B tara komslem, la b tʋʋmã yaool n womda biisi
1 Yãmb sã n be a Zeova Kaset rãmb nins sẽn tar komslmã sʋka, bɩ y bãng tɩ y ket n tõe n mooname tɩ wom biisi. Sɩd me, yãmb komslmã tõe n kɩtame tɩ y paam soay sẽn pa wõnd a taab n kõ kasetã la y keng neb a taab raoodo.
2 Soay nins y sẽn tar n tõe n kõ kasetã: Neb wʋsg sẽn yaa koms rãmb kẽesda b mens zãng-zãng koe-moonegã pʋgẽ. Wala makre, saam-bi-poak b sẽn maan wopeere t’a ka le tõe n kẽn la a gom sõma yãame t’a sɩdã sã n gaar a mobillã sorã naoã rãmb sẽn kẽndẽ wã noore, a tõe n kãaba nebã zʋrno rãmba. Vugri, a basa zʋrno rãmb 80 lɛɛr a yiib pʋgẽ bala. Yãmb komslmã leb n kɩtame tɩ y tõe n yã neba, b sẽn da ka na n tõogẽ n yãẽ nana-nana ne manesem a taaba. Sẽn yaa woto wã, bɩ y ges nin-kãensã wa yãmb mengã mooneg zĩigẽ neba.
3 Yãmb moonegã tõe n woma biis wʋsgo. Neb a taabã sã n ne yãmb yẽesmã la Biiblã sɩd sẽn toeem yãmb vɩɩmã tɩ lebg sõma wã, rẽ tõe n kɩtame tɩ Rĩungã koɛɛg yamleoog kẽ-ba. Sẽn paase, yãmb sã n seg neb sẽn namsd ne zu-loeese, yãmb sẽn vɩɩmd n yã bũmb ningã tõe n sõng-y lame tɩ y tik Wẽnnaam Gomdã zug n bels-ba.—2 Kor. 1:4.
4 Yãmb tõe n kenga neb a taabã raoodo: B ninga saam-bi-poak a Laurel Nisbet vʋʋsem masĩn pʋgẽ t’a maan yʋʋm 37 be, ne rẽ fãa a sõnga neb 17 tɩ b paam Biiblã sɩd bãngr hakɩka. Rẽ yĩnga a vɩɩmã kɩbar pa kengd yãmb raood sɩda? Woto, yãmb me mak-sõngã tõe n kenga y tẽed-n-taasã raood tɩ b modg n paas a Zeova tʋʋmdã pʋgẽ.—g93 22/1 s.n. 18-21.
5 Baa yãmb komslmã sã n kɩtame tɩ y ka tõe n yi moonegã wʋsg wa y sẽn da rat to-to wã, ne rẽ fãa y tõe n kenga neb a taabã raoodo. Saam-biig a yembr yeelame: “Mam yãame tɩ baa ned sẽn tar yĩns komslem sẽn yaa kãseng tõe n sõnga neb a taab wʋsgo. Maam ne m pagã yɩɩ sõngr n kõ tigingã neb toɛy-toɛy wakat fãa. Tõnd komslmã yĩng kɩtame tɩ b tõe n yã tõnd wakat fãa n paam sõngre.” Baasg zãnga, d miime tɩ y yĩns komslmã yĩng kɩtame tɩ ka wakat fãa la y na n tõog n tʋm tɩ ta wala y yẽesmã sẽn baood tɩ y maanã ye. Ne rẽ fãa, y sã n paam sõngre, y tõe n ket n moonda koe-noogã. Woto yĩnga, y sã n baooda sõngr bɩ y togs kãsem dãmbã bɩ tigingã neb a taab sẽn tõe n kõ-y sõngre.
6 A Zeova nee bũmb nins fãa yãmb sẽn maand n balemd-a wã, t’a sũur noom ne yãmb sẽn maand a raabã ne y sũur fãa wã. (Yɩɩl 139:1-4) Y sã n teeg-a, a na n kõ-y-la pãng tɩ y ket n moond koe-noogã sõma tɩ womd biisi.—2 Kor. 12:7-10.