Moon-y la y kõ kaset sõma
1 A Zezi sẽn yaa ‘naab la soaalã’ segla a karen-biisã mooneg tʋʋm-kãsengã sẽn da gũud-bã yĩnga. (Ezai 55:4; Luk 10:1-12; Tʋʋ. 1:8) Tʋm-tʋmd a Pɩɛɛr yeela woto n bilg tʋʋmd ning a Zezi sẽn da kõ-bã: ‘Bãmb kõo tõnd noor tɩ d moon neba sʋk n kɩs kaset [sõma] tɩ yaa bãmb la Wẽnnaam yãk tɩ b yɩ nin-vɩɩse la kũum bʋ-kaooda.’ (Tʋʋ. 10:42) Kɩs kaset sõma wã baoodame tɩ d maan bõe?
2 Tʋm-tʋmd a Poll sẽn kõ kasetã to-to wã tõe n zãmsa tõnd yɛl wʋsgo. A sẽn da wa n seg Efɛɛz tigingã kãsem dãmbã, a tẽeg-b lame: ‘Yãmb miime tɩ mam ka kong tɩ togs yãmb bũmb nins fãa sẽn na n sõng yãmba ye. La mam ka zoe rabeem tɩ moon koɛɛga la tɩ zãms yãmb neba sʋka la rot pʋsẽ ye. Mam kɩsa kaset [sõma] ne Zʋɩf rãmba la Gɛrk rãmba tɩ b tek yam n kos sugri n tũ Wẽnnaam n tẽ tõnd Zusoab a Zezi.’ A Poll mengã maoo ne makr toɛy-toɛya, la a modgame n taas koe-noogã neb wʋsg wa a sẽn tõe tɛka. A ra ka taasd a kɛlgdbã sɩd kãsemsã bal ye, a ra baoodame n na n togs-b ‘Wẽnnaam daabã zãnga.’ Sẽn na yɩl n tõog n maan dẽ, a ra sakame n na n maan modgr la a tall mong-m-meng yam. A paasame: “Bõn-kãens fãa ka yell ne maam ye. Mam ka tẽed tɩ mam yõora yaa bõn-kãseng ne maam ye. Mam sẽn data yaa tɩ mam we n tõog n baas bũmb ninga b sẽn ning mam zug tɩ m maanã, la m maan tʋʋmd ninga Zusoab a Zezi sẽn kõ maam tɩ m togs Wẽnnaam barka koe-noogã.”—Tʋʋ. 20:20, 21, 24, 27.
3 Wãn to la d tõe n tũ a Poll makrã rũndã-rũndã? (1 Kor. 11:1) Yaa d sẽn na n baood neb nins sẽn zemsã, baa d sẽn maood ne makr toɛy-toɛyã. Leb n yaa d sẽn na n taasd koe-noogã neb sẽn gomd buud-goam toɛy-toɛya, la d modgd n sõngd neb nins sẽn dat n bãng n paasã. (Mat. 10:12, 13) Rẽ baoodame tɩ d bao sẽka, tɩ d maan modgre, la d nong nebã.
4 Yãmb tõe n yɩɩ sõngr so-pakdb bɩ? Tʋʋlg la tʋʋl-nif kiisã yaa wakat sẽn zems tɩ y yɩ sõngr so-pakd n tõog n kõ kaset sõma. Ad yɩɩ bũmb sẽn keng raood wʋsgo, d sẽn yã tɩ rɩẽ neb wʋsg n maan modgr wʋsg n yɩ sõngr so-pakdbã!
5 Saam-bi-poak sẽn tar yʋʋm 80 laafɩ n da ka waooga. A Zeova siglgã sagls neka a tʋlsem ne so-pakrã tʋʋmde. A gʋlsa woto: “Rẽ neka tʋlsem ning m sẽn da tar m sũurẽ hal daar zãr so-pakrã tʋʋmd yĩngã, la kɩt tɩ m dat n maan sõngr so-pakrã tʋʋmd baa yaa vugr n paase.” A yãka yam n na n yɩ sõngr so-pakd tʋʋlg kiuugã. A yeelame: “Pipi mam sẽn maan bũmb ning yɩɩ zĩnd n tags n gese m sã n tõeeme. Mam sõsa yellã zug ne m bipuglã, bala m da rata a sõngre. Yẽ me linga maam a sẽn deeg sõngr so-pakrã kõom sebr me n na n pidsã.” Kiuugã pʋgẽ, saam-bi-poakã sẽn kʋʋlã maana lɛɛr dãmb 52 koe-moonegã pʋgẽ. A paasame: “Naoor wʋsgo m kosa a Zeova t’a kõ-m pãnga, m sã n da ne tɩ m pãngã rat n saame. Kiuugã baasgẽ m sũurã yɩɩ noogo, la m pʋʋsa a Zeova bark naoor wʋsg a sẽn sõng-ma yĩnga. M dat n le yɩɩ sõngr so-pakd yɛsa.” Sũ-noog ning a sẽn paamã tõe n kenga neb a taab sẽn tʋlg wʋsg n yɩ so-pakdb n yaool n ka tar laafɩ wʋsgã raoodo.
6 Ne lingri, b basa saam-biig tʋʋmd wakat bilf yĩnga, tɩ yẽ me kell n tũnug ne rẽ n dɩk sõngr so-pakrã tʋʋmde. Kiuugã pʋgẽ a yẽesmã ne moonegã tʋʋmd paasame, la kiuugã ne a sa wã t’a sɩnga Biibl zãmsg ne neda. A tagsa yẽ sẽn vɩɩmd bũmb ningã yell n yeele: “Ad ki-kãng sɩd yɩɩ kiuug sẽn zĩnd barka!” Ad a sẽn paam a Zeova sor-wilgr la a sõngrã sɩd kõ-a-la sũ-noogo! N-ye, a Zeova barka modgr ning saam-biigã sẽn maan n moon koe-noogã n paasã wʋsgo, la a na n barka yãmb me woto.—Mal. 3:10.
7 Sã n yaa ne neb wʋsgo, sõngr so-pakrã tʋʋmd ka nana ye. Ne rẽ fãa, baa ne b sẽn tar zɩɩb b nug-tʋʋmã zĩigẽ, b zakẽ wã, la b tar b mens zu-loeesã, saam-biis la saam-bi-pogs wʋsg tõog n yɩɩ so-pakdba. Naoor wʋsgo kõ kaset sõma wã baoodame tɩ d sak n dɩk d sẽkã la d pãngã sẽn tar yõod wʋsgã n kẽes tʋʋmdã pʋgẽ, la rẽ sẽn wat ne bark ningã me ka tar mak-n-taar ye.—Yel. 10:22.
8 Tʋʋlg la tʋʋl-nif kiisã yaa wakat sẽn zems sõngr so-pakrã yĩnga. Tʋʋlg kiuugã tara wɩkɛn dãmb a nu. Koe-moondb nins sẽn tʋmd wakat fãa wã sã n moon sõma wɩkɛn kãens la zaaba wã, b tõe n yɩɩ sõngr so-pakdba. Y leb n tõe n moona sõma tiga wakat tʋʋl-nif kiuugã pʋgẽ. Lekoll karen-biis bɩ tʋm-tʋmdb kẽer tõeeme n paam vʋʋsgo, tɩ rẽ tõe n sõng-b tɩ b paam lɛɛr 50 wã b sẽn baoodã. Sẽn na yɩl n tõog n moon lɛɛr 50 tʋʋlg la tʋʋl-nif kiisã, rẽ yĩnga y tõe n tũu sõngr so-pakrã tʋʋmd na-kẽndɩ wã sẽn naag sõs-kãngã pʋgẽ wã a yembr bɩ? Sõs-y tʋʋmd na-kẽndr ning yãmb sẽn yãkã zug ne neb a taaba. Sik kae tɩ sõs-kãng na n kenga bãmb kẽer raood tɩ b wa naag yãmb koe-moonegã pʋgẽ ye. Yãmb sã n ka na n tõog n yɩ sõngr so-pakd me, bɩ y yãk bõn-datɩ takɩ ki-kãens yĩnga, la y moon ne neb nins sẽn tõe n yɩ so-pakdbã. Maan-y y gɛɛlã masã sẽn na yɩl n tõog n wɩng ne moonegã n paas tʋʋlg la tʋʋl-nif kiisã.
9 Wilg-y y mi-beoog Tẽegrã yĩnga: Yʋʋmd fãa, Tẽegrã wakate neb wʋsg wilgda b mi-beoog a Zezi maoongã sẽn yɩ rondã yĩng n ‘baood sẽk’ n lebgd sõngr so-pakdba. (Ef. 5:15, 16, NW ) Rɩẽ, Afirik nen-taoor la a tẽn-sʋk tẽns nins sẽn tʋmd ne Rĩungã Tʋʋmd kãngã wã pʋsẽ, neb 8 970 n yɩ sõngr so-pakdb tʋʋlg kiuugã, tɩ neb 3 332 yɩ sõngr so-pakdb tʋʋl-nif kiuugã. Rẽ kɩtame tɩ b sã n pʋɩ tɩ zemse, kiis a yiibã pʋsẽ, kiuug fãa yaa neb 6 151 n yɩ sõngr so-pakdba. Sõor kãngã yɩɩda neb 1 266 sẽn yɩ sõngr so-pakdb tʋʋmd yʋʋmdã kiis nins sẽn deng rẽ wã, b sã n pʋɩ tɩ zemse. Tẽegrã wakat kãngã leb n yaa wakat sẽn zems d sẽn tõe n wilg d mi-beoog Kirist maoongã sẽn yɩ rondã yĩnga, n wɩng ne moonegã tʋʋmd n paase.
10 Tʋʋl-nif kiuug rasem 16 sẽn kolgdã bɩ y tags Tẽegrã võor sẽn ya a soab ne yãmbã zugu. Tags-y yɛl nins sẽn tall n tãag Kiristã kũumã la bũmb ning sẽn kõ-a yɩɩr wʋsgã zugu. Leb-y n tags-y sũ-noog ning sẽn da gũud a Zezi wã yelle, la rẽ sẽn sõng-a to-to t’a yals kãn-kãe namsgã taoorã. Tags-y a sẽn yaa tigingã Zusoab n get moonegã la karen-biisã maaneg tʋʋmd yellã zugu. (1 Kor. 11:3; Heb. 12:2; Wil. 14:14-16) Rẽ poor bɩ y wilg y mi-beoog bũmb nins fãa Kirist sẽn maan n kõ-dã yĩnga, n kẽes y meng zãng-zãng moonegã tʋʋmd pʋgẽ, tɩ zems ne yãmb yɛlã sẽn yaa to-to.
11 Sõng-y neb a taabã tɩ b kõ kaset sõma: Kãsem dãmbã la kãsemb sõngdbã sã n yɩ sõngr so-pakdba b tõe n kenga neb a taab raood sõma. B sã n moond ne koe-moondbã, la b sã n wa tɩ kaagd-b pe-kʋɩɩng tʋʋmdã wakate, b tõe n sõnga neb a taabã tɩ b kẽes b mens zãng tʋʋm kãngã sẽn ka wõnd a taabã pʋgẽ. Bɩ d fãa pʋʋs yel-kãngã zugu, tɩ rẽ na n kɩtame tɩ d sẽn lagem taab n kõt kaset sõma wã paam pãng n paase.
12 Yaa sɩd tɩ kãsem dãmbã la kãsemb sõngdbã fãa na n tũu segls nins b sẽn maan tigingã pʋgẽ sẽn na yɩl tɩ b wɩng ne moonegã tʋʋmd tʋʋlg la tʋʋl-nif kiisã, la sẽn tɩ yɩɩd fãa yaa tʋʋmdã yel-gɛt n segd n maan segls sẽn zems koe-moonegã tʋʋmd yĩnga. A segd n yãka zĩisi, raya, la wakat nins sẽn zems ne koe-moondbã wʋsg sẽn tɩ yɩɩdã, sẽn na yɩl tɩ b seg taab moonegã yĩnga, la a kɩt tɩ b togsd tigingã rẽ wakat fãa. A tõe n maana segls tɩ koe-moondbã seg taab wakat toɛy-toɛy daarã pʋgẽ, tɩ rẽ kõt tigingã neb sor tɩ b tõe n kõ kasetã ne manesem buud toɛy-toɛya. Rẽ tõe n yɩɩ kaset kũun toleng zĩisẽ ne soay zut la zak-zaka, lebg-n-tɩ-ges rãmba, la kaset kũun ne telefõne. Sẽn paase, a leb n segd n maana segls tɩ sɛba, zʋrno rãmba, la mooneg zĩis beẽ tɩ sek ki-kãensã wakate.
13 Sebr ning d sẽn na n kãab nebã tʋʋlg kiuugã yaa Bãngr sebrã, ne bõn-datl sẽn yaa sɩng Biibl zãmsg ne neba. B kõo sagls yʋʋmd 2002, yʋʋm-vẽkr kiuug Rĩungã Tʋʋmd seb-paasdem pʋgẽ, sẽn wilgd Bãngr sebrã sẽn kãabd to-to. Tʋʋl-nif kiuugã yaa Gũusg Gasgã la Réveillez-vous ! wã la d na n kãabe. Modg-y n tũ sagls nins sẽn be sõasg ning gom-zug sẽn yaa “Bũmb ning d sẽn na n yeel n wilg zʋrno rãmbã” pʋgẽ wã. Tõnd fãa segd n dɩka sẽk n segl neere, sẽn na yɩl n kõ kaset sẽn yaa sõma.
14 Ad sɩd yaa bũmb sẽn kõt tõnd sũ-noogo, d sẽn tũud tigingã Zusoab sẽn ya a Zezi Kiristã sor-wilgrã, n paam n taasd neb a taabã koe-noogã! Tʋʋlg la tʋʋl-nif kiisã sẽn kolgdã, bɩ d leb n modg tɩ b yɩ kiis d sẽn na n tʋm tɩ yɩɩg pĩnd kiisã, n sak Kiristã noor ning sẽn yet tɩ d kõ kaset sõma wã.
[Zĩ-gũbri, seb-neng a 4]
Sõngr so-pakrã tʋʋmd na-kẽndɩ toɛy-toɛy yʋʋmd 2003 tʋʋlg la tʋʋl-nif kiisã yĩnga
Daarã Lɛɛr dãmba
Tẽne 1 2 — — 2 —
Talaato 1 — 3 — — —
Arba 1 2 — 5 — —
Lamusa 1 — 3 — — —
Arzũma 1 2— — — — —
Sibri 5 4 3 5 6 7
Hato 2 2 3 2 2 3
Tʋʋlgo 56 56 54 55 50 50
Tʋʋl-nifu 50 50 51 53 — —
Tʋʋm na-kẽndɩ kãensã a yembr na n zemsa ne yãmb bɩ?