D tõe n kɩtame tɩ yʋʋmd 2000 tʋʋl-nif kiuugã sãoog pĩnd kiisã bɩ?
1 Tʋʋl-nif kiuug rasem 19 wã, arba zaabr na n yɩɩ tõnd tʋʋmd yʋʋmdã wakat kãsenga. Baraare, tẽngã gill zugu, wĩndgã lʋɩɩs poore, a Zeova Kaset rãmbã tiging bɩ sull fãa na n maana Kiristã kũum Tẽegr dũniyã gill zugu. D sẽn vɩẽ babg ning fãa a Zezi Kirist maoongã tẽegr na n yɩɩ yʋʋmdã pʋgẽ yell sẽn yaa kãseng n yɩɩd fãa wã. B wilga Tẽegrã daar vẽeneg Calendrier des Témoins de Jéhovah 2000 pʋgẽ.
2 Tʋʋl-nif kiuugã tõr kõta tõnd sor sõma tɩ d tõe n wilg d mi-beoog ne a Zeova ne d sũy fãa, a sõmblem d sẽn ka segd ne wã a sẽn wilg n tũnug ne a Biriblã maoongã yĩnga. Wãn-wãn to? Tʋm-tʋmd a Poll gʋlsame: “Kirist nonglem n so tõndo, tõnd sẽn mi sɩda tɩ yembr sã n ki neba fãa yĩnga, dẽ, fãa yaa kũum. Bãmb kii neba fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩng n yaool n vʋʋga yĩnga.” (2 Kor. 5:14, 15) N-ye, tʋʋl-nif kiuugã, d tõe n wilgame tɩ d ka vɩ d mens yĩng bal ye, la tɩ d vɩɩ a soab ning sẽn ki tõnd yĩngã. La d sẽn yaa Rĩungã ministr dãmba d na n kɩtame tɩ ki-kãng yɩ d kiuug sẽn são pĩnd kiisã!
3 Rɩk-y sõngr so-pakrã tʋʋmd tʋʋl-nif kiuugã: Tʋm-tʋmd a Poll kõo tõnd makr sẽn tar pãng wʋsg a sẽn yeel tɩ: “Mam ka get tɩ m sɩɩgã yaa bũmbu, t’a tara yõod ne maam ye, m wee n tõog n baas m zoeesã la ministɛɛr ning m sẽn paam Soaal a Zezi nengẽ wã, sẽn yaa kõ kaset sõma ne Wẽnnaam sõmblem d sẽn ka segd ne wã koe-noogã.” (Tʋʋ. 20:24, NW ) Tõnd me tara zu-noog a woto n na n kõ kaset sõma a Zeova Wẽnnaam wɛɛngẽ. Yaa rẽ yĩng la d sẽn dat n maan tɩ tʋʋl-nif kiuugã yɩ d kiuug sẽn são pĩnd kiisã sõngr so-pakrã tʋʋmd pʋgẽ wã!
4 A sẽn tar wɩkɛn dãmb a nu wã, tʋʋl-nif kiuugã na n yɩɩ ki-sõng n kõ so-pakdb wʋsgo. Yʋʋmd 1997 tʋʋlg kiuugã tõnd sẽn da wa n paam d sõngr so-pakdb sõor sẽn sãdã, koe-moondb 163 sẽn kẽes b mens a pʋgẽ wã ra yɩɩga 20 koabg zug koe-moondbã sõor zãng zugu. Yʋʋm a tãab rẽ loogr poore, koe-moondbã fãa sõor paasa sẽn kolg 20 koabg zugu, tɩ neb 200 sẽn paas kõt rapoore. Woto rat n yeelame tɩ tõnd tõee sõma n zʋʋg sõngr so-pakdb sõor sẽn sãd ning d sẽn da paam pĩndã. Sẽn paase, b sẽn wa n boog lɛɛr dãmbã sõor b sẽn baoodã, rẽ kɩtame tɩ koe-moondb wʋsg sẽn yɩɩd tigingã pʋgẽ tõe n kẽes b mens ministɛɛrã nen-kãngã pʋgẽ. Pʋʋsg pʋgẽ, koe-moond fãa sẽn deeg lisg segd n gesa a sã n na n tõogame n dɩk sõngr so-pakrã tʋʋmd tʋʋl-nif ki-kãngã.
5 Tũnug-y ne tʋʋl-nif kiuugã sẽn be Calendrier 2000 pʋgẽ wã n maan gɛɛl masã, kiuug ning sẽn watã yĩnga. Yãk-y ray nins y sẽn na n tõog n kẽes y meng koe-moonegã pʋgẽ wã, la y geel lɛɛr dãmb nins y sẽn tagsd tɩ y na n tõogame n maan koe-moonegã tʋʋmd pʋgẽ kiuugã pʋgẽ wã n gese. Paas-y wakat ning y sẽn na n dɩk n kõ neb a taabã kaset ne manesem sẽn yãk wakat la sẽn ka yãk wakatã. Lɛɛr dãmbã sõor zãng kolga lɛɛr 50 wã sẽn yaa sõor ning b sẽn baood sõngr so-pakdbã yĩngã bɩ? Sã n mikame tɩ ka ta lɛɛr dãmbã sõor b sẽn baoodã, y tõe n maana remsg a taab y geelg-n-tʋmã pʋgẽ sẽn na yɩl n bao sẽk sõngr so-pakrã tʋʋmd yĩng bɩ? Daar fãa y sẽn baood bal yaa lɛɛr a ye la minit 40, b sã n pʋɩ tɩ zemse, sẽn na yɩl n paam lɛɛr 50 wã kiuugã pʋgẽ.
6 Sẽn mik masã tɩ lɛɛr dãmbã b sẽn baood wakat fãa so-pakdbã yĩngã me boogame wã, y geendame n na n kẽes y meng wakat fãa ministɛɛrã pʋgẽ bɩ? Y sã n sãmbda y na tõog n paam lɛɛr 70 wã b sẽn baood wakat fãa so-pakdbã yĩngã, bõe yĩng tɩ y ka na n maan sõngr so-pakrã tʋʋmd tʋʋl-nif kiuugã n yãk lɛɛr 70 tɩ yɩ y bõn-datla? Y sã n mik tɩ y tõe n maan-a lame fãa, tõe tɩ y na n tʋllame n yɩɩd n maan demand sẽn na yɩl n kẽes y meng wakat fãa so-pakdbã sʋk tʋʋll-tʋʋll wala y sẽn tõe tɛka.—Ges-y Notre ministère, seb-vã-nens 113-14.
7 Kẽes-y y meng zãng wala koe-noogã moonda: D yaa koe-moondb tɩ d yaa so-pakdb me, tõnd fãa nonglem hakɩkã ne a Zeova wã n tusd-d tɩ d maand d sẽn tõe fãa ne d sũy fãa a Zeova sõgenegã pʋgẽ tɩ zems ne tõnd mengã yɛl sẽn yaa to-to wã. (Luk 10:27) Woto, d wilgdame tɩ “tõnd tʋmdame la d maoodẽ; tɩ bõe, tõnd teegda Wẽnnaam sẽn vɩ n yaa neba fãa Fãagdã, la b yaa tẽedba rẽnd n yɩɩda.” (1 Tɩm. 4:10) Yaa rẽ yĩng la d sẽn gũud tɩ neba fãa kẽes b mens Rĩungã tʋʋmd pʋgẽ tʋʋl-nif kiuugã.
8 Bɩ d ra yĩm a Zezi sagl-kãngã ye: “Tigisg yaa wʋsgo la tigisdba yaa bilfu. Dẽ yĩnga, bɩ y kos tigisga soaba tɩ b tʋm tigisdba tɩ b kẽng bãmb tigisgã.” A sẽn yeel rẽ poor bilf bala, a Zezi boola a tʋm-tʋmdb 12 wã n tʋm-b tɩ b tɩ moone. (Mat. 9:37, 38; 10:1, 5, 7) Sẽn pẽneg yʋʋmd a sẽn zãms 12 wã moonegã tʋʋmd pʋgẽ neer poore, a Zezi “yãka karen-biis a taab pis-yopoe n tʋm bãmb” n kõ-b noy a woto me: “Tigisg yaa wʋsgo . . . Woto yĩnga, bɩ y kos tigisga soaba tɩ b tʋm tigisdb tɩ b kẽng b tigisgã.” (Luk 10:1, 2) Biiblã sebr ning sẽn yaa Tʋʋma togsda a Zeova sẽn leok pʋʋsg a woto to-to. Yʋʋmd 33 T.W. Pãntekot sasa tɩ karen-biisã sõor da fɩɩgame n ta 120. Rẽ poore, sõy sẽn sãd sẽn pʋg taab sẽn yaa 3 000 la 5 000 la b paam-yã. (Tʋʋ. 1:15; 2:41; 4:4) Rẽ poore, “karem-biisa paasa wʋsg[o].” (Tʋʋ. 6:7) Woto me, tõnd wakatã d tog n ket n kota Zusoabã Rĩungã koe-moondb n paasdẽ! Sẽn zems ne tõnd pʋʋsgã, tigingã koe-moond fãa segd n dɩka segls takɩ sẽn na yɩl n kẽes a meng koe-moonegã pʋgẽ kiuug fãa.
9 Bɩ y ges tʋʋl-nif kiuugã Calendrier 2000 wã pʋgẽ sõma. Sẽn mik tɩ kiuugã dẽenem day a yiibã yaa sibr la hatã, y tõeeme n dɩk segls sẽn na yɩl n kẽes y meng koe-moonegã pʋgẽ wɩkɛn kãnga, n paam n sɩng pĩnd-pĩnd kiuugã pʋgẽ bɩ? Y tõeeme n lagem ne Tigingã Sebr Zãmsg sull n teel “Periodik pʋɩɩb daar” fãa kiuugã pʋgẽ bɩ? Yaa wãn to yẽ ne y sẽn na n maan lɛɛr a ye bɩ sẽn yɩɩd woto ministɛɛrã pʋgẽ hat fãa? Y tõe n dɩka segls n maan zaabr kaset kũun bɩ? La ra yĩm-y n tũnug ne segb buud fãa n kõ kasetã ne manesem sẽn ka yãk wakat y tʋʋma zĩigẽ, lekollẽ wã, bɩ y sã n wa tʋmd y daar fãa tʋʋmã ye. Ning-y bãnd ray nins y sẽn tõe n dɩk sẽk koe-moonegã pʋgẽ wã zĩisẽ. Tũnug-y ne kalãndirie wã n gʋlsd y moonegã wakat kiuugã pʋgẽ n bĩngdẽ.
10 Tʋʋl-nif kiuugã na n yɩɩ wakat sẽn zems n kõ b rãmb nins sẽn pidsd yɛl nins b sẽn baoodã, tɩ kẽem dãmbã sak tɩ b lebg koe-moondb sẽn ka reeg lisgã. Yãmb sã n zãmsda Biiblã ne neda, a soabã bɩɩ sẽn sek a na tɩ kos yel-gɛt taoor soabã tɩ b ges a sã n tõe n lebga koe-noogã moond bɩ? Yãmb sã n tara kamb sẽn nan ka reeg lisgu, yãmb sõsa ne kẽem dãmbã b tẽebã bɩʋʋng wɛɛngẽ bɩ? Ka yɩtẽ wakat sẽn zems n kõ-b tɩ b sɩng koe-moonegã sɩda?—Ges-y Notre ministère, seb-vã-nens 97-100.
11 D sẽn modgd n dat tɩ yʋʋmd 2000 tʋʋl-nif kiuugã yɩ d kiuug ning sẽn são pĩnd kiisã, tõnd fãa segdame n kẽes d mens ministɛɛrã pʋgẽ, tɩ rẽ poor bɩ d kɩs d koe-moonegã rapoor kiuugã baasgẽ. (Mak-y ne Mark 6:30.) B segdame n daool koe-moondb nins sẽn ka reeg lisgã sẽn sɩng koe-moonegã pipi wã tɩ b pids b rapoorã n kɩs-a tao-tao. D sã n maan d sẽn segd n maanã, d tõe n sõnga sõma n paas tʋʋl-nif kiuugã rapoor waooglem. D leb n tõe n sõngame n paas pẽgr kãseng ning b sẽn kõt a Zeova ne tõnd sẽn modgd n kõt kasetã maasem.
12 Tall-y neb a taab n wa Tẽegrã: Kõn yɩ sũ-no-kãseng n kõ-d tɩ d paam sõor sẽn sãd paalg yʋʋmd 2000 Kirist kũumã Tẽegrẽ sɩda? N-ye! Rẽ rat n yeelame tɩ yaa pipi neb sõor sẽn ta woto sẽn tigim n na n wilg b mi-beoog ne nonglem wilgr sẽn yaa kãseng n yɩɩd ning a Zeova Wẽnnaam la a Zezi Kirist sẽn maan tõnd yĩngã! (Zã 3:16; 15:13) Rɩk-y segls nins fãa sẽn yaa tɩlae wã sẽn na yɩl tɩ bũmb ba a ye ra gɩdg yãmb ne y zakã rãmb Tẽegrã waoong ye.
13 Yaa masã la y segd n sɩng n boond nebã tɩ b wa Tẽegrã. Gʋls-y y sẽn dat tɩ b rãmb nins fãa wa wã yʋya. Paas-y ned ning fãa sẽn zãms Biiblã pĩnda, neb nins sẽn zãmsd Biiblã masã, la lebg-n-tɩ-ges rãmbã yʋya. Leb-y n paas-y mitb nins y sẽn tar tʋʋmã zĩigẽ, lekollẽ wã, yagsã sʋka, ne y sẽn maand afɛɛr ne neb ninsã fãa yʋya. Ra yĩm-y y mitb a taabã la y roagdbã ye. Y sã n gʋls yʋyã fãa poore, bɩ y mengã tɩ yã ned kam fãa n bool-a ne y sũur fãa. Wilg-y b sẽn na n maan Tẽegrã zĩig ning la wakat ningã tɩ yɩ vẽenega. Tʋʋl-nif kiuugã rasem 19 sã n wa kolgdẽ, bɩ yãmb mengã tɩ yã neb nins yʋy y sẽn gʋlsã bɩ y telefõn n tẽeg-ba. Kãab-y tɩ y na n wa tall-b lame n kẽng Tẽegrẽ wã baraar zaabre.
14 Sẽn zems ne sor-wilgr ning Sosiete wã sẽn da kõ pĩndã, kẽem dãmbã sull na n maana modgr zall n daool koe-moondb nins sẽn ye ka moond koe-noogã sẽn be teritoaarẽ wã tɩ b wa Tẽegrã. (Mat. 18:12-14) Kẽem dãmbã na n tʋllame n lebg n ges Sosiete wã yʋʋmd 1999, wao-fugdg kiuug rasem a 2 lɛtrã. Tigingã sekertɛɛr na n gʋlsa koe-moondb nins fãa sẽn le ka moondã yʋya, tɩ tʋʋmdã yel-gɛt yãk kẽem dãmb tɩ b tɩ ges-b n bool-b Tẽegrã. Tõe tɩ nin-kãensã sẽn ye ka moondã sã n paam pe-kɩʋʋng gesg sẽn kõt raoolg tʋʋll-tʋʋlle, b tõe n sõng-b lame tɩ b le lebg neb sẽn tʋmd koe-moonegã pʋgẽ yɛs tʋʋl-nif kiuugã pʋgẽ menga. Na n kenga b tẽebo, b sã n kos-b tɩ b lagem ne koe-moond sẽn tar minim n tʋm koe-moonegã pʋgẽ.
15 Raool-y nebã tɩ b kõ teelg sõma tʋʋl-nif kiuugã! Kẽem dãmbã, ministɛɛr sõgen dãmbã, la zak soben dãmbã fãa segdame n lagem n tʋm neer sẽn na yɩl tɩ yʋʋmd 2000 tʋʋl-nif kiuugã yɩ d kiuug ning sẽn são pĩnd kiisã. Kẽem dãmbã segd n modga sõma n sigl bũmba fãa neer la b lʋɩ yɛla taoore. (Heb. 13:7) B segd n dɩka segls sẽn zems n maan sɛk koe-moonegã yĩng ra-zaan-dayã la wɩkɛn dãmbã pʋsẽ. B tõe n dɩka segls a taab tɩ sɛk koe-moonegã yĩng zĩnd wĩnd-kaoorã baasgẽ la zaabre. B segdame n ka geelg-n-tʋmã tõr b sẽn maan tʋʋl-nif kiuugã yĩngã tablo n wã. B segd n yãka ned t’a ges sɛk fãa b sẽn geend n na n maan koe-moonegã yĩng yelle. B segd n kõo teritoaar tɩ sek sull fãa.
16 Tʋʋl-nif kiuugã yaa Gũusg Gasgã la Réveillez-vous! wã periodik rãmb la d na n kãabe. Sẽn na yɩl n tõog n sɩng yirẽ Biibl zãmsg ne neba, b segd n kãaba b rãmb nins sẽn wilgd ratmã Baood seb-bilã. Woto yĩnga, b segd n paama periodik rãmb la seb-biy tɩ seke.
17 Kiuugã baasgẽ, na n yɩɩ tɩlae tɩ sebr zãmsg taoor dãmbã fãa la b pʋgdsã segd n daoola b sullã neb fãa tɩ kiuugã kũumẽ bɩ b kɩs b koe-moonegã rapoor tao-tao. B tõe n maana rẽ meng kiuugã yaoolem wɩkɛne. Rẽ poore, sekertɛɛrã sã n wa geend rapoor dãmbã, a sã n yã tɩ koe-moondb kẽer n pa kɩs b rapoor dãmba, ne nonglem a na n tẽeg-b lame tɩ b kɩs tɩ sig-noy kiuug rasem a 6 ra ta ye. Bala yaa wakat kãng la a tog n tool Sosiete wã tigingã rapoore. Sekertɛɛrã tõe n kosa sebr zãmsg taoor lʋɩtbã tɩ b sõng-a n yã koe-moondbã yembr-yembre.
18 Tẽegrã wakat yaa yʋʋmdã sasa ning sẽn yaa kãseng n yɩɩd ne Wẽnnaam nin-buiidã. Ne tõnd fãa, a segd n yɩɩ tʋʋm wʋsg wakat a Zeova sõgenegã pʋgẽ. Na n sɩd yɩɩ woto, sã n mik tɩ tõnd ned kam fãa kẽesa a meng zãng wala a sẽn tõe tɛk koe-noogã mooneg pʋgẽ, sã n mik tɩ b rãmb nins sẽn tõe n dɩk sõngr so-pakrã tʋʋmd maana woto, la sã n mik tɩ d modga sõma n wa ne neb a taab Kiristã kũum Tẽegrẽ. Ne d sũur fãa, bɩ d pʋʋs t’a Zeova bark modgr nins d sẽn maand n na n kɩt tɩ yʋʋmd 2000, tʋʋl-nif kiuugã yɩ d kiuug sẽn são pĩnd kiisã wʋsgo, tɩ rẽ fãa wa ne pẽgr la ziir n kõ Wẽnnaam!—Heb. 13:15.
[Zĩ-gũbri, seb-neng a 3]
Sõngr so-pakdba
Sõor sẽn sãd to d sẽn zɩ n paamã: 163
(Yʋʋmd 1997 tʋʋlg kiuugã)
[Zĩ-gũbri, seb-neng a 4]
Koe-moondb sõor zãnga
Sõor sẽn sãd to d sẽn zɩ n paamã: 998
(Yʋʋmd 1999 sa-sik kiuugã)
[Zĩ-gũbri, seb-neng a 5]
Tẽegrã watba
Sõor sẽn sãd to d sẽn zɩ n paamã: 2 557
(Yʋʋmd 1999)