‘Togs-y Wẽnnaam koɛɛgã fãa zãnga’
1 Yãmb sã n dat ne y sũur fãa n wilg y mi-beoog bõn-sõng b sẽn kõ-y yĩnga, y na n wilga rẽ ne y tagsg la y tʋʋma. Ges-y a Poll manesem sẽn yɩ a soaba, sõmblem la neer ning a Zeova sẽn maan ãdem-biisã yĩngã. A yeelame: “Bark Wẽnnaam bãmb kũuna noor sẽn ka tõe n togsa yĩnga”! Bõe n be ‘kũun’ kãng pʋgẽ? Yaa ‘Wẽnnaam bark kãsengã’ fãa a sẽn kõ-dã, tɩ rẽ pukr sẽn yaa kãseng n yɩɩd yɩ a Biriblã a sẽn kõ t’a yɩ rond tõnd yel-wẽna yĩngã.—2 Kor. 9:14, 15; Zã 3:16.
2 Rẽ yĩnga a Poll wilga a mi-beoogã ne noor goam bal bɩ? Ayo! A wilga a mi-beoogã ne manesem toɛy-toɛya. A Poll kiris-nin-taasã yɩ-neer tẽebã wɛɛngẽ yell ra pak-a-la wʋsgo, t’a ra rat n maan a sẽn na maan n sõng-b tɩ b rɩ Wẽnnaam maan-neerã nafa tɩ pidi. A Poll yeela nin-kãens wɛɛngẽ tɩ: “Tõnd me sẽn nong yãmb wʋsga yĩnga, tõnd ka kõ yãmb Wẽnnaam Koe-nooga bal ye, tõnd kõo yãmb tõnd mens me n paase, tõnd sẽn nong yãmba yĩnga.” (1 Tes. 2:8) A Poll ra sõngda neb nins sẽn zoe n be tigingã pʋgẽ wã tɩ b tʋm sẽn na yɩl tɩ b fãagrã yɩ waaziba. La sẽn paas rẽ, a Poll toga sor kɩlometr tusa tẽn-gãong la mogr zugu, n moon koe-noogã ne a sũur fãa n bao neb nins “sẽn da tar yam-sõng vɩɩm sẽn-kõn-sa wã yĩngã.” (Tʋʋ. 13:48, NW ) A Poll mi-beoog wʋsgã bũmb nins fãa a Zeova sẽn da maan n kõ-a wã yĩngã tus-a lame t’a ‘togs Wẽnnaam koɛɛga fãa zãnga.’—Kol. 1:25.
3 Tõnd mi-beoogã bũmb nins fãa a Zeova sẽn maan n kõ-dã yĩngã tusda tõnd tɩ d sõng tõnd tigingã neb nins sẽn be raab pʋgẽ tẽebã wɛɛngẽ. (Gal. 6:10) Rẽ leb n tusda tõnd me tɩ d moon Rĩungã koe-noog wʋsg wa d sẽn tõe tɛk d moonegã zĩisẽ fãa.—Mat. 24:14.
4 Sor d sẽn tõe n tũnug ne n wilg d mi-beoogo: Yʋʋmd fãa Kirist kũumã Tẽegr kõta tõnd sor sẽn ka wõnd a taab tɩ d tõe n tũnug ne n wilg d mi-beoog a Zeova ne a Zezi Kirist sẽn maan n kõ-dã yĩnga. Tigis-kãngã ka tigis-zaalg bala, bɩ yel-zaalg tẽegr bal ye. A Zezi yeelame: “Bɩ y maan bõn-kãnga n tẽegd mam yelle.” (Luk 22:19) Kiristã kũum Tẽegr yaa wakat d sẽn segd n bʋgs a Zezi sẽn yɩ ned ning buudã zugu. Yaa wakat d sẽn segd n sak n deeg t’a vɩɩme la a tʋmd rũndã-rũndã, n tar ziir la naam ning b sẽn kõ-a, a sẽn vɩɩmd ne burkĩnd la a kõ a yĩnga tɩ yɩ maoongã. Tẽegrã maaneg leb n yaa sor sẽn kõ-d tɩ d tõe n wilg tɩ d sakda Kirist zu-sobendã, la t’a ya a soab ning sẽn lʋɩt taoor n get kiris-neb tigingã tʋʋm yellã. (Kol. 1:17-20) Ne waoogre, Wẽnnaam nin-buiidã fãa segdame n zĩnd Kirist kũumã Tẽegrẽ. Rõandã b na n maana Tẽegrã lamusa raar wĩndgã lʋɩɩs poore, yʋʋmd 2002, tʋʋlg kiuug rasem 28.
5 Rɩẽ b sẽn modg n tʋm tɩ Tẽegrã nan ka ta wã, neb sõor sẽn sãd b sẽn zɩ n paam sẽn yaa 2 163 602 n wa Tẽegrã Etazĩni Tʋʋmdã willẽ (Y sã n dat n yã tẽng fãa neb sõor sẽn wa Tẽegrã, bɩ y ges yʋʋmd 2002, yʋʋm vẽkr kiuug pipi daar Gũusg Gasgã, seb-neng 29 n tɩ ta 32.) Neba sẽn na n wa rõandã Tẽegrã sõor na n yɩɩ wãna? Rẽ bee ne tõnd sẽn na n ‘tʋmdẽ la d maood’ wʋsgo, n sõngd neb wʋsg wa d sẽn tõe tɛk tɩ b wa.—1 Tɩm. 4:10.
6 Soaalã Zaabr Dɩɩbẽ zĩndg toor sẽn ka be, d tõeeme me n wɩng ne koe-moonegã n paase. Sik kae tɩ saam-biis la saam-bi-pogs tus pi-gĩn n na n yɩ sõngr so-pakdb kiuug a yembr bɩ sẽn yɩɩd woto ye. Yʋʋm a nu wã sẽn loogã pʋgẽ, yʋʋmd fãa, tʋʋlg kiuugã n tɩ ta sig-noy kiuugã sẽn yaa Tẽegrã wẽndã sasa, b sã n pʋɩ tɩ zemse b ra paama sõngr so-pakdb 212 142. (Sẽn na yɩl n paam tẽng fãa sõore, bɩ y ges Koe-mooneg kɩbaya sẽn be Rĩungã Tʋʋmd pʋgẽ, sẽoogo, sa-sak la bõn-bɩʋʋng kiisã.) Y tõe n manega y yɛlã sẽn na yɩl n tõog n yɩ sõngr so-pakd rõandã bɩ? Rẽ yɩtẽ-la sor sẽn yaa sõma y sẽn tõe n tũnug ne n wilg ne y sũur fãa tɩ y tara mi-beoog ne Wẽnnaam a sẽn kõ Kirist maoongã yĩnga. Y tõe n talla bas-m-yam t’a Zeova na n ning-y-la barka, wa kɩbay nins sẽn pʋgdã sẽn wilgdã.
7 Saam-bi-poak sẽn yaa wakat fãa tʋm-tʋmd gʋlsa kɩba-kãngã sõngr so-pakrã a sẽn maan rɩẽ tʋʋlg kiuugã wɛɛngẽ woto: “Yʋʋmd 2001 wao-fugdg kiuugã Rĩungã Tʋʋmd saglame tɩ ned ning fãa yɛl sẽn kõt-a sor t’a tõe n yɩ sõngr so-pakd Tẽegrã sasa, bɩ a maan dẽ. Sẽn mik tɩ tʋʋlg kiuugã ra tara sib a nu wã, ra kell n zemsa ne mam sẽn sigl m yɛlã to-to wã. Dẽ mam pidsa sõngr so-pakrã kosg sebr n kɩse.” Kiuugã sɩngr bala, a yãka bõn-datl n yet t’a na n makame n sɩng yirẽ Biibl zãmsg ne neda. A tõogame n maan dẽ bɩ? N-ye, ya a sẽn da wa n kõt kasetã lɛɛr 52 soabã sasa ki-kãng la a tõog n sɩng Biibl zãmsg ne neda! Dẽ a yeelame tɩ bõe? “D sã n maan modgr n paas fãa, d paamda bark kãsemse.”
8 Zak neb sã n lagem taab n maan sõngr so-pakrã, wãn-wãn la nafd-ba? Zak sẽn tar neb a naas sẽn maan woto rɩẽ tʋʋl-nif kiuugã yãame tɩ ki-kãng yaa kiuug b sẽn na n tẽegd a yell wakat fãa. Kamba ma yeelame: “Tõnd da geta daar fãa ne sũ-noogo, bala d fãa ra lagma taab n moond koe-noogã! Tõnd sẽn da sõsd yɛl nins d sẽn maan koe-moonegã pʋgẽ daar fãa wã kɩtame tɩ d zaabrã rɩɩb wakat ra be yamleoogo.” Biriblã yeelame: “M sũur yɩɩ noog m sẽn tõog n moon ne m baaba ra-zaan dayã, sẽn yaa wakat ning a sẽn da segd n beẽ a tʋʋma zĩigẽ wã.” T’a ba wã paas woto: “M sẽn yaa zakã soabã, m sũur yɩɩ noog m sẽn da mi tɩ d lagma taab n maan tʋʋmd ning sẽn tar-a yõod n yɩɩd tõnd wakatã.” Yãmb zakã neb tõe n lagma taab n maan so-pakrã tʋʋmd bɩ? Bõe yĩng tɩ yãmb zaka neb ka na n sõs ne taab n bãng b fãa sã n tõe n yɩɩ sõngr so-pakdb Tẽegrã wakate?
9 D tõe n kɩtame tɩ tʋʋlg kiuugã sãoog pĩnd kiisã bɩ? Yʋʋmd 2000 wã sɩngrẽ, Rĩungã Tʋʋmd sʋka woto: “D tõe n kɩtame tɩ yʋʋmd 2000 tʋʋl-nif kiuugã sãoog pĩnd kiisã bɩ?” Koe-moondbã manesem yɩɩ wãn-wãna? Sõor sẽn sãd toɛy-toɛy la b paam-yã. Sõngr so-pakdb sõor sẽn sãd d sẽn da zɩ n paam kiuug a yembr pʋgẽ, sẽn yaa 2 410 la b ra paam Togo, tɩ Senegall yaa bãmb 196. Sẽn paase sõor sẽn sãd la b paam lɛɛr dãmbẽ wã, zʋrno rãmb basg sõorẽ, la lebg-n-tɩ-ges rãmbã sõorẽ. Yãmb tẽra tẽebã tʋʋm ki-kãngã sẽn ka wõnd a taabã pʋgẽ wã sẽn kɩt tɩ yãmb tigingã neb tall yẽesem ningã bɩ? D tõeeme n tʋm tɩ ta woto bɩ yɩɩg rẽ meng rõandã bɩ? D fãa sã n lagem taab n modge, yʋʋmd 2002 tʋʋlg kiuugã na n yɩɩ kiuug sẽn na n “sãoog pĩnd kiisã.” Tʋʋlg kiuugã tɩ bõe yĩnga?
10 Yɛl a yiib n kɩt tɩ tʋʋlg kiuugã segd n yɩ kiuug sẽn ka wõnd a taab moonegã tʋʋmd pʋgẽ. Nananda, Tẽegrã sẽn na n maan tʋʋlg kiuugã kũumã sẽnẽ wã kõta tõnd sẽk wʋsg tɩ d tõe n deng pĩnd kiuugã pʋgẽ n bool neb wʋsg wa d sẽn tõe tɛk tɩ b wa. Sẽn paase, tʋʋlg kiuugã tara wɩkɛn dãmb a nu, tɩ rẽ kɩt tɩ yaa nana n yɩɩd tɩ tʋm-tʋmdbã la karen-biisã yɩ sõngr so-pakdba. Bõe yĩng tɩ y ka na n zĩnd masã n maan tʋʋmd na-kẽndr y sẽn tõe n tũ nana-nana, n tʋm ne mooneg tʋʋmd na-kẽndrã sẽn be seb-paasdmã pʋgẽ wã? Sõngr so-pakrã tõe n yaa nana n yɩɩd yãmb sẽn tẽedã. Wala makre, yãmb sã n maan lɛɛr a 8 wɩkɛn fãa wɩkɛn dãmb a nu pʋsẽ, sẽn ket yaa y moon lɛɛr 10 bal kiuugã ray a taabã pʋgẽ n tõog n paam lɛɛr 50 wã b sẽn baood tɩ y paamã.
11 Bõe la kãsem dãmbã tõe n maan n sõng tigingã neb fãa tɩ b ‘togs Wẽnnaam koɛɛgã fãa zãnga’? Y mengã sã n kõt sõss tigissẽ wã bɩ y sã n wa sõsd ne-ba, bɩ y kɩt tɩ b tall yẽesem ne koe-moonegã. Tigingã sebr zãmsg taoor lʋɩtb ne b sõngdbã tõe n dɩka sard n gom ne ned kam fãa sẽn be bãmb sullã pʋgẽ yel-kãngã zugu, la b kãab-b b sõngre. Tõe tɩ b sẽn baood bal yaa gom-nood sẽn kengd raood la sagl-sõma bala. (Yel. 25:11) Tõe tɩ neb wʋsg na n yãame tɩ b sã n toeem b tʋʋma na-kẽndr bilfu, b tõe n yɩɩ sõngr so-pakdba. Tigims kẽer pʋsẽ, kãsem dãmbã la kãsemb sõngdbã la b pagba wʋsgo, sã n pa b fãa, kõta mak-sõngo, n lebgd sõngr so-pakdb Tẽegrã wakate. Woto kõo koe-moondb wʋsg raood tɩ bãmb me naag n maan woto. Tõe tɩ pãn-komslem bɩ yɛl a taab n kɩt tɩ koe-moondb kẽer ka tõe n yɩ so-pakdb ye. La b tõe n sagl-b lame tɩ b wilg b mi-beoogo, n moon koɛɛgã wʋsg wa b sẽn tõe tɛk ne tigingã neb a taabã.
12 Kãsem dãmbã sã n maag b yĩng n mag yɛlã neere, b na n tõog n maana yɛl wʋsgo. Rasem a yopoe wã fãa pʋgẽ b segd n pĩnd n yãka wakat sẽn zems koe-moonegã yiib tigiss yĩnga. Sã n tõeyã, tʋʋmd yel-gɛtã na n deng n yãka saam-biis sẽn tõe tʋʋmdã tɩ b lʋɩ taoor koe-moonegã yiib tigiss fãa pʋsẽ. B segd n segla sõma tɩ tigis-kãensã ra zʋʋg minit 10 n digd 15 ye. Yaa wakat kãng pʋgẽ me la b segd n ning nebã ne taaba, n wilg nebã moonegã zĩiga, la b maan pʋʋsgã. (Ges-y Yãmb Sʋgsgã Leoorã sẽn be yʋʋmd 2001, bõn-bɩʋʋng kiuugã Rĩungã Tʋʋmd pʋgẽ wã.) B segd n togsa tigingã neb moonegã tʋʋmd na-kẽndr kiuugã pʋgẽ vẽenega, la b tabl sebr ning sẽn wilgd rẽ wã tablo wã zĩigẽ.
13 B segd n modgame tɩ moonegã zĩis seke. Tʋʋmdã yel-gɛt ne saam-biig ning sẽn get-a moonegã zĩis yellã segd n yãa taab n maan segls tɩ b moon zĩis nins b sẽn pa moond wakat fãa wã. B sẽn segd n modg n maan n yɩɩda, yaa bao sẽn ka b yiyã, kõ kasetã soayã zut la te-koosgã rotẽ, la b kõt kasetã zaabre. Zĩig ning rẽ sẽn tõeyã, b tõe n sõnga koe-moondb kẽer tɩ b kõ kasetã ne telefõne.
14 Sõng-y-b tɩ b leb n moon yɛsa: Saam-biis n be yãmb tigingã mooneg zĩigẽ n ka leb n moond koe-noogã bɩ? Nin-kãensã ket n yaa tigingã neba, n dat sõngre. (Yɩɩl 119:176) Sẽn mik tɩ dũni kʋdg kãngã saab kolga wʋsg woto tɩ dũni paalgã wat ka la bilfã, zemsame tɩ d modg sõma n sõng nin-kãensã tɩ b leb n moone. (Rom 13:11, 12) Kameruni, yʋʋm a nu sẽn loogã pʋgẽ, yʋʋmd fãa neb sõor sẽn yɩɩd 350 n sak sõngr a woto n leb n sɩng moonego. Bõe la d tõe n maan n sõng neb wʋsg n paas tɩ b lebg n tall nonglem la bas-yard ning b sẽn da tar sɩngrẽ wã?—Heb. 3:12-14.
15 Kãsem dãmbã na n yẽsa ne taab n bãng bũmb ning b sẽn na n maan n sõng neb nins sẽn bas moonegã yʋʋm a wãna sẽn loogã pʋgẽ wã. (Mat. 18:12-14) Sekertɛɛrã segd n vaeesa Tigingã koe-moondb kart dãmb n bãng b rãmb nins sẽn ka le moondã. B segd n modga wʋsg n tũnug ne pe-kɩʋʋng tʋʋmdã n kõ-b sõngre. Kãsem soab tõeeme n kẽng n tɩ ges koe-moond ninga, bala a ra mi-a-la sõma bɩ a yɩɩ a tũud-n-taag pĩnda. B leb n tõeeme n kos koe-moondb a taab sõngre. Tõeeme tɩ koe-moondb kãens ra zoe n zãmsa Biiblã ne ned ning sẽn ka le moond masã wã, tɩ b sũy na n yɩ noog tɩ b kõ b sõngrã b sẽn dat wʋsg masã wã. D saagdame tɩ rẽ na n tusa neb wʋsg sẽn da ka le moond tɩ b leb n sɩng Wẽnnaam Gomdã togsg yɛsa. B sã n tar zʋg-sõma nins sẽn segdã, Tẽegrã wakat la sasa ning sẽn zems n yɩɩd tɩ b sɩng moonegã!—Ges-y Yãmb Sʋgsgã Leoorã sẽn be yʋʋmd 2000, sɩpaolg kiuugã Rĩungã Tʋʋmd pʋgẽ n paam kɩbay n paase.
16 Neb a taab n tar zʋg-sõma nins sẽn segdã bɩ? A Zeova ket n ningda a nin-buiidã barka, a sẽn wat ne ‘buuda fãa soolem bõn-neeb’ b sʋkã. (Azze 2:7) Yʋʋmd fãa neb tusa n tõogd n tall zʋg-sõma nins sẽn segdã n lebgd koe-moondb sẽn ka reeg lisgu. Nin-kãens yaa ãnda rãmba? A Zeova Kaset rãmb kamba, ne Biibl karen-biis sẽn bɩt zãmsgã pʋgẽ. D maanda wãn n bãng tɩ b tara zʋg-sõma nins sẽn segdã n tõe n moon koe-noogã?
17 A Zeova Kaset rãmbã kamba: Baa ne b sẽn nan ka koe-moondb sẽn ka reeg lisgã, kamb wʋsg ra tũuda b roagdbã n moond koe-noogã zak-zak sẽn na maan yʋʋma. Tʋʋlg kiuugã tõeeme n yɩ wakat sẽn zems sẽn na yɩl n kɩt tɩ b sɩng moonego. Wãn to la y bãngd tɩ y biigã tara zʋg-sõma nins sẽn segdã? Organisés pour bien remplir notre ministère sebrã seb-neng 100 pʋgẽ b yeelame tɩ yaa biig “zʋg sã n yaa sõma t’a mengã tõe n wilg a tẽebo, n togs neb a taabã koe-noogã, tɩ ya a sũurã n tusd-a t’a maand woto.” Yãmb sã n tagsdẽ tɩ y biigã tara zʋg-sõma nins sẽn segdã bɩ y gom ne Tigingã Tʋʋmd Sull ned a yembre.
18 Biibl karen-biis nins sẽn tar zʋg-sõma nins sẽn segdã: Biibl karen-biig sã n paam bãngrã la a wa tigissã n kaoos bilf poore, a tõeeme n dat n lebg Rĩunga koe-moonda. Yãmb sã n maand zãmsg ne karen-biig a woto, bɩ y ges sʋgs-kãensã: A bɩtame tɩ zems ne a yʋʋma la a tõodã sẽn ta to-to wã bɩ? A sɩngame n taasd a tẽebã neb a taabã ne manesem sẽn ka yãk wakat bɩ? A sɩng n tallda ‘nin-paalgã zʋg-sõma’ bɩ? (Kol. 3:10) Rẽ yĩnga a tara zʋg-sõma nins sẽn segdã koe-moondb sẽn ka reeg lisgã yĩng sẽn be Notre ministère sebrã, seb-neng 98-9 pʋgẽ wã bɩ? Sã n yaa woto, y segd n tɩ yãa Tigingã Tʋʋmd Sull tɩ b maan segls tɩ kãsem dãmb a yiib seg yãmb ne y karen-biigã n sõs ne. A sã n tara zʋg-sõma nins sẽn segdã, kãsem dãmb a yiibã na n wilg-a lame t’a tõe n sɩnga koe-noogã mooneg nebã sʋkã.
19 Yaa wãn to yẽ ne tʋʋl-nif la sig-noy kiisã? D na n wɩnga ne koe-moonegã wʋsg ki-kãensã me. Tõeeme tɩ neb wʋsg sẽn yaa sõngr so-pakdb tʋʋlg kiuugã leb n tõog n maan woto tʋʋl-nif la/bɩ sig-noy kiuugã. Tʋʋl-nif la sig-noy kiisã sasa, d sẽn na n kãab n yɩɩd yaa Gũusg Gasgã la Réveillez-vous ! wã zʋrno rãmb koe-moonegã wakate. Ad zʋrno kãensã sɩd tõog n toeema neb nins sẽn karemd-bã vɩɩm tɩ naf-ba! Yaa zʋrno kãensã n sõng wʋsg n wa ne Kaset rãmbã sõor paasg d sẽn ne tɩ maand dũniyã gill pʋgẽ wã. D na n maana modgr wʋsg n kãab zʋrno rãmbã neb wʋsg wa d sẽn tõe tɛk tʋʋl-nif la sig-noy kiisã. Segl-y y meng masã n wa tõog n paam n kẽes y meng zãnga.
20 Y sẽn geend n na n wɩng ne koe-noogã mooneg n paasã, rẽ yĩnga y segd n paasa zʋrno rãmbã y sẽn tũnugd ne tigingã n kotẽ wã sõor bɩ? Tʋʋmd yʋʋmdã fãa pʋgẽ, b yãka sibr tɩ yaa Gũusg Gasgã la Réveillez-vous ! rãmbã kãabg raare. La sẽn mik tɩ koe-moondb wʋsg na n yɩɩ sõngr so-pakdb tɩ d fãa na n kãab zʋrno rãmbã kiis a yiibã fãa pʋgẽ wã, tõe n yaa tɩlae tɩ d paas zʋrno rãmbã d sẽn tũnugd ne tigingã n kotẽ wã sõore. Sã n yaa tɩlae tɩ y paas bɩ y togs rẽ sẽn get-a zʋrno rãmbã yell yãmb tigingẽ wã tao-tao.
21 Neb wʋsg wilga b mi-beoog sõasg ning gom-zug sẽn yaa “Bũmb ning d sẽn na n yeel n wilg zʋrno rãmbã” sẽn be Rĩungã Tʋʋmd pʋgẽ wã yĩnga. Yãmb tũnugda ne segl-kãnga, n zãmsd zʋrno rãmbã kãabg goam b sẽn wilg be wã bɩ? Bõe yĩng tɩ semen fãa, y zak pʋgẽ Biibl zãmsgã wakate, y ka na n maan weer y zãmsgã wakat n mak zʋrno rãmbã kãabg gom-kãensã a yembr n maan n minim?
22 Tʋm-y wa y sẽn tõe tɛk Tẽegrã wakate: Bɩ d kẽes d mens zãng tẽebã tʋʋm b sẽn magd n na n maan Tẽegrã wakat kãngã wã pʋgẽ, n wilg a Zeova tɩ d tara mi-beoog wʋsg ne-a ‘a kũuna noor sẽn ka tõe n togsa yĩnga,’ wala a Polle. Bũmb nins d sẽn magd n na n maana 1) yaa zĩnd tigisg ning sẽn tar-a yõod n yɩɩd yʋʋmdã pʋgẽ wã, sẽn yaa Soaalã Zaabr Dɩɩb b sẽn na n tẽeg lamusã raare, yʋʋmd 2002, tʋʋlg kiuug rasem 28 wã, 2) yaa sõng neb nins sẽn ka le moondã tɩ b lebs n paam ‘b pipi nonglmã’ (Wil. 2:4; Rom 12:11), 3) yaa sõng d kambã la Biibl karen-biis nins fãa sẽn tar zʋg-sõma nins sẽn segdã tɩ b lebg koe-moondb sẽn ka reeg lisgu, la 4) yaa kẽes d meng koe-noogã mooneg tʋʋmd pʋgẽ wʋsg wa d sẽn tõe tɛka, n yɩ sõngr so-pakd tʋʋlg kiuugã la rẽ poor menga.—2 Tɩm. 4:5.
23 D pʋʋsda a Zeova ne d sũur fãa t’a sõng-d fãa tɩ d kẽes d mens zãng Rĩungã koe-noog mooneg pʋgẽ Tẽegrã wakat kãngã, n wilg woto tɩ d tara mi-beoog ne a Zeova bũmb nins fãa a sẽn maan n kõ-dã yĩnga.
[Zĩ-gũbri, seb-neng a 6]
M meng mooneg tʋʋmd na-kẽndr yʋʋmd 2002 tʋʋlg kiuugã yĩnga
Tẽne Talaato Arba Lamusa Arzũma Sibri Hato
1 2 3
Zʋrno rãmb pʋɩɩb raare
4 5 6 7 8 9 10
Zʋrno rãmb pʋɩɩb raare
11 12 13 14 15 16 17
Zʋrno rãmb pʋɩɩb raare
18 19 20 21 22 23 24
Zʋrno rãmb pʋɩɩb raare
25 26 27 28 29 30 31
TẼEGRÃ Zʋrno rãmb pʋɩɩb raare
WĨNDGÃ
LƲƖƖS POORE
Y tõe n maana segls sẽn na yɩl n paam lɛɛr 50, n tõog n yɩ sõngr so-pakd tʋʋlg kiuugã bɩ?