Malɛgsã sõngda tõndo
1 “Gese, mam bee ne yãmb wakat fãa hal tɩ ta wakat sɛɛbo.” Ad gom-kãensã sɩd kengda neb nins fãa sẽn tũud a Zezi no-kãngã wã raoodo: ‘Bɩ y kẽng n maan karen-biisi’! (Mat. 28:18-20) Yaa ne malɛgsã maasem me la a Zezi be ne a karen-biis hakɩkã. (Mat. 13:36-43) Ad yaa bũmb sẽn kõt sũ-noogo, d sẽn lagem ne malɛgs nins sẽn sakd a Zeova wã n moond ‘koe-noog sẽn ka sɛtã!’—Wil. 14:6, 7.
2 Tõnd koe-moonegã pʋgẽ: Biiblã wilgame tɩ Wẽnnaam tʋma malɛgsã “tɩ b sõng neb nins sẽn na n paam fãagra.” (Heb. 1:14) Pipi kiris-neba wakatẽ, malɛgsã sõnga a Zezi karen-biisã tɩ b yã neb nins sẽn zems ne koe-noogã. (Tʋʋ. 8:26) Rũndã-rũndã, Wẽnnaam sõgen dãmbã ket n nee vẽeneg tɩ malɛgsã sõngd-b lame. Naoor wʋsgo, neb n yeel tɩ b ra pʋʋsdame n baood sõngre, wakat ning Kaset soab sẽn wa n na n ges-ba. Ad yaa sũ-noog meng n kõ tõnd ne malɛgsã, nin-kãens sã n sak Rĩungã koɛɛga!—Luk 15:10.
3 D sã n wa segd kɩɩsgo: A Zeova tʋma a malɛgsã sẽn yaa ‘pãn-kãsems rãmbã,’ tɩ b wa kogl a Daniɛlle, a tũud-n-taas a tãabã sẽn yaa Hebre kom-bɩɩsã, tʋm-tʋmd a Pɩɛɛre, la neb wʋsg a taab sẽn paam mak-kãsemse. (Yɩɩl 103:20; Dan. 3:28; 6:21, 22; Tʋʋ. 12:11) Wakat ninga, kɩɩsg taoore d tõeeme n ka mi d sẽn na n maaneg ye, la a Eliize sõgenã sẽn yã bũmb ningã tõe n kenga tõnd raoodo. B ra wilg-a lame tɩ “sẽn be-b ne tõnda yɩɩda sẽn be-b ne bãmbã.” (2 Rĩm 6:15-17) Baa b sã n talla tõnd ne pãng n tɩ ning zĩig d sẽn ka tõe n lagem ne d tẽed-n-taasã, d ka segd n koms raood ye. Wẽnnaam Gomdã kõta tõnd bas-m-yam n yetẽ: “Zusoaba malɛk rãmb gũbgda neb nins sẽn zoet bãmbã n fãagd bãmba.”—Yɩɩl 34:8.
4 Ka la bilfu, malɛgs tãb-biis kʋʋng n na n sãam Kirist naamã bɛɛb fãa. (Wil. 19:11, 14, 15) Nanand tɩ ra-kãng wa, bɩ d ket n pẽgd a Zeova ne raoodo, n tar bas-m-yam zãng tɩ saasẽ tãb-biis kʋʋng sẽn sakd Kiristã n sõngd tõndo.—1 Pɩɛ. 3:22.