“Bɩ laafɩ zĩnd yãmb ne neba fãa sʋka”
1. Ned sũur sã n yik ne-d koe-moonegã sasa, vɛrse bʋg saglg la d segd n tũ?
1 A Zeova nin-buiidã nonga laafɩ. Koɛɛgã d sẽn taasdã me yaa laafɩ koɛɛga. (Ezai 52:7) La wakat ninga, d tõe n wẽe nina zak noor n na n sõs ne-a t’a sũurã yik ne-do. Wakat kãnga, bõe la d tõe n maan tɩ laafɩ zĩndi?—Rom 12:18.
2. Bõe yĩng tɩ tar yõod tɩ d tall yam koɛɛgã mooneg sasa?
2 Bɩ d tall yam: Yaa sɩd tɩ neb kẽer sũur sẽn yikd ne-dã yaa b sẽn ka nong d tũudmã, la sãnda yẽ nengẽ ka rẽ yĩng ye. Tõe tɩ tõnd n wa wakat sẽn pa zemse. Nina ra zoe n tara yell sẽn yik a sũuri. Baa sã n yaa Rĩungã koɛɛgã n yik a sũuri, d pa segd n yĩm tɩ naoor wʋsgo, yaa b sẽn togs-b yɛl sẽn pa sɩdã yĩnga. (2 Kor. 4:4) D sã n tall yam, na n sõng-d lame tɩ d kell n yõk d mense, n da tags t’a sũurã sẽn yikã yaa ne tõnd mengã ye.—Yel. 19:11.
3. Wãn to la d tõe n wilg tɩ d waoogda nebã koe-moonegã sasa?
3 Bɩ d waoogd nebã: Neb wʋsg gãda b sẽn zãms-b bũmb ning tũudmã pʋgẽ wã dem-dem. (2 Kor. 10:4) Ned fãa tara sor n na n yãk a na n kelgame bɩ a pa na n kelge. D pa tol n dat me n paoog-a, a sẽn tẽed bũmb ninsã, bɩ n kɩt t’a tagsdẽ t’a pa mi baa fʋɩ Biiblã zugu, tõnd sẽn mi yɛl kẽer t’a pa miẽ wã yĩng ye. A sã n yeel tɩ d yi a zakẽ, bɩ d sak n looge.
4. Tall goam sẽn tar noosmã rat n yeelame tɩ bõe?
4 Bɩ d goamã tall noosem: B sã n gom tõnd põaasa, d tog n sika d meng n leok noog-noogo. (Kol. 4:6; 1 Pɩɛ. 2:23) D pa segd n maan tɩ lebg no-koeemd ye. Yɩta sõma tɩ d sõs bũmb tõnd ne kɛlgdã sẽn sak n deeg zugu. D tõeeme me n bʋk d meng n bao n bãng bũmb ning sẽn kɩt t’a pa rat n kelg-dã. La nina nengẽ, sẽn na yɩl tɩ yellã ra yãnge, yɩta sõma tɩ d loog n da bao n na n sõs ne-a ye.—Yel. 9:7; 17:14.
5. Koe-moonegã sasa, d sã n modg tɩ laafɩ zĩnd tõnd ne nebã sʋka, nafa bʋs la d paamda?
5 D sã n modg tɩ laafɩ kell n zĩndi, tõe n kɩtame tɩ ned a to sã n wa nindaar n na n sõs ne-a bɩ a sak n kelge. (Rom 12:20, 21) Baa sã n wõnd a pa na n tol n sak n kelg-do, a tõe n wa lebga d saam-biig daar ninga. (Gal. 1:13, 14) A wa n sak t’a pa tol n sak me, d sã n kell n yõk d mens la d modg tɩ laafɩ zĩndi, d waoogda a Zeova la d kɩtdẽ tɩ d tʋʋmdã paamd waoogre.—2 Kor. 6:3.