D sõng d kɛlgdbã tɩ b tagse
1. D sã n dat tɩ d koe-moonegã wom biisi, wãn to la d segd n maane?
1 D sã n dat tɩ d koe-moonegã wom biisi, wãn to la d segd n maane? Yaa d sẽn na n togsd nebã Biiblã sẽn yetã bal bɩ, bɩ yaa d sẽn na n sõng d kɛlgdbã tɩ b tags n bãng sẽn yaa sɩda, la b sẽn segd n maanegã bɩ? Tʋm-tʋmd a Poll sẽn wa n sõsd ne zʋɩf rãmb nins sẽn da be Tesalonikã, a sõng-b lame tɩ b tagse. A sẽn maan woto wã, “bãmb neb kẽer deegame,” n sak n lebg tẽedba. (Tʋʋ. 17:2-4) La d maanda wãn n tõog n sõng nebã tɩ b tagse?
2. Koe-noogã mooneg sasa, wãn to la d tõe n dɩk a Poll togs-n-taare?
2 D tik b sẽn mi bũmb ninsã la b tagsa wã zugu: D koe-moonegã zĩisẽ, d sã n dat n sõng nebã tɩ b tagse, yaa tɩlae tɩ d tik d sõsgã bũmb b sẽn mi zugu. A Poll sẽn wa n yik Areopaazẽ wã n na n sõs ne gɛrk neb sẽn da pʋʋsd bõn-naandsã, a sɩnga a sõsgã ne bũmb b sẽn mi, la b sẽn da sak n deege. (Tʋʋ. 17:22-31) Yãmb me sã n segend y mens n na n tɩ sõs ne nebã y moonegã zĩigẽ, bɩ y tags b wʋsg sẽn tẽed bũmb ninsã, la tags-kɛg nins b sẽn tarã yelle. (1 Kor. 9:19-22) Y kɛlgdã sã n yeel bũmb sẽn na yɩl n kɩɩs-yã, bɩ y bao bũmb yãmb ne yẽ fãa sẽn tẽeda, n sõs rẽ zugu.
3. D sã n nong n sokd sogsg ne yam, wãn to la tõe n sõng nebã tɩ b tagse?
3 Sokd-y-b sogsg ne yam: D sã n dat n sõng ned t’a bãng a sore, yaa tɩlae tɩ d deng n bãng a sẽn be zĩig ningã. Dẽnd d sã n dat n sõng ned t’a tags n bãng sẽn yaa sɩda, la a sẽn segd n maanega, yaa tɩlae tɩ d deng n bãng bũmb ning sẽn zoe n be a yamẽ wã. A Zezi ra nong n sokda nebã sogsg sẽn na yɩl n bãng sẽn be b yamẽ wã n tõog n sõng-b tɩ b tagse. Wala makre, ned a ye sẽn wa n sok-a tɩ bõe la a segd n maan n paam vɩɩm sẽn ka sɛtã, a baoome n bãng a tagsg n yaool n na n leok-a. (Luk 10:25-28) Daar a to me, b soka a Pɩɛɛr sokre, t’a leok tɩ pa zems ye. La a Zezi lebs n sok-a-la sogsg ne yam sẽn na yɩl n dems a tagsgã. (Mat. 17:24-26) Woto yĩnga, ned sã n sok sokr bɩ a yeel bũmb tɩ pa zemse, tõnd me tõe n sok-a-la sogsg ne yam, n sõng-a t’a tagse.
4. Bõe yĩng tɩ d segd n sõngd d kɛlgdbã tɩ b tagsdẽ?
4 D sã n sõngd d kɛlgdbã tɩ b tagsdẽ, d rɩkda d karen-saamb kãseng a Zezi togs-n-taare, la d rɩkd pipi kiris-neb nins sẽn tall minim koe-moonegã pʋgẽ wã togs-n-taare. Wilgdame me tɩ d waoogda d kɛlgdã. (1 Pɩɛ. 3:15) Woto tõe n kɩtame t’a sak tɩ d lebg n wa sõs ne-a nindaare.