Modg-y tɩ tẽegrã kiis yɩ sũ-noog sasa
1. Bõe la y tõe n maan n paas y sũ-noogã tẽegrã kiis sasa?
1 Y tõe n paasa y sũ-noogã tʋʋlgo, tʋʋl-nif la sig-noy kiisã. Wãn-wãna? Yaa y sẽn na n moon koɛɛgã wʋsgo, tɩ sã n tõe bɩ y yɩ sõngr so-pakda. Wãn to la rẽ na n paas y sũ-noogã?
2. Bõe yĩng tɩ d sã n moond koɛɛgã wʋsg bɩ paasd d sũ-noogã?
2 Bao-y n paas-y y sũ-noogã: A Zeova naana tõnd tɩ d tõe n bao n bãng-a la d tũ-a, n paam sũ-noogo. (Luk 11:28) A naan-d lame me tɩ d sã n yaa kõata, bɩ noogd d sũuri. (Tʋʋ. 20:35) Ne koe-moonegã maasem, d waoogda Wẽnnaam la d sõngd d taaba. Rẽ n so tɩ d sã n moond koɛɛgã wʋsg bɩ paasd d sũ-noogã, la d koe-moonegã minim. D minimã sã n paasdẽ, boogda d rabeemã, tɩ d tõe n gom ne raoodo. D na n paama segb toor-toor me n kõ kasetã la d sɩng Biiblã zãmsg ne neba. Woto fãa kɩtame tɩ koe-moonegã tar yamleoogo.
3. Bõe yĩng tɩ tʋʋlg la tʋʋl-nif kiisã sɩd zems ne sõngr so-pakrã?
3 Tʋʋlg la tʋʋl-nif kiisã n zems ne so-pakrã n yɩɩda. Bala, d tõe n moona lɛɛr 30 wall 50 n yɩ sõngr so-pakda. Sẽn paase, tʋʋlg kiuugã rasem 22 sibrã n tall n tãag tʋʋl-nif kiuug rasem 14 tẽne wã sẽn yaa tẽegrã daarã, d na n pʋɩya seb-vãad n bool nebã tɩ b wa a Zezi kũumã tẽegre. Woto yĩnga, tigimsã neb na n naaga taab n moon koɛɛgã wa b sẽn tõe tɛk ne “yam a yembre,” n mao tɩ seb-vãadã ta moonegã zĩig neb wʋsgo.—Sof. 3:9.
4. D sã n dat n yɩ sõngr so-pakda, bõe la d tog n maane?
4 Segl-y pĩnda: Y sã n nan pa segle, bɩ y tags n ges y sẽn tõe n maan to-to n paam sẽk n moon koɛɛgã wʋsg kiuug a ye wall sẽn yɩɩd rẽ. Pʋʋs-y-yã a Zeova n kos sõngre. (Zak 1:5) Gom-y rẽ yell ne y zakã rãmb wall tigingã neb a taaba. (Yel. 15:22) Tõe tɩ woto na n sõng-y lame tɩ y bãng tɩ baa y laafɩ wã sã n pa waoogẽ, wall y sẽkã sã n paoodame me, y tõe n yɩɩ sõngr so-pakda, n paam sũ-noogo.
5. D sã n moon koɛɛgã wʋsg tẽegrã kiis sasa, nafa bʋs la d na n paame?
5 A Zeova ratame t’a nin-buiidã tall sũ-noogo. (Yɩɩl 32:11) D sã n modg n moon koɛɛgã wʋsg tẽegrã kiis sasa, na n paasa d sũ-noogã, la noog d saasẽ Ba wã sũur me.—Yel. 23:24; 27:11.