Y na n yɩɩ sõngr so-pakd bɩ?
1. Bõe yĩng tɩ Tẽegrã wakat yaa sasa d sẽn paam n tõe n moon koɛɛgã n paase?
1 Tẽegrã wakat yaa sasa d sẽn paam n tõe n moon koɛɛgã n paase. Sasa kãngã, d tagsda a Zeova nonglem sẽn ka to wã yelle, a sẽn sak t’a biigã ki tɩ yɩ rond tõnd yĩnga. (Zã 3:16) D sũur nooma wʋsg ne bũmb ning a Zeova sẽn maana. Woto kɩtame tɩ d moond koɛɛgã n wilgd nebã a sẽn yaa a soaba, la bũmb nins a sẽn maand ãdem-biisã yĩnga. (Ezai 12:4, 5; Luk 6:45) Leb n yaa sasa d sẽn na n pʋɩ seb-vãad n bool d zo-rãmb la d moonegã zĩig nebã tɩ b wa naag-d a Zezi kũumã tẽegrẽ. Rẽ poore, d na n modgame n tɩ kaag sẽn wa-b Tẽegrã la b rat n bãng n paasã. Y tõe n yɩɩ sõngr so-pakd tʋʋlgo, tʋʋl-nif la sig-noy kiisã n moon koɛɛgã n paas bɩ?
2. Bõe n kɩt tɩ tʋʋlg kiuugã yaa sasa sẽn zems ne sõngr so-pakrã?
2 Modg-y tɩ tʋʋlg kiuugã ra wõneg a taabã ye: Tʋʋlg kiuugã yaa sasa sẽn zems ne sõngr so-pakrã. Sẽn na n yɩ-b sõngr so-pakdbã tõe n moona lɛɛr 30 bɩ 50. Sã n mikame tɩ tigims sull yel-gɛtã kaagda yãmb tigingã tʋʋlg kiuugã pʋgẽ, sẽn yaa-b sõngr so-pakdbã na n paama sor n kẽng tigsg ning a sẽn na n maan ne so-pakdb a taabã. Rõandã, a Zezi kũumã tẽegr na n yɩɩ talaatã daare, tʋʋlg kiuug rasem 26. La d na n sɩnga seb-vãadã pʋɩɩb pĩnda, rat n yeel tɩ tʋʋlg kiuugã pipi daarã tɛka. Sẽn paase tʋʋlg kiuugã tara wɩkɛn dãmb a nu. Woto yĩnga, bɩ y modg n moon wʋsg tʋʋlg kiuugã, n kɩt t’a yɩ kiuug sẽn pa wõnd a taaba.
3. Bõe la y tõe n maan n tõog n paas y koe-moonegã?
3 Segl-y meng masã tɛka: Yaa masã la y tog n segl y mens n tõog n yɩ so-pakda. Y zak pʋgẽ zaabr Biibl zãmsgã sasa, yãmb ne-y zakã rãmb tõe n sõsa ne taab n ges y sẽn tõe n maan to-to n yɩ so-pakdba. (Yel. 15:22) Y sã n pa tõe n yɩ sõngr sõ-pakda, bɩ y ra sãam y sũur ye. Y sã n tõog n yi koɛɛgã mooneg fãa, bɩ y modg n moon n kaoos n yɩɩg raasenkama. Wɩkɛn dãmbã sẽn yãk b toogo, bɩ y yi ray a taabã me n moone.
4. D sã n moon koɛɛgã n paas tʋʋlgo, tʋʋl-nif la sig-noy kiisã, nafa bʋs la d na n paame?
4 D sã n moon koɛɛgã wʋsg tʋʋlgo, tʋʋl-nif la sig-noy kiisã, a Zeova raabã maanego, la d taabã sõngrã sẽn kõt sũ-noog ningã na n paasame. (Zã 4:34; Tʋʋ. 20:35) Sẽn yɩɩd fãa, d modgrã na n nooga a Zeova sũuri.—Yel. 27:11.