Sak piig la a wɛ
Ket-y n togsd Wẽnnaam Gomdã ne raoodo
1. a) Koe-no-bʋg la a Zezi karen-biisã moon-yã, la Zʋɩf rãmb kẽer manesem yɩɩ wãn to? b) Sogs-bʋs la d tõe n soke?
SẼN pẽneg yʋʋm 2 000 la woto, Wẽnnaam Biribl a Zezi Kirist ra paama zaeeb n na n wa yɩ Rĩm tẽngã gill zugu. A Zezi bɛɛb nins sẽn yaa tũudmã nebã maana zãmb tɩ b kʋ-a, la a Zeova vʋʋg-a lame. A Zezi maasem yĩnga, neba ra tõe n paama vɩɩm sẽn pa satã masã. La a Zezi karen-biisã sẽn wa n moon koe-no-kãngã nebã sʋkã, b nams-b lame. B suii bãmb kẽer bãens roogo, n pãb-b ne kalwaas meng la b yeel-b tɩ b ra le gom a Zezi yell ye. (Tʋʋma 4:1-3, 17; 5:17, 18, 40) B ra na n maana wãna? Sã n da yaa yãmba, y ra na n maana wãna? Y ra na n ket n kõta kasetã ne raood bɩ?
2. a) Koe-no-bʋg la b segd n moon rũndã-rũndã? b) Ãnd dãmb n segd n moon koe-noogã?
2 Yʋʋmd 1914, a Zezi Kirist lebga Wẽnnaam Rĩungã Rĩm saasẽ, sẽn na yɩl n dɩ naam ‘a bɛɛbã sʋka.’ (Yɩɩl Sõamyã 110:2) Rẽ poore, b riga a Sʋɩtãan ne a zĩn dãmbã n sik tẽngã zugu. (Wilgri 12:1-5, 7-12) Dũni wẽng kãngã yaoolem dayã sɩnga wakat kãnga. Sasa kãng sã n wa sa, Wẽnnaam na n sãama a Sʋɩtãan siglgã zãnga. (Daniɛll 2:44; Matɩe 24:21) Sẽn na n põs-bã na n paama saagr sẽn yaa vɩɩmd wakat sẽn pa sat tẽng zug sẽn na n lebg arzãna. Yãmb sã n saka koe-no-kãnga, y na n datame n taas-a neb a taaba. (Matɩe 24:14) La nebã manesem bʋg la d segd n bãng tĩiri?
3. a) Nebã manesem yaa wãn to ne Rĩungã koɛɛga? b) Sok-bʋg la d segd n leoke?
3 Yãmb sã n moond Rĩungã koe-noogo, neb kẽer na n sak-a lame, la wʋsg na n maana b toor kae. (Matɩe 24:37-39) Kẽer na n yaala yãmb walla b kɩɩs-yã. A Zezi pĩnd n togsame tɩ kɩɩs-kãng tõe n yii tõnd zakã neb nengẽ. (Luk 21:16-19) Rẽ leb n tõe n zĩnda yãmb tʋʋmã zĩigẽ bɩ lekollẽ wã. Tẽns kẽer pʋsẽ, yaa goosneema wã meng n yiisd noor n gɩdg a Zeova Kaset rãmbã. Sã n wa yaa woto, y na n ket n togsda Wẽnnaam Gomdã ne raood la y “yals kãn-kãe tẽeb pʋgẽ” bɩ?—1 Korẽnt dãmba 16:13.
D ra teeg d mens pãng ye
4. a) Sẽn na yɩl n wilg tɩ d yaa Wẽnnaam sõgen dãmb sẽn yaa sakdba, bõe la b baood tɩ d maan pipi? b) Bõe yĩng tɩ tõnd tigissã tar yõod wʋsgo?
4 F sã n dat n yɩ a Zeova sõgen sẽn yaa sakda yaa f sẽn na n tar bas-yard ne a seglsã. Segl-kãensã a ye yaa tigingã tigissi. Gʋlsg Sõamyã sagenda tõnd tɩ d ra bas tigissã kẽnd ye. (Hebre dãmba 10:23-25) Neb nins sẽn ket n yaa a Zeova Kaset rãmb sẽn yaa sakdbã yaa neb sẽn modgd n kẽnd tigissã wakat fãa n tɩ naag b tẽed-n-taasã. Tigis-kãens sasa, tõnd paamda Gʋlsg Sõamyã bãngr n paasdẽ. D wʋmda sɩd nins d sẽn mi sõma wã võor n paasdẽ, la d bãngd d sẽn na n tũ-b to-to tɩ yɩ sõma n paase. D pẽnegda d saam-biis a taabã sẽn yaa kiris-nebã, n lagemd ne-b Wẽnnaam balengã pʋgẽ, la d paamd pãng n na n maan Wẽnnaam daabã. A Zeova vʋʋsem sõngã kõta sor-wilgr tigingã maasem yĩnga, la ne vʋʋsem sõng kãng maasem, a Zezi bee tõnd sʋka.—Matɩe 18:20; Wilgri 3:6.
5. B sã n wa gɩdg a Zeova Kaset rãmbã tʋʋmde, yaa bõe la b maand tigissã wɛɛngẽ?
5 Yãmb rebda tigissã n pa vaandẽ bɩ? La y tũuda y sẽn wʋm be wã y vɩɩmã pʋgẽ bɩ? Wakat ninga, b sã n gɩdg a Zeova Kaset rãmbã tũudmã, yaa tɩlae tɩ b maan tigissã sul bõoneg pʋsẽ saam-biis yiya. Tigissã zĩis la b wakat tõe n toeemame, n pa zems ne-d wakat fãa ye, tɩ tigiss kẽer maand zĩig sẽn wat n zʋʋg menga. Baa ne rẽ sẽn tõe n wa ne tiisg bɩ yell tõnd mengã zugã, saam-biis la saam-bi-pogs nins sẽn yaa wẽn-sakdbã modgdame n na n wa tigisg fãa.
6. Wãn to la d wilgd tɩ d teega a Zeova, la wãn to la rẽ tõe n sõng tõnd tɩ d ket n gomd ne raoodo?
6 D sã n pʋʋsd Wẽnnaam a Zeova ne d sũy fãa n pa vaandẽ, n miẽ tɩ d rata a sõngre, kɩtdame tɩ d teeg-a. Yãmb maanda woto bɩ? A Zezi pʋʋsa naoor wʋsg a tẽng zug koe-moonegã sasa. (Luk 3:21; 6:12, 13; 22:39-44) La yʋng ning sẽn deng tɩ b ka-a ra-luk zugã, a sagla a karen-biisã woto: “Bɩ yãmb gũ la y pʋʋse n da kẽ makr ye.” (Mark 14:38) Nebã sã n tall yam-kaalg ne Rĩungã koɛɛga, d tõe n wa ratame n boog d koe-moonegã. Nebã sã n yaand tõnd bɩ b namsd tõndo, d tõe n wa ratame n bas moonegã, sẽn na yɩl n da wa bao yɛl n kõ d mens ye. La d sã n pʋʋs Wẽnnaam ne d sũy fãa n kos a vʋʋsem sõngã sẽn na yɩl n tõog n ket n gomd ne raoodo, d pa na n lʋɩ mak-kãensã taoor ye.—Luk 11:13; Efɛɛz rãmba 6:18-20.
Kaset rãmb sẽn tall raood wʋsgo
7. a) Bõe yĩng tɩ kɩbar ning sẽn be Tʋʋma sebrẽ wã tar yõod wʋsg ne tõndo? b) Leok-y sogsg nins b sẽn kõ sul-kãngã baasgẽ wã, n wilg kɩba-kãngã sẽn tõe n naf tõnd to-to vẽenega.
7 Kɩbar ning sẽn be Tʋʋmã sebrẽ wã tara yõod wʋsg ne tõndo. A wilgda tõnd tʋm-tʋmdbã la pipi karen-biisã sẽn yɩ neb wa tõndã sẽn tõog bõn-gɩdgdɩ to-to, la b wilg tɩ b talla raoodo, la tɩ b yɩ a Zeova Kaset rãmb sẽn yaa wẽn-sakdba. Bɩ d vaees kɩba-kãng babg a yembr n tũnug ne sogsg la verse rãmb nins sẽn pʋgdã. D sã n wa maand woto, bɩ yãmb mengã ges y sẽn karemd bũmb ningã sẽn tõe n naf-y to-to.
Tʋm-tʋmdbã ra yaa rap sẽn maan karen-bɛd bɩ? B ra yaa neb sẽn da zoe n tar daood yell buud fãa taoor bɩ? (Zã 18:17, 25-27; 20:19; Tʋʋma 4:13)
Bõe n sõng a Pɩɛɛr t’a gom ne raood Zʋɩf rãmbã bʋ-kaoodb sul-kãseng ning sẽn kao Wẽnnaam mengã Biribl bʋʋd n dogl-a taalã taoore? (Matɩe 10:19, 20; Tʋʋma 4:8)
Yaa bõe la tʋm-tʋmdbã ra maand semen dãmb nins sẽn deng tɩ b tall-b n wa Zʋɩf rãmbã bʋ-kaoodb sul-kãseng taoorã? (Tʋʋma 1:14; 2:1, 42)
Nanambsã sẽn wa n yeel tʋm-tʋmdbã tɩ b ye ra moon a Zezi yʋʋrã, a Pɩɛɛr ne a Zã leokame tɩ bõe? (Tʋʋma 4:19, 20)
B sẽn bas-bã poore, ãnd soab sõngr la tʋm-tʋmdbã leb n kose? B pʋʋsame sẽn na yɩl tɩ namsgã sa bɩ, bɩ b pʋʋs n kosa bõe? (Tʋʋma 4:24-31)
Wãn to la a Zeova kõ sõngre, bɛɛbã sẽn wa n mak n na n gɩdg moonegã tʋʋmdã? (Tʋʋma 5:17-20)
Wãn to la tʋm-tʋmdbã wilg tɩ b wʋma bũmb ning sẽn kɩt tɩ b ra fãag-b bi-bees roogẽ wã võore? (Tʋʋma 5:21, 41, 42)
Baa ne bɛɛbã namsg sẽn da kɩt tɩ karen-biis wʋsg sãeegã, bõe la b kell n maane? (Tʋʋma 8:3, 4; 11:19-21)
8. Pipi karen-biisã koe-mooneg woma bi-sõma bʋs sẽn kõt sũ-noog wʋsgo, la wãn to la tõnd me wa n kẽes d meng koe-mooneg kãng pʋgẽ?
8 Koe-noogã mooneg pa yɩ zaalem ye. Sẽn zems karen-biis 3 000 n deeg lisg yʋʋmd 33 Pãntekotã. “Tẽedba sẽn sak Zusoaba tara paasg hal tɩ lebg neb kʋʋngo, daop ne pagba.” (Tʋʋma 2:41; 4:4; 5:14) Sẽn wa n beẽ-beẽ, a Soll sẽn yit Tarsã sẽn da nams Wẽnnaam nin-buiidã wʋsgã lebga kiris-ned n sɩng kaset kũun sɩdã wɛɛngẽ ne raoodo. B wa n boond-a lame tɩ tʋm-tʋmd a Polle. (Galat dãmba 1:22-24) Tʋʋmd ning sẽn sɩng pipi yʋʋm kob-gĩndẽ wã pa yals ye. Tʋʋm-kãngã paama pãng n paas rũndã-rũndã, la a saag n taa dũniyã tɛk fãa. Tõnd tara zu-noog n na n tʋm tʋʋm-kãnga, la sẽn na yɩl n maan rẽ, d tõe n paama zãmsg ne mak-sõng ning a Zeova Kaset rãmb sẽn yɩ wẽn-sakdb sẽn deng tõndã sẽn basã.
9. a) So-bʋs la a Poll da tũnug ne n kõ kasetã? b) Wãn to la yãmb moond neb a taabã Rĩungã koɛɛga?
9 A Poll sẽn bãng sɩdã sẽn tɩ loe ne a Zezi Kiristã, yaa bõe la a maan-yã? “Tao-tao bala, yẽ moona koɛɛga karen-dot pʋsẽ n yeel t’a Zezi yaa Wẽnnaam Biiga.” (Tʋʋma 9:20) A talla mi-beoog ne sõmblem kãseng ning Wẽnnaam sẽn tall ne-a wã, la a bãngame tɩ neba fãa ra segd n wʋma koe-noogã yẽ sẽn paama. A Poll da yaa Zʋɩf, la wala sẽn zems ne rẽ wẽnd minungã, a kẽnga Zʋɩf rãmbã karen-dotẽ n tɩ kõ kaset Rĩungã wɛɛngẽ. A leb n moona zak-zaka, la a sõs ne nebã raagẽ wã. La a ra sakdame n kẽng zĩ-zẽmsẽ n tɩ moon koe-noogã.—Tʋʋma 17:17; 20:20; Rom dãmba 15:23, 24.
10. a) Wãn to la a Poll wilg t’a ra tara raood la yam, a sã n da kõt kasetã? b) Wãn to la d tõe n dɩk a Poll togs-n-taare, d sã n wa kõt d roagdba, d tʋmd-n-taas la d karen-bi-taas kasetã?
10 A Poll ra tara raood la yam me, tɩ tõnd me segd n maan woto. A tika kãabs nins Wẽnnaam sẽn maan b yaab rãmbã zut n kɩt tɩ koɛɛgã tall yamleoog ne Zʋɩf rãmbã. A sã n da gomd ne Gɛrk rãmbã, a tikda yɛl b sẽn da mi zutu. Wakat ninga, a tũnugda ne yẽ mengã sẽn bãng sɩdã to-to wã n kõ kasetã. A yeelame: “Mam maanda bũmb fãa Koe-nooga yĩnga tɩ mam tõe n paam pʋɩɩr ne [neb a taaba].”—1 Korẽnt dãmba 9:20-23; Tʋʋma 22:3-21.
11. a) Bõe la a Poll ra maand n gind no-koɛɛm wakat fãa ne a kɩɩsdbã? b) Wakat bʋg la d segd n dɩk a Poll togs-n-taar ne yam, la wãn to? d) Yɛ la d paamd pãng n ket n gomd ne raoodo?
11 Bɛɛbã kɩɩsg sã n wa kɩt t’a Poll ra getẽ tɩ sẽn são ya a sẽn na n tɩ moon zĩig a to wakat bilf pʋgẽ, yaa rẽ la a maanda, la a ra pa modgd n na n wẽ no-koɛɛm wakat fãa ne kɩɩsdbã ye. (Tʋʋma 14:5-7; 18:5-7; Rom dãmba 12:18) La a zɩ n zoe yãnd ne koe-noogã ye. (Rom dãmba 1:16) Baa ne a Poll bɛɛbã sẽn paoog-a la b nams-a wʋsgã, ‘Wẽnnaam kõ-a-la raood’ t’a ket n moondẽ. A yeelame: “Zusoaba sõnga maam n kõ maam pãng tɩ m togs Koe-noog [sõma].” (1 Tesalonik rãmba 2:2; 2 Tɩmote 4:17) Kiris-neb tigingã Zusoab a Zezi ket n kõta tõnd pãng ning d sẽn datã, sẽn na yɩl n tʋm tʋʋmd ning a sẽn deng n togs tɩ segd n maana tõnd wakatã.—Mark 13:10.
12. Bõe n wilgd tɩ kiris-nebã tara raoodo, la raood kãng tika bõe zugu?
12 D bee bʋʋm n na n ket n moond Wẽnnaam Gomdã ne raood wa a Zezi la Wẽnnaam sõgen dãmb hakɩk a taab sẽn maan pipi yʋʋm kob-gĩndẽ wã. Woto pa rat n yeel tɩ d gomda yaare, bɩ tɩ d baoodame n na n modg neb nins sẽn pa rat koɛɛgã tɩ b sak-a ye. La pa nebã sẽn na n maand b toor kae-yã yĩng me la d na n koms raood n bas ye. D leb n pa basd me tɩ bɛɛbã kɩɩsg kɩt tɩ d bas mooneg ye. Wala a Zezi, tõnd wilgda nebã tɩ yaa Wẽnnaam Rĩungã bal n yaa goosneema ning sẽn zemsã tẽngã gill zugu. D gomda ne bas-yardo, bala d gomda a Zeova, sẽn yaa yĩngr la tẽng naab sẽn ka to wã yʋʋr yĩnga. Sẽn paase, koɛɛg ning tõnd sẽn moondã yaa Wẽnnaam koɛɛga, pa tõnd dẽnd ye. La yaa nonglem ning tõnd sẽn tar ne a Zeova wã n yaa bõn-kãseng ning sẽn kɩtd tɩ d pẽgd-a wã.—Filip rãmba 1:27, 28; 1 Tesalonik rãmba 2:13.
Lebg-n-gese
• Bõe yĩng tɩ tar yõod tɩ d taas neba fãa Rĩungã koe-noogo, la neba manesem bʋg la d segd n bãng tĩiri?
• Wãn to la d tõe n wilg tɩ d pa teeg d mens pãng n na n maan a Zeova raabã?
• Zãms-bʋs sẽn tar yõod wʋsg la Tʋʋma sebr kõt tõndo?
[Foto, seb-neng 173]
Pĩnd wẽndẽ wã la rũndã-rũndã, a Zeova sõgen dãmbã moonda Wẽnnaam gomdã ne raoodo