Segl-y y mens n wa tõog n paas y koe-moonegã
1. A Zezi kũumã tẽegr sã n wa kolge, bõe la d maanda, la wãn-to la d tõe n segl d mens rẽ yĩnga?
1 Yʋʋmd fãa, a Zezi kũumã tẽegr sã n wa kolgdẽ, yaa segb d sẽn paamd n paasd d koe-moonegã sẽn na yɩl n ‘pʋʋs a Zeova bark wʋsgo.’ (Yɩɩl 109:30) Rõndã, y na n tõog n paasa y koe-moonegã tʋʋlg kiuugã sẽn na yɩl n wilg a Zeova sẽn kõ-d rondã y mi-beoog bɩ? Yaa masã la y segd n segl y mens rẽ yĩnga.—Yel. 21:5.
2. a) Rɩẽ tʋʋl-nif kiuugã b sẽn yeel tɩ d tõe n dɩka sõngr so-pakrã n moona lɛɛr 30 wã, yãmb manesem yɩɩ wãna? b) neb a taab me manesem yɩɩ wãna?
2 Sõngr so-pakrã: Rɩẽ, koe-moondbã sẽn bãng tɩ b tõe n dɩka sõngr so-pakrã tʋʋl-nif kiuugã n moon lɛɛr 30 wã, b sũy yɩɩ noog wʋsgo. Saam-biig a ye yeelame: “Mam ket n bee kolɛɛse, tɩ yaa toog tɩ m yɩ wakat fãa so-pakda. La tʋʋl-nif kiuugã, m na n dɩka sõngr so-pakrã n gʋls tɩ m na n moona lɛɛr 30. Baa ne rẽ, m na n modg n paama lɛɛr 50.” Saam-bi-poak sẽn tʋmd yeelame: “Lɛɛr 30 tɛka. Rẽ paoong pa toog ye!” B sẽn wa n togs tɩ woto tõeeme wã, saam-bi-poak yʋʋm sẽn yɩɩd 80 sẽn da yɩ so-pakd yeelame: “Mam da sɩng n baoodame tɩ yɩ woto! A Zeova miime tɩ so-pakrã yɩ-m-la noog wʋsgo!” Kẽer sẽn pa tõog n dɩk sõngr so-pakrã modgame n paas b koe-moonegã.
3. Bõe n kɩt tɩ d segd n mag n ges d sã n pa tõe n dɩk sõngr so-pakrã tʋʋlgo, tʋʋl-nif la sig-noy kiisã?
3 Rõndã tʋʋlg kiuugã, koe-moondbã na n le tõog n dɩka sõngr so-pakrã n moon lɛɛr 30 wall 50. Sẽn paase, tʋʋlg kiuug rasem 17 wã tɛka, d na n pʋɩya seb-vãad n bool nebã tɩ b wa naag-d tʋʋl-nif kiuug rasem a 5 wã n maan Tẽegrã. Koe-moondbã sẽn na n paam n moon koɛɛgã wʋsg tʋʋlg kiuugã yĩnga, na n yɩ-b-la noog hal tɩ kẽer kell n dɩk sõngr so-pakrã tʋʋl-nif la sig-noy kiisã me, n moon lɛɛr 50 wã.
4. Bõe la d tõe n maan n paas d koe-moonegã, la rẽ yõod na n yɩɩ bõe?
4 Yãmb zak pʋgẽ zaabr Biibl zãmsgã sasa, yaa sõma tɩ y naag taab n ges ned fãa sẽn tõe n maan to-to n paas a koe-moonegã tʋʋlgo, tʋʋl-nif la sig-noy kiisã sasa. (Yel. 15:22) Kos-y-yã a Zeova t’a ning modgr ning y sẽn na n maanã barka. (1 Zã 3:22) Y sã n paas y koe-moonegã, y na n paam n pẽga a Zeova n paase, la y sũ-noogã me na n paasame.—2 Kor. 9:6.