Ket-y n togsd a Zeova tʋʋm-kãsemsã
1. A Zeova tʋʋm-kãsemsã sʋka, bʋs la y nand n tɩ yɩɩda?
1 Ned ba a ye kae n yaa wa tõnd Wẽnnaam kãseng a Zeova ye! A Davɩɩd gʋlsame: “[Zeova], mam Wẽnnaam, yãmb bõn-bãna yãmb sẽn maanã ne y tagsga tõnd yĩnga yaa wʋsgo. A to kae sẽn zem yãmb ye.” (Yɩɩl 40:6) A Zeova sẽn naan ãndũni wã, Mesi Rĩungã, nonglem tʋʋm nins a sẽn tʋm a nin-buiidã yĩngã, la a koɛɛgã b sẽn moond dũniyã gill zugã bee a tʋʋm-kãsemsã sʋka. (Yɩɩl 17:7, 8; 139:14; Dan. 2:44; Mat. 24:14) D sẽn nong a Zeova la d nand bũmb nins fãa a sẽn naana yĩng kɩtame tɩ d gomd a yell ne neb a taabã. (Yɩɩl 145:5-7) Tʋʋlgo, tʋʋl-nif la sig-noy kiisã sasa d na n paama segb sẽn na yɩl n maan dẽ n paase.
2. Wãn-wãn la sõngr so-pakrã nafd tõndo?
2 Rɩk-y sõngr so-pakrã tʋʋmde: Rẽ yĩnga, ki-kãensã pʋsẽ b sẽn na n wɩng ne koe-moonegã n paasã, y tõe n segla y mens sẽn na yɩl n dɩk lɛɛr 50 koe-moonegã yĩng kiuug a ye bɩ sẽn yɩɩd rẽ bɩ? Y sã n toeem y raasenkam yɛla tʋʋm kãnga yĩnga, na n naf-y lame. (Ef. 5:16) Neb wʋsg yãame tɩ sõngr so-pakrã tʋʋmd sõng-b lame tɩ b paas b koe-moonegã sõmblem. Koɛɛgã mooneg zak-zakã lebga nana ne-ba, la b tõog n tʋma ne Biiblã wʋsgo. B sẽn dɩk sẽk wʋsg n kẽes b mens koe-moonegã pʋgẽ wã yĩng kɩtame tɩ b tõog n kell n sõng neb nins sẽn wilg tɩ b rat n bãnga sɩdã n paasã. Sẽn paase, neb kẽer sẽn da zɩ n zãms Biiblã ne ned paam n sɩnga Biibl zãmsg b sõngr so-pakrã tʋʋmd wakate. Sõngr so-pakrã tʋʋmd sẽn kɩtd tɩ d maan modgr wʋsg neb a taabã sõngr yĩngã, a yaa tʋʋmd sẽn kõt sũ-noogo.—Tʋʋ. 20:35.
3. Wãn-wãn la neb kẽer tõog n dɩk sõngr so-pakrã tʋʋmd baa ne b yɛlã sẽn pa nana wã?
3 Ra yɩ-y yãg-yãg n yeel tɩ yãmb yɛlã sẽn yaa to-to wã yĩng kɩtame tɩ y pa tõe n dɩk sõngr so-pakrã tʋʋmd ye. Kãsem soab a ye sẽn tar kamb a yiibu, la a tar nug tʋʋmd n tʋmd wakat fãa n dɩk sõngr so-pakrã rɩẽ. Wãn-wãn la saam-bi-kãngã sẽn pa tar sẽkã tõog n pids tʋʋmdã? Sẽn mik t’a tʋmda semena pʋgẽ wã yĩnga, a ra rɩkda sẽk wʋsg wɩkɛn dãmbã n sɩngd ne kasetã kũun sibr daar fãa yibeoog wakat a 7 wã sorã zugu. Tigingã pʋgẽ, neb kẽer yɛl sẽn wõnd woto me rɩka sõngr so-pakrã, la b sõnga taab la b keng taab raoodo. Tiging a ye pʋgẽ, saam-bi-poak sẽn tar yʋʋm 99 rɩka sard n na n kẽes a meng sõngr so-pakrã tʋʋmdẽ sig-noy kiuugã, a bi-pugl sẽn bool-a t’a wa naag-a poore. Tigingã neb a taabã sõng-a lame, n tusd a põor weefã n yãagd-a zak-zaka, la neb nins a sẽn zãmsd Biiblã yiya. A leb n kõo kasetã ne telefõnne, a moona sorã zug la a gʋls lɛta n moone. A sak n deegame tɩ pa ne yẽ meng pãng la a tõog n maan dẽ ye, la yaa ne a Zeova sõngr bala.—Ezai 40:29-31.
4. Yel-bʋs la d segd n ges d sã n sigind sõngr so-pakrã tʋʋmd na-kẽndre?
4 Sigl-y tʋʋmd na-kẽndr sẽn zemsd ne y yɛlã. Na-kẽndr ning sẽn be seb-kãngã pʋgẽ wã tõe n sõng-y lame. Rẽ yĩnga y tʋmda wakat fãa bɩ y kẽnda lekolle? Sã n yaa rẽ, tõe tɩ sẽn são yaa y sẽn na n moond wɩkɛn dãmbã. Y yĩnsã sã n pa noome tɩ rẽ kɩt tɩ y pa tõe n moon daar tõre, tʋʋmd na-kẽndr sẽn na n kɩt tɩ y tõog n moon wakat bilf daar fãa tõe n zemsa ne-yã. Togs-y neb a taabã tɩ y rat n dɩka sõngr so-pakrã. Tõe tɩ bãmb me na n yãka yam n naag-yã.
5. Bõn-datl bʋg la bi-bɩɩg tõe n yãk tʋʋlgo, tʋʋl-nif la sig-noy kiisã pʋsẽ?
5 Kom-bɩɩsã sẽn tõe n kẽes b mens to-to: Kom-bɩɩsã sã n togsd a Zeova tʋʋm kãsemsã, noogda a sũuri. (Yɩɩl 71:17; Mat. 21:16) Y sã n yaa bi-bɩɩg sẽn deeg lisgu, y tõe n dɩka sõngr so-pakrã tʋʋmd kiuug a yembr n moon ray nins lekoll sẽn kaeyã. Y sã n pa tõe n dɩk sõngr so-pakrã, rẽ yĩnga, y tõe n yãka lɛɛr dãmb takɩ y sẽn na n moon la y bao n paas y koe-moonegã sõmblem ki-kãensã pʋsẽ bɩ? Y sã n sɩng n moonda ne y roagdbã n yaool n nan pa koe-moond sẽn pa reeg lisgu, wakat kãnga yaa sasa sẽn zems y sẽn tõe n modg n yɩ koe-moond sẽn pa reeg lisgu. Y pa tog n tags tɩ y segd n yɩɩ ned sẽn mi sogsg wʋsg sẽn tik Biiblã zug leoore, bɩ tɩ y tog n bãnga yɛl wʋsg wa kom-kãsems nins sẽn deeg lisgã ye. Rẽ yĩnga, y mii Biiblã zãms-yẽg bɩ? Y tũuda noy nins sẽn be a pʋgẽ wã bɩ? Y ratame tɩ neba bãng tɩ y yaa a Zeova Kaset soab bɩ? Sã n yaa woto bɩ y gom ne y roagdbã rẽ wɛɛngẽ. B tõe n tɩ yãa kãsem dãmbã tɩ b ges y sã n tara zʋgd nins sẽn zemsã.—Ges-y Notre ministère sebrã seb-neng 98-9.
6. Wãn-wãn la d tõe n sõng Biiblã karen-biis tɩ b lebg koe-noogã moondba?
6 Sõng-y neb a taabã tɩ b moone: Tõe tɩ Biiblã karen-biis nins sẽn bɩt tẽebã pʋgẽ n paasdẽ wã naag tõnd ki-kãensã tʋʋmdã sẽn na n yɩ wʋsgã pʋgẽ. Y sã n zãmsda Biiblã ne ned sẽn bɩt sõma tẽebã pʋgẽ n paasdẽ bɩ y kos y sebrã zãmsg yel-gɛt wall tʋʋmdã yel-gɛt sõngre. Bãmb nin-yɛng tõe n wa naag-y lame n ges a soabã bɩʋʋng sẽn zem to-to. Sã n mik tɩ karen-biigã tara zʋgd nins sẽn zemsã n tʋll n lebg koe-moonda, yel-gɛt taoor soabã segd n dɩka segls tɩ kãsem dãmb a yiib wa seg yãmb ne karen-biigã. (Ges-y yʋʋmd 1988 bõn-bɩʋʋng kiuug rasem 15 Gũusg Gãsgã ne farende, seb-neng 17.) B sã n mik t’a tõe n yɩɩ koe-moonda, bɩ y sõng-a tao-tao t’a sɩng koɛɛgã moonego.
7. Wãn-wãn la b segd n sõng koe-moondb nins sẽn pa ye moond koɛɛgã, bɩ sẽn pa moond-b kiuug fãa wã?
7 Sebrã zãmsg yel-gɛtb segd n gesa b sulã pʋsẽ neb nins sẽn pa ye moond koɛɛgã, bɩ sẽn pa moond-b kiuug fãa wã yelle. Bool-y-b tɩ b wa yãag-y koe-moonegẽ wã. B sã n kaoosame n pa moone, yɩta sõma tɩ kãsem dãmb a yiib reng n sõs ne-b n ges b sã n ket n tõe n mooname. (Ges-y Yãmb sogsgã leoore yʋʋmd 2000 sɩpaolg kiuugã Rĩungã Tʋʋmde.) Tigingã neb yẽesem ki-kãensã tʋʋmdã sẽn na n yɩ wʋsgã pʋgẽ wã tõe n kenga b raoodo, n kɩt tɩ b lebg n sɩng koɛɛgã mooneg wakat fãa.
8, 9. Bõe la kãsem dãmbã tõe n maan n kɩt tɩ nebã kẽes b mens sõngr so-pakrã tʋʋmdẽ ki-kãensã?
8 Segl-y y mens masã tɛk n paas y tʋʋmdã: Kãsem dãmba, sɩng-y masã tɛk n wilg tigingã neb tɩ sõngr so-pakrã tʋʋmd tara yõod wʋsgo. Y tõe n maana rẽ ne y sẽn na n gom koe-moonegã tʋʋmd yell neere, la y kõ mak-sõngo. (1 Pɩɛ. 5:3) Tigingã paama sõngr so-pakdb a wãn rɩẽ? Rẽ yĩnga, b sõorã tõe n yɩɩga rẽ rõandã bɩ? Sebrã zãmsg yel-gɛtb ne b sõngdbã segd n baoa soay n kɩt tɩ b sulã neb fãa paas b koe-moonegã tʋʋmde. Tʋʋmdã yel-gɛtb tõe n sigla koe-moonegã yiib tigiss a taab n paase. Reng-y n wilg-y tigingã neb segls nins b sẽn dɩkã. Kɩt-y tɩ koe-moondb sẽn tar minim lʋɩt taoore, la b sɩngd tigissã la b baasd lɛɛre. (Ges-y Yãmb sogsgã leoore yʋʋmd 2001 bõn-bɩʋʋng kiuug Rĩungã Tʋʋmde.) Tʋʋmdã yel-gɛt leb n segd n gesame tɩ b paam moonegã zĩis la sɛbã tɩ seke.
9 Rɩẽ, tiging a ye kãsem dãmb sɩnga nebã tẽegr pĩnd-pĩnd tɩ b kẽes b mens sõngr so-pakrã tʋʋmdẽ, tɩ kãsem dãmb a wãn pids so-pakrã tʋʋmd kosg sebre. B sigla koe-moonegã yiib sasa a taab n paase, a ye yɩɩ yibeoog wakat a 5:30 kasetã kũun soayã zut yĩnga, a to yɩɩ zaabr wakat a 3 sẽn debd-b lekollã yĩnga, tãab-n-soaba yɩɩ zaabr wakat a 6, sẽn sigd-b tʋʋm wakat kãnga wã yĩnga. Sẽn paase, b sigla tigiss a tãab sibr fãa koe-moonegã yiib yĩnga. Tigingã neb 66 n dɩk sõngr so-pakrã tʋʋl-nif kiuugã pʋgẽ!
10. Wãn-wãn la zagsã neb tõe n segl b mens n moon n paase?
10 Bõe yĩng tɩ y zak pʋgẽ zãmsg ning sẽn pʋgdã sasa y pa na n yãk bõn-datɩ takɩ kiis nins sẽn watã yĩnga? Zagsã neb sã n sigl b sẽkã sõma la b fãa sã n sak n lagem n tʋme, bãmb sʋka neb kẽer wall b fãa tõogd n dɩka sõngr so-pakrã tʋʋmde. Rẽ maaneg sã n pa tõe bɩ y bao n paas y raasenkam moonegã wakat bɩ n moon sasa a taab n paase. Naag-y taab n pʋʋs rẽ wɛɛngẽ. Y tõe n talla bas-m-yam t’a Zeova na n ninga y modgrã barka.—1 Zã 3:22.
11. a) Bõn-kãsems bʋs la a Zezi maoongã pids-yã? b) Wakat bʋgo, la yɛɛnẽ la y na n maan Tẽegrã?
11 Wẽnnaam tʋʋmd ning sẽn ya-a kãseng n tɩ yɩɩd a taabã: A Zeova sẽn wilg a nonglmã ne manesem sẽn ya-a kãseng n tɩ yɩɩd ya a sẽn sak n kõ a Biriblã tɩ yɩ rond tõnd yel-wẽnã yĩngã. (1 Zã 4:9, 10) Maoongã sẽn yɩ rondã kɩtame tɩ ãdem-biisã na n paam b mens ne kũumã la yel-wẽnã yembdo. (Rom 3:23, 24) Kaool paalgã sẽn yẽbg a Zezi zɩɩmã sẽn daagã zugã maasem yĩngã, Wẽnnaam sakame tɩ ninsaalb sẽn pa zems zãng lebg a kamba, n tar saagr n na n tɩ rɩ naam saasẽ Rĩungã pʋgẽ. (Zer. 31:31-34; Mark 14:24) Bũmb ning sẽn tar yõod n yɩɩdã ya a Zezi sẽn yɩ sakd tɩ zems zãnga, tɩ maneg a Zeova yʋʋrã. (Tõo. 32:4; Yel. 27:11) Tʋʋl-nif kiuugã rasem a 4 hatã raar wĩndgã kõom poore, dũniyã gill zugu d na n maana Kiristã kũumã Tẽegre.
12. Wãn-wãn la Soaalã zaabr dɩɩb tẽegrẽ zĩndg tõe n naf neb nins sẽn wilg ratem n wa wã?
12 Soaalã zaabr dɩɩbã tẽegr pẽgda a Zeova tʋʋm kãsemsã. Tẽegrã sõsg kɩtdame tɩ d tall mi-beoog wʋsg ne a Zeova, a sẽn maan bũmb ning n yao rondã yĩnga. Neb sẽn wilg ratem sã n wa Tẽegrẽ wã, b na n yãa a Zeova tʋʋm kãsems a taaba. B na n yãa a Zeova sẽn zãms a nin-buiidã tɩ b tar lagem-n-taar la nonglem ningã. (Ef. 4:16, 22-24; Zak 3:17, 18) Ned sã n zĩnd be wakat kãng sẽn tar yõodã sasa, tõe n talla pãn-tusdg wʋsg a soabã tagsg zugu, la rẽ kɩtame tɩ d rat tɩ neb wʋsg zĩnd beenẽ baraare.—2 Kor. 5:14, 15.
13, 14. Ãnd rãmb la d tõe n bool Tẽegrẽ wã, la wãn-wãna?
13 Bool-y neb a taabã tɩ b wa: Sɩng-y neb nins y sẽn dat n boolã yʋy gʋlsgo. Y segd n gʋlsa y zagsã neb nins sẽn nan pa tẽedbã yʋya, y yagse, y tʋmd-n-taase, y karen-bɩ-taase, ne neb nins y sẽn zãms Biiblã pĩnd la masã, la y lebg–n-tɩ-ges rãmba fãa yʋya. Sebrã zãmsg yel-gɛtb segd n paasa neb nins fãa sẽn ye pa moond koɛɛgã yʋya.
14 Tũnug-y ne Tẽegrẽ wã boolg sɛbã la y gʋls Tẽegrã zĩig la a lɛɛrã sebrã zugu. Y sã n dat me, y tõe n tũnuga ne yʋʋmd 2004 tʋʋl-nif kiuug pipi raar Gũusg Gãsgã poor boolgã, pa rẽ bɩ a soab ning sẽn be yʋʋmd 2004 tʋʋlg kiuug rasem 22 Réveillez-vous ! wã poorã. Tʋʋl-nif kiuugã sã n wa kolg bɩ y lebg n tɩ kaag neb nins yʋy y sẽn da gʋlsã wall y telefõn n tẽeg-ba.
15. Tẽegrã raare, wãn to la d tõe n maan sãamb sãando?
15 Tẽegrẽ wã: Tẽegrã daar zaabr bɩ y modg n wa pĩnda. Maan-y sãamb sãand n deeg nin-paalsã ne pʋʋsem sõma. (Rom 12:13) Yãmb n segd n ges sãamb nins y sẽn boolã yell n yɩɩda. Waoog-y-b la y wilg-b tigingã neb a taaba. Y tõe n kɩtame tɩ b zĩnd y sɛɛgẽ. La kẽer sã n pa tar Biibl bɩ yɩɩll sebre, d tõe n kɩtame tɩ b naag tõnd bɩ ned a to n karem bɩ n yɩɩle. Tẽegrã poore, b sã n tar sogsg bɩ y sõng-b tɩ b paam leoore. Sã n yaa pipi kẽer sẽn wa Tẽegrẽ wã la woto bɩ y sok-b n ges b sã n tʋll n bãnga Wẽnnaam Gomdã la a raabã n paase. Kãab-y-b Biibl zãmsgo.
16. Bõe la d tõe n maan n sõng neb nins sẽn wa Tẽegrẽ wã tɩ b bɩ tẽebã wɛɛngẽ.
16 Kell-y n sõng-y sẽn wa-bã: Semen nins sẽn na n pʋgl Tẽegrã, neb nins sẽn wa wã tõe n datame tɩ b wa sõng-b n paase. Tõe n yɩɩ woto me ne neb nins sẽn da wat tigissã wakat fãa n yaool n ye pa wat wakat fãa masã wã. Kãsem dãmba segd n gũusame n ges tɩ b ra yĩm nin-kãensã yelle, la b bao n bãng bũmb ning sẽn kɩt tɩ b rãmbã pa ye bɩt tẽebã wɛɛngẽ wã. Kɩt-y tɩ b bãng tɩ wakatã yaa yãgdem wakate. (1 Pɩɛ. 4:7) Sõng-y nebã fãa tɩ b bãng nafa nins b sẽn na n paame, b sã n tũ Biiblã sẽn sagl tɩ d tigimd ne Wẽnnaam nin-buiidã wakat fãa wã.—Heb. 10:24, 25.
17. Bõe yĩng tɩ d segd n ket n togsd a Zeova tʋʋm-kãsemsã?
17 A Zeova tʋʋmã yaa kãsems wʋsg n kɩt tɩ baa d sã n na n vɩɩmd wakat fãa, d pa na n tõog n wʋm b võor zãng ye. (Zoob 42:2, 3; Koɛ. 3:11) Woto yĩnga, d pa na n tol n bas-a pẽgr a tʋʋm-kãsemsã yĩng ye. Tẽegrã sasa, d tõe n wilga d mi-beoog a Zeova tʋʋm-kãsemsã yĩnga, d sẽn na n mao wala d sẽn tõe tɛk n paas d koe-moonegã.
[Zĩ-gũbri, seb-neng a 5]
Y tõe n tũu na-kẽndɩ kãensã a ye n yɩ sõngr so-pakd bɩ?
Tʋʋlgo Tẽ* Ta* Ar* La Arz Si Ha Lɛɛr Zãnga
Daar fãa 1 1 1 1 1 5 2 51
Rasem
a yiibu 5 0 5 0 0 0 0 50
Wɩkɛn
dãmba 0 0 0 0 0 8 5 52
Wɩkɛn
dãmba
la rasem
a yiibu 0 0 2 0 2 6 2 50
Tʋʋl-nifu Tẽ Ta Ar La* Arz* Si Ha Lɛɛr Zãnga
Daar fãa 1 1 1 1 1 5 2 50
Rasem
a yiibu 0 0 0 5 5 0 0 50
Wɩkɛn
dãmba 0 0 0 0 0 8 5 52
Wɩkɛn
dãmba
la rasem
a yiibu 0 0 2 0 2 6 2 50
Sig-noyã Tẽ Ta Ar La Arz Si* Ha* Lɛɛr Zãnga
Daar fãa 1 1 1 1 1 4 2 51
Rasem
a yiibu 5 0 0 0 0 5 0 50
Wɩkɛn
dãmba 0 0 0 0 0 7 3 50
Wɩkɛn
dãmba
la rasem
a yiibu 0 0 2 0 2 5 2 51
* Naoor a nu kiuug pʋgẽ