‘Yɩ-y neb sẽn maand tʋʋm sõma wʋsgo’

¹ Tʋm-tʋmd a Poll sẽn da wa n baasd a mooneg tʋʋmdã a yaoolem yʋʋma sasa, a zĩnda ne a Tɩmote la a Tɩt wʋsgo. A gʋlsa sɛb sẽn keng b yiibã fãa raood ne goam sẽn wõnd taaba. A yeela a Tɩt tɩ “neb nins sẽn tẽ Wẽnnaama” segd n ket n ‘wɩngda ne tʋʋm sõma maanego.’ (Tɩt 3:8) La a yeela a Tɩmote me tɩ neb nins sẽn teeg Wẽnnaamã segd n maaname “tɩ b yɩ neb sẽn maand tʋʋm sõma wʋsgo.” (1 Tɩm. 6:17, 18, Kãab-paalga Koe-noogo) Woto yaa sagl-sõng tõnd fãa yĩnga! La bõe n na n tus tõnd tɩ d maan tʋʋm sõma d vɩɩmã pʋgẽ? La tʋʋm sõma bʋs takɩ la d tõe n maan ray nins sẽn watã pʋsẽ?

² Bũmb nins sẽn tusd tõnd tɩ d maand tʋʋm sõma wʋsgã yaa d sẽn tẽed la d nong a Zeova wã yĩnga, la a sẽn kɩt tɩ d saagd n na n paam bõn-kãseng ningã yĩnga. (1 Tɩm. 6:19; Tɩt 2:11) Sẽn yɩɩd fãa, yʋʋmdã wakat kãngã, b tẽegda tõnd t’a Zeova tʋma a Biribl a Zezi tẽng zug sẽn na yɩl t’a wilg t’a Ba wã tʋʋm zemsame, la a pak vɩɩm sẽn-kõn-sa wã sor n kõ neb nins sẽn zems ne rẽ paoongã. (Mat. 20:28; Zã 3:16) B na n wilga rẽ vẽeneg Kiristã kũum Tẽegrẽ tʋʋlg kiuugã rasem 28. Rẽ yĩnga, tõnd sẽn saagd n na n paam vɩɩm sẽn-kõn-sa wã yĩng ka tusd tõnd tɩ d na n maan d sẽn tõe fãa tɩ d ‘maan tʋʋm sõma wʋsg’ sɩda? Yaa vẽeneg tɩ d na maan woto! Tʋʋm bʋs la d tõe n maan masã?

³ D maan tʋʋm sõma tʋʋlg kiuugã la rẽ poore: Sãmbg sẽn ka be, d na n zĩnda Tẽegrẽ wã, sẽn yaa bũmb ning sẽn tar-a yõod n yɩɩd a Zeova Kaset rãmbã sẽn maand yʋʋmdã pʋgẽ dũniyã gill zugã. (Luk 22:19) La d ratame n bool neb wʋsg wa d sẽn tõe tɛka tɩ b wa naag tõnd Tẽegrẽ wã. Ges-y moonegã tʋʋmd kɩbay sẽn be yʋʋmd 2002, yʋʋm-vẽkr kiuugã 1 daar Gũusg Gasgã pʋgẽ wã, tɩ y na n yãame tɩ rɩẽ, dũniyã gill zugu, tẽns wʋsg pʋsẽ neb sẽn wa Tẽegrã sõor yɩɩga koe-moondbã sõor naoor a tãabo, a naase, a nu, bɩ yɩɩd woto menga. Yaa vẽeneg tɩ tigimsã neb fãa maana modgr wʋsg n pʋɩ Tẽegrẽ wã boolg sɛb wʋsg b moonegã zĩisẽ fãa. Yaa rẽ n so, tɩ d rat n dɩk sẽk wʋsg wa d sẽn tõe tɛk masã tɛk n tɩ tãag tʋʋlg kiuugã rasem 28 wã n bool nebã tɩ b wa Tẽegrã, n sõng-b tɩ b bãng n paas fãagrã d sẽn saagd n na n paamã wɛɛngẽ.

⁴ Tʋʋlg kiuugã ne a ta tɩ zĩis kẽere wĩndgã na n kaoosda lʋɩɩse, tɩ zĩigã sẽn yaa to-to wã me na n zemse. Wãn to la d tõe n tũnug ne rẽ ‘n maan tʋʋm sõma wʋsgo’? Yaa d sẽn na n ket n moond koe-noogã ne yẽesem, n ‘wɩngd ne tʋʋm sõma maanego.’ (Tɩt 2:14; Mat. 24:14) Yãmb sã n ka tõog n yɩ sõngr so-pakd tʋʋlg kiuugã, rẽ yĩnga y tõe yɩ-a-la tʋʋl-nif kiuugã la/bɩ sig-noy kiuugã bɩ? Yãmb sã n yaa sõngr so-pakd tʋʋlg kiuugã, y tõe n kell n kẽnga taoor ne rẽ bɩ?

⁵ Koe-moondb kẽer sẽn tar nug-tʋʋmd yãame tɩ b tõe n dɩka lɛɛr a yembr bɩ sẽn yɩɩd woto n moone, b sã n wa rebd tʋʋma, n kõt kasetã sor zugu, bɩ n moond neb sẽn be tʋʋm zĩisẽ sẽn pakd pĩnda. Neb a taab rɩkda wakat bilf midi wã sigb poor n kõ kasetã. Neb kẽer yãame tɩ b tõe n zãmsa Biiblã ne b tʋmd-n-taag wakat kãng pʋgẽ. Saam-bi-pogs wʋsg sẽn yaa zak pagb tõogame n yãk sẽk koe-moonegã yĩng b kambã sẽn be kareng zĩigẽ wakate. Bãmb kẽer yikda pĩnd ray kẽer n tʋm b zakã tʋʋma, tɩ raarã pʋgẽ bɩ b paam sẽk n yɩɩd n tõe n moon la b zãms Biiblã ne neba.—Ef. 5:15, 16, Kãab-paalgã Koe-noogo.

⁶ Baa yãmb mengã sã n ka tõe n yɩ sõngr so-pakda, tõe tɩ y tõog n maan y meng tʋʋmd na-kẽndr n moon koe-noogã n paase, n maand y sẽn tõe fãa n ‘maand neere, n yaa neb sẽn maand tʋʋm sõma wʋsgo, n yaa neb sẽn kõte, la sẽn nong n pʋɩt [sɩdã] ne neb a taaba’.—1 Tɩm. 6:18, Kãab-paalgã Koe-noogo.

⁷ Ra yĩm-y karen-biis maanegã sẽn yaa tʋʋm sõngã ye: Yʋʋmd fãa neb sẽn nong sɩdã n wat Tẽegrẽ wã. Rẽ yĩngã tigingã neb kẽer tõe n sõnga neb nins sẽn wa Tẽegrã n yaool n nan ka tar ned sẽn zãmsd Biiblã ne-bã bɩ? B tõe n lebg n tɩ ges-b lame, sẽn na yɩl n sõng-b tɩ b tẽebã bɩ bɩ? Tõe tɩ nin-kãensã sẽn wa Tẽegrã kẽer yaa Kaset rãmb roagdba. Tõe tɩ bãmb kẽer yaa neb sẽn da zãms Biiblã pĩnda, la sẽn baood bal tɩ b sõng-b tɩ b lebg n sɩng zãmsgã la b wat tigissã n ka vaandẽ ye. Ad sɩd na yɩ sũ-noog n kõ-do, d sã n wa yã tɩ nin-kãensã lebg a Zeova sõgen dãmb sẽn naag tõnd n balemd a Zeova!

⁸ D sẽn na n wɩng ne tʋʋmdã n paas tʋʋlg kiuugã la rẽ poorã yĩngã, yaa vẽeneg tɩ d na n yãa neb sẽn dat n bãng sɩdã n paase, n lebg n kẽng n tɩ ges-ba. Sʋk-y-b bũmbu, la y kãab-b tɩ y sã n lebg n wa nindaare, y na n kõo leoorã. D sã n maan woto d segenda sor lebg-n-tɩ-ges yĩnga. Sẽn yaa sõma n yɩɩd yaa d sẽn na n maan lebg-n-tɩ-gesã tao-tao. D sã n ka tõog n sɩng Biibl zãmsg pipi kẽngrẽ wã, d tõeeme n mak n maan dẽ d nindaar kẽngrã, tɩ sã n tõeyã.

⁹ D sor zug kaset kũunã wakate, bɩ d bao n sɩng sõss ne nebã. Koe-moondb wʋsg n kõ kaset sor zugu, n yã neb sẽn da tʋll n bãng n paase, sẽn kõ-b b yʋyã, b adɛrs rãmba, la b telefõn nimero rãmba. Nedã y sẽn segã sã n ka be yãmb moonegã zĩigẽ, bɩ y reeg Veuillez suivre l’intérêt (S-43) sebr y Rĩungã Roogẽ n pids n kɩs tigingã sekertɛɛre. Yẽ me na n taasa sebrã tiging ning sẽn moond nedã sẽn beẽ wã sekertɛɛre. Sekertɛɛrã sã n ka tõe rẽ, a na n tool-a-la tʋʋmdã willẽ tɩ b ges-a yelle. Woto, b tõe n tɩ sõnga a soabã n paase.

¹⁰ Nedã sã n pa bas adɛrs tɩ ya a telefõn nimero la a bas ne-yã, bɩ y tũnug ne telefõnã n maan lebg-n-tɩ-gesã. Deng-y pĩnd n segl y sẽn na n sõs bũmb ning zugã. Ning-y y Comment raisonner sebrã yambẽ sẽn na yɩl n tõog n lak-a tao-tao n gese. Koe-moondb kẽer tõogame n tũnug ne telefõn n zãms Biiblã ne neb hal tɩ yɩ sõma. Neb b sẽn da ka tõe n yã yir nana n zĩnd nin-kãensã sʋka. Saam-bi-poak sɩngame n kot pagb sẽn tʋlg n bãng n paas a sẽn seg zak-zak moonegã wakat tɩ b kõ-a b telefõn nimero rãmba. Woto kɩtame t’a tõog n sɩng Biibl zãmsg ne neb a yiibu.

¹¹ Lagm-y n tʋm ne kãsem dãmbã n sõng sẽn ka le moond-bã: Kãsem dãmbã tʋlla sõma n sõng sẽn ka le moond-bã ne nonglem. Neb a woto wʋsg zoe n yãka yam b toor n lebg n sɩng tigissã waango. B yãame tɩ b segd n lagma ne a Zeova siglgã sõma n tõog n paam tẽeb bãan ning b sẽn bilg Yɩɩl Sõamyã 91 soabã pʋgẽ wã. Nin-kãens kẽer tõe n lebs n sɩnga koe-moonegã masã. Tõeeme tɩ neb a taab sẽn ka le moond sã n wa Tẽegrã ki-kãngã, bɩ b sak tɩ b zãms Biiblã ne-ba. Sã n mikame tɩ yaa woto, kãsem dãmbã na n maana segls tɩ ned zãms Biiblã ne b rãmb nins sẽn dat sõngrã. Bãng-y tɩ b sã n kos yãmb sõngr a woto tɩ y sake, b na n talla naneb wʋsg ne rẽ.—Rom 15:1, 2.

¹² Ket-y n ‘wɩngd ne tʋʋm sõma maanego’: Koe-moondb wʋsg sẽn yɩ sõngr so-pakdb kiuug a yembr bɩ sẽn yɩɩd woto mikame tɩ b koe-moonegã paasa kiis nins sẽn pʋglã. B sega neb sẽn tʋlg n bãng n paase, n yã tɩ b segd n lebg n kẽnga b nengẽ. Rẽ tus-b lame tɩ b modgd n yit koe-moonegã naoor wʋsg n yɩɩda, sẽn na yɩl n tõog n leb n tɩ seg nin-kãensã sẽn dat n bãng n paasã. Koe-moondb kẽer sɩnga Biibl zãmsg ne neba, tɩ sõng-b tɩ b moond koe-noogã n yɩɩd menga.

¹³ Neb a taab meng n yã tɩ moonegã la karen-biisã maaneg tʋʋmd kõt-b-la sũ-noog wʋsg hal tɩ rẽ tus-b tɩ b lebg n tags yɛl nins b sẽn ning pipi b vɩɩmã pʋgẽ wã zut n gese. Woto kɩtame tɩ neb kẽer tõog n boog sẽkã b sẽn da rɩkd b nug-tʋʋmdã yĩngã n tõog n dɩkd sõngr so-pakrã kiuug fãa. Koe-moondb a taab tõog n lebga wakat fãa so-pakdba. B tõogame n teeg Wẽnnaam n paase, la b bas bũmb nins dũniyã sẽn kõtã teegre. B mikame tɩ b sã n “yɩ kõatb sẽn kõt ne sũ-noogo,” b paamda a Zeova bark wʋsgo, la kɩtdẽ tɩ b sẽn saagd n na n paam “vɩɩm sẽn yaa sɩda” paamd pãng n paasdẽ. (1 Tɩm. 6:18, 19) Tigingã neb wʋsg sã n kẽ so-pakrã tʋʋmdẽ, tigingã fãa neb nafdame. So-pakdbã nongame n gomd yɛl sẽn kõt sũ-noog nins b sẽn paamd koe-moonegã pʋgẽ wã yelle, la b kot neb a taabã tɩ b wa moon ne-ba, tɩ rẽ paasd tigingã neb tẽebo.

¹⁴ Bɩ d faa ‘maan tʋʋm sõma wʋsg’ Tẽegrã wakat la a poore, n wɩng ne tʋʋm n paas kiris-neb tʋʋma pʋsẽ. Bɩ d wilg d mi-beoog bũmb nins a Zeova sẽn maane, n kɩt tɩ d saagd n na n vɩɩmd wakat sẽn-kõn-sa dũni paalg sẽn yaa tɩrg pʋgẽ wã yĩnga.—2 Pɩɛ. 3:13.