D moonda ne raoodo, la d baooda laafɩ ne nebã

¹ Neb wʋsg tõnd sẽn moond Rĩungã koɛɛg wilgda bũmb nins b sẽn sɩd tẽedã, la pa zemsd ne Biiblã sẽn yetã ye. La baa d sẽn segd n moon ne raoodã, d tʋllame me tɩ ‘laafɩ zĩnd tõnd ne nebã fãa sʋka,’ la d ra yikd nebã sũy zaalem ye. (Rom 12:18; Tʋʋ. 4:29) Woto yĩnga, d na n maan wãn n tõog n moond koɛɛgã ne raood la d baood laafɩ ne nebã?

² D bao tɩ tõnd ne kɛlgdbã wʋm taaba: Ned sẽn baood laafɩ ne nebã ginda no-koɛɛma. D kɛlgd sã n togs bũmb a sẽn tẽed ne a sũur fãa tɩ d kɩɩs-a zaalem, a pa na n ye kelg-d ye. Woto yĩnga, ned sã n gom gomd tɩ pa sɩda, d segd n maana yam n togs bũmb a sẽn tõe n sak n deeg tɩ sõsgã kell n kẽng taoore, la kẽ a sũuri.

³ D kɛlgd sã n togs a tagsg tɩ yaa kɛgr tɩ d pa kɩɩs-a, rẽ yĩnga woto wilgdame tɩ d kalemda sɩdã ne ziri bɩ? Ayo. Tõnd kiris-nebã tʋʋmd yaa moon Wẽnnaam Rĩungã koe-noogo. B pa yeel tɩ d kɩɩs d kɛlgdbã tagsg buud fãa sẽn pa zems ne Biiblã sẽn yetã ye. (Mat. 24:14) D kɛlgd sã n togs bũmb tɩ pa zemse, wall tɩ d tʋlg n dems a sẽn yeelã, d tõe n tika rẽ zug n bao n bãng a tagsgo.—Yel. 16:23.

⁴ D waoogd d kɛlgdbã: Wakat ninga, d kɛlgd gomd sã n yaa kɛgre, d segd n kɩɩs-a-la ne raood la ne yẽesem. La d sẽn baood laafɩ wã yĩnga, d pa segd n yaand nebã bɩ n paoogd bũmb nins b sẽn tẽedã, wall neb nins sẽn zãmsd-b bõn-kãens tɩ yaool n pa zems ne Biiblã sẽn yetã ye. D sã n maand wa d yɩɩda nebã, tõe n kɩtame tɩ b pa kelg koɛɛgã ye, la d sã n sikd d mens n sõsd ne-b ne bʋgsem, b na n kelg-d lame. D sã n waoog d kɛlgd la d pa paoog a sẽn tẽed bũmb ninsã, a na n sak n kelga koɛɛgã nana-nana.

⁵ Tʋm-tʋmd a Poll ra waoogda a kɛlgdbã la bũmb nins b sẽn tẽedã n baood a sẽn na n moon-b koɛɛgã to-to tɩ b sak n kelg-a. (Tʋʋ. 17:22-31) Sẽn na yɩl n tõog n ‘fãag kẽere,’ a ra sakd n ‘lebgda bũmb fãa neb [buud] fãa yĩnga.’ (1 Kor. 9:22) D segd n dɩka a togs-n-taare, n moond koe-noogã ne raood la d baood laafɩ ne nebã.