“Yam soab tʋʋmã n wilgd t’a tara yam”
1. Wãn to la neb kẽer get tõnd tʋʋmdã?
1 Wakat ninga, tõnd tõe n sega neb sẽn pa rat n kelge, b sẽn pa mi tõnd tʋʋmdã võorã yĩnga, bɩ neb sẽn togs-b yɛl sẽn pa sɩd a Zeova Kaset rãmbã zug yĩnga. Tõeeme me tɩ yaa kiba-kɩtb kẽer sẽn dõt tõndã n kɩt tɩ b tar tags-kɛg tõnd zugu. Tẽns kẽer pʋsẽ menga, b yetame t’a Zeova Kaset rãmbã yaa tũudum sẽn pa sõma. Nebã sã n wa tar manesem kãngã buud ne tõndo, d maanda wãna?
2. Bõe n tõe n sõng tõnd tɩ nebã sã n wa sãbsd tõnd bɩ d ra koms raoodo?
2 D ra koms raood ye: A Zezi ne neb a taab sẽn da tũud a Zeova wã sẽn da moond koɛɛgã, neb kẽer ra pa wʋmd b sẽn maandã võore, la b ra rõt-b lame me. (Tʋʋ. 28:22) La b pa bas tɩ nebã wɩdgã ne b sãbsgã kɩt tɩ b zoe yãnd ne koɛɛgã mooneg ye. A Zezi yeelame tɩ “yam soab tʋʋmã n wilgd t’a tara yam.” (Mat. 11:18, 19) A Zezi kell n maana a Ba wã raabã ne yẽesem, n miẽ tɩ neb nins sẽn nong sɩdã na n yãame tɩ koe-noogã a sẽn moondã tara yõod wʋsgo. D sã n tẽeg tɩ Wẽnnaam Biigã meng sega yel-kãensã buudu, tõe n kɩtame tɩ d ra koms raood ye.
3. Bõe yĩng tɩ sãbsgã la kɩɩsgã pa segd n ling tõndo?
3 A Zezi yeelame tɩ dũniyã na n kisga a karen-biisã wa a sẽn kisg yẽ to-to wã. (Zã 15:18-20) Rẽnd nebã sã n sãbsd tõnd bɩ n kɩɩsd tõndo, pa segd n ling tõnd ye. D pʋd n segd n gũume tɩ yãng n paase, tõnd sẽn kolgd dũniyã saab t’a Sʋɩtãan sũ-puugrã paasdẽ wã yĩnga. (Wil. 12:12) D sũur segd n yɩɩ noogo, bala woto wilgdame t’a Sʋɩtãan dũniyã rebda a saab zĩigẽ.
4. Ned sã n pa rat n kelg bɩ a sã n gom tõnd gom-yoodo, d segd n maana wãna?
4 D leok nebã ne bʋgsem: Ned sã n pa rat n kelg tõnd bɩ a sã n gom tõnd gom-yoodo, d segd n leoka ne bʋgsem. (Yel. 15:1; Kol. 4:5, 6) Sã n tõeyã, bɩ d wilg pʋ-peelem dãmbã tɩ nebã yeta yɛl wʋsg sẽn pa sɩd a Zeova Kaset rãmbã zugu, walla d sok-b bũmb ning sẽn kɩt tɩ b tagsd woto wã. Tõnd bʋgsmã tõe n kɩtame tɩ b bao n bãng goam nins b sẽn wʋm a Zeova Kaset rãmbã zugã sã n yaa sɩda, la kɩt t’a Zeova Kaset soab sã n wa b nengẽ nindaar bɩ b sak n kelge. La a soabã sũur sã n yika wʋsgo, yɩta sõma tɩ d kos sugr la d looge. Tõnd kɩsa sɩd tɩ baa nebã sẽn get tõnd to-to fãa, d tʋʋmdã tata a Zeova yam.—Ezai 52:7.