Siglgã taoor lʋɩtb Sull lɛtre

D saam-biisi,

“Bɩ yãmb paam barka la laafɩ sẽn yit tõnd Ba a Wẽnnaam la tõnd Zusoab a Zezi Kirist nengẽ.” (1 Kor. 1:3) Tõnd sɩd rata ne d sũur fãa tɩ wakat ning bũmb ning fãa sẽn vʋʋsd ne yõorã sẽn na n pẽg a Zeova ne pẽgr ning a sẽn segd ne wã wa. (Yɩɩl 150:6) La nand tɩ ra-kãng sẽn yaa kãsengã wa, d ket n moonda Wẽnnaam Rĩungã koe-noog la d maand karen-biisi.

Yaa koe-noogã mooneg n yaa tʋʋmd ning sẽn yaa kãseng n yɩɩd a Zeova tʋʋma sẽn maand tẽng zug rũndã-rũndã wã sʋka. (Mark 13:10) D mii vẽeneg t’a Zeova ratame tɩ d maan tʋʋm kãngã, rẽ n so tɩ d pʋʋsd n kot a sõngre, n miẽ tɩ ninsaal fãa tõe n dɩɩ a Zezi maoongã sẽn yɩ rondã yõodo. (Wil. 14:6, 7, 14, 15) Yaa sɩd tɩ d segda zu-loeese, la d tara mi-beoog d sẽn paam pãng ‘sẽn yit yĩngr’ n na n maan tʋʋm kãngã wã.—Luk 24:49.

Yaa bũmb sẽn kõt sũ-noogo, d sã n lebg n ges bũmb ning a Zeova sẽn maan ne a sõgen dãmbã maasem rɩẽ tʋʋmd yʋʋmdã pʋgẽ wã. Wẽnnaam vʋʋsem sõngã kõo a nin-buiidã pãng tɩ b tall Kirist nonglmã buud n tõog kisgrã dũniyã gill zugu. Nonglem a woto buud yɩɩ vẽeneg tõnd tigis-kãsemsẽ wã. Yʋʋmd 2003, sigr kiuugã tɛk n tɩ ta yʋʋm-sar kiuugã saabo, neb sẽn yit tẽns sẽn yɩɩd koabg pʋsẽ toga sor n kẽng tẽns-tẽns tigis-kãsems 32 b sẽn maan dũniyã ween-vɩɩs a naasã pʋsẽ. B boola misioneer dãmbã, tẽn-tẽns sõgen-dãmba, Betɛll zak neb sẽn tʋmd tẽn-zẽms n sõs ne, tigims gĩn sul la tẽn-tẽns tigis-kãsemsẽ wã.

Tigis-kãsemsẽ wã d paama sɛb nins gom-zut sẽn yaa ‘Voyez le bon pays’ la Écoute le grand Enseignant. Sẽn paase, b togsame tɩ b lebs n maana So-pakrã tʋʋmd lekoll sebr n na n sɩng n tʋmd ne-a yʋʋmd 2004 tʋʋmd yʋʋmdã baasg sẽnese. Bilf-bilfu, neb sẽn be so-pakrã tʋʋmd pʋgẽ hal sẽn kaoos na n leb n naaga so-pakdb paals n maan lekollã.

Wẽnnaam ne ninsaalb sõngr maasem yĩng kɩtame tɩ b tõog n me Rĩung Rot wʋsg n paase, sẽn yɩɩd fãa tẽns nins arzɛgsã sẽn paoodã pʋsẽ. Tẽebã rɩɩb raab sẽn tar paasg dũniyã gill zugã yĩng kɩtame tɩ b met Sosiete wã Tʋʋmd will biru rãmb n yalgd tẽns wʋsg pʋsẽ. Masã seb-bil ning gom-zug sẽn yaa Vɩɩnd-y ne sũ-noog wakat sẽn kõn sa tẽng zugu! bee ne buud-goam 299, tɩ b sẽn yiis-b sõor yaa sɛb milyõ 139. B sẽn yiis Bãngr Sẽn Tar n Debd Vɩɩm Sẽn-Kõn-Saẽ Wã sɛb sõor yɩɩda milyõ 93, buud-goam 161 pʋsẽ. Sẽn paase, b yiisa Bõe la Wẽnnaam baood tɩ tõnd maane? seb-bilã sõor sẽn yɩɩd milyõ 200 buud-goam 267 pʋgẽ.

D pʋʋsda neb 258 845 sẽn deeg lisg n wilg tɩ b rɩka b mens n kõ Wẽnnaamã rɩẽ tʋʋmd yʋʋmdã pʋgẽ wã ne b waoong ne d sũur fãa. Yãmb sẽn be Wẽnnaam Rĩungã poorẽ wã kɩtame t’a Sʋɩtãan kis yãmb n yɩɩd yaa sɩda, la leb n kɩtame tɩ yãmb paamd a Zeova bark la a koglg tẽebã wɛɛngẽ n yɩɩda, y sẽn zoet zoees ning sẽn be yãmb taoorã yĩngã. (Heb. 12:1, 2; Wil. 12:17) N-ye, bas-y y yam tɩ ‘yãmb gũudã ka na n suus ye.’—Yɩɩl 121:3.

Yʋʋmd 2004 verse wã yaa: “Bɩ yãmb gũusi . . . Bɩ y segle.” Verse kãngã sɩd zemsa ne wakatã sõma. (Mat. 24:42, 44) B bilga kiris-nebã Wẽnnaam Gomdã pʋgẽ wa pa-wet zãmaan kãngã sẽn dat n sa wã pʋgẽ. (1 Pɩɛ. 2:11; 4:7) Woto yĩnga, d segd n tika d yamã tẽebã yɛl zutu, n da gĩd d vɩɩmã ne yɛla, la d fees d sũyã neere. “Dragõ kãsengã” rat n sãama tõndo, n kɩt t’a dũniyã rɩ tõndo.—Wil. 12:9.

Bũmb sẽn tar yõod wʋsg sẽn na n sõng-d tɩ d ket n yaa gũusdb yaa Biiblã kareng daar fãa. Rẽ tõe n sõng-d lame tɩ d sẽn dɩk d meng n kõ Wẽnnaamã wɛɛngẽ, d sẽn yet tɩ ‘n-ye wã yɩ n-ye bala,’ la tɩ d ‘tall tõnd pipi tẽebã kãn-kãe hal tɩ [saabã] wakat ta.’ (Zak 5:12; Heb. 3:14) Biiblã kareng daar fãa wã tõe n sõnga tõnd tɩ d tẽeg tɩ dũniyã zãaga wʋsg ne Wẽnnaam noyã sẽn ka toeemdã. (Mal. 3:6; 2 Tɩm. 3:1, 13) Bãngr ning sẽn yit Biiblã pʋgẽ wã tõe n sõng-d lame tɩ d lak d mens ne ‘soalem sẽn yaa belgr’ la d kell n yɩ neb sẽn sakd a Zeova.—2 Pɩɛ. 1:16; 3:11.

Roagdba, yãmb sẽn wubd y kambã a Zeova saglg la a zãmsg pʋgẽ wã, rẽ yĩnga y sõngd-b lame tɩ b yãkd tẽeb bõn-datɩ la ‘b ket n gũusdẽ bɩ?’ (Ef. 6:4) Yãmb zãmsd-b lame sẽn na yɩl tɩ b sẽn tagsd bũmb ning b beoog-daara zugã yɩ wala sẽn zĩnd-a tẽng zug n tall yam n yɩɩdã sẽn da tagsd to-to a meng beoog-daarã zug bɩ? A Zezi ra tõe n yɩɩ minizie, te-maanda, bɩ logtor ning sẽn yaa kãseng n yɩɩd t’a to zɩ n zĩndã, la a basa rẽ n tʋm Wẽnnaam tʋʋmdã wakat fãa. Bɩ a mak-sõngã kɩt tɩ y sõng y kambã tɩ b ning Rĩungã yɛl pipi zĩigẽ b vɩɩmã pʋgẽ.

Tʋm-tʋmd sẽn tũud sɩdã sull neba, siglgã taoor lʋɩtb sull sẽn tʋmd b yʋʋr yĩngã tara mi-beoog wʋsg ne ‘kʋʋn-kãsengã,’ b sẽn sõngd tõnd ne d zɩɩb ning sẽn yaa kɩt tɩ ‘Wẽnnaam soolem koe-noog kãngã moon dũniyã tɛk fãa tɩ yɩ kasetã.’ (Wil. 7:9; Mat. 24:14, 45) A Zeova kõta yãmb tõnd sẽn nong wʋsgã bas-m-yam t’a tẽra “yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã.” (Heb. 6:10) Yãmb sã n karemd kɩbayã sẽn kõt sũ-noogã la y yãt biis nins modgrã d sẽn lagem taab n maana sẽn wa ne wã seb-nens nins sẽn pʋgdã pʋsẽ, bɩ y bãng tɩ y me naagame n sõng tɩ b kõ kaset kãng sõma dũniyã gill zugu.

Bɩ y ket n gũud beoog-daarã ne raoodo, y sẽn ket n ‘get keoorã sẽn be taoorã’ sasa, n da bas tɩ ninsaal ba a ye bɩ zĩn kɩt tɩ y kong-a ye. (Heb. 11:26; Kol. 2:18) N-ye, teeg-y a Zeova, n tall bas-m-yam t’a na n sõnga neb nins sẽn nong-a wã tɩ b paam vɩɩm sẽn zems zãnga.—Zã 6:48-54.

Bãng-y tɩ yaa ne sũ-noog la d naagd yãmb n balemd a Zeova la d pẽgd a ziirã.

Yãmb saam-biisã,

A Zeova Kaset rãmbã Siglgã taoor lʋɩtb Sulli