Kaset sẽn wilgd tɩ b tara tẽebo!
1. Yel-bʋs sẽn sãamd sũur la a Zezi pĩnd n togs tɩ na n zĩndame?
1 Tʋm-tʋmdbã ra kelgda a Zezi neere, a sẽn wa n gomd a waoongã la dũniyã sɛɛb yellã. A yeelame tɩ yɛl sẽn sãamd sũur n da na n zĩndi. Wala makre, zaba, kom, tẽn-digimdg la bã-longdse. A paasame tɩ nebã ra na n kisga a tʋm-tʋmdbã n kɩt tɩ b nams-b la b kʋ-ba. Ziri no-rɛɛsdb ra na n yikame n belg neb wʋsgo. La neb wʋsg me nonglem ra na n maagame.
2. Bõe yĩng tɩ koe-noogã sẽn moond dũniyã gill zugã yaa lingr ne nebã?
2 A Zezi sẽn togs zu-loe-kãensã fãa la a wilg tɩ b na n moona Wẽnnaam soolem koe-noogã dũniyã gill zugã, ra segd n yɩɩ lingr ne a tʋm-tʋmdbã. (Mat. 24:3-14) Rũndã-rũndã, d nee bãngr gom-kãngã sẽn sɩd pidsdi. Baa ne d sẽn vɩ tood sasa wã, a Zeova Kaset rãmbã moonda koe-noogã ne yẽesem. Neb wʋsg nonglem maagdame, la tõnd yẽ nonglmã tara paasgo. Baa ne “buudã fãa” sẽn kis tõndã, d ket n moonda tẽnsã fãa pʋsẽ la bala.
3. Rapoorã zugu, bõe n kengd yãmb raood n yɩɩda?
3 D sã n ges a Zeova Kaset rãmbã tʋʋmdã sẽn yɩ to-to dũniyã gill zug tɩ be seb-kãngã neng a 3-6 pʋgẽ wã, kengda raoodo. Yaa yʋʋm 16 la woto a Zeova Kaset rãmbã sẽn dɩkd sẽn yɩɩd lɛɛr milyaar a ye yʋʋmd fãa n moon koɛɛgã la b maan karen-biisi. Ad woto sɩd yaa kaset sẽn wilgd tɩ b tara tẽebo! So-pakdbã sʋka, koabg zugu, yɩɩ neb a 6 n paase, koe-moondbã sʋka koabg zugu, neb a 3 n paase. Biiblã karen-biisã koabg zugu, neb a 4 n paase. La sẽn deeg-b lisgã koabg zugu, yaa neb 20 n paase. Ad yaa sũ-noog tɛka, d sẽn ne tɩ neb sõor sẽn kolg milyõ a yopoe n modgd n maand a Zeova raabã baa ne vɩɩmã sẽn yaa toogã! Bõe la yãmb yã rapoorã pʋgẽ tɩ kengd yãmb raood n yɩɩda?
4. Zu-loe-bʋs la rao a ye mao ne n tõog n deeg lisgu?
4 Baa ne sõorã sẽn waooga, d pa segd n yĩm tɩ yaa neb sẽn wilg tɩ b tara tẽeb ye. Wala makre, a Guillermo roga yʋʋmd 1935 wã pʋgẽ. A bɩɩ Bolivi, la a sẽn wa n tar yʋʋm a wɛ bal la a sɩng koka pʋʋg pʋgẽ tʋʋma. Hal a yãadmẽ, a ra wãbda koka wã vãad sẽn na yɩl n paam pãng n tʋm a tʋʋmã sẽn da yaa yõog pãng tʋʋmã. Kaoosg zugẽ, a wa n lebga rã-yũud la sɩga-yũuda. A sẽn zãms Biiblã n bãng a Zeova sẽn dat t’a maan bũmb ninga, a basa sɩgaarã la rã-tɩgrã. La sẽn mik t’a sẽn da sɩng koka wã vãad wãbr daar zãra yĩnga, ra yaa toog wʋsg ne-a t’a tõog n base. A pʋʋsa a Zeova ne a sũur fãa n tõog n base, n paam n deeg lisgu. Yẽ meng yeela woto: “Masã, m yaa yɩlemde, la m sũur nooma wʋsgo.”
5. Bõe la yãmb rat tɩ nebã maane?
5 A Zeova sɩd nonga nebã. A sẽn dat bũmb ning yaa tɩ nebã fãa tek yam n kos sugri. (2 Pɩɛ. 3:9) Tõnd me rata woto. Bɩ d kell n modg n maan d sẽn tõe fãa n sõng pʋ-peelem dãmbã tɩ b bãng a Zeova, la b nong-a wa tõnd sẽn mi-a la d nong-a to-to wã.