz bɩ neb nins sẽn tõe n maan tʋʋmdã tɩ b fãa bãng b sẽn baood tɩ b maanã, n tõog n geel tʋʋmdã ligd sẽn na n ta to-to n wilgi. Ãnterpiriiz rãmb bɩ nin-kãensã sã n wilg kãsem dãmbã bãmb ned kam fãa tʋʋmd ligd sẽn na n ta to-to, rẽ, kãsem dãmbã tõe n yãka sẽn ya a sõma n yɩɩdã. Baa saam-biig sã n yeel tɩ yẽ tõe n maana tʋʋmdã bɩ a kõ teed nins b sẽn datã n wilg a ligd takɩ, b segd n tũu Sosiete wã no-kãensã.
10. Bõe la b segd n maan sẽn na yɩl tɩ b rɩk tigingã ligd n tʋm ne manesem sẽn segde?
10 Tigims a yiib bɩ sẽn yɩɩd woto sã n tigimd Rĩung Ro-yɛng pʋgẽ, Rĩungã Roog zãab yel-gesg sull tõe n bĩngda ligd toor Rĩungã Roog zãab yĩnga, tɩ kiuug fãa bɩ b gʋls sebr n wilgd tiging fãa kãsem dãmb sull t’a bãng b sẽn tʋmd ne ligdã to-to. Yaa kãsem dãmbã n segd n ges tɩ b rɩk tigingã ligd n tʋm ne manesem sẽn segde.
11. Rĩungã Roog maneg-kãsems sã n yaa tɩlae, bõe la b segd n maane?
11 Rĩungã Roog maneg-kãsemse: Rĩungã Roog zãab yel-gesg sull sã n yã tɩ Rĩungã Roog rata maneg-kãsenga, sul-kãng neb togsda kãsem dãmb sulã yellã n paam sor-wilgri. B sã n bãng tɩ maneg-kãseng yaa tɩlae, bɩ b mikame tɩ tigims nins sẽn tigimd be wã rata yɩng neb sõngre, kãsem dãmbã na n yãa biru ning sẽn get-a meebã yell Sosiete wã tʋʋmd willẽ. Saam-bi-kãensã sẽn tar tõog la minimã tõe n kõo sagls sẽn yaa sõma la b sõng n ges tʋʋmdã yell neere. Depãens kãseng sã n kẽed sʋka, b segd n geel n bãnga tʋʋma ligd takɩ n segl no-sɩɩr sẽn na yɩl tɩ tigingã neb rɩke.—Ges-y Yãmb sogsgã leoorã sẽn be yʋʋmd 1994, wao-fugdg kiuugã Rĩungã Tʋʋmd pʋgẽ wã.
12. Wãn to la d tõe n wilg d mi-beoog zu-noog ning d sẽn tar n tigimd taab Rĩungã Roogẽ wã yĩnga?
12 Ad d sũur nooma ne zu-noog ning d sẽn tar n tõe n tigim taab Rĩungã Roogẽ wã! D ka tog n maan laas-laas ne tigissã bɩ n ges-b wala bũmb sẽn ka yõod ye. Tõnd fãa sã n sõngd wa d sẽn tõe tɛk n zãad Rĩungã Rot sõma, d na n ket n paamd n tigimda taab la d kengd taab raood sõma. Woto zẽkda baleng yɩlemdã la waoogd a Zeova yʋʋrã. Bɩ d rɩk sard sẽn ka vigsd n zã d balengã zĩig t’a yɩ sõma.
[Zĩ-gũbri, seb-neng a 4]
Bũmb nins b sẽn segd n ges tɩ yell ra wa maanã:
◻ B segd n wilga roogã yiib zĩis la a ɛskalie rãmb zĩis vẽenega, n maan tɩ zĩ-kãens tar vẽenem tɩ seke, tɩ b tõe n ta be nana-nana.
◻ Teedã bĩngr dot la kabine wã pʋs segd n yɩɩ yɩlma, tɩ teed sẽn tõe n yõk bugum tao-tao, teed ned sẽn so bɩ sagd ra zĩnd a pʋgẽ ye.
◻ B segd n vaeesa roogã sugr la sugrã kogs n gese, n yiisd rẽgdã wakat fãa.
◻ B segd n ninga vẽenem tɩ sek zĩ-kẽndsẽ wã la wiidi bɩ mobilã gaarg zĩisẽ, la b yiis bũmb ning fãa sẽn tõe n kɩt tɩ ned salg bɩ a lʋɩ.
◻ Wakat fãa b segd n vaeesda kʋʋrã wã teed la vãntɩlatɛɛr dãmbã n getẽ la b manegd-ba.
◻ Roogã sã n yũund zĩig ning bɩ b maneg rẽ tao-tao tɩ pʋgẽ wã ra wa lebg maasr n wa ne yɛl ye.
◻ Ned sã n ka be Rĩung Roogẽ b segd n sog-a-la sõma.
[Zĩ-gũbri, seb-neng a 5]
Roogã la zĩigã zãabo
◻ Yɩngã: Sugrã, lalgã poore, pẽntiirã, fenetã wã, Rĩungã Roog pano manegame tɩ yaa sõma bɩ?
◻ Zĩigã: Zĩigã manegame tɩ yaa sõma bɩ? Neba kẽn zĩisẽ, lalgã sẽn gubgã, la montɛyã la mobilã gaarg zĩig yaa sõma bɩ?
◻ Pʋgẽ wã: Rẽ yĩnga, tapi rãmbã, rido rãmbã, zombdsã, te-ningdɩ wã la te-nagsdɩ, pẽntiirã, sɛbã sẽn bĩngd zĩig ningã, goeelsã la kʋɩlemsã ne feneta wã vɛrni (zĩis nins b sẽn tar dẽ wã) sakda gesg bɩ? Sɛbã roglg taabl la wʋmbã teed zĩig manega sõma bɩ?
◻ Roogã teedo: Ãmpull dãmbã, wʋmbã teedo, la vãntɩlatɛɛr dãmbã yaa sõma bɩ?
◻ Kabine wã: Kabine wã yaa yɩlemd la sõma bɩ?
◻ Tigingã sɛba: (Zĩis nins b sẽn yaood fagtiir dãmbã) B yaooda kʋʋra wã la koomã fagtiir dãmb wakat fãa la b bĩngd-b neer bɩ?