Tigissã kẽnd wakat fãa wã segd n zĩnda pipi zĩigẽ d vɩɩmã pʋgẽ
1 Kiris-neb zagsã neb ningda tigingã tigiss kẽnd wakat fãa wã pipi zĩigẽ b vɩɩmã pʋgẽ. La tʋʋm nins sẽn yaa tɩlae vɩɩmã pʋgẽ wã tõe n kɩtame tɩ yɩ toogo. Rẽ yĩnga zak pʋgẽ tʋʋma, nug-tʋʋmd bɩ lekollẽ tʋʋmd n sɩng sẽk ning b sẽn yãk a Zeova balengã yĩnga rɩɩb bɩ? D sã n ges yɛlã wala a Zeova sẽn get-b to-to wã, na n sõng-d lame tɩ d kell n tũ yɛl nins d sẽn ningd pipi zĩigẽ d vɩɩmã pʋgẽ wã.—1 Sãm. 24:7; 26:11.
2 Israɛll ned a ye sẽn da tɩ wɩɩs raad vʋʋsg raarã a kɩɩsa a Zeova noor ne yamleoogo. Tõe t’a tagsame t’a zakã rãmb yell la a ra geta, bɩ tɩ rẽ ra pa yell wʋsg ye. La b sẽn kao a bʋʋdã to-to wã wilgdame t’a Zeova getame tɩ rɩk sẽk ning b sẽn yãk yẽ balengã yĩngã n tʋm tʋʋm a taab sẽn pa tɩ loe ne yẽ balengã yaa yel-wẽn-kãsenga.—Sõd. 15:32-36.
3 D sẽn na n mao ne yellã to-to: Ne neb wʋsgo, tall nug-tʋʋmde, la f kẽnd tigissã sɩd baooda modgr menga. Sãnda tõogame n mao ne zu-loe-kãngã b sẽn tɩ yẽs ne b tʋʋmdã taoor soab yĩnga, b sẽn zems ne b tʋmd-n-taas tɩ b na n ledgd-ba, b sẽn bao tʋʋmd a to sẽn zems n yɩɩd bɩ n toeem b vɩɩmã manesmã. Sãmbg sẽn ka be, baleng hakɩkã pʋgẽ, maand kãens nooma Wẽnnaam sũuri.—Heb. 13:16.
4 Lekollẽ tʋʋm me tõe n kɩtame tɩ tigissã kẽnd yɩ toogo. Bi-bɩɩg a yembr yeela woto: “Mam tʋmda m lekollẽ tʋʋmã kẽer nand tɩ tigissã sɩnge, tɩ m sã n wa ta yir bɩ m maan sẽn ketã n baase.”
5 Lagem-n-tʋm la sẽkã siglg sõma zak pʋgẽ tʋʋmã wɛɛngẽ me sõngda zagsã neb tɩ b tõogd n kẽnd tigissã. (Yel. 20:18) B tõe n zãmsa kamba me tɩ b yelgd b futã b toore, sẽn na yɩl tɩ b tõogd n loogd tigisgã wakat ning b sẽn yãkã. Roagdbã mak-sõngã tõe n kɩtame tɩ kamba bãng tigissã kẽngr yõod sẽn ta zĩig ninga.—Yel. 20:7.
6 Dũni kãngã weoogrã pãng sẽn tar paasgã yĩnga, tigingã tigiss kẽnd wakat fãa wã tara yõod wʋsgo. Bɩ d ket n get yɛlã wa a Zeova sẽn get-b to-to wã, n kɩt tɩ tigissã kẽnd wakat fãa wã zĩnd pipi zĩigẽ d vɩɩmã pʋgẽ.—Heb.10:24, 25.