“Bɩ d maan neba fãa yel-sõmde”
1 Yʋʋmd 2002 wao-fugdg la tʋʋlg kiisã Rĩungã Tʋʋmd seb-paasdem dãmb gom-zut la woto: ‘Togs-y Wẽnnaam koɛɛgã fãa zãnga’ la ‘Yɩ-y neb sẽn maand tʋʋm sõma wʋsgo.’ (Kol. 1:25; 1 Tɩm. 6:18, Kãab-paalga Koe-noogo) Seb-kãens pʋsẽ b ra sagla tõnd tɩ d modg n paase, n sõng neb nins sẽn dat n bãng n paasã tɩ b wa Tẽegrã, n sõng sẽn da ka le moond-bã tɩ b leb n kẽes b mens tigingã tʋʋm pʋsẽ, la d sõng d kambã la d Biibl karen-biis nins sẽn tar zʋg-sõma nins sẽn segdã tɩ b sɩng koe-noogã moonego. Sãmbg kae tɩ d sẽn modg sõma wã, d tõog n paama bi-sõma ye. Dẽ, ‘tõnd sã n paam weere, bɩ d [ket n] maand neba fãa yel-sõmde.’—Gal. 6:10.
2 Bool-y-b tɩ b leb n wa yɛsa: Tʋʋmdã kɩbay d sẽn paamã wilgdame tɩ Afirik tẽn-sʋk la a nin-taoor tẽnsã pʋsẽ, neb sẽn pa koe-moondb sõor sẽn yɩɩd tus kobs-yoob n wa Tẽegrã rɩẽ. Sẽn mik tɩ b waoongã wilgdame tɩ b rat n bãnga tẽebã yɛlã, bõe la d tog n maan n keng neb nins sẽn “tar yam-sõng vɩɩm sẽn-kõn-sa wã yĩngã” pels tɩ b lebg tẽedba? (Tʋʋ. 13:48, NW ) Sagl-y-b tɩ b ra kaoos la b lebg n wa tigingã tigissẽ ye.
3 Bõe yĩng tɩ y ka na n bool ned sẽn dat n bãng n paas Tigingã Sebr Zãmsgẽ t’a kelg sõasg sẽn be yamleoog a Ezai bãngr-gomdã zugu? Yãmb sã n yaa neda roagd bɩ a miting tɩ b yãk-y tɩ y segd n kõ sõasg Wẽnnaam Tʋʋmdã lekollẽ, bɩ y bool-a t’a wa kelg y sõasgã. Togs-y a soabã zãma sõss nins b sẽn na n kõ tigingã pʋgẽ semen nins sẽn watã pʋgẽ wã gom-zutu. (B segd n tabla yaoolem zãma sõssã na-kẽndr sɛbã tablg zĩigẽ.) Bao-y soay n nek a soabã tʋlsem ne a Zeova balengã. La a soabã sã n ka zoe n zãmsd Biiblã ne tigingã neda, y tõe n kãab-a-la Biibl zãmsgo.
4 Ket-y n kengd sẽn ka le moond-bã pelse: Nin-kãensã sʋka, b rãmb nins sẽn wa Tẽegrã wʋsg zoe n dɩka b mens n kõ a Zeova. La wakat n wa n zĩnd tɩ b bas koe-noogã moonego. Baasgo, a Poll sagla tõnd tɩ d ‘maan yel-sõmd’ n kõ “neb nins sẽn yaa tõnd ba-biis a Zezi tẽeba yĩngã n yɩɩda.” (Gal. 6:10) Woto yĩnga, sẽn ka le moond-bã yell n segd n pak tõnd n yɩɩda.
5 Tõe tɩ bãmb kẽer zoe n saka sõngr ning kãsem dãmbã la neb a taabã sẽn kõ-bã, n leb n moond koe-noogã yɛsa. Kãsem dãmbã sã n yãka yãmb tɩ y tʋm ne koe-moond sẽn leb n sɩng moonego, bãng-y tɩ yãmb nonglmã ne a Zeova la ne koe-moonegã na n kõ-a-la bas-m-yam. Wilg-y-yã-a y sẽn kẽesd y meng koe-moonegã nens toɛy-toɛy pʋsẽ to-to sẽn na yɩl t’a tõog n paam sũ-noog a pʋgẽ, n pẽdg ne moonegã tʋʋmde, la a paam a Zeova barka.
6 Sõng-y koe-moondb paalsã tɩ b moonegã sɩngr yɩ sõma: Pag sẽn yaa nin-paalg sɩdã yɛl wɛɛngẽ sẽn mik t’a yãa Wẽnnaam siglg hakɩkã, a tʋlgame n na n sɩng koe-moonegã zĩig pʋgẽ bala. B sẽn wilg-a bũmb ning a sẽn segd n maanã poorã, a yeelame: “Bɩ d sɩng zĩig pʋgẽ bala.” B sã n sakame tɩ ned sẽn zãmsd Biiblã ne yãmb sɩng koe-moonegã, bɩ y sõng-a t’a bãng t’a segd n “sɩnga zĩig pʋgẽ bala.” Dẽ, bɩ y kɩt tɩ koe-moond paalgã mooneg sɩngr yɩ sõma. Sõng-y-yã-a t’a minim n segendẽ la a kẽesd a meng koe-moonegã pʋgẽ semen fãa.
7 Sã n yaa y meng biig n lebg koe-moond sẽn ka reeg lisg paalem, bɩ y moon ne-a n sõng-a t’a bɩ wa sẽn zems ne a yʋʋma la a pãn-tõogã. Yãmb sã n sõnga n paas bilfu, tõe t’a sẽn na n tõog n sõs ne nebã sõma to-to wã, n karem Biiblã verse rãmb la a kãab sɛbã to-to wã ling-yã. A sã n tõogame n paam tɩ ned kelg-a koe-moonegã sasa, bɩ y sõng-a t’a segl lebg-n-tɩ-gesã n leb n tɩ gʋʋl a soabã ratem ne sɩdã.
8 Wɩng-y ne koe-moonegã tʋʋmd n paase: Yãmb yɛlã sẽn yaa to-to wã kõt-y-la sor tɩ y tõe n wɩng ne koe-moonegã tʋʋmd n paas Tẽegrã wakat loogr poor meng bɩ? Y tõe n moona lɛɛr a yembr bɩ a yiib n paas y sẽn da minim n moond to-to semena pʋgẽ bɩ? Yãmb gũusdame n baood wakat ning y sẽn na n leb n wa tõog n yɩ sõngr so-pakdã bɩ? Bɩ y tõe n manesa yɛlã y vɩɩmã pʋgẽ n wa tõog n kẽ wakat fãa tʋʋmdã pʋgẽ? Modgr nins fãa d sẽn maand koe-moonegã pʋgẽ wã tõe n wa sõnga nina t’a sak sɩdã! (Tʋʋ. 8:26-39) D sẽn nan gũudã sasa, bɩ d “maan sẽn yaa neer daar fãa sã n yaa [tõnd] sʋka wala a sã n yaa neba fãa sʋka.”—1 Tes. 5:15.
[Zĩ-gũbri, seb-neng a 3]
Ket-y n sõngd-y:
□✔ Sẽn wa-b Tẽegrã
□✔ Koe-moondb nins sẽn leb n sɩng moonegã
□✔ Koe-moond-paals sẽn ka reeg lisgã