Tʋʋm-sõng y sẽn tõe n yãk n wa tʋm tʋʋmdã yʋʋm-paalgã pʋgẽ
1. Tʋʋm-bʋg la d tõe n yãk n wa tʋm tʋʋmdã yʋʋmd paalgã pʋgẽ?
1 D sã n dat tɩ d tẽebã bɩt n paasdẽ, d segd n yãka Wẽnnaam tʋʋm d sẽn na n wa tʋme. Tʋʋm-bʋs la yãmb yãk n na n wa tʋm tʋʋmdã yʋʋm-paalgã pʋgẽ? Tʋʋm-sõng a ye y sẽn tõe n tʋm yaa sõngr so-pakrã. Y tõe n tʋm-a-la kiuug a ye bɩ sẽn yɩɩd rẽ. Sõngr so-pakrã kõta sũ-noogo, la tʋʋm-kãng sẽn baood tɩ d reng n segl d mensã yĩnga, yaa masã la d segd n sɩng d mens seglgo. Bõe yĩng tɩ sõngr so-pakrã yaa tʋʋmd d sẽn tõe n wa tʋme?
2. Bõe yĩng tɩ d segd n yãk n wa yɩ sõngr so-pakda?
2 Bũmb nins sẽn tõe n kɩt tɩ d yɩ sõngr so-pakda: D sã n yaa sõngr so-pakda, d rɩkda sẽk wʋsg n moond koɛɛgã, tɩ kɩt tɩ d tat d saasẽ Ba wã yam ‘daar fãa n paasdẽ.’ (1 Tes. 4:1) D sã n tagsd bũmb nins fãa a Zeova sẽn maan n kõ tõndã yelle, sũ-noogã kɩtdame tɩ d rat n gom a yell ne neb a taabã. (Yɩɩl 34:2, 3) A Zeova getame la a nand modgr nins tõnd ned kam fãa sẽn maand n na n moon koɛɛgã n paasã. (Heb. 6:10) D sẽn mi tɩ d sẽn modgd n tʋmd a Zeova tʋʋmdã d tata a yamã, kõt-d-la sũ-noog wʋsgo.—1 Kib. 29:9.
3, 4. Wãn to la sõngr so-pakrã nafd tõndo?
3 Naoor wʋsgo, d sã n minim n maand bũmbu, bõn-kãng maaneg wat n lebga nana ne-do, la kõt-d sũ-noogo. Y sã n dɩkd sẽk wʋsg n moond koɛɛgã, na n kɩtame tɩ zak-zak moonegã lebg nana ne-yã. Rẽ na n kɩtame tɩ y tõog n sɩngd sõsg ne nebã nana-nana, la y tʋmd ne Biiblã nana-nana me. Y sã n nong n gomd ne nebã y tẽebã yelle, y tẽebã paamda pãng n paasdẽ. Saam-biis wʋsg sẽn da pa tar Biibl karen-biis tõog n paamame, b sẽn yɩ sõngr so-pakdbã yĩnga.
4 D sã n yaa kiris-ned sẽn pa tar yẽesem, sõngr so-pakrã tõe n sõng-d lame tɩ d paam yẽesem. Saam-biig a ye sẽn da bas n pa le yaa wakat fãa so-pakd wa n bãngame t’a rɩkda a sẽkã wʋsg n tʋmd tʋʋm a taaba. Woto kɩtame t’a yãk yam n na n yɩ sõngr so-pakd kiuug a ye. A yeela woto: “Mam sẽn yɩ sõngr so-pakd kiuug a ye pʋgẽ wã balã, kenga mam tẽebã hal wʋsgo! Mam yãka yam n kell n yɩ sõngr so-pakd hal tɩ kɩt tɩ m wa lebg wakat fãa so-pakd yɛsa.”
5. Y sã n tagsdẽ tɩ y pa tõe n yɩ sõngr so-pakda, bõe la y tõe n maane?
5 D sẽn na n maan to-to n tõog d rabeemã: Neb kẽer tõe n yɛɛsdame n pa rat n yɩ sõngr so-pakdba, bala b tagsdame tɩ b pa tõe n moon koɛɛgã sõma ye. Yãmb me sã n tagsd woto, a Zeova tõe n sõnga yãmb wa a sẽn sõng a Zeremi wã. (Zer. 1:6-10) Baa ne a Moiiz sẽn da ‘ka gom-minim soabã,’ a Zeova tũnugã ne-a n pids a raabã. (Yik. 4:10-12) Y sã n tagsdame tɩ y pa tõe, bɩ y kos a Zeova t’a kõ-y raoodo.
6. Bõe la d tõe n maan n tõog n yɩ sõngr so-pakd baa tɩ d pa tar sẽk bɩ laafɩ?
6 Laafɩ kaalem bɩ sẽkã kaalem kɩtame tɩ y yɛɛsd n pa rat n yɩ sõngr so-pakd bɩ? Sã n mik tɩ y laafɩ wã pa waooge, y sã n maand sẽn zemsd y sẽn tõe tɛka, tõe n kɩtame tɩ y tõog n yɩ sõngr so-pakda. La y sã n pa tar sẽka, y tõe n viiga tʋʋm nins sẽn pa tar yõod wʋsgã n wa tʋm-b kiuug a to. Saam-biis sãnda sẽn tʋmd wakat fãa yãka raar a ye bɩ rasem a yiib n pa tʋm n na n tõog n yɩ sõngr so-pakdba.—Kol. 4:5.
7. Bõe yĩng tɩ tar yõod tɩ d pʋʋsd Wẽnnaam sõngr so-pakrã yelle?
7 D sẽn na n maan to-to: Pʋʋs-y a Zeova n yeel-a tɩ y rat n yɩɩ sõngr so-pakda. Kos-y-yã t’a ning modgr ning y sẽn maand n dat n yɩ sõngr so-pakdã barka. (Rom 12:11, 12) A tõe n sõng-y lame tɩ y bãng y sẽn na n maan to-to n paam sẽka. (Zak 1:5) Sã n mikame tɩ sõngr so-pakrã yamleoog pa tar-yã, bɩ y kos a Zeova t’a sõng-y tɩ y paam sũ-noog koe-noogã mooneg pʋgẽ.—Luk 10:1, 17.
8. Wãn to la Yelbũn 15:22 tõe n sõng-y tɩ y tõog n yɩ sõngr so-pakda?
8 Sõs-y sõngr so-pakrã yell ne y zakã rãmba. (Yel. 15:22) Tõe tɩ zakã pʋgẽ neb a taab tõog n sõng nin-yend t’a yɩ sõngr so-pakda. Wilg-y tigingã pʋgẽ neb a taabã tɩ y rat n yɩɩ sõngr so-pakda, sẽn tɩ yɩɩda neb nins yɛl sẽn wõnd yãmb rẽndã. Woto tõe n kɩtame tɩ y paam yẽesem n paas n tõog n yɩ sõngr so-pakda.
9. Ki-bʋs la y tõe n yãk n yɩ sõngr so-pakda?
9 Yãmb sã n wa get yãmb sẽn na n sigl to-to n moon koɛɛgã tʋʋmdã yʋʋm-paalgã sasa, wakat bʋg la yãmb tagsd tɩ y tõe n yãk n yɩɩ sõngr so-pakda? Yãmb sã n yaa lekoll karen-biiga, wall y tʋʋmd daar fãa, y tõe n gesame n yãk kiis nins sẽn tar vʋʋsg daya, bɩ sẽn tar sib a nu wall hat a nu wã. Wala makre, bõn-bɩʋʋngo, yʋʋm-sare, tʋʋlg la sa-sik kiisã tara sib a nu la hat a nu. Sig-noy kiuugã tara sib a nu, tɩ sigr kiuugã tar hat a nu. Y sã n yaa bãad bɩ y ges n yãk kiis nins sẽn yaa sõma n sakd mooneg ne yãmbã. Y tõe n yɩɩ sõngr so-pakd kiuug ning tigims sull yel-gɛta sẽn na n wa kaag yãmb tigingã. A kaagrã sasa, y na n paama zu-noog n kẽng wakat fãa so-pakdbã tigisgã, n kelg pipi babgã. A Zezi kũumã Tẽegr sẽn na n yɩ tʋʋlg kiuugã rasem 22 wã yĩnga, y tõe n yɩɩ sõngr so-pakd tʋʋlgo, tʋʋl-nif la sig-noy kiisã sasa. Y sã n wa yãk kiuug bɩ kiis nins y sẽn dat n yɩ sõngr so-pakdã, bɩ y gʋls na-kẽndr sẽn na n sõng-y tɩ y tõog n moon tɩ ta lɛɛr nins sõor b sẽn baoodã.
10. Sã n mik tɩ y pa tõe n yɩ sõngr so-pakda, bõe la y tõe n maane?
10 Baa tɩ y sã n tagsdame tɩ y pa tõe n yɩ sõngr so-pakd tʋʋmdã yʋʋmd ning sẽn watã pʋgẽ, y tõe n ket n moonda koɛɛgã ne yẽesem. Ket-y n maand-y y sẽn tõe fãa koe-noogã mooneg pʋgẽ, la y bãng tɩ y sẽn maand woto wã tata a Zeova yam. (Gal. 6:4) Sõng-y neb nins sẽn yaa-b sõngr so-pakdbã la y keng b raoodo. Y tõe n gesa y sẽkã n yãk raar semennã pʋgẽ n moon ne so-pakdbã.
11. Bõe yĩng tɩ d segd n ning d yamẽ tɩ tõnd wakatã pa reem wakate?
11 A Zeova Kaset rãmbã miime tɩ wakat ning sẽn ketã pa reem wakat ye. Koe-noogã mooneg yaa tʋʋmd b sẽn segd n pidsi. Neb vɩɩm n be yell pʋgẽ, la wakatã sẽn ketã paoodame. (1 Kor. 7:29-31) D sã n nong Wẽnnaam la nebã, na n kɩtame tɩ d maan d sẽn tõe fãa koe-noogã mooneg pʋgẽ. D sã n segl d mens sõma la d modge, d na n tõog n yɩɩ sõngr so-pakd tʋʋmdã yʋʋm-paalgã pʋgẽ, baa yaa kiuug a yembre. Woto sɩd yaa tʋʋm-sõngo!