D gũus ne ẽntɛrnetã bẽdse Babg a 3: Ẽntɛrnetã tũnug n gʋls lɛta wã
1 Baa sã n pa wẽng tɩ tõnd ne d zo-rãmb wall d zak neb sẽn vɩ kɛɛng gʋlsd kibay n toond taabã, rẽ yĩnga zemsame tɩ d tool kiba-kãens neb a taab sẽn pʋd n pa mi tõnd zo-rãmbã bɩ d zakã neb nins d sẽn gʋlsdã bɩ? Segdame tɩ d ning-b ẽntɛrnetã pʋgẽ tɩ nebã fãa tõe n karem bɩ? Rẽ yĩnga zemsame tɩ d tool kiba-kãensã neb yaar sɩda? La y sã n paam kibay tɩ pa yãmb la b ra gʋls n na n kõ, zemsame tɩ y rɩk-b n tool neb a taab bɩ?
2 Rẽ yĩnga kibay nins y sẽn toolã sã n yaa zɩlem-beedo, a kõn kell n piuug sɩda? (Yel. 12:19; 21:28; 30:8; Kol. 3:9) Sãmbg sẽn ka be, d sã n dat n “gũus ne [d] kẽnd neere, tɩ zems ne bũmb fãa zãng wa yam dãmba la ka wa yalemba,” d na n tagsa rẽ zug sõma. (Ef. 5:15) Ad d sũy yaa noogo, d sẽn mi tɩ kibay nins fãa sẽn be Annuaire dãmbã pʋsẽ, Gũusg Gasgã la Réveillez-vous ! wã pʋgẽ wã yaa sɩda, n kengd d raood la b kɩtdẽ tɩ d ket n kẽnd ‘sorã’ zugã.—Ezai 30:20, 21.
3 Yell a ye me n be. Tʋm-tʋmd a Poll da goma neb kẽer yell n yeel woto: “Bãmb na n minima kʋɩɩng n yɩ yi-saadba, la ka yãoã bal ye, b na n yɩɩ yel-kãnesdba la gom-yaals rãmba, sẽn gomd sẽn ka zems tɩ gom ye.” (1 Tɩm. 5:13) Woto wilgdame tɩ d pa segd n sãamd d sẽkã zaalem n toond d saam-biisã kiba-yaals ye.
4 Tags-y ẽntɛrnetã tũnug n gʋls lɛta wã sẽn dɩkd sẽk ningã yelle. Sebr a yembr (Le smog de données [ãngil.]) yeela woto vẽenega: “Ned sã n dɩkd sẽk wʋsg ne ẽntɛrnetã, a wat n ye pa bõn-paall sẽn be yamleoog ne-a yas ye, a lebgda yel-pakr bũmb sẽn dɩt sẽka, bala daar fãa a na n paamda kibay ka-tɛk a tʋmd-n-taase, a zo-rãmb la a roagdb sẽn toond-a t’a segd n karem la leoke, . . . n paas kibay a taab lɛɛbd sẽn toond yaare.” Sebrã paasame: “Neb wʋsg sẽn nong ẽntɛrnetã tɩ loog nug tara minung a ye tɩ pa sõma ye. B sã n yã ned adɛrs fãa, b toonda a soab reem bɩ kʋʋsem buud fãa b sẽn seg ẽntɛrnetẽ wã. B mi n toonda galʋ-tẽns kẽer pʋsẽ rog-n-migs kibaya, lɛta la yɛl a taab me.”
5 Saam-biis wʋsg paama kiba-kãensã buudu. Naoor wʋsgo, yaa kibay sẽn gomd koe-moonegã yell tɩ maand laado, yɛl sẽn wõnd b tika bũmb nins tõnd sẽn tẽedã zugu, makr toɛy-toɛy b sẽn wʋm d zãma sõss kẽer pʋsẽ tigissẽ wã la tigis-kãsemsẽ wã, kibay b sẽn wʋm koe-moonegã sasa la kibay a taaba, tɩ b fãa lagem n wõnd pa wẽng woto ye. Neb wʋsg paama kiba-kãensã n tool b taab n pa reng n bao n bãng b sẽn yitẽ, tɩ kɩt tɩ b pa tõe n bãng kibayã sẽn yi ned ning nengẽ n sɩng saagrã, la b sã n sɩd yaa sɩd ye.—Yel. 22:20, 21.
6 Pa kiba-kãens buud sẽn ka yõodã yell la a Poll sẽn da gomd ne a Tɩmote a lɛtrã pʋgẽ wã ye. A yeel-a lame: “Tall gom-sõma nins fo sẽn deeg mam nengẽ wã mamsgo la tẽeb ne nonglem a Kirist Zezi maasem yĩnga.” (2 Tɩm. 1:13) “Buud-gomd sẽn yaa yɩlemdã” sẽn yaa sɩd ning sẽn be Biiblã pʋgẽ wã tara “gom-sõma wã mamsgo,” A tika Biiblã gom-zu-raoog sẽn yaa t’a Zeova na n wilga ne a Rĩungã maasem tɩ yẽ n segd n yɩ ãndũniyã fãa naabã. (Sof. 3:9, NW) D segd n dɩka d sẽkã la d keelmã fãa n gom n teel a Zeova naam sẽn ka to wã.