D paas d koe-moonegã minim: D sẽn tõe n leok ned sẽn dat n kʋʋg d sõsg to-to

Saglgã yõodo: Mams-y wa yãmb sẽn na n miẽ tɩ yel-beed n wate, tɩ yɩl tɩ nebã põse, rẽnda b zoe. Woto wã, yãmb kẽngame n na n tɩ togs y yaka, t’a leok t’a pa tar sẽk n na n kelg ye. Rẽ yĩnga y na sĩnd n loog sɩda? Yaa vẽeneg tɩ y pa na n maan woto ye. Koe-moonegã zĩigẽ me, wʋsg mi n pa rat n kelg tõndo, n pa miẽ tɩ koɛɛgã d sẽn taasd-bã tõe n fãag-b lame ye. Tõe tɩ d ta n mikame tɩ b sɩd pa tar sẽk ye. (Mat. 24:37-39) Wall tõe tɩ b togs-b-la yɛl sẽn pa sɩd tõnd zugu. (Mat. 11:18, 19) B tõe n tagsdame tɩ tõnd tũudmã ne tũudum nins sẽn tʋmd tʋʋm-wẽnsã yaa a ye. (2 Pɩɛ. 2:1, 2) La a sã n tõdg t’a kõn kelge, d pa segd n yãg n loog ye.

Ad d sẽn tõe n maane:

• Nand tɩ y yi n moon koɛɛgã zak-zaka, bɩ y rɩk sẽk bilf n tẽeg neb kẽer sẽn mi n leokd tõnd to-to n dat n kʋʋg sõsgã, n bao n bãng y sẽn tõe n leok-ba.

• Y kɛlgdã sã n dat n kʋʋg sõsgã, bɩ y bao n bãng y sẽn tõe n maan to-to n paam n sõs ne-a. Wala makre, y tõe n pẽg-a lame. Woto tõe n kɩtame t’a tʋlg n sõse. Makre, a sã n yeel t’a zoe n tara a sore, y tõe n leok-a woto: “Yaa neb wa yãmb sẽn nong tũudmã la tõnd sõsd ne.” La sasa ning me, y sã n bãng kɛlgdã tagsg wall a yɛlã sẽn yaa to-to, y tõogd n kõ-a-la kasetã. Wala makre, a sã n yeel t’a pa tar sẽka, y tõe n leoka woto: “M sɩd neeme tɩ sẽkã kae ye. La nand tɩ m looge, m nongẽ lame n kõ-y seb-kãngã.” A sã n leokame t’a pa rat n kelge, y tõe n sok-a-la woto: “Yaa Biiblã goam la yãmb pa rat n kelg bɩ, bɩ yaa tũudum buudã fãa yell n pa pak yãmba?”

• D tʋm ne yam. D ra yĩm t’a Zeova pa modgd nebã tɩ b kelg koɛɛgã ye. (Tõo. 30:19) A Zeova taoore, ned kam fãa na n tʋka a meng zɩɩbo. (Gal. 6:5) Woto yĩnga, kɛlgdã sã n tõdg fasɩ t’a pa na n kelge, sẽn são yaa d looge. Rẽ na n wilgame tɩ d waoog-a lame, tɩ tõe n yɩ sabab tɩ d tẽed-n-taas sã n pɩʋʋg nindaare, bɩ a sak n kelge.—1 Pɩɛ. 3:15.

Mak-y woto ki-kãngã:

• Ned sã n kʋʋg y goam tɩ y looge, bɩ y sõs ne y tũud-n-taagã n bãng y sẽn da tõe n leok to-to tɩ yɩ sõma.