D paas d koe-moonegã minim: D bãng n leok kɛlgd sũur sẽn yiki

Saglgã yõodo: Neb wʋsg tõnd sẽn segd koe-moonegã sasa waoogd-d lame. La baasgo, a Zezi ra yeelame tɩ sãnda na n kisga tõndo. (Zã 17:14) Woto yĩnga, d kɛlgd sũur sã n yik ne-do, pa segd n ling-d ye. D segd n modgame tɩ d sẽn na n leok to-to wã ta sẽn tʋm-a tõndã yam, rat n yeel t’a Zeova. (Rom 12:17-21; 1 Pɩɛ. 3:15) Woto tõe n kɩtame tɩ yellã ra zãag zĩig ye. Sẽn paase, tõe n kɩtame tɩ kɛlgdã, la neb nins fãa sẽn yã wã tʋlg n kelg a Zeova Kaset rãmbã nindaare.—2 Kor. 6:3.

Ad d sẽn tõe n maan dẽ to-to:

Da leok-y-yã a no-baoodmã ye. Kell-y n zã-y y meng sõma. Rẽ tõe n kɩtame t’a bʋke. Ra tags-y tɩ yaa yãmb yĩng la a sũurã sẽn yikã ye. (Koɛ. 7:9) Tõe n yaa zu-loɛɛg ning n namsd-a, wall y waoongã n pa seg wakat-sõngo. La baa sã n yaa koɛɛgã d sẽn taasdã n yik a sũuri, tõe n yaa a sẽn pa wʋm tɩ sek yĩnga.—2 Kor. 4:4.
Leok-y ne gom-noodo. (Yel. 15:1) Rẽ yĩnga, a ra gõeeme tɩ y nek-a bɩ? Y tiis-a-la a tʋʋm zug bɩ? Yaa sɩd tɩ d pa kot ned sugr d sẽn moond koɛɛgã yĩng ye. La d tõe n kosa sugri, d waoongã sã n pa seg wakat-sõngo. Sã n yaa a soabã sẽn wʋm goam sẽn pa sɩd tõnd zug n yik a sũuri, y tõe n yeel-a-la woto: “Mam wʋmda y sũur sẽn pa noomã võore. La wõnda y sẽn wʋm bũmb ningã pa sɩd ye. Y sã n data, m tõe n vẽneg-y lame.” La sã n yaa d sẽn yiisd neb kẽer tigingã pʋgẽ, pa rẽ bɩ d sẽn pa reegd zɩɩmã võor la a pa wʋmde, y tõe n yeel-a-la woto: “Tõnd pa ningd-y taal ye. Wʋsg sɩd pa wʋmd d sẽn maand woto wã võor ye. La m tõe n bõos n wilg-y-la Biiblã zĩig ning rẽ sẽn tikã bɩ?”
Kɛlgdã sũur sã n yika wʋsgo, yɩta sõma tɩ y loog la y ra leok-a ye. A sã n yeel t’a pa le rat n yã a Zeova Kaset soab a zakẽ, bɩ y yeel-a tɩ d sakame.

Mak-y woto ki-kãngã:

Y zak pʋgẽ Biiblã zãmsgã sasa, mak-y y sẽn na n leok ned sũur sẽn yik to-to.
Koe-moonegã sasa, y kɛlgd sũur sã n yik tɩ y loog n bas-a, bɩ y sok y tũud-n-taagã n ges y sẽn da tõe n leok-a to-to tɩ zemse.