Tũ-y maam wakat fãa
1 Neb wʋsg lʋɩɩsda b mensã raab pidsg taoor b vɩɩmã pʋgẽ, la ne rẽ fãa, naoor wʋsgo, b pa tar sũ-noog ye. A Zezi yaool n wilgame tɩ yaa f sẽn na n get neb a taabã raab yell la f paamd sũ-noog hakɩka. (Tʋʋ. 20:35) A yeelame: “Ned sã n dat n tũ maam, bɩ a kɩɩs a meng raabo . . . n tũ maam wakat fãa.” (Mark 8:34) Woto pa rat n yeel tɩ f mongd f meng f yamleoog yɛl kẽer wakat-wakat bal ye. Yɩɩda woto. Rat n yeelame tɩ daar fãa, d segd n bao n taa a Zeova yam, la pa d meng yam ye.—Rom 14:8; 15:3.
2 D ges tʋm-tʋmd a Poll makrã. A sẽn paam Kirist Zezi bãngrã “sẽn yɩɩd bũmb fãa wã yĩnga,” a basa a mengã raab pʋgb n tʋm Rĩungã yĩng ne a sũur fãa. (Fil. 3:7, 8) A yeela woto: “Mam sũur yaa noog tɩ mam kõ fãa la paas mam menga” neb a taabã sõngr yĩnga. (2 Kor. 12:15) Dẽnd tõnd ned kam fãa segd n soka a meng woto: ‘Bõe la mam maand ne m sẽkã, m pãngã, m tõodã la m laogã? Mam lʋɩɩsda m mengã raab pidsg taoor bɩ, bɩ m baoodame n na n ta Wẽnnaam yam?’
3 Bũmb nins d sẽn tõe n maan neb a taabã nafr yĩnga: Yʋʋmd fãa, Wẽnnaam nin-buiidã rɩkda sẽn yɩɩd lɛɛr milyaar a yembr n moond Rĩungã koe-noog sẽn fãagd yõyã. Tigingã pʋgẽ, kom-bɩɩs la kãsemb fãa tʋmda tʋʋm toɛy-toɛy sẽn nafd b taabã. B leb n tʋmda tʋʋm a taab tigis-kãsemsẽ wã, la b sõngd n met rot nins pʋsẽ d sẽn tʋmd sẽn na yɩl tɩ baleng hakɩkã kẽng taoorã, la b get b yell me. Saam-biis a taab me tʋmda seɛlassã sẽn yaa sull sẽn sõngd saam-biisã b sã n wa tar zu-loees logtor yir tɩbsg wɛɛngẽ wã pʋgẽ, la sull ninga sẽn tʋgd n kaagd bãad dãmbã (Groupe de visite de malades) pʋgẽ. Tʋʋm kãensã fãa b sẽn tʋmd ne yamleoogã nafda d saam-biisã sẽn be dũniyã gill zugã.—Yɩɩl 110:3.
4 Yel-beed sã n wa maan wall b sã n wa rat sõngr tao-tao zĩig ninga, leb n yaa segb d sẽn tõe n tũnug n kõ d sõngre. La naoor wʋsgo, tõnd meng tõe n bao n bãnga d tẽed-n-taas sã n data sõngr wall raood kengre, n tɩ sõng-ba. (Yel. 17:17) D sã n maand d sẽn tõe fãa ne yamleoog n na n sõng neb a taabã la d tʋmd Rĩungã nafr yĩnga, d rɩkda a Zezi togs-n-taare. (Fil. 2:5-8) Bɩ d ket n modgd n maand boto wakat fãa.