A Zeova nonga ned ning sẽn kõt ne sũ-noogo
1, 2. a) Bõe n wilgd tɩ ned kae n kõt ne sũ-noog n ta a Zeova? b) Bõe wɛɛngẽ la a Zeova Kaset rãmbã rɩkd a Zeova togs-n-taare?
1 Biiblã wilgdame t’a Zeova yaa kõta, la t’a ‘pukda a nug tɩ bõn-vɩɩsã fãa paamd b sẽn dat tɩ sekdẽ.’ (Yɩɩl 145:16) Kũun sẽn yaa kãseng n tɩ yɩɩd fãa yaa a sẽn kõ a bi-riblã tɩ yɩ rond tõnd yĩngã. (Zã 3:16) Sẽn paase, d tags n ges a sẽn get d yell tẽebã wɛɛngẽ la a kõt-d rɩɩbo, futu, la teed a taab wakat fãa wã. Vẽenega, a Zeova sɩd “kõta ne sũ-noogo,” tɩ yaa mak-sõng sẽn ka to. (2 Kor. 9:7) Biiblã sagenda tõnd tɩ d yɩ “Wẽnnaam togs-n-taase.”—Ef. 5:1.
2 D sã n wa taasd nebã koe-noogã d moonegã zĩigẽ, bɩ d sã n wa tiig n seg ned n moon-a, yaa kũun la d kõta. Yʋʋmd fãa, a Zeova Kaset rãmbã rɩkda lɛɛr dãmb sẽn yɩɩd milyaar a ye n moond koɛɛgã, la woto yaa kũun la b sẽn kõt nebã. Koe-moonegã pʋgẽ, d kõta nebã sɛb buud toor-toor milyõ rãmb zaalem.
3. Bõe la a Zeova siglgã maan n kõ tẽns nins sẽn pa tar laog wʋsgã, wala makre tõnd tẽngã, la bõe la b gũud tɩ tõnd maane?
3 Sẽn paase, tẽns nins sẽn pa tar laog wʋsgã pʋsẽ, wala makre tõnd tẽngã, a Zeova siglgã sõngã tigims wʋsg tɩ b me Rĩung Roto. B sẽn sɩng tẽns nins sẽn pa tar laog wʋsgã sõngr ne Rĩungã Rotã meebã tɛk n tãag masã, Afirik yen-yen b mee sẽn yɩɩd bãmb 8 600. B gũudame tɩ saam-biisã ges ro-kãensã yelle, la b maan b sẽn tõe fãa n ningd ligd kogendã pʋsẽ sẽn na yɩl tɩ ligd ning b sẽn dɩk n me roogã kẽ. Woto na n kɩtame tɩ b tõog n ye sõng tigims a taab me tɩ b paam Rĩung Roto.
4, 5. Sõdg-y teed kẽer d sẽn tog n paam sẽn na yɩl n sõng ne koɛɛgã moonego.
4 Siglgã taoor lʋɩtb Sullã tũnugda ne filiyall dãmb sẽn yɩɩd 100, n get koɛɛgã mooneg yell dũniyã gill zugu. Saam-biis la saam-bi-pogs sẽn kolg 20 000 n tʋmd zĩ-kãense. Zĩ-kãens kẽere, b yiisda sɛb n toond tigimsã sẽn na yɩl tɩ b tall n moon koɛɛgã. Mams-y n ges bũmb nins b sẽn baood sẽn na yɩl n tõog yiisd sɛbã. Rẽ baooda ro-bɛd sẽn na n ning masĩn dãmbã la teed a taaba. Yaa tɩlae tɩ b paam seb-vãad wʋsg la teed a taab ligd sẽn yaa toogo, sẽn na yɩl n tõog n maan sɛb buud toor-toore. D segd n paama ordinatɛɛr dãmb la masĩn dãmb a taab sẽn na yɩl n lebgd sɛbã ne buud goam wʋsgo, la b tall n tʋm tʋʋm a taaba. Sẽn tʋmd-b Betɛll dãmbẽ wã me segd n paama ro-gãase. Woto fãa yaa sẽn na yɩl n sõng ne koɛɛgã moonego.
5 Siglgã le yiisda ligd n maand depãens a taab me. Wala makre, b geta misioneer dãmb tusa yelle, la b get so-pakdbã b sẽn tʋm tẽns nins koe-moondb raab sẽn beẽ wã me yelle. B geta tigims sull la distrik yel-gɛtb tusa me sẽn kaagd tigimsã sẽn na yɩl n keng saam-biisã raood tɩ b kell n moon koe-noogã me yelle.
6. Yɛ la d paamd ligd n tʋmd tʋʋm-kãensã fãa? Rɩk-y makr la y wilg a võore.
6 D sã n get koɛɛgã mooneg sẽn yaa tʋʋm-kãsengã, tõe tɩ d na n soka d meng n gese, yɛ la b paamd ligd n tʋmd tʋʋm-kãensã? Yaa d saam-biis milyõ rãmbã nus sẽn zãad la sẽn yaa naong rãmba, la neb a taab sẽn mi tʋʋm-kãseng ning a Zezi sẽn bobl tõndã yõodã n kõt kũuni. (Mat. 24:14; 28:19, 20) Nebã sẽn kõt ligd kãngã wã yaa wa koom sẽn tosd bilf-bilf hal tɩ wa lebg ko-zoetem, n zoet n kẽed kʋɩlgẽ, tɩ kʋɩl-kãng me koom zoet n kẽed mogr pʋgẽ tɩ lebgd wʋsgo. A Zeova kaset rãmbã tigissã sasa b pa pɩʋʋgd nebã taoor ne laas n deesd ligd ye. B leb n pa kot sõngr zĩig a to ye. Neb nins sẽn teend tʋʋm-kãseng kãngã ne b ligdã maanda rẽ b sẽn nong a Zeova wã yĩnga.
7, 8. a) Wa pĩnd wẽndẽ dãmbã sẽn da maandã, rũndã-rũndã bõe n kɩtd tɩ pʋ-peelem dãmbã kõt kũun n teend tũudum hakɩkã? b) Wãn to la d tõe n bãng kũun ning sẽn tat a Zeova ne a biig a Zezi Kirist yam?
7 Hal pĩnd wẽndẽ n tãag masã neb nins sẽn tũud a Zeova wã minim n kõta kũun n teend tũudum hakɩkã. A Zeova sẽn wa n yeel a Moiiz t’a ti sɛk-roogã weoogẽ wã, nebã kõo kũun ne yamleoogo. Yikr 35:21 wã yeta woto: “La neb nins fãa sũur sẽn noom ne Zusoabã talla kũun ne yamleoog n wa kõ Zusoabã sɛk-roogã manegr yĩnga.” Vẽenega, b sũyã sẽn noom ne a Zeova wã kɩtame tɩ b kõ b nag-teed ligd sẽn yaa toogo, la teed a taab b sẽn pa tẽed tɩ b tõe n le paamame ye. B da rat n teela tũudum hakɩkã ne b sũy fãa.
8 Yaa woto me rũndã-rũndã. Yaa neb nins sẽn sɩd nong a Zeova wã n kõt kũun n teend koɛɛgã d sẽn moond dũniyã gill zugã. B sʋkã, baa wʋsg sẽn yaa naong rãmbã, b yiisda ligd n teend koe-moonegã baa ne sẽn pa nana ne-bã. B sẽn maandã wõnda wa pog-kõorã sẽn maan to-to a Zezi wakatẽ tɩ b gomd rẽ yell Luk 21 pʋgẽ wã. A Zezi sẽn yã pog-kõorã kũunã, ne sẽn pa waoogã a yeela a tʋm-tʋmdbã woto: “Mam yeta yãmb sɩda tɩ pʋg-kõ-kãngã sẽn yaa naong soabã ningame n yɩɩd neb a taabã fãa. Tɩ bõe, bãmb fãa ligd sẽn yaa wʋsgã, bãmb yãka kũun n ning ligdã ningr zĩigẽ, la yẽ sẽn ka tarã, a ninga a sẽn tara tɛka, hal a rɩɩba ligd fãa.” (Luk 21:2-4) Kiba-kãngã wilgdame tɩ kũun nins saam-biis nins sẽn pa tar ligdã sẽn kõtã tata a Zeova ne a biig a Zezi Kirist yam, la b getame tɩ tara yõod wʋsgo baa ne sẽn pa waoogã.
9. Bõe n wilgd tɩ pa tigingã neb fãa n get tɩ tara yõod wʋsg tɩ b yiis ligd n teel Rĩungã tʋʋmde?
9 D segd n feesa d mens n ges d sã n sɩd teenda Rĩungã tʋʋmdã ne d sũur fãa. Sasa ninga, saam-biis nins sẽn yet tɩ b pa tar ligd n na n teel koɛɛgã mooneg bɩ Rĩungã Roog yell gesgã yaool n paamda ligd n maand yɛl a taab sẽn pa tar yõod wʋsgo. Wala makre, sa n yaa kãadem yelle, b nong yiisda ligd wʋsg daar a ye bɩ wakat a wãn kibs yĩng bala. Woto wilgdame tɩ neb kẽer getame tɩ b sẽn na n yiis b ligd n teel koɛɛgã moonegã pa tar yõod wʋsg ye.—Fil. 1:10.
10. Wãn to la b segd n teel tʋʋmdã, la d sã n wʋm a võor sõma wãn to la na n naf-do?
10 Wõnda wa neb kẽer ket n nan pa wʋm kũunã bɩ ligdã koe-moondbã sẽn segd n kõ la b reeg sɛbã võor sõma ye. Sẽn yaa sebr ning fãa la d reeg Rĩungã Roogẽ, d segd n ningã ligd koglgã pʋgẽ rẽ yĩngã. D sã n modgd n maand woto, d sõngda ne depãens rãmbã. D sã n kõ ned sebr d moonegã zĩigẽ, d yeta a soabã tɩ yaa zaalem, la t’a sã n data a tõe n kɩsa a sẽn tare. D sã n lebg n na n tɩ ges neb nins sẽn wilg tɩ b rat n bãng n paasame wã, bɩ neb nins d sẽn zãmsd Biiblã, d segd n wilg-b-la b sẽn tõe n teel koɛɛgã d sẽn moond dũniyã gill zugã to-to, la d bas tɩ b kõ b sẽn tare. (Mat. 24:14) Neb wʋsg sẽn bãng tɩ d tʋʋmdã yaa kãseng sũy mi n yaa noog tɩ b rat n kõ kũuni.
11. Rĩm a Davɩɩd sẽn wa n kõ kũun n na n teel wẽnd-doogã meebã poore a yeelame tɩ bõe, la bõe yĩng tɩ d segd n dɩk a togs-n-taare?
11 Rĩm a Davɩɩd wilga a tagsg wakat ning yẽ ne Israɛll nebã sẽn kõ kũun n na n teel wẽnd-doogã meebã. A yeela a Zeova pʋʋsg pʋgẽ woto: “Maam ne m nebã yaa bõe n tõog n kõ yãmb bũmb a woto ne yamleoogo? Tɩ bõe, bũmba fãa yita yãmb nengẽ. La tõnd yãka bũmb nins yãmb sẽn kõ tõndã n lebs yãmba.” (1 Kib. 29:14) Yaa ned kam fãa n segd n tags n ges ligd sõor ning a sẽn tõe n kõ. A Zeova na n sɩd ninga neb nins fãa sẽn kõt ne sũ-noog la ne yamleoogã barka.
12. a) Wãn to la d tõe n kõ kũunã n teel koɛɛgã d sẽn moond dũniyã gill zugã? b) Bõe la saam-biis nins sẽn get ligdã yellã segd n maane?
12 D tõe n toola d kũunã Betɛllẽ wã, pa rẽ bɩ d ning kogendã sẽn be Rĩungã Roogẽ wã pʋsẽ. Tigsg fãa poore, saam-biis a yiib n segd n vaag ligdã n sõde, la b gʋls ligd kãng sõorã resi zugu. Nin-kãensã sã n get ligdã yell sõma, saam-biisã na n ningda b kũunã kogendã pʋsẽ wakat fãa ne bas-m-yam. (1 Kor. 4:2) Kiuug fãa kũum, tigingã segd n toola ligd ning fãa saam-biisã sẽn kõ n na n teel koɛɛgã d sẽn moond dũniyã gill zugã.
13. Neb nins sẽn kõt ne sũ-noogã tõe n kɩsa sɩd ne bõe?
13 A Zeova ninga Israɛll nebã bark wʋsgo, sasa ning b sẽn da rɩkd b tarmã n teend tũudum hakɩkã ne b sũy fãa wã. Tõnd me tõe n kɩsa sɩd t’a Zeova na n ning-d-la barka, d sã n pelg d pʋs n teel Rĩungã koɛɛgã mooneg la d ‘waoog-a ne d paoongã.’—Yel. 3:9, 10.