D moon koɛɛgã wʋsg a Zezi kũumã tẽegr wakate!
1. Bõe yĩng tɩ d segd n gese d sã n tõe n moona tʋʋlgo, tʋʋl-nifu, la sig-noy kiuugã wʋsg n paase?
1 Yãmb tõe n moona wʋsg tʋʋlgo, tʋʋl-nifu, la sig-noy kiuugã bɩ? Karen-biisã ne tʋm-tʋmdb kẽer sẽn yaa koe-moondb na n paama kõnze bilfu, n tõog n moon koɛɛgã wʋsgo. Tʋʋl-nif kiuugã rasem a 2 tɛka, dũniyã gill zugu, d na n pʋɩya seb-vãad n bool nebã tɩ b wa naag tõnd n maan a Zezi kũumã tẽegr tʋʋl-nif kiuugã rasem 17. Rẽ poore d na n modgame n lebg n tɩ ges neb nins sẽn wa a Zezi kũumã tẽegrã, la d bool-b tɩ b wa kelg Tẽegrã poor sõsgã tʋʋl-nif kiuugã rasem 25 semennã. Bʋʋm wʋsg n be sẽn kɩt tɩ d segd n gese d sã n tõe n moona tʋʋlgo, tʋʋl-nifu, la sig-noy kiuugã wʋsg n paase.
2. Bõe la d tõe n maan n paam n moon wʋsgo?
2 Sõngr so-pakrã: Bũmb a ye d sẽn tõe n maan n paam n moon wʋsg yaa d sẽn na n yɩ sõngr so-pakda. Sẽn mik tɩ d fãa pa tar sẽk wʋsgã, woto baoodame tɩ d reng n segl d mense, la d sigl d sẽkã sõma. (Yel. 21:5) D tõe n viiga yɛl nins sẽn pa tɩlae wã n wa maan wakat a to. (Fil. 1:9-11) Y tõe n wilga tigingã neb a taab tɩ y ratame n yɩ sõngr so-pakda. Woto tõe n kɩtame tɩ bãmb me yɩ sõngr so-pakdba.
3. Bõe la zagsã rãmb tõe n maan n tõog n moon wʋsgo?
3 Y zakã pʋgẽ zaabr Biibl zãmsgã sasa, yaa sõma tɩ y sõs ne taab n ges y sẽn tõe n maan bũmb ning kiis a tãabã pʋgẽ. (Yel. 15:22) Woto, y tõe n sõnga zakã neb kẽer tɩ b yɩ sõngr so-pakdb kiuug a ye bɩ sẽn yɩɩd woto. La y sã n mik tɩ rẽ pa tõe, y maanda wãna? Y tõe n modgame n moon koɛɛgã zaabr-zaabre, bɩ n moond wɩkɛn dãmbã wʋsg n paase.
4. D sã n modg n moon wʋsg a Zezi kũumã tẽegr sasa, bark bʋs la d na n paame?
4 A Zeova nee modgr nins tõnd sẽn maand sẽn na yɩl n maan a raabã, la a sũur nooma ne rẽ wʋsgo. (Heb. 6:10) D sã n tʋmd a Zeova tʋʋmã la d sõngd neb a taabã, d paamda sũ-noogo. (1 Kib. 29:9; Tʋʋ. 20:35) Bɩ y modg n moon wʋsg a Zezi kũumã tẽegr sasa, rat n yeel tɩ tʋʋlgo, tʋʋl-nifu, la sig-noy kiuugã n paam bark wʋsgo.