Yãmb moonda ne raood bɩ?
1 Baa ne a Pɩɛɛr la a Zã bɛɛbã sẽn yõg-b n namsã, b kell n kẽnga taoor n togs Rĩungã koɛɛg ne raoodo. (Tʋʋ. 4:17, 21, 31) Ne tõnd rũndã-rũndã, moon ne raood rat n yeelame tɩ bõe?
2 D kõ kaset ne raoodo: Ned “sẽn tar daood” yaa ned “sẽn tar sũ-keelem,” sẽn dat n yeel tɩ “sẽn pa yɛɛsd baa fɩ la sẽn tar tõog-toogo.” Ne kiris-neb hakɩkã, moon ne raoodã rat n yeelame tɩ b ra zoe rabeem ne b gom zĩig ning fãa b sẽn paam sor sẽn zems n tõe n taas neb a taab koe-noogã ye. (Tʋʋ. 4:20; 1 Pɩɛ. 3:15) Rat n yeelame tɩ tõnd ka zoet yãnd ne koe-noogã ye. (Yɩɩl 119:46; Rom 1:16; 2 Tɩm. 1:8) Dẽ, raood yaa zʋg d sẽn segd n tall n tõog n maan tʋʋmd ning b sẽn kõ-d tɩ d moon Rĩungã koe-noog saabã wakat kãngã wã. A tusda tõnd tɩ d taas koe-noogã nebã zĩig ning fãa d sẽn tõe n yã-bã.—Tʋʋ. 4:29; 1 Kor. 9:23, NW.
3 Raood tallg lekollẽ wã: Rabeem bɩ nin-zoeer kɩtame tɩ yaa toog ne-y tɩ y moon y karen-bi-taasã bɩ? Wakat ninga ka nana ye. Sɩda rẽ tõe n yɩɩ tʋʋm-toog menga. Baasg zãnga, a Zeova na n kenga yãmba, y sã n pʋʋs n kos raood sẽn na yɩl n moon neb a taabã. (Yɩɩl 138:3) Raoodã na n sõng-y lame tɩ y tõog n kɩt tɩ b bãng tɩ y ya a Zeova Kaset soaba, la y yals kãn-kãe yaalg taoore. Rẽ tõe n kɩtame tɩ, y moonegã lekollẽ wã fãag b rãmb nins sẽn kelgd yãmbã.—1 Tɩm. 4:16.
4 Raood tallg tʋʋma zĩigẽ: Neba miimi tɩ yãmb ya a Zeova Kaset soab tʋʋma zĩigẽ bɩ? Tõe tɩ yaa ne yãmb moonegã bal la koe-noogã tõe n ta y tʋmd-n-taasã. Yãmb raoodã me na n le sõng-y lame tɩ y tõog n paam tɩ b kõ-y sẽk y kiris-neb tigissã la tigis-kãsemsã yĩnga.
5 Raood tallg makr wakate: D sã n wa segd kɩɩsgo, raood tallgã tara yõod wʋsgo. (1 Tes. 2:1, 2, NW) Neb sã n wa rat n maan-d wẽnga, n yaand-do, bɩ b sã n namsd-d vẽeneg d tẽebã yĩnga, raoodã sõngda tõnd tɩ d gãd d tẽebã kãn-kãe. (Fil. 1:27, 28) A kengda tõnd tɩ d yals kãn-kãe weoogr sẽn na yɩl tɩ d bas d Wẽnnaam a Zeova noyã sakre. A kõta tõnd pãng tɩ neb a taabã sã n kãbg d sũur bɩ d kell n yɩ neb sẽn baood laafɩ.—Rom 12:18.
6 Baa zu-loeesã d sẽn segdã sẽn yaa b rãmb fãa, bɩ d nang pãng n ket n moond koe-noogã ne raoodo.—Ef. 6:18-20.