D ket n togsd Wẽnnaam koɛɛgã ne raoodo
1 D sẽn yaa kiris-nebã, d miime tɩ pa nebã fãa n na n sak n kelg koɛɛgã d sẽn moondã ye. (Mat. 10:14) La neb kẽer sẽn pa rat n kelg-dã yĩng pa segd n kɩt tɩ d bas koe-noogã mooneg ye. (Yel. 29:25) Bõe n sõngd tõnd tɩ d ket n togsd Wẽnnaam koɛɛgã ne raoodã?
2 Tʋm-tʋmd a Poll ra miime t’a sẽn bãng Kiristã yaa bõn-kãseng “sẽn yɩɩd bũmb fãa.” Rẽ kɩtame t’a togs koɛɛgã “ne pãnga.” (Fil. 3:8; 1 Tes. 1:5) Baa neb kẽer sẽn ges koɛɛgã a sẽn moonã wa bõn-faoog la yalemdã, a ra miime tɩ koɛɛgã yaa ‘Wẽnnaam pãng n kõt ned ninga fãa sẽn tẽeda fãagre.’ (Rom 1:16) Woto yĩnga, baa a Poll sã n da wa segd kɩɩsgo a ra ket n dellda a Zeova n gomd ne raoodo.—Tʋʋ. 14:1-7; 20:18-21, 24.
3 Tõnd pãngã sẽn yitẽ: Pa a Poll meng pãng n kɩt t’a ra tõe n kɩs kasetã ne raoodã ye. A gʋls n goma yẽ ne a Sɩlas yʋʋr yĩng woto: “La tõnd sẽn da nams n paam toog wʋsg Filip wa yãmb sẽn bãngã, tɩ baa neb wʋsg sẽn kɩɩsã, tõnd Wẽnnaam kõo tõnd daood tɩ d togs yãmb bãmb Koe-noogã.” (1 Tes. 2:2; Tʋʋ. 16:12, 37) Sẽn paase, b sẽn da wa n kẽes a Poll bãens roog Rommã, a kosa a tẽed-n-taasã tɩ b pʋʋs Wẽnnaam a yĩng sẽn na yɩl t’a tõog n ket n togsd koe-noogã “ne raood wa sẽn zemse.” (Ef. 6:18-20) A Poll sẽn dell a Zeova n pa teeg a mengã, a tõog n kell n togsa Wẽnnaam koɛɛgã ne raoodo.—2 Kor. 4:7; Fil. 4:13, Sebr Sõngo.
4 Tõnd me teegda a Zeova woto rũndã-rũndã. Saam-biig a ye n da get tɩ yaa toog ne-a t’a wilg nebã a tʋʋmã zĩigẽ t’a yaa a Zeova Kaset soaba, la a kõ a tʋmd-n-taasã kasetã. Sɩngrẽ wã, rao a ye sẽn yaa a tʋmd-n-taag n da pa rat n kelg-a, la a sẽn gom kũum vʋʋgr saagrã yellã, a kelgame tɩ kɩt t’a sak n sɩng Biiblã zãmsgo. Rẽ tɛka, saam-biigã tũnugda ne sɛgb a sẽn paam fãa n kõt kasetã. A toeema tʋʋm zĩiga, la beenẽ yʋʋm 14 pʋgẽ, a sõnga neb 34 tɩ b reeg lisgu. Wala woto, tõnd me tõe n kɩsa sɩd t’a Zeova na n kõ-d-la pãng tɩ d ket n togsd a koɛɛgã ne raoodo.—Tʋʋ. 4:29.