D moon a Zeova sõmblmã

1. Bõe n kɩt tɩ d moond a Zeova sõmblmã?

¹ “Yãmb yaa kãseng n so pãng la ziir la naam ne waoogre. Bũmb nins fãa sẽn be yĩngr la tẽnga yaa yãmb n so. Yaa yãmb n yaa rĩm n so fãa.” (1 Kib. 29:11) Tõnd sẽn nong a Zeova la d tar mi-beoog ne bũmb nins a sẽn kõ tõndã segd n kɩtame tɩ d maan bõe? Rẽ segd n kɩtame tɩ d ‘wilg sẽn bool-a tõnd tɩ d yi lik pʋgẽ n kẽ [yẽ] vẽenem kãsenga pʋgẽ wã bõn-sõma wã fãa.’ (1 Pɩɛ. 2:9) Tõnd pa tõe n bas n pa gom tõnd Wẽnnaamã sẽn yaa kãsengã yell ne neb a taabã ye! D na n paamame n gom a Zeova sõmblmã yell sõma tʋʋlgo, tʋʋl-nif la sig-noy kiisã sasa.

2. Wãn to la d na n maan n bool nebã tɩ b wa Tẽegrã, la ãnd dãmb me n tõe n naag n maand dẽ?

² D modg wʋsg n bool nebã tɩ b wa a Zezi kũumã Tẽegrẽ: Tʋʋl-nif kiuugã rasem a 2 tẽnẽ wã daare, d na n maana a Zezi kũumã Tẽegr n wilg a Zeova sõmblmã. Tʋʋlg kiuugã rasem 17 n tɩ tãag tʋʋl-nif kiuugã rasem a 2, dũniyã gill zugu d na n talla seb-vãad sẽn pa wõnd yʋʋm a taabã rẽndã n bool nebã tɩ b wa. D fãa segd n maana d sẽn tõe fãa n bool nebã. Yɩta sõma tɩ nin-paals nins tẽeb sẽn bɩtã sɩng koe-noogã mooneg wakat kãngã. Yãmb meng biig bɩ y Biibl karen-biig tẽeb sã n bɩ n sek a na moon koɛɛgã, bɩ y tɩ togs kãsem dãmbã.

3. Bõe la d tõe n yeel n bool nebã tɩ b wa Tẽegrã?

³ Tõnd sẽn na n bool nebã to-to wã na n yɩɩ wa d sẽn maan to-to n bool nebã “D fãagrã ta n saame!” tigis-kãsengẽ wã. B na n toola seb-vãada tiging fãa pʋgẽ tɩ sek koe-moond fãa na paam bãmb 50, tɩ so-pakd fãa paam bãmb 150. Y sã n na n kõ ned seb-vãoogã bɩ y gom koɛɛg-koɛɛga. Wala makre, y tõe n yeela woto bala: “Tõnd pʋɩta seb-vãad n boond nebã tɩ b wa tigisg sẽn tar yõod wʋsg d sẽn maand yʋʋmd fãa. Sebrã zugu, b wilga sẽn na n yɩ sasa ninga, la sẽn na n yɩ to-to. Yãmb dẽnd la woto. D gũud-y lame.” A soabã sã n sok tõnd bũmbu, bɩ d maag d meng n leok-a. D tõe n tika vẽnegr ning sẽn be Biiblã yetame sebrã neng 206 pʋgẽ wã n bãng n leoke. Wɩkɛn dãmbã, d na n kãabda zʋrno rãmbã la d pʋɩt seb-vãadã me. Ned sã n dat n bãng n paas bɩ y modg n lebg n tɩ ges-a.

4. Wãn to la d na n pʋɩ seb-vãadã?

⁴ Y sã n mik ned zak fãa pʋgẽ, bɩ y kõ-a seb-vãoogã. D segd n gʋlsda zags nins d sẽn pa yãẽ nebã nimero rãmba, n wa lebg n kẽng baraar wall raar a to semennã pʋgẽ. Tẽegrã sã n wa ket semenne, tigims nins sẽn ket n tar seb-vãad wʋsgã tõe n dɩgla seb-vãadã neb nins sẽn ka-b yirã zags bɩ b rot noyẽ. Modg-y tɩ y roagdb nins sẽn pa a Zeova Kaset rãmbã, y sẽn zãmsd Biiblã ne neb ninsã, neb nins y sẽn lebgd n tʋgd n getẽ wã, y yagsã, y tʋmd-n-taasã la y karen-bi-taasã paam seb-vãadã.

5. Bõe yĩng tɩ d segd n segl d mens masã n wa yɩ sõngr so-pakdba?

⁵ Sõngr so-pakrã: Rẽ yĩnga yãmb tõe n yɩɩ sõngr so-pakd tʋʋlgo, tʋʋl-nif la sig-nog kiisã sasa sẽn na yɩl n moon a Zeova sõmblmã n paas bɩ? Sẽn na yɩl n tõog n maan dẽ, tõe tɩ y na n booga yɛl kẽer y sẽn nong n maand daar fãa wã. (Ef. 5:15-17) Y tõe n kɩsa sɩd tɩ y sã n modgd n tʋmd a Zeova tʋʋmã n paasdẽ, y na n paama a Zeova barkã la sũ-noogo. (Yel. 10:22) Tʋʋlgo, tʋʋl-nif la sig-noy kiisã sẽn kolgdã yĩnga, yaa masã la d segd n segl d mense.—Yel. 21:5.

6. Yʋʋm 90 saam-bi-poakã sẽn yɩ sõngr so-pakd rɩẽ wã zãmsda tõnd bõe?

⁶ Rɩẽ, tõnd saam-bi-poak a ye sẽn tar yʋʋm 90 n tõog n yɩ sõngr so-pakda. Ad a sẽn yeele: “Baa ne mam sẽn nong zardinaaz la m da rat n sɩng tɩɩs selbã, m bãngame tɩ m da segd n deng n gesa bũmb nins sẽn tar yõod n yɩɩdã yelle. Mam sẽn da rat n lʋɩɩs Rĩungã tʋʋmd taoor m vɩɩmã pʋgẽ wã yĩnga, m yãka yam n na n yɩ sõngr so-pakd tʋʋlg kiuugã sasa.” A sẽn maan modgr ningã naf-a lame bɩ? A yeela woto: “Mam pẽnegã tigingã neb n paase, la m pẽneg a Zeova me n paase.” Rẽ yĩnga tõnd me tõe n zĩnd n tagsa bũmb nins d sẽn maandã yell n ges d sã n tõe n toeema yɛl kẽer wa d sãam-bi-poakã sẽn maanã bɩ?

7. Yaa toog tɩ d yɩ sõngr so-pakd bɩ?

⁷ D tõe n tagsame tɩ yaa toog tɩ d moon lɛɛr 50 wã, la wakat ninga yaool n pa toog wa d sẽn tagsdã ye. Pʋʋs-y Wẽnnaam la y zĩnd n tags n ges y sẽn maand bũmb nins daar fãa wã, n geelg sõma n bãng n yãk sasa ning y sẽn na n moon koɛɛgã, n gʋls rẽ n paas yãmb sẽn da zoe n tar na-kẽndr ning Rĩungã tʋʋm yĩngã. Yãmb n mi y yɛlã n yɩɩd neb a taabã. Y laafɩ wã la y pãngã sã n paoodẽ, y tõe n maana lɛɛr a yiib bal daar fãa. Yãmb sã n tʋmda lɛɛr a 8 daar fãa bɩ y sã n yaa karen-biiga, y tõe n yɩɩ sõngr so-pakd n moond zaabr la wɩkɛn dãmbã.

8. Bõe n sõng ned a ye ne a pag tɩ b tõog n yɩ sõngr so-pakdba?

⁸ Zags wʋsg neb tõogame n naag taab n yɩ sõngr so-pakdba. Yʋʋm nins sẽn loogã, ned ne a pag n da yɛɛsd ne b na yɩ sõngr so-pakdba, bala b ra tagsdame tɩ b pa na n tõog ye. La yaa bõe la b maan-yã? B yeelame: “Tõnd pʋʋsa a Zeova t’a sõng-d tɩ d tõog n maan bũmb ning d sẽn da sɩng n dat n naag taab n maanã.” B sigla b sẽkã sõmã n tõog n sɩd yɩ sõngr so-pakdba. Ad b sẽn togs bũmb ning n paase: “Yɩɩ bõn-sõng tɛkẽ. Rẽ nafa tõnd hal wʋsgo. Tõnd sagenda d taabã tɩ b mak so-pakrã tʋʋmd n gese. Tõnd sã n tõog n maan-a lame, dẽnd yãmb me tõeeme.”

9. Sẽn na yɩl n segl y mens kiis nins sẽn watã yĩnga, bõe la y tõe n maan y zakã Biibl zãmsg sasa?

⁹ Yãmb ne y zaka rãmb sã n na n wa zãms Biiblã ne taab poorẽ, y tõe n dɩka sẽk n ges zaka rãmb fãa sẽn tõe n maan to-to n moon koɛɛgã n paas kiis nins sẽn watã. Baa yãmb zaka rãmb fãa sã n pa tõe n yɩ sõngr so-pakdb me, y tõe n sõnga zaka nin-yɛng t’a yɩ sõngr so-pakda. Rẽ me sã n pa tõeyã, zaka rãmb fãa tõe n yãka yam n moon n paas tʋʋlg kiuugã n tãag sig-noy kiuugã sasa.

10. Bõe yĩng tɩ d segd n gom d sẽn dat n lebg sõngr so-pakd Tẽegrã sasa wã yell ne neb a taabã?

¹⁰ D sõng taaba: Ned sã n tar yẽesem, tõe n sõnga a to t’a paam yẽesem. Gomd-y y sẽn dat n lebg sõngr so-pakdã yelle. Rẽ tõe n kɩtame tɩ neb a taabã me rat n maan woto. Sẽn paas me, neb nins sẽn da yɩ sõngr so-pakdb pĩndã tõe n sõng-y lame tɩ y sigl y sẽkã sõma. (Yel. 15:22) Yãmb sã n na n tõog n yɩɩ sõngr so-pakda, y tõe n yeela koe-moond a to yɛl sẽn wõnd yãmb rẽndã t’a wa naag yãmb tʋʋm kãngã sẽn kõt sũ-noogã pʋgẽ.

11. Wãn to la kãsem dãmbã tõe n kɩt tɩ nebã tʋlg n yɩ sõngr so-pakdb tʋʋlg n tãag sig-noy kiuugã?

¹¹ Kãsem dãmb wʋsg n sigl b sẽkã sẽn na yɩl n tõog n yɩ sõngr so-pakdba. (Heb. 13:7) Yaa vẽeneg tɩ rẽ kengda tigingã neb raoodo! Kãsem dãmba leb n tõe n paasa neb a taabã yẽesem, b sã n sõsd ne-ba. Goam a wãn sẽn kengd pɛlg bɩ sagls a wãn bal tõe n kɩtame tɩ neb kẽer yɩ sõngr so-pakdba. Tʋʋmdã yel-gɛt tõe n sigla koe-mooneg sasa a taab n paase, sẽn na yɩl tɩ neba fãa tõog n naagd taab n moondẽ, baa yaa tʋʋmã sigb bɩ lekollã poore, la a kɩtdẽ tɩ b taasd koees tɩ nebã bãngdẽ. A leb n segd n gesame tɩ moonegã zĩis ne sɛbã seke.

12. Yãmb sã n pa tõe n yɩ sõngr so-pakda, bõe la y tõe n maane?

¹² Baa bũmb sã n kɩt tɩ yãmb pa tõe n yɩ sõngr so-pakda, y tõe n kenga neb nins sẽn yaa so-pakdbã pels la y pʋʋs b yĩnga. (Yel. 25:11; Kol. 4:12) Y tõe n sigla y sẽkã n tõog n naag-b n moon koɛɛgã semennã pʋgẽ, bɩ n moond n kaoosd n yɩɩgd yãmb sẽn nong n moondẽ wã.

13. D mamsd n na n paama sõngr so-pakdb a wãn Burkĩna Faso ka, la wãn to la tõnd tigingã tõe n sõng tɩ rẽ pidsi?

¹³ D sẽn mamsd n na n paam sõngr so-pakdb sõor tʋʋl-nif kiuugã: Tẽns nins fãa yʋy sẽn be Rĩungã Tʋʋmd seb-kãngã rapoor pʋgẽ wã naaga taab n paam sõngr so-pakdb 8250. Rẽ n so tɩ d mamsdẽ tɩ rõndã tʋʋl-nif kiuugã, d tõe n paama sõngr so-pakdb 10000. Zĩ-gũbr ning sẽn be seb-neng a 4 wã wilgda tẽng fãa sẽn mamsd n na n paam so-pakdb sõor ninga. Kãsem dãmbã sã n mams sõor b tigingã sẽn tõe n sɩd paam la b keng koe-moondbã raoodo, tẽng fãa tõe n paama sõngr so-pakdb sõor ning a sẽn baoodã. Wala makre, b tõe n sarame tɩ b tigingã pʋgẽ, koe-moondb a 6 sʋka, a 1 na n yɩɩ so-pakda. Yaa vẽeneg tɩ tigims kẽer pʋsẽ, koe-moondb nins sẽn na n tõog n yɩ so-pakdbã sõor na n yɩɩga woto. La tigims wʋsg tõe n paamame tɩ koe-moondb a yoob sʋka, a yembr kẽes a meng so-pakrã tʋʋmdẽ. Tags-y n ges rẽ sẽn na n kɩt tɩ sũ-noog ning zĩnd yãmb tigingã pʋgẽ wã, la rẽ sẽn na n kɩt tɩ y tõog n tʋm y moonegã zĩigẽ sõma to-to!

14. Bõe yĩng tɩ tʋʋl-nif kiuugã yaa sõma ne sõngr so-pakrã tʋʋmde?

¹⁴ Bõe yĩng tɩ tʋʋl-nif kiuugã yaa sõma ne sõngr so-pakrã tʋʋmde? Yaa tʋʋl-nif kiuugã rasem a 2 la d na n maan a Zezi kũumã Tẽegrã, la rẽ na n kɩtame tɩ d tõog n lebg n tɩ ges neb nins sẽn sak n wa wã. Yaa Gũusg Gasgã ne Réveillez-vous ! wã la d na n wilg nebã, la d modg tɩ tõnd sẽn lebgd n tʋgd n get neb ninsã paam Biiblã yetame sebrã, tɩ d tõog n sɩng Biiblã zãmsg ne-ba. Dẽnd tõnd sã n yaa sõngr so-pakd tʋʋl-nif kiuugã, d tõe n paam n sɩnga Biiblã zãmsg ne neb wʋsgo. Sẽn paas me, tʋʋl-nif kiuugã tara hat rãmb a nu n paas kibs rãmb nebã sẽn pa tʋmde, tɩ kɩt tɩ tʋm-tʋmdbã la karen-bɩɩsã tõe n yɩ sõngr so-pakdba.

15. Tʋʋlgo, tʋʋl-nif la sig-noy kiisã sẽn kolgdã yĩnga, bõe yĩng tɩ d pa segd n deem ne koɛɛgã moonego?

¹⁵ Yʋʋmd fãa, Tẽegrã wakat sã n ta, pẽnegda tõnd ne dũni kãngã saabo. Sẽk ning tõnd sẽn tar n tõe n gom d Wẽnnaam sẽn yaa kãsengã yell ne neb a taabã pa ye waoog ye. (1 Kor. 7:29) D sã n bas tɩ Tẽegrã sasa looge, zu-noog ning d sẽn da tar n na n pẽg d Ba sẽn be saasẽ wã wakat kãngã wã me loogame. D segl d mens masã, tɩ tʋʋlgo, tʋʋl-nif la sig-noy kiisã bɩ d tõog n maan d sẽn tõe fãa n moon a Zeova sõmblmã!