D sõng karen-bi-paalsã tɩ b tõog n yals kãn-kãe makr wakate
1 Ned sã n sɩng Biiblã zãmsg n wa rat n maan Wẽnnaam daabã, a Sʋɩtãan maanda a sẽn tõe tɛk sẽn na yɩl n gɩdg-a. (2 Tɩm. 3:12) A tõe n tũnuga ne a soabã tʋmd-n-taase, a karen-bi-taase, bɩ a yags n maan dẽ. La sã n yaa roagd sẽn wõnd a rata a neer n gɩdgd-a, tõe n yɩɩ toog wʋsg t’a tõog n yals kãn-kãe.—Mat. 10:21; Mark 3:21.
2 B reng n wilgame tɩ d na n paama namsgo: Karen-bi-paalsã segd n ninga b yamẽ tɩ b na n paama namsgo, la tɩ rẽ wilgdame tɩ b lebgda Kiristã karen-biis hakɩka. (Zã 15:20) Sasa ninga, neb kẽer tõe n namsda tõndo, b sẽn tar tags-kɛg a Zeova Kaset rãmbã zugã yĩnga. La d segd n ninga d yamẽ tɩ sã n yaa tõnd sẽn dɩk a Zezi togs-n-taar la d sakd Wẽnnaamã yĩng la b paoogd tõndo, d na n wa paama sũ-noog wʋsgo. (Tʋʋ. 5:27-29, 40, 41) D wilg karen-bi-paalsã t’a Zeova bee ne-ba, la a na n sõng-b lame. (Yɩɩl 27:10; Mark 10:29, 30) B sã n tõog n yals kan-kãe, b wilgdame tɩ b sakame t’a Zeova la yĩngr la tẽng Naaba, la t’a Sʋɩtãan yagda ziri.—Yel. 27:11.
3 Bãngr hakɩkã nafa: Kɩt-y tɩ y karen-biisã bãng tɩ b sã n ket n zãmsd Biiblã na n naf-b-la wʋsgo, baa ne zu-loees nins fãa b sẽn na n segã. A Sʋɩtãan sẽn gɩdgd-bã yaa sẽn na yɩl tɩ bũmb nins b sẽn zãmsdã ra kɩ yẽg b sũyã pʋsẽ ye. (Yel. 4:23; Luk 8:13) B segd n ket n zãmsda Wẽnnaam Gomdã, sẽn na yɩl n kɩ yẽg tẽebã pʋgẽ.—Yɩɩl 1:2, 3; Kol. 2:6, 7.
4 Tõog toogã nafa: Makr buud fãa pʋgẽ, d segd n tõoga toogo, bala tõe n woma bi-sõma. (Luk 21:16-19) D sã n sõng karen-biisã tɩ b tõog toog makr pʋgẽ, na n nafa bãmb mengã, la neb a taabã. B na n yãame t’a Zeova sɩd ningda neb nins sẽn yalsd kãe-kãe makr wakatã barka.—Zak 1:12.
5 Tʋm-tʋmd a Poll sũur yɩɩ noogo, a sẽn yã a tẽed-n-taasã sẽn be Tesalonikã tẽebã sẽn kengdã. A ra sõnga neb wʋsg tɩ b sak sɩdã, la a pʋʋsa Wẽnnaam bark bãmb fãa yĩnga. (2 Tes. 1:3-5) Tõnd me sã n sõng d karen-biisã tɩ b tõog toog makr pʋgẽ, d na n paama sũ-noog ning a Poll sẽn paamã buudu.