D moon koe-noogã sõma
1. Koe-no-bʋs la tõnd segd n togs nebã?
1 Rũndã-rũndã, yaa koe-beed la d wʋmd n yɩɩda. La tõnd tara zu-noog n tõe n “togs Wẽnnaam barkã koe-noog” sõma. (Tʋʋ. 20:24) D togsda nebã tɩ d vɩɩ “yaoolem wakate,” la tɩ ka la bilfu, a Zeova na n waa ne dũni-paalg tɩrlem sẽn na n zĩnd a pʋgẽ, tɩ ‘dẽenem bũmb fãa looge.’ (2 Tɩm. 3:1-5; Wil. 21:4) Wakat kãngã, bãas pa na n le zĩnd ye. (Ezai 33:24) Sẽn ki-bã na n vʋʋgame n le paam n vɩɩmd ne b zakã rãmb la b zo-rãmba. (Zã 5:28, 29) Tẽngã gill fãa na n lebga arzãna. (Ezai 65:21-23) Woto fãa yaa barkã koe-nood a wãn bal tõnd sẽn segd n togs nebã.
2. Bõe yĩng tɩ d tõe n moon koe-noogã n paas tʋʋlgo, tʋʋl-nif la sig-noy kiisã sasa?
2 Tʋʋlgo, tʋʋl-nif la sig-noy kiisã sasa, d na n moona koe-no-kãensã buud hal sõma. Ki-kãensã sasa, tẽns wʋsg pʋsẽ, zĩigã yẽegda tao-tao la a pa sobgd tao-tao ye. Woto kɩtame tɩ b tõe n moon koɛɛgã n kaoose. Sẽn paase, a Zezi kũumã Tẽegr sẽn tar yõod n yɩɩd yʋʋmdã fãa pʋgẽ wã na n yɩɩ tʋʋlg kiuugã rasem 22 wã sibrã daare, wĩntoogã lʋɩɩs poore. Yaa masã tɛk la d segd n sɩng d mens seglg n wa tõog n moon koɛɛgã n paase.
3. Bõe n tõe n sõng tõnd zakã rãmb tɩ b moon koɛɛgã n paase?
3 Sõngr so-pakrã: Rẽ yĩnga yãmb tõe n manega y sẽkã sẽn na yɩl n yɩ sõngr so-pakd kiuug a ye bɩ kiis a tãabã fãa sasa bɩ? Poorẽ, yãmb ne y zakã rãmb sã n na n wa zãms Biiblã, y tõe n dɩka sẽk n sõs rẽ yelle. Zakã rãmb sã n naag taaba, b tõe n sõnga zaka nin-yɛng ka rẽ bɩ sẽn yɩɩd woto meng tɩ b yɩ sõngr so-pakdba. (Yel. 15:22) Pʋʋs-y a Zeova n gom rẽ yelle, la y ges a sẽn na n ning y modgrã bark to-to. (Yel. 16:3) Baa yãmb zakã ned baa a ye sã n pa tõe n yɩ sõngr so-pakda, zakã rãmb fãa tõe n gesa b sẽn na n maan to-to n naag neb nins sẽn yaa sõngr so-pakdbã n moon n paase.
4. Tõnd sã n yaa tʋm-tʋmda, wãn to la d tõe n sigl d sẽkã n tõog n yɩ sõngr so-pakda?
4 Yãmb sã n yaa tʋm-tʋmd sẽn pa tar sẽk wʋsgo, y tõe n manega y sẽkã sõma n tõog n yɩ sõngr so-pakda. Wala makre y sã n sig tʋʋmã midi n na n vʋʋse, y tõe n dɩka sẽk-kãng bilf n moone. Y tõeeme me n kos mooneg zĩig sẽn pẽ yãmb zakã bɩ y tʋʋmã zĩigẽ, n moond koɛɛgã lɛɛr a ye bɩ sẽn yɩɩd woto, nand tɩ tʋʋmã sɩnge, bɩ tʋʋmã sigb poore. Yãmb sã n da siglame n na n maan yɛl kẽer sẽn pa yel-yãgdem, y tõe n basame n maan-b kiuug a to pʋgẽ, la y moon koɛɛgã wʋsg wɩkɛn dãmbã. Kẽer meng yãka daar a ye bɩ rasem a yiib n pa tʋm n tõog n moon koɛɛgã n paase.
5. Wãn to la d tõe n sõng sẽn kʋʋl-bã bɩ koms-rãmbã tɩ b yɩ sõngr so-pakdba?
5 Yãmb sã n kʋʋlame, y sã n yaa koamsa, bɩ y keelmã sã n pa waoogẽ, yãmb tõeeme n yɩ sõngr so-pakda, n moond koɛɛgã bilf daar fãa. Kos-y a Zeova t’a kõ-y “pãn-kãsenga.” (2 Kor. 4:7) Saam-bi-poak sẽn tar yʋʋm 106 tõog n yɩɩ sõngr so-pakda. A zakã neb nins sẽn yaa a Zeova Kaset rãmbã n paas a tigingã neb a taab sõng-a lame t’a tõog n moon zak-zaka, n lebg n tɩ ges nebã, n zãms Biiblã ne neba, la a tʋm koe-moonegã tʋʋm a taab me. A sõngame n kɩt tɩ neb piig sɩng Biiblã zãmsgo. A yeela woto: “Mam sã n tagsd zu-noog ning mam sẽn paam n yɩ sõngr so-pakdã yelle, mam nonglmã la m mi-beoogã ne a Zeova, a Bi-riblã la ne a siglgã paasdame. Mam pʋʋsda a Zeova bark wʋsgo.”
6. Bõe la kom-bɩɩs nins sẽn deeg lisg n ket n kẽnd lekollã tõe n maan n tõog n yɩ sõngr so-pakdba?
6 Yãmb sã n yaa bi-bɩɩg sẽn deeg lisg n ket n kẽnd lekolle, yãmb me tõeeme n yɩ sõngr so-pakdba. Wala tʋm-tʋmdbã, yãmb me tõe n sigla y sẽkã n moond wɩkɛn dãmbã n yɩɩda. Y tõeeme meng n yit ray a taab karengã poor n moond lɛɛr a ye bɩ sẽn yɩɩd woto. Kõnze rãmbã sasa me, y tõe n yit n moondame. Yãmb sã n dat n yɩ sõngr so-pakda, bɩ y gom rẽ yell ne y roagdbã.
7. Tʋʋlgo, tʋʋl-nif la sig-noy kiisã sasa, bõe la kãsem dãmbã tõe n maan n kɩt tɩ tigingã neb yẽesem paase?
7 Kãsem dãmbã sẽn tõe n sõng tigingã neb to-to: Kãsem dãmbã mak-sõngã tõe n paasa tigingã neb fãa yẽesem. (1 Pɩɛ. 5:2, 3) B tõe n sigla koe-moonegã sasa a taab me, tɩ neb kẽer tõog n moon yibeoog pĩnda, karengã poore, bɩ tʋʋmã sigb poore. Tʋʋmdã yel-gɛt segd n yãka koe-moondb sẽn tõe n lʋɩ taoor n maan tigissã tɩ nebã yaool n yi n moone, la a ges tɩ moonegã zĩis n paas sɛbã la zʋrno rãmbã sek kiis a tãabã fãa sasa.
8. Bõe la tiging a ye kibar zãmsd tõndo?
8 Tiging a ye pʋgẽ, kãsem dãmbã sɩnga sõngr so-pakrã yell goam ne tigingã neb pĩnd-pĩnda. Semen fãa, b ra togsda tigingã neb so-pakdbã sõore. Rẽ kɩtame tɩ neb nins fãa sẽn da tʋll n moon koɛɛgã n paasã bãng tɩ b pa na n yɩ b yembr ye. B ra siglame tɩ neb kẽer tõe n yi n moon yibeoog pĩnd la zaabre. Rẽ kɩtame tɩ tigingã koe-moondb 53 yɩ sõngr so-pakdba, sẽn dat n yeel tɩ koe-moondbã pʋɩ-sʋk la bala.
9. Bõe yĩng tɩ tʋʋlgo, tʋʋl-nif la sig-noy kiisã yaa sõma ne neb nins sẽn dat n sɩng koe-moonegã?
9 D sõng neb a taabã tɩ b moon koɛɛgã: Sẽn zãmsdb Biiblã la kambã sã n wa tõe n yit koe-moonegã, sɩngrẽ wã b kɩtdame tɩ b yit ne koe-moondb nins sẽn zoe n tar minimã. La b tõe n paamame n moon ne koe-moondb nins sẽn tar minimã sõma tʋʋlgo, tʋʋl-nif la sig-noy kiisã sasa, bala yaa wakat kãng la tigingã neb wʋsg moond koɛɛgã n paasdẽ. Yãmb zãmsda ned Biiblã t’a soab tũud a Zeova noyã sõma bɩ? Yãmb tara kamb sẽn tar manesem sõng la b bɩɩsd b tẽebã n yaool n nan pa koe-moondb bɩ? B sã n wilg tɩ b rat n lebga koe-moondb tɩ yãmb sɩd tagsdẽ tɩ b tõeeme, bɩ y togs kãsem soab a ye. Yel-gɛtbã taoor-lʋɩtã na n yãka kãsem dãmb a yiib tɩ b sõs ne yãmb la ne y biigã bɩ ned ning y sẽn zãmsd Biiblã.
10. Bõe la kãsem dãmbã tõe n maan n sõng neb nins sẽn pa le moond koɛɛgã la b pa le kẽnd tigissã?
10 Tʋʋlg kiuugã n tɩ tãag sig-noy kiuugã sasa me, koe-moondb nins sẽn pa le moond koɛɛgã la b pa le kẽnd tigissã tõeeme n lebg n sɩng rẽ maanego. Sebrã zãmsg yel-gɛtb la kãsem dãmb a taabã segd n maana b sẽn tõe fãa n tɩ ges nin-kãensã la b bool-b tɩ b wa naag-b n moon koɛɛgã. Sã n mikame tɩ b sẽn da moon koɛɛgã kaoosame, kãsem dãmb a yiib segd n deng n tɩ sõsã ne-b n bãng b sã n ket n tõe n moona koɛɛgã.—km 11/00 seb-neng a 3.
11. Bõe n wilgd tɩ Wẽnnaam sɩd nonga tõnd hal wʋsgo?
11 D segl d mens Tẽegrã yĩnga: Rondã yaa Wẽnnaam kũun sẽn wilgd t’a nonga tõnd hal wʋsgo. (Tʋʋ. 20:24) Tʋʋlg kiuug rasem 22 wã sibrã daare, wĩntoogã lʋɩɩs poore, dũniyã gill zugu, neb milyõ rãmb n na n tigim taab n maan Kiristã kũumã Tẽegr n wilg b mi-beoogo. Tõnd dat n boola sẽn dat-bã fãa tɩ b wa naag-d n maan Tẽegrã sẽn wilgd t’a Zeova nonga ãdem-biisã.
12. Ãnd dãmb la d segd n bool tɩ b wa Tẽegrã?
12 Gʋls-y neb nins yãmb sẽn dat n boolã yʋya. Tõe n yɩɩ yãmb roagdba, y yagse, y karen-bi-taase, y tʋmd-n-taase, yãmb sẽn zãmsd neb nins Biiblã la sẽn da zãms-b Biiblã pĩndã, la neb nins yãmb sẽn tʋgd n getẽ wã. Yãmb sẽn boond-b rãmbã sã n sok yãmb bũmb Tẽegrã zugu, y tõe n gesa Biiblã yetame sebrã pʋgẽ, a neng 206-8 wã, zĩig ning b sẽn gomd Soaalã kũum Tẽegr yellã. Woto meng tõe n kɩtame tɩ y tõog n sɩng Biiblã zãmsg ne-ba, sẽn mik tɩ yaa sebr ning tõnd sẽn tar n zãmsd nebã Biiblã pʋgẽ la y na n karem n leok a soabã.
13. Wãn to la a Zeova ning koe-moondb a yiib modgr barka, b sẽn bool neb Tẽegrã yĩngã?
13 Saam-bi-poak a ye gʋlsa zags rãmb 48 a sẽn da tʋll n bool yʋya. A sã n da bool zak a ye neba, a rẽegda b yʋyã sebrã zugu, la a gʋls yẽ sẽn bool-b daar ningã. La a sũurã yɩɩ noog wʋsgo, bala yẽ sẽn bool-b rãmbã sʋka, neb 26 n tõog n wa. Saam-biig a ye sẽn tar butik boola a tʋm-tʋmd a ye sẽn da yɩ prɛtre. Raoã waame, la rẽ poore a yeela woto: “Mam sẽn zãms bũmb ning Biiblã zug lɛɛr a yembrã sasa wã yɩɩda mam sẽn zãms bũmb ning katolik rãmbã wẽnd-doogẽ wã yʋʋm 30 wã sasa.” Tẽegrã loogr poor bilfu, a sak n sɩnga Biiblã zãmsg Biiblã yetame sebrã pʋgẽ.
14. Tʋʋm-bʋg n na n sɩng tʋʋlg kiuugã pipi daar dũniyã gill zugu?
14 Nebã boolgo: Sẽn sɩng ne tʋʋlg kiuugã pipi daar n tɩ tãag tʋʋlg kiuugã rasem 22 wã, d na n pʋɩya seb-vãad dũniyã gill zug n bool nebã tɩ b wa a Zezi kũumã Tẽegrã. Yɩta sõma tɩ koe-moondbã fãa kẽes b toog zãng-zãng tʋʋm-kãngã pʋgẽ. Yaa sõma me tɩ d yã nebã mens n kõ-b sɛbã la d ra bas b rignoyẽ wã ye. La sã n mik tɩ yãmb moonegã zĩig yalma wʋsgo, kãsem dãmbã tõe n gesa sã n yaa sõma tɩ y maand yam ne yam n basd seb-vãadã neb nins y sẽn pa mikd yirã rignoyẽ. Wɩkɛn dãmbã, d na n pʋɩta zʋrno rãmbã me.
15. Bõe la d tõe n yeel n bool nebã tɩ b wa Tẽegrã?
15 Sẽn mik tɩ d pa na n paam sẽk wʋsg n pʋɩ seb-vãadã yĩnga, d segd n goma ne nebã koɛɛg-koɛɛga. D tall yẽesem la d wilg tɩ d nonga nebã. Y tõe n yeela woto: “D pʋɩta seb-vãad n boond yãmba, y zakã rãmba, la y zo-rãmbã tɩ y wa naag-d n maan tigis-kãseng sẽn na n zĩnd tʋʋlg kiuugã rasem 22. Yãmb dẽnd la woto. Seb-vãoogã pʋgẽ, y na n yãa kibay a taab n paase.” A soabã tõe n tara sogsg n na n soke, bɩ a tõe n deega seb-vãoogã la a yeel meng t’a na n modg n waame. A sã n sɩd rat n bãng n paase, bɩ y gʋls a yʋʋrã la y modg n lebg n tɩ ges-a.
16. Kiba-bʋg n wilgd tɩ tara yõod tɩ d pʋɩ seb-vãad n bool nebã tɩ b wa Tẽegrã?
16 Rɩẽ, sodaag a ye yãa boolã seb-vãoog a roogã noore. A ra rat n kẽngame, la a ra segd n deng n bõosa a sɛrzã wã sore. A sẽn wilg a sɛrzã wã seb-vãoogã, a sɛrzã wã reng n yalsa sɩɩ n yaool n yeel tɩ yẽ roagdbã yaa a Zeova Kaset rãmba, la tɩ yẽ mengã ra mii n tũud-b lame n kẽnd tigissã. Sɛrzã wã kõ-a-la sore, la a tũ-a meng n kẽnge.
17. Wãn to la d wilgd tɩ d pa reegd Wẽnnaam barkã zaalem?
17 D wilg d mi-beoogo: Tʋʋlgo, tʋʋl-nif la sig-noy kiisã sẽn kolgdã yĩnga, bɩ tõnd ned kam fãa tags a Zeova sẽn nong-a to-to wã yelle. Tʋm-tʋmd a Poll gʋlsa woto: “Tõnd kota yãmb tɩ y ra reeg Wẽnnaam barkã zaalem ye.” (2 Kor. 6:1) Wãn to la d tõe n wilg tɩ d pa reeg Wẽnnaam barkã zaalem? A Poll gʋlsa woto: “La ne bũmb fãa pʋga tõnd wilgdame tɩ tõnd yaa Wẽnnaam tʋm-tʋmdba.” (2 Kor. 6:4, Kãab-paalgã Koe-noogo.) Dẽnd tõnd sã n tar manesem sõng la d moond koe-noogã ne yẽesem, d wilgdame tɩ d tara mi-beoog ne a Zeova, a sẽn kõ tõnd kũunã yĩnga. Tʋʋlg kiuugã n tãag sig-noy kiuugã sasa, d na n tõog n moona koɛɛgã sõma n paase.
[Zĩ-gũbri, seb-neng a 3]
Ãnd dãmb me n tõe n yɩ sõngr so-pakdba?
◼ Zagsã rãmba
◼ Tʋm-tʋmdbã
◼ Koms-rãmbã la sẽn kʋʋl-bã
◼ Karen-biisã
[Zĩ-gũbri, seb-neng a 4]
Y sã n wa pʋɩt sɛb-vãadã:
◼ Gom-y koɛɛg-koɛɛg ne yẽesem
◼ Gʋls-y neb nins sẽn dat n bãng n paasã yʋy n lebg n tɩ ges-ba
◼ Pʋɩ-y zʋrno rãmbã wɩkɛn dãmbã