Watchtower SƐB VAEESG ZĨIGA
Watchtower
SƐB VAEESG ZĨIGA
Moore
  • BIIBLE
  • SƐBA
  • TIGISSÃ
  • km01 Tʋʋlg kiuugu s.n. 3-6
  • Tʋʋl-nif kiuugã yaa wakat d sẽn segd n ‘tʋm la d mao’ wʋsgo

Video pa be zĩ-kãngã ye.

Video wã pa tõog n yi ye.

  • Tʋʋl-nif kiuugã yaa wakat d sẽn segd n ‘tʋm la d mao’ wʋsgo
  • Yʋʋmd 2001 Rĩungã tʋʋmde
  • Bũmb sẽn wõnd woto
  • D tõe n kɩtame tɩ yʋʋmd 2000 tʋʋl-nif kiuugã sãoog pĩnd kiisã bɩ?
    Yʋʋmd 2000 Rĩungã tʋʋmde
  • ‘Togs-y Wẽnnaam koɛɛgã fãa zãnga’
    Yʋʋmd 2002 Rĩungã tʋʋmde
  • Bɩ d tall yẽesem ne tʋʋm sõma maanego!
    Yʋʋmd 2003 Rĩungã tʋʋmde
  • “Bɩ d maan neba fãa yel-sõmde”
    Yʋʋmd 2002 Rĩungã tʋʋmde
Bũmb a taaba
Yʋʋmd 2001 Rĩungã tʋʋmde
km01 Tʋʋlg kiuugu s.n. 3-6

Tʋʋl-nif kiuugã yaa wakat d sẽn segd n ‘tʋm la d mao’ wʋsgo

1 Tẽegrã wakat yaa bʋgsg sasa ne a Zeova nin-buiidã. Yaa wakat kãng la d segd n bʋgs bũmb ning a Zezi kũumã sẽn pidsã zugu. Leb n yaa wakat d sẽn segd n tags saagr ning Wẽnnaam sẽn kõ-dã zug sõma. Ya a Zezi sẽn daag a zɩɩmã n kɩt tɩ d tõe n paam saag-kãnga. Y sã n lebg n tags rɩẽ tʋʋl-nif kiuug rasem 19 wã yelle, bõe n wat y yamẽ? Y tẽra neb nins y sẽn yã Tẽegrẽ wã zaab-kãngã bɩ? Y tẽra yamleoog ning sẽn da be sʋk be wã bɩ? Y tẽra sõsg sẽn yaa sõma wã b sẽn kõ wã, la pʋʋsg sẽn yit sũurẽ b sẽn maanã bɩ? Tõe tɩ y rɩka sard kãn-kãe n wilg y mi-beoog ne a Zeova la a Zezi b sẽn tall nonglem ne-yã yĩnga. Bõe la bʋgsg a woto na n tus-y tɩ y maane?

2 Yaa vẽeneg tɩ ne a Zeova nin-buiidã, ka ne noor bal la b wilgd b mi-beoog ye. (Kol. 3:15, 17) Sẽn yɩɩd fãa, rɩẽ tʋʋl-nif kiuugã d wilga d mi-beoog ne a Zeova, a sẽn dɩk segls n na n fãag-dã yĩnga, n modg wʋsg ne koe-noogã moonego. Koe-moondb nins sẽn yɩ sõngr so-pakdbã sõor yɩɩga pĩnd sõor sẽn sãdã Afirik tẽn-sʋk la a nin-taoor tẽnsã pʋsẽ. Wala makre, Togo paama sõor sẽn sãd paalg sẽn yɩɩd pĩndã rɩẽ tʋʋl-nif kiuugã, ne sõngr so-pakdb 1778. Sõor kãngã zʋʋga pĩnd sõor sẽn sãdã 21 koabg zugu. Sẽnegalle, sõngr so-pakdbã sõor yɩɩ 196, tɩ woto zʋʋg pĩnd sõor sẽn sãdã sẽn yɩɩd 17 koabg zugu. So-pakdbã ne koe-moondb a taaba fãa sẽn lagem taab n modgã kɩtame tɩ d paam sõor sẽn sãd toɛ-toɛy lɛɛr dãmbẽ wã, zʋrno rãmb d sẽn basã, la lebg-n-tɩ-ges rãmbã sõor pʋsẽ. Tõnd sẽn yã tɩ neb kobs sɩnga Biibl zãmsgã, tɩ nebã sẽn wa Tẽegrã sõor yɩɩg pĩndã paasa tõnd sũ-noogo!

3 Sɩda, tõnd saagrã sẽn yaa waazibã yãngda tõnd yẽesem tʋʋmdã pʋgẽ. Yaa wala tʋm-tʋmd a Poll sẽn gʋlsã bala: “Woto yĩnga, tõnd tʋmdame la d maoodẽ; tɩ bõe, tõnd teegda Wẽnnaam sẽn vɩ n yaa neba fãa Fãagdã, la b yaa tẽedba rẽnd n yɩɩda.”—1 Tɩm. 4:10.

4 Wãn to la y na n wilg tɩ y tara tẽeb ne segls nins a Zeova sẽn maan vɩɩmã yĩng Tẽegrã sasa? Rɩẽ tʋʋl-nif kiuugã, tẽns wʋsg paama Rĩungã koe-moondb sõor sẽn sãd paala. D na n paama sõor sẽn sãd paal tʋʋl-nif kiuugã bɩ? Tõnd sõorã na n yɩɩga woto tʋʋl-nif kiuugã sẽn watã bɩ? Sɩd tõeeme. La sẽn na yɩl tɩ yɩ woto, dɩlla koe-moond fãa, a reeg lisg t’a ka reeg lisg me, moone. Tõeeme tɩ nin-paals wʋsg tõog n tall zʋg-sõma nins b sẽn baoodã n moone. Woto, tags-y n bao y sẽn na n maaneg n tõog n tʋm wʋsg la y modg sõma koe-moonegã pʋgẽ tʋʋl-nif kiuugã. Wakat kãng bɩ y ges bũmb ning y sẽn tõe n maan n tus neb a taaba, wala b rãmb nins minim sẽn ka ta yãmbã, tɩ b wa yãag-y tʋʋmdã pʋgẽ.

5 D sõng neb kẽer tɩ b leb n sɩng moonego: Yãmb sã n mi neb kẽer sẽn ka yi koe-mooneg na ta kiuug bɩ kiis a yiibu, y tõe n daoola ned a woto buudu. Y leb n tõe n kos-a lame t’a wa yãag-y koe-moonegã pʋgẽ. Neb sã n be tigingã pʋgẽ n ka le moondẽ, kẽem dãmbã na n maana modgr wʋsg n tɩ ges-ba, la b raool-b tɩ b leb n sɩng mooneg tʋʋl-nif kiuugã.

6 Tõnd fãa tog n ket n kota a Zeova vʋʋsem sõngã sẽn na yɩl n paam pãng a tʋʋmdã pʋgẽ. (Luk 11:13) Bõe la d tog n maan n tõog n paam vʋʋsem sõngã? D tog n karma Wẽnnaam Gomdã vʋʋsem sõng sẽn vẽnegã. (2 Tɩm. 3:16, 17) D togame me n ‘kelg Wẽnd vʋʋsem koɛɛgã ne b tigingã!’ (Wil. 3:6, Sebr Sõngo) La yaa d sẽn na n debd tigiss a nu wã fãa rasem a yopoe fãa pʋgẽ la d tõogd n maan dẽ. Masã la wakat ning d sẽn segd n sõng sẽn moond-b n vaandẽ wã la sẽn ka le moond-bã tɩ b zãmsd sõma n paasdẽ la b rebd tigissã wakat fãa. (Yɩɩl 50:23) D maanda rẽ la d gũusd n get d tẽebã yell sõma. La bũmb a to la b baood tɩ d maan me.

7 Tʋm-tʋmd a Pɩɛɛr wilgame tɩ Wẽnnaam kõta a vʋʋsem sõngã “neb nins sẽn sakd bãmba.” (Tʋʋ. 5:32) Sakr a woto baoodame tɩ d tũ noor ning b sẽn kõ tɩ d ‘moon neba sʋk n kɩs kasetã.’ (Tʋʋ. 1:8; 10:42) Yaa sɩd tɩ d rata Wẽnnaam vʋʋsem sõngã sẽn na yɩl n paam pãng n moone. Baa ne rẽ, d sã n sɩng n wilgd tɩ d tʋll n taa Wẽnnaam yam me, a na n le sõng-d lame n paase. Bɩ d ra tol n ges tɩ d sẽn sɩng sakr woto wã yaa bũmb sẽn ka tar yõod ye!

8 D sõng kambã: Roagdba, yãmb zoe n yãame tɩ y kambã rat n goma ne neb a taabã sɩdã yell bɩ? B minim n yãagda yãmb koe-moonegã pʋgẽ bɩ? B zʋgã yaa sõma bɩ? Sã n yaa woto, y tõe n tɩ yãa tigingã tʋʋmd sull ned a yembre, tɩ b ges y biigã sã n tara zʋg-sõma nins b sẽn baoodã n tõe n lebg koe-moond tʋʋl-nif kiuugã. (Ges-y Notre Ministère sebrã, seb-neng 100.) Bãng-y tɩ y kambã tõeeme n naag n pẽg a Zeova sõma Tẽegrã wakat sẽn watã.—Mat. 21:15, 16.

9 Wakat fãa, kiris-ned sẽn yaa ma n da raoond a bi-pugl kɩdg t’a gomd ne neb a taabã a Zeova yelle. Rɩẽ, vugri bi-puglã ra wa n moonda ne a ma wã. A basa Baood seb-bilã ne rao la a wilg sebrã gom-zut võyã. Raoã sʋka biigã: “Fo tara yʋʋm a wãna?” T’a yeel tɩ “yʋʋm a yopoe.” A sẽn tõog n wilg koɛɛgã sõma woto wã linga raoã, bala yẽ sẽn da wa n yaa yãagã a maana tũud-n-taar ne a Zeova Kaset rãmbã, la a zɩ n sak sɩdã zãng a vɩɩmã pʋgẽ ye. Pa kaoos la b sɩng Biibl zãmsg ne raoã, a pagã, la ne a bi-puglã ye.

10 Kamb wʋsg n zoe n yaa koe-moondba, la d sũy nooma b sẽn naagd tõnd n moondẽ wã. Kom-kãensã tõe n daoola b kom-taasã. Sẽn paase, tʋʋl-nif kiuugã le yaa wakat sẽn zems n kõ zak fãa neb tɩ b paas b zems-n-taarã la b tẽebã pãngã. Tõe n yɩɩ woto, b sã n lagem taab n tʋm Wẽnd-baleng tʋʋmdã pʋgẽ. Yaa zak soben dãmbã n segd n kõ mak-sõng yel-kãngã pʋgẽ.—Yel. 24:27.

11 D sõng nin-paalsã: La yaa wãn to ne nin-paalsã y sẽn zãmsd Biiblã ne wã? B tõe n sõnga ne koe-moonegã d sẽn na n modg wʋsg n moon tʋʋl-nif kiuugã bɩ? Tõe tɩ y sẽn da wa n zãmsd Bãngr sebrã ne neda, sak a 2, sull 22, bɩ sak 11, sull 14, b wilgame tɩ b tʋll n togsa neb a taabã bũmb ning a sẽn zãmsdã. Y sã n wa kolgd sebrã baasgẽ, bɩ y segl n sõs ne-a yellã zug vẽenega. Y tõe n maana woto, y sã n wa zãmsd ne-a sak 18, sull a 8 wã. B yeta be woto: “Tõe tɩ y rata ne y sũur fãa, n togs y sẽn zãmsd bũmb ningã y roagdbã, y zo-rãmbã la neb a taabã. Sɩda, tõe tɩ y zoe n maanda woto, wa a Zezi sẽn wilg koe-noogã neb a taabã sasa sẽn pa yãk wakat mengã. (Luk 10:38, 39; Zã 4:6-15) Tõe tɩ masã wã y rat n maaname tɩ yɩɩg rẽ.” Yaa woto me ne neb nins sẽn zãmsd ne yãmbã bɩ?

12 Yãmb karen-biigã tẽeda Wẽnnaam Gomdã bɩ? A zoe n tũuda Biiblã noy bɩ? A tũuda Wẽnnaam noyã a vɩɩmã pʋgẽ bɩ? A wata tigissã bɩ? A rat n yɩɩ Wẽnnaam a Zeova sõgen bɩ? Sã n yaa woto, bɩ y raool-a t’a togs kẽem dãmbã. Dẽ b na n gesa a sã n tara zʋg-sõma nins b sẽn baoodã n tõe n lebg koe-moond sẽn ka reeg lisg n naag-y n moon tʋʋl-nif kiuugã. (Ges-y Notre Ministère sebrã, seb-neng 98-9.) Woto, a mengã na n yãame t’a Zeova siglgã na n teel-a-la a Zeova sõgenegã pʋgẽ.

13 Karen-biis kẽer bɩta tao-tao n yɩɩd b taab tẽebã wɛɛngẽ. Dẽ, neb kẽer tũu sagls nins b sẽn kõ yʋʋmd 2000, sigr kiuug D Rĩungã Ministɛɛrã pʋgẽ, seb-neng a 4, sull a 5-6, n zãmsd sebr a yiib-n-soab ne karen-biis kẽere. Yaa b rãmb nins sẽn wilg nonglem ne sɩdã pipi, tɩ yaool n yaa tɩlae tɩ b paam sõngr n paas n tõog n lagemd ne tigingã neb sõma-sõma wã. Wakat fãa, d ket n saagdame tɩ “sã n yɩ bilf walla a sã n kaoose,” bɩ pʋ-peelem dãmb a woto lebg Kirist karen-biis hakɩka. (Tʋʋ. 26:29) La sã n mikame tɩ y zãmsa ne a soabã n ‘kaoos’ kiis wʋsgo, tõeeme tɩ Tẽegrã sasa yɩ wakat sẽn zems ne karen-biigã t’a sɩng n wilgd a mi-beoog wʋsgo, Kirist sẽn yao tõnd yel-wẽnã samdã yĩnga.

14 D sẽn na n sõng-b tɩ b moon koe-noogã to-to: D sã n ges a Zezi sẽn zãms a karen-biisã to-to wã, d tõe n bãnga d sẽn na n maan to-to n sõng karen-biis nins sẽn tar zʋg-sõma nins b sẽn baoodã tɩ b sɩng koe-moonego. A pa yã kʋʋng bal n tees-b a tʋm-tʋmdbã tɩ b tɩ sɩng mooneg ye. A rengame n wilg vẽeneg tɩ moonegã tʋʋmd tara yõodo. A sagl-b lame tɩ b yɩ neb sẽn nong pʋʋsgo, la a kõ-b bõn-kãsems a tãabo: yaa tũud-n-taaga, mooneg zĩiga, la koɛɛga. (Mat. 9:35-38; 10:5-7; Mark 6:7; Luk 9:2, 6) Yãmb me tõe n maana woto. Yaa y meng biiga, karen-bi-paalga, tɩ yaa ned sẽn bas moonegã wakat a wãn pʋgẽ me, yɩtẽ-la sõma tɩ y modg wʋsg n maan bũmb nins sẽn pʋgdã.

15 Wilg-y vẽeneg tɩ moonegã yaa tɩlae: Kɩt-y tɩ nedã bãng vẽeneg tɩ moonegã tʋʋmd tara yõodo. Tall-y yam-sõng ne tʋʋmdã. Togs-y kɩbay sẽn wilgd bũmb ning tigingã sẽn maan koe-moonegã pʋgẽ. Tall-y yam ning a Zezi sẽn tall tɩ b wilg Matɩe 9:36-38 pʋgẽ wã. Raool-y karen-biigã bɩ ned ning sẽn ka le moondã t’a pʋʋs sẽn na yɩl n wa tõog n sɩng moonego, la sẽn na yɩl tɩ tʋʋmdã kẽng taoor dũniyã gill zugu.

16 Kɩt-y tɩ nedã bãng t’a tõe n tũnuga ne soay wʋsg n kõ kasetã: Togs-y-yã-a t’a tõe n tũu sebrã zãmsg sull neb n moon zak-zaka. Sagl-y-yã-a t’a sõs ne a roagdb la a mitinsi, bɩ ne a tʋmd-n-taas la a karen-bi-taas vʋʋsgã wakate. Koe-moond sã n wa rɩk mobill n debd zĩig ninga, a sã n tall zood manesem ne neb a taabã sẽn be be wã, a tõe n sɩnga sõasg ne neba. D sã n deng n yãk yam n na n sõs ne nebã, rẽ na n paka sor n kõ-d tɩ kõ kaset sẽn yaa sõma. Sɩd-sɩda, d tara soay wʋsg n na n taas neb a taabã tõnd saagrã “daar fãa.”—Yɩɩl 96:2, 3.

17 La yɩtẽ-la sõma n yɩɩd tɩ yãmb ne koe-moond paalgã ra kaoos la y sɩng n moond ne taab zak-zak ye. Y sã n yãka bõn-datl n dat n moon sõma n paas tʋʋl-nif kiuugã, bɩ y kos sẽn get-a mooneg zĩisã yell t’a kõ-y mooneg zĩig sẽn zemse. Rẽ na n kõ-y-la sor tɩ y tõog n moon zĩ-kãng sõma-sõma. Wala makre, yãmb sã n moon n sa, bɩ n debd tigiss bɩ zĩis a taaba, y tõe n yãa ned yiri, zak ned sẽn da kaẽ bɩ neb sẽn da kelgẽ sõma. Zĩig ning rẽ sẽn zemsã, bɩ y bao n sõs ne a soabã koɛɛg-koɛɛga. Dẽ, y na n yãame tɩ y maana bũmb sẽn tar yõodo, la y sũ-noogã koe-moonegã pʋgẽ na n paasame.

18 Segl-y koɛɛg sẽn be yamleoogo: Ned tõe n datame n taas Rĩungã koɛɛg neb a taabã, la ka vẽeneg t’a tara bas-m-yam ne a sẽn na n taas-a to-to wã ye. Sẽn yɩɩd fãa, yaa woto, a soabã sã n sɩnga mooneg paalem bɩ a kaoosame n yi moonego. D sã n sõng nin-paalsã la sẽn bas-b moonegã tɩ b segle, rẽ ka sẽk sãoong ye. Baa Tʋʋmdã tigiss la moonegã yiib tigiss sẽn sõngd tõnd ne sagl-sõma wã, segl-m-mengã yaa tɩlae.

19 Wãn to la y tõe n sõng nin-paalsã tɩ b segl moonegã yĩnga? Sɩng-y ne zʋrno rãmbã wilgri, la y maan tɩ wilgrã yɩ nana la koɛɛga. Kos-y-b tɩ b tags n bao dũni wã kɩbay sẽn gomd yɛl sẽn pak moonegã zĩigẽ neba. Rẽ poor bɩ b bao kɩbay yaoolem zʋrno rãmbã pʋsẽ sẽn tɩ loe ne kɩba-kãense. Naag-y taab n mak wilgrã n gese, la y ra kaoos la y tũnug ne-a koe-moonegã pʋgẽ ye.

20 D sõng sẽn nong-b sɩdã sẽn na yɩl tɩ fɩɩgr zĩnd beoog-daare: Rɩẽ, dũniyã gill zugu, neb nins sẽn wa Tẽegrã sõor yɩɩga milyõ 14 la pʋɩ-sʋka. Koe-moondbã sõor yɩɩga milyõ a yoob bilf bala. Woto rat n yeelame tɩ sẽn yɩɩd neb milyõ a nii la pʋɩ-sʋk n da nong sɩdã tɩ sek b na wa Tẽegrã. Beenẽ, b wʋma Biiblã zãms-kãsemsã a yembr võore. B paam n bãnga neb kẽer tõnd sʋkã, tɩ rẽ yɩ-b noogo. Bãmb wʋsg pẽgda tõndo, la b maand kũun n teend dũni gill tʋʋmdã. B leb n gomd n sõngda tõnd neb a taab taoore. Sul-kãngã neb sẽn yaa wʋsgã tõe n wa kɩtame tɩ fɩɩgr zĩnd beoog-daare. Bõe la d tõe n maan n sõng-b tɩ b bɩ n paas tẽebã wɛɛngẽ?

21 Nin-paals wʋsg sẽn yɩɩd sẽn wat Tẽegrã, yaa tõnd mengã n bool-ba. Woto rat n yeelame tɩ b mii ba yaa ned a yembr kɛlgdbã sʋka. Sã n yaa tõnd n bool ned t’a wa, d segd n maaname t’a soabã bãng tɩ d sũur nooma ne a waoongã, la d sõng-a t’a rɩ sõsgã nafa sõma. Roogã sẽn na n pid nebã yĩngã, sõng-y-yã-a t’a paam zĩiga. Peng-y-yã-a Biibli, la y kɩt t’a naag-y n yɩɩl y yɩɩllã sebr pʋgẽ. A sã n sʋk bũmb fãa, bɩ y leoke. Yãmb sã n sõng-a sõma woto, tõe n paasa a nonglmã ne sɩdã. Yaa sɩd tɩ zɩɩb a woto zaoo tõnd ned kam fãa zugu. Tõnd sã n yã ned d sẽn ka mi, bɩ d pʋʋs-a la d sõs ne-a bilf n paam n bãng-a.

22 Tẽegrẽ wã waoong tõe n sɩd toeema ned tagsgo, la leb n wilgdẽ me t’a ka yã a sẽn baoodã zĩig a to ye. Woto leb n wilgdame t’a tagsdame t’a segd n vaeesa tõnd sẽn togsda neer n paase. Nedã ka wʋmd a Zeova nonglmã sẽn ka koakã võor tɩ sek ye. A sẽn wʋm a Zezi sẽn yao tõnd yel-wẽnã samdã võorã tõe n yɩɩ vẽnegr sẽn yaa kãseng n kõ nedã. Zĩig pʋgẽ bala, a tõe n yãame tɩ tõnd yaa toore: tɩ d yaa pʋ-peelem dãmba, neb sẽn tar zood manesem, sẽn nong la sẽn waoogd neba. A na n yãame tɩ tõnd roogã ka wõnd egiliiz rãmbã sẽn nags ne bõn-naands tɩ b maand yɛl sẽn ka yõod b pʋsẽ wã ye. Nin-paalsã na n yãame me tɩ neb buud toɛ-toɛy n be kɛlgdbã sʋka, la tɩ b ka kot ligd ye. Bõn-kãensã a sẽn na n yã wã tõe n tus-a lame t’a leb n wa.

23 Nin-paalg fãa sẽn wa Tẽegrẽ wã, koe-moond n segd n lebg n tɩ sõngd-a Tẽegrã poore. Yãmb sã n bool ned t’a wa, yãmb n segd n lebg n tɩ ges-a. Togs-y-yã-a tɩ tigiss a taab n maand Rĩungã Roogẽ t’a nan pa loog ye. Togs-y-yã-a zãma sõasg ning sẽn na n pʋglã gom-zugu. Wilg-y-yã-a Tigingã sebr zãmsg ning sẽn pẽ yẽ yirã n yɩɩdã zĩig la a maaneg wakate. Rẽ poor bɩ y kõ-a Baood seb-bilã, la y wilg-a tʋʋl-nif kiuug rasem 30 semena zãmsg gom-zugu, sẽn yaa “A Zeova Kaset rãmbã sẽn sigl to-to” wã. Wilg-y-yã-a bũmb ning sẽn kɩt tɩ tigingã neb fãa segend n na n kẽng tigis-kãseng sẽn wata, t’a wakatã kolgã.

24 Maan-y segls n kẽng n tɩ kaag-a yiri. Sẽn paas Baood seb-bilã, modg-y t’a paam Bãngr sebrã. Seb-kãensã na n sõng-a lame t’a bãng Biiblã zãms-kãsemse. A sã n ka zoe n zãmsd Biiblã ne ned bɩ y kãab-a Biibl zãmsgo. Sagl-y-yã-a t’a karem Les Témoins de Jéhovah seb-bila (bɩ seb-kãngã sã n ka be, Les Témoins de Jéhovah — Unis pour faire la volonté de sur toute la terre seb-bilã). Seb-kãng wilgda tõnd siglgã sẽn tʋmd to-to. Raool-y-yã t’a ges tõnd video rãmbã, wala Toute la communauté de nos frères video wã (bɩ, rẽ sã n ka beẽ, Unis grâce à l’enseignement divin video wã). Kɩt-y t’a bãng tigingã neb a taaba. Kiis nins sẽn na n pʋglã bɩ y lebgd n tʋgd n get nin-paalsã. Bool-y-yã-a t’a wa tigissã tigims gĩnd yel-gɛtã gesg wakate, bɩ tigims gĩnd la daar a yembr tigis-kãsemsã. Kõ-y-yã-a sor t’a tõog n wilg t’a “bee yam-sõng pʋgẽ vɩɩm sẽn-kõn-sa wã yĩnga.”—Tʋʋ. 13:48, NW.

25 Kãsem dãmbã sẽn tõe n maan bũmb ninga: Sẽn na yɩl tɩ d tõog n wɩng n paas koe-moonegã pʋgẽ tʋʋl-nif kiuugã, bee wʋsg ne kãsem dãmbã. Yãmb sã n yaa sebr zãmsg taoor soaba, gʋls-y yɛl nins y sẽn na n maan n sõng yãmb sullã ned fãa t’a naag n moon tʋʋl-nif kiuugã. Ned n be yãmb sullã pʋgẽ n yaa bi-bɩɩga, nin-paalga, ned sẽn moond n vaandẽ bɩ sẽn ka le moond bɩ? Gũus-y n ges roagdbã, so-pakdbã, bɩ koe-moondb a taabã sã n sõngd-b lame. Maan-y yãmb mengã sẽn tõe fãa n sõnge. Yʋʋm a yiib pʋgẽ, saam-bi-poak n da moond n vaandẽ. A moona sẽn yɩɩd lɛɛr 50 rɩẽ tʋʋl-nif kiuugã. Bõe n sõng-a? A yeelame tɩ yaa kẽem dãmbã sẽn wa n ges-a n yɩlmã n keng a tẽebã.

26 Kãsem dãmbã la ministɛɛr sõgen dãmbã segd n lagmame n tʋm sẽn na yɩl tɩ mooneg zĩisã, zʋrno rãmbã, la sɛbã sek kiis nins sẽn watã pʋsẽ. B tõeeme n sigl mooneg yiib tigiss n paas bɩ? Sã n yaa woto, bɩ y maan segls rẽ yĩnga. Sẽn yɩɩd fãa, y mengã sã n wa pʋʋsdẽ, bɩ y kos a Zeova t’a ning modgrã d sẽn na n maan n paas Rĩungã tʋʋmdẽ kiuugã pʋgẽ wã barka.—Rom 15:30, 31; 2 Tes. 3:1.

27 Rɩẽ tiging a yembr kãsem dãmb sɩd raoola koe-moondbã tɩ b wɩng n paas ne moonegã tʋʋmde. Semen fãa, tigissẽ wã b kosa koe-moondb tɩ b gese, b sã n tõe n yɩɩ sõngr so-pakdba, la b pʋʋs rẽ yĩnga. Kãsem dãmbã la ministɛɛr sõgen dãmbã fãa wilgame tɩ b ratame tɩ tʋʋl-nif kiuugã bɩ moonegã yɩɩg kiis a taabã fãa. Wakat fãa b goma rẽ yell ne yẽesem. Rẽ kɩtame tɩ koe-moondb 58 koabg zug yɩ so-pakdb ki-kãnga. Kãsem dãmbã la ministɛɛr sõgen dãmbã fãa ra bee b sʋka.

28 Kẽes-m-meng zãngã kõta sũ-noogo: D sã n ‘tʋm la d mao’ sõma koe-moonegã pʋgẽ wata ne bark bʋse? (1 Tɩm. 4:10) Kãsem dãmb nins yell b sẽn gom zugẽ wã yeela woto tigingã sẽn moon ne yẽesem rɩẽ tʋʋl-nif kiuugã wɛɛngẽ: “Saam-biisã la saam-bi-pogsã ra nong n gomda b sẽn da nong taab la b minim taab n yɩɩdã yelle. La rẽ yɩɩ b sẽn sɩng n moond ne taab n yɩɩdã tɛka.”

29 Saam-biig sẽn yaa bi-bɩɩg n yaa koams n da tʋll me n wɩng ne koe-moonegã rɩẽ tʋʋl-nif kiuugã. A maana segls neere, t’a ma wã la tẽebã pʋgẽ saam-biis ne saam-bi-pogs sõng-a. A tõog n yɩɩ sõngr so-pakd tʋʋl-nif kiuugã, hal t’a tʋʋmdã wom biis wʋsgo. A ra tagsda wãn-wãn ne yẽ mengã sẽn kẽes a meng tʋʋmdã pʋgẽ n yã wã? A yeela woto: “Mam sẽn dog tɛka, yɩɩ pipi m sẽn ges m meng wa nin-kɛgenga.”

30 Yaa vẽeneg t’a Zeova barkda b rãmb nins sẽn tar naneb wʋsg ne b sẽn tõe n gom a naamã yellã. (Yɩɩl 145:11, 12) D sã n maand Tẽegrã, d miimi tɩ wẽn-zoeerã sẽn wat ne bark ninsã na n yɩɩ wʋsg n yɩɩg beoog-daar menga. Tʋm-tʋmd a Poll ra gũuda keoor sẽn yaa vɩɩm sẽn ka sɛtã ne yãgbo. Baasg zãnga, a ra miimi tɩ woto ra ka bũmb a sẽn na n kalemd a nus n zĩ n gũudẽ bal ye. A gʋlsame: “A yaa bõn-kãng yĩng la mam tʋmda n maood ne bãmb pãnga sẽn tʋmd tʋʋm kãsems mam pʋgẽ wã.” (Kol. 1:29) A Zeova tũnuga ne a Zezi n kõ a Poll pãng t’a maan yõe fãagr tʋʋmde. A tõe n maana woto me tõnd wakatã. Na n yɩɩ woto ne yãmb me tʋʋl-nif kiuugã sẽn watã bɩ?

[Zĩ-gũbri, seb-neng a 3]

Ãnda la yãmb tõe n daool t’a moon tʋʋl-nif kiuugã?

Y biig bɩ?

Y Biibl karen-biig bɩ?

Ned sẽn ka le moond bɩ?

    Moorã Sɛba (1991-2025)
    Pag-y
    Pak-y
    • Moore
    • Toole
    • Y sẽn date
    • Copyright © 2025 Watch Tower Bible and Tract Society of Pennsylvania
    • Y sẽn segd n sake
    • Noy d sẽn tũudi
    • Paramètres de confidentialité
    • JW.ORG
    • Pak-y
    Toole