Segb d sẽn paam n na n pẽg a Zeova n paase
1. Bõe la b sak tɩ d tõe n maan tɩ na n sõng-d tɩ d ‘pẽg a Zeova wʋsgo’?
1 Tʋʋlg kiuugã pʋgẽ, b wilgame tɩ yʋʋmd fãa masã, tʋʋlg ne tʋʋl-nif kiisã sasa, koe-moondb nins sẽn dat n yɩ sõngr so-pakdbã tõe n moona lɛɛr 30. B paasame tɩ tigims sull yel-gɛtbã kaagr sasa me, d tõe n yɩɩ sõngr so-pakd n moon lɛɛr 30. Kaagrã sã n sɩngda kiuug kũumẽ n kẽed kiuug ning sẽn nan sɩngd-a wã pipi semennã, sẽn dat-a tõe n yɩɩ sõngr so-pakda, n moon lɛɛr 30 kiuug ning sẽn nan kiid-a wã wall sẽn nan sɩngd-a wã. Sõngr so-pakdbã fãa tõe n kẽnga tigisg ning yel-gɛtã sẽn na n tall ne wakat fãa so-pakdbã la zall so-pakdbã n kelg tigisgã gilli. Rẽnd baa d sã n pa tõe n moon lɛɛr 50 me, masã, yʋʋmd pʋgẽ, d tõe n yɩɩ sõngr so-pakdb hal naoor a naas n moon lɛɛr 30 n ‘pẽg a Zeova wʋsgo.’—Yɩɩl 109:30; 119:171.
2. Bõe la sẽn na n yɩ-b sõngr so-pakdb tigims sull yel-gɛtã kaagr sasa wã na n paame?
2 Tigims sull yɛl-getã kaagr sasa: Masã, koe-moondb wʋsg na n tõogd n yɩta sõngr so-pakdb tigims sull yel-gɛtã kaagr sasa, n naagd-a n moond koɛɛgã tɩ kengd b raoodo. (Rom 1:11, 12) Sõngr so-pakdb wʋsg tõe n kosame n moon ne yel-gɛtã arbã, lamusã wall arzũmã daare. Woto, koe-moondb nins sẽn tʋmd rasem a taabã tõe n kosame n moon ne-a sibrã bɩ hatã. Sẽn paase, sõngr so-pakdbã sẽn na n paam n naag wakat fãa so-pakdbã la zall so-pakdbã n maan tigisg ningã na n kenga b raood wʋsgo!
3. Bõe yĩng tɩ d tõe n yɩ sõngr-pakd tẽegrã sasa?
3 Tʋʋlg la tʋʋl-nif kiisã sasa: Pĩnda, b ra kõo sor tɩ d tõe n moon lɛɛr 30 tẽegrã sasa n yɩ sõngr so-pakd kiuug a ye. Masã, lebga kiis a yi la d tõe n moon lɛɛr 30 n paas d ‘pẽgr maand’ ning d sẽn kõt a Zeova wã waooglem. (Heb. 13:15) Tʋʋlg la tʋʋl-nif kiisã sɩd zemsa ne so-pakrã, tɩ d tõe n moon koɛɛgã wʋsg n paase. Ki-kãense, d pʋɩta seb-vãad n boond nebã tɩ b wa tẽegrã. Sẽn paase, koe-moondbã fãa la bal sẽn moond wʋsg wakat kãngã, d tõe n paam n moona ne neb toor-toore. Tẽegrã poore, d lebgd n tɩ n kaaga neb nins sẽn wa wã, la d bool-b me tɩ b wa kelg zãma sõsg ning sẽn na n zĩndã. Rẽ yĩnga y pa tõe n tũnug ne segb kãensã fãa n yɩ sõngr so-pakd sɩda?—Luk 6:45.