Sak piig la a yembre
“Bɩ y reng n bao Rĩungã” wakat fãa
1. a) Bõe yĩng t’a Zezi sagl a kɛlgdbã tɩ b reng n bao Wẽnnaam Rĩungã? b) Sok-bʋg la d segd n sok d mense?
SẼN yɩɩd yʋʋm 1900 sẽn looge, a Zezi sõsg a yembr pʋgẽ Galile, a sagla a kɛlgdbã tɩ b “reng n bao Wẽnnaam [rĩungã] ne bãmb tɩrlem.” La bõe yĩng tɩ rẽ ra yaa yãgb bũmbu? Rẽ yĩnga, ra pa na n yɩ yʋʋm kobs wʋsg poor la Kiristã ra na n deeg Rĩungã naam sɩda? N-ye, la ra yaa ne Mesi Rĩungã maasem la a Zeova ra na n wilg tɩ yẽ n segd ne naamã, la a pids a raab sẽn yaa kãsengã sẽn tɩ loe ne tẽngã. Ned ning fãa sẽn sɩd ra mi bõn-kãensã yõodã ra segd n lʋɩɩsa Rĩungã pipi zĩigẽ a vɩɩmã pʋgẽ. Sã n da segd n yɩ woto ne a Zezi pipi karen-biisã, rũndã-rũndã n yɩɩde, bala Kirist yaa Rĩm masã! La sokr n be: Mam vɩɩmã wilgdame tɩ m deng n baooda Wẽnnaam Rĩungã bɩ?—Matɩe 6:33.
2. Bõe la neb wʋsg baood ne yẽesem?
2 Rũndã-rũndã, dũniyã gill zugu, neb milyõ rãmb n deng n baood Rĩungã. B wilgdame tɩ b sakda Rĩungã naam, b sẽn dɩkd b mens n kõt Wẽnnaam la b tikd b vɩɩmã a Zeova raabã maaneg zugã yĩnga. La neb wʋsg yẽ baooda bũmb nins sẽn be dũniyã pʋgẽ wã. Nebã baooda ligdi, n paas laogã la yõ-noogrã ligdã sẽn tõe n da wã. Sã n pa woto me, b rɩkda b pãngã fãa n kẽes b nug-tʋʋmdã pʋgẽ. B sẽn vɩ to-to wã wilgdame tɩ yaa b mengã, laogã la yõ-noogrã yell n pak-ba. B lebsda Wẽnnaam yɛlã poorẽ, rẽ me yaa b sẽn na n tẽed-a.—Matɩe 6:31, 32.
3. a) Laog bʋs buud la a Zezi yeel a karen-biisã tɩ b bao, la bõe yĩnga? b) Bõe yĩng tɩ pa tar yõod tɩ d maan yɩɩr tɩ loog laogã yɛl yĩnga?
3 La a Zezi kõo a karen-biisã sagl-kãngã: “Ra bĩng-y y paoong dũniyã ka . . . ye,” bala paoong kãens ba a ye pa kelld n pa ne a soabã wakat fãa ye. La a yeel-b tɩ b ‘bĩng b paoongã saasẽ,’ ne b sẽn na n maan a Zeova raabã. A Zezi sagla a karen-biisã tɩ b kell n tall nif sẽn yaa “sõama,” n tagsd Wẽnnaam daabã maaneg yell neer la b maand rẽ n yɩɩda. A yeel-b lame: “Yãmb ka tõe n sak Wẽnnaam la arzɛgs yiib fãa ye.” La yaa wãn to ne tõnd bõn-datmã, wala rɩɩbo, fut la rotã? A Zezi sagl-b lame: ‘Bɩ y ra maan yɩɩr ye.’ A yeel-b lame tɩ b ges liuuli wã Wẽnnaam sẽn dɩlgdã, la tɩ b ges tɩ-puudã Wẽnnaam sẽn nagsdã. Tõnd sẽn ya a Zeova sõgen dãmbã pa tar yõod n yɩɩd bãmb fãa sɩda? A Zezi yeelame: “Bɩ y reng n bao Wẽnnaam [rĩungã] ne bãmb tɩrlem, la bõn-kãens fãa [sẽn yaa tɩlaeyã] na paas yãmba.” (Matɩe 6:19-34) Yãmb manesmã wilgdame tɩ y tẽeda woto bɩ?
Ra bas-y tɩ bũmb reeg Rĩungã sɩd zĩig ye
4. Laogã yɛl sã n pak ned tɩ loog noore, tõe n baasa ne bõe?
4 Zemsame tɩ paam laog sẽn sekd tõnd mengã la d zakã neb yell pak-do. La yell n tõe n paam neda, laogã yɛl sã n pak-a tɩ loog noore. Ba a sã n yetẽ t’a tẽeda Rĩungã, a sã n lʋɩɩs yɛl a taab taoor a sũurã pʋgẽ, yel-kãens na n deega Rĩungã sɩd zĩiga. (Matɩe 13:18-22) Wala makre, vugri, na-poll sẽn yaa arzɛk soab n sok a Zezi: “Mam na n maana bõe n paam vɩɩm sẽn ka sɛta?” A ra pa maand wẽng ye, a ra leb n maanda neb a taabã neere, la a ra nonga a arzɛkã tɩ looge. A ra pa rat n bas a arzɛkã sẽn na yɩl n lebg Kirist karen-biig ye. Woto yĩnga, a konga zu-noog ning a sẽn da tar n tõe n wa zĩnd ne Kirist saasẽ Rĩungã pʋgẽ wã. A Zezi yeela rẽ wɛɛngẽ woto: “Neb nins sẽn tar arzɛgsa Wẽnnaam [rĩungã] kõom na n yɩɩ toogo.”—Mark 10:17-23.
5. a) A Poll sagla a Tɩmote t’a ra bao tɩ yɩɩg bõe, la bõe yĩnga? b) Wãn to la a Sʋɩtãan bẽt nebã ne ligda nonglem n kẽesd-b sãoong pʋgẽ?
5 Yʋʋm wʋsg rẽ poore, tʋm-tʋmd a Poll gʋlsa a Tɩmote sẽn da be Efɛɛz sẽn da yaa leebg galʋ-tẽng sẽn tar arzɛkã pʋgẽ, n tẽeg-a woto: “Tõnd ka zɩ bũmb n wa dũniyã pʋgẽ ye, la yaa sɩda tɩ tõnd ka tõe n zɩ bũmb n yi ye. Dẽ yĩnga, tõnd sã n tar dɩɩb ne futu, yõwã sekda tõndo.” Tʋm n paam ‘dɩɩb ne fut’ d mens la d zakã rãmb yĩng yaa bũmb sẽn zemse. La a Poll keoog-d lame: “Neb nins sẽn dat n yɩ arzɛgs rãmba kẽeda makre la kũusr pʋgẽ la ratem wʋsg sẽn yaa yalemdo sẽn sãamd bãmba n kẽesd bãmb toog ne sãoong pʋgẽ.” A Sʋɩtãan tara sɩlem. A tõe n deng n belga ned ne yel-bõonese. Rẽ poore yaa ne yel-kãsemse, tõe tɩ yaa sor n pak n kõ a soabã t’a tõe n paam naam bɩ tʋʋm sẽn yaood sõma n yɩɩda, sẽn dɩt sẽk ning a sẽn da rɩkd n kẽesd tẽebã yɛl pʋsẽ wã. Sã n pa d gũusame, ‘ligdã nonglem’ tõe n deega Rĩungã yɛl sẽn tar yõod wʋsg n yɩɩdã zĩiga. A Poll wilga rẽ woto: “Ligd [nonglem] sẽn so kẽerã, b basa tẽebo n kẽes b mens to-kãseng pʋgẽ.”—1 Tɩmote 6:7-10.
6. a) Sẽn na yɩl tɩ laogã nonglem ra wa soog-do, yaa bõe la d segd n maane? b) Bas-yard bʋg la d tõe n talle, baa ne laogã yɛl sẽn yaa toog dũniyã pʋgẽ rũndã-rũndã wã?
6 A Poll sẽn sɩd nong a tẽeb saam-biig a Tɩmote wã yĩnga a sagl-a-la woto: “Bɩ f zoe bõn-kãense,” la “zab tẽeb zabr sõama.” (1 Tɩmote 6:11, 12) D segd n modga wʋsgo, d sã n pa rat tɩ laogã nonglem sẽn pid dũniyã pʋgẽ wã wa soog-do. La d sã n modg ne tẽebo, a Zeova pa na n bas-d abada. Baa ne teedã ligd sẽn paasd tɩ tʋʋmã paoong lebg toogã, a na n sõng-d lame tɩ d paam bũmb nins sẽn sɩd yaa tɩlae ne-dã. A Poll gʋlsame: “Bɩ yãmb da yɩ ligd noangdb ye, la bɩ y kɩt tɩ bũmb nins yãmb sẽn tara sek yãmba. Tɩ bõe, Wẽnnaam menga yeelame yaa: ‘Mam kõn bas yãmb walla m mong yãmb abada ye.’ Dẽ, tõnd tõe n yeela ne daood yaa: ‘[A Zeova] yaa mam sõangda, mam kõn zoe rabeem ye. Ned tõe n maana maam bõe?’ ” (Hebre dãmba 13:5, 6) La rĩm a Davɩɩd gʋlsame: “Mam dag n yaa bi-bɩɩga, la masã mam kʋʋlame, la mam nan ka yã tɩ b bas nin-tɩrg ye, la mam nan ka yã t’a yagens bõosd rɩɩb me ye.”—Yɩɩl Sõamyã 37:25.
Pipi karen-biisã kõo mak-sõngo
7. No-bʋs la a Zezi kõ a karen-biisã moonegã wɛɛngẽ, la bõe yĩng tɩ woto ra zemse?
7 A Zezi sẽn zãms a tʋm-tʋmdbã sõma poore, a tʋm-b-la Israɛll tɩ b tɩ moon koe-noogã n yeel tɩ “[saasẽ rĩungã] kolgame.” Ad woto sɩd ra yaa koe-noog tɛkẽ! A Zezi Kirist sẽn da yaa Rĩm sẽn yaa Mesi wã ra bee bãmb sʋkã. Tʋm-tʋmdbã sẽn da tʋmd Wẽnnaam tʋʋmdã wʋsgã, a Zezi ra sagl-b lame tɩ b tall bas-yard tɩ Wẽnnaam na n gesa b yelle. Rẽ n so t’a yeele: “Da zɩ-y bũmb y kẽnda yĩng ye, da zã-y dasaare ne korgo la buri la ligd ye, la y ra zɩ fut a yiib-yiib ye. Yãmb sẽn sig zak ninga, bɩ y pa [be] hal tɩ ta y loogre.” (Matɩe 10:5-10; Luk 9:1-6) A Zeova ra na n gesame tɩ Israɛll buudã neb sẽn da nong n deegd sãambã ges b yelle.
8. a) Sẽn deng a Zezi kũumã bilfu, bõe yĩng t’a kõ noy sẽn yaa toor moonegã wɛɛngẽ? b) Ne rẽ fãa, bõe n da na n ket n yaa pipi a Zezi karen-biisã vɩɩm pʋgẽ?
8 Kaoosg poore, sẽn deng a kũumã bala, a Zezi pĩnd n togsa a karen-biisã tɩ yɛla ra na n toeemame. Bɛɛbã kɩɩsg yĩnga, tõeeme tɩ b pa leb n deeg-b sãand sõma Israɛll ye. Sẽn paase, ra pa na n kaoos la b taas bu-zẽmsã Rĩungã koɛɛg ye. Rẽ tɛk masã, b ra segd n dɩka b ‘potmaan’ la b ‘korgo.’ Baasg zãnga, b ra segd n ket n baooda a Zeova Rĩungã ne a tɩrlmã nanda, la b tall bas-m-yam tɩ Wẽnnaam da na n ninga b modgrã bark tɩ b paam dɩɩb la futu.—Luk 22:35-37.
9. Ne a Poll sẽn tʋm n bao a noorã rɩɩbã, wãn to la a ning Rĩungã pipi zĩigẽ a vɩɩmã pʋgẽ, la yaa sagl-bʋg la a kõ yel-kãng zugu?
9 Tʋm-tʋmd a Poll yɩɩ ned sẽn kõ mak-sõng a Zezi sagl-kãngã tũubã wɛɛngẽ. A Poll tika a vɩɩmã koe-noogã zugu. (Tʋʋma 20:24, 25) A sã n da kẽng tẽngẽ n na n tɩ moone, a ra tʋmdame n paamd a meng noor dɩɩbo, n da sẽt fu-rot menga. A ra pa teeg neb a taab sõngr ye. (Tʋʋma 18:1-4; 1 Tesalonik rãmba 2:9) La ne mi-beoogo, a ra sakdame tɩ b reegd-a sãando, la neb a taabã sã n da maan-a kũun ne nonglem, a ra sakdame. (Tʋʋma 16:15, 34; Filip rãmba 4:15-17) A Poll pa sagl kiris-nebã tɩ b bas b zagsã yell gesg n moon koe-noogã ye, la a sagl-b lame tɩ b tʋk b zɩɩb toɛy-toɛyã ne zemsgo. A sagl-b lame tɩ b tʋme, tɩ b nong b zagsã la b pʋɩ b sẽn tarã ne neb a taaba. (Efɛɛz rãmba 4:28; 2 Tesalonik rãmba 3:7-12) A sagl-b lame tɩ b teeg Wẽnnaam la b ra teeg laogã ye, tɩ b vɩɩmd tɩ wilg tɩ b sɩd mii yɛl nins sẽn tar yõod n yɩɩdã. Wa sẽn zems ne a Zezi zãmsgã, woto ra rat n yeelame tɩ b reng n bao Wẽnnaam Rĩungã ne a tɩrlmã.—Filip rãmba 1:9-11.
Ket-y n ningd-y Rĩungã pipi zĩigẽ y vɩɩmã pʋgẽ
10. Reng-y n bao Rĩungã rat n yeelame tɩ bõe?
10 Hal sẽn ta zĩ-bʋg la tõnd mengã moond neb a taabã Rĩungã koe-noogo? Rẽ bee ne tõnd mengã yɛla la ne tõnd mi-beoogã ne Wẽnnaam sẽn ta zĩig ningã. Da yĩm-y t’a Zezi pa yeel tɩ: ‘Bao-y Rĩungã, y sã n pa tar bũmb a to n na n maan ye.’ A sẽn mi Rĩungã yõodã yĩnga, a wilga a Ba wã raab n yeele: ‘Bɩ y reng n bao Wẽnnaam Rĩungã.’ (Luk 12:31, Sebr Sõngo) Baa tõnd neb wʋsg sẽn segd n tʋm n bao noor dɩɩb d mens la d zagsã yĩngã, d sã n tar tẽebo, d vɩɩmã na n tika Rĩungã tʋʋmd Wẽnnaam sẽn kõ-dã zugu. Wakat kãng pʋgẽ me, d na n gesa d meng zakã rãmb yelle.—1 Tɩmote 5:8.
11. a) Wãn to la a Zezi wilg tɩ sẽk ning nebã fãa sẽn dɩkd n moond Rĩungã koɛɛgã pa na n yɩ yembre? b) Yel-bʋs n tõe n kɩt tɩ d moon wʋsg bɩ d pa moon wʋsgo?
11 Tõnd sʋkã sãnda tõe n dɩka sẽk n yɩɩd b taab n moon Rĩungã koe-noogo. La a Zezi sẽn dɩk makr ning n gom zĩis buud toor-toor yellã pʋgẽ, a wilgame tɩ neb nins fãa sũy sẽn yaa wa zĩ-sõngã na n woma biisi. Hal tɩ ta wãn to? Nebã yɛl pa taab ye. Nebã yʋʋma, b yĩnsã laafɩ la b zak pʋgẽ zɩɩbã pa yembr ye. La ned sã n tar mi-beoog hakɩk ne Wẽnnaam, a tõe n maana bũmb wʋsgo.—Matɩe 13:23.
12. Sẽn tɩ yɩɩd fãa, tẽeb tʋʋm-bʋg sẽn yaa sõma la b sagend kom-bɩɩsã tɩ b bao n maane?
12 Yaa sõma tɩ d yãk bõn-datɩ sẽn na n sõng-d tɩ d tʋm Rĩungã tʋʋmd n paase. Kom-bɩɩsã segd n tagsa bi-bɩɩg a Tɩmote sẽn yɩ kiris-ned sẽn tall yẽesmã mak-sõng yell neere. (Filip rãmba 2:19-22) B sã n wa sa b karengã, bõe la b tõe n maan tɩ tall bark n ye yɩɩd b sẽn na n kẽ Wẽnnaam wakat fãa tʋʋmdẽ wã? Kãsembã me sã n yãk tẽeb bõn-datɩ sẽn yaa sõma, na n naf-b lame.
13. a) Ãnd n yãkd tõnd mengã sẽn tõe n tʋm Rĩungã tʋʋmd pʋgẽ to-to? b) Tõnd sã n sɩd reng n bao Rĩungã, yaa bõe la d wilgda?
13 Baa tõnd sã n tagsdẽ tɩ neb kẽer tõe n tʋma Wẽnnaam tʋʋmdã tɩ yɩɩg b sẽn maandã, d pa segd n sãbg-b ye, la d tẽebã segd n kɩtame tɩ d tʋm n paas Wẽnnaam tʋʋmdẽ wã wa tõnd sẽn tõe tɛka. (Rom dãmba 14:10-12; Galat dãmba 6:4, 5) Wa a Zoob makrã sẽn wilgã, a Sʋɩtãan yetame tɩ sẽn pak tõnd n yɩɩd yaa tõnd laogã, tõnd mengã naare, la d mengã neere, la tɩ yaa tõnd menga nafr yĩng bal n kɩt tɩ d tũud Wẽnnaam. La tõnd sã n sɩd reng n bao Rĩungã, d sõngdame n wilg t’a Sʋɩtãan yaa pʋ-yagd piig la a yiibu. Rẽ d kõta kaset tɩ bũmb ning sẽn wat pipi tõnd vɩɩmã pʋgẽ yaa Wẽnnaam tʋʋmdã. Woto, d wilgda ne d no-goam la d tʋʋm tɩ d nonga a Zeova wʋsgo, la tɩ d sakda a naam sẽn ka to wã wakat fãa, la tɩ d nonga d taabã.—Zoob 1:9-11; 2:4, 5; Yelbũna 27:11.
14. a) Bõe yĩng tɩ be nafre, d sã n yãk wakat takɩ n na n moon koe-noogã? b) Hal sẽn ta zĩ-bʋg la Kaset rãmb wʋsg moond koe-noogã?
14 D sã n deng n yãk wakat takɩ n na n moon koe-noogã, na n sõng-d lame tɩ d moon wʋsg n yɩɩda. A Zeova mengã “yãka wakat” a raabã pidsg yĩnga. (Yikri 9:5; Mark 1:15) Sã n tõeyã, yaa sõma tɩ d yãk yam n moon koe-noogã vugr bɩ sẽn yɩɩd woto semen fãa. Dũniyã gill zugu, a Zeova Kaset rãmb tus kobs rɩka sõngr so-pakrã tʋʋmde, n moond koe-noogã sẽn kolg lɛɛr a yiib daar fãa. Bãmb tus kobs a taab rɩka wakat fãa so-pakrã tʋʋmde, n moond Rĩungã koe-noogã sẽn kolg lɛɛr a yiib la pʋɩ-sʋk daar fãa. Zall so-pakdbã la misioneer dãmbã rɩkda sẽk sẽn yɩɩd woto Rĩungã tʋʋmdẽ. Tõnd me tõe n baoa soay n kõ neb nins fãa sẽn dat n kelg Rĩungã koe-noogã kaset sẽn pa yãk wakate. (Zã 4:7-15) Tõnd segd n tʋlg n kẽesa d meng tʋʋm-kãngã pʋgẽ wa d sẽn tõe tɛka, bala a Zezi reng n togsa woto: “Wẽnnaam [rĩungã] koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:14; Efɛɛz rãmba 5:15-17.
15. Sẽn tɩ loe ne tõnd koe-moonegã, bõe yĩng tɩ y tagsdẽ tɩ saglg ning sẽn be 1 Korẽnt dãmba 15:58 pʋgẽ wã zemsame?
15 Dũniyã gill zugu, baa b sẽn be tẽng ning pʋgẽ, a Zeova Kaset rãmbã lagemda taab n moond koe-noogã. B tũuda Biiblã sagl-kãngã vʋʋsem sõng sẽn vẽneg tɩ b gʋlsã: “Bɩ yãmb tall tẽeb kãn-kãe n da vigs ye, la wakat fãa bɩ y maan Zusoaba tʋʋmd wʋsgo, tɩ yãmb miimi tɩ yãmb sẽn tʋmd Zusoaba tʋʋmda ka na n yɩ zaalem ye.”—1 Korẽnt dãmba 15:58.
Lebg-n-gese
• A Zezi sẽn yeel tɩ ‘bɩ y reng n bao rĩungã,’ a wilgame tɩ bõe la b segd n ning yiib-n-soab zĩigẽ?
• Bõe la tõnd segd n tags tõnd mengã la d zakã rãmb noor dɩɩb baoob wɛɛngẽ? Sõng-bʋg la Wẽnnaam na n kõ-do?
• Tõnd tõe n kẽesa d toog Rĩungã tʋʋm-bʋs pʋsẽ?
[Foto, seb-neng 107]
Rũndã-rũndã, tẽnsã fãa pʋsẽ, a Zeova Kaset rãmbã moonda koe-noogã, nand tɩ saabã wa